1. Nrinttini muulupale Yehova waavahalyaawe manyari?

YEHOVA ahowumpa anamathelana oopacera wiira waacivele waayara asaana. Phimaana, Ibiiblya ineera: “Asaana akhanle yoohiyeriya invahaawe Yehova.” (Isaa. 127:3) Iyo maanaaya wiira cani? Wuupuwele wiira mpatthannya nawuulepela wiira unsunkere nsurukhu mwinci? Weeva waahala ukhala cani? Atthunaka waanaahala wuutteela nrima nlattu woocuwela wiira mpatthannya nawuukhuluvela. Masi ciicammo atthunaka waanaahala ukhala niiwasiwaasi wuupuwelaka mananna oohala usunka ratta nsurukhu wotheene uvahiyaa. Mpatthaniihu muulupale, Yehova, nawaavaha manyari itthu yofayita cinene uvikana uyo nsurukhuuyo. Uyo nawaavaha nrintti muulupale wowaawacera asaanaaya wiira akhale ratta ni ootteeliya.

2. Makohoni anhaleehu woopela mwaha?

² Tipani nlamuliya ulakela wakhala wiira anamathelana ahaana yaayaraka asaana awula mena? Manannani manyari cinlamuliyaaya waakavihera asaanaaya ukhala ootteeliya? Ninaahala woona mattharelelo o mbiiblyani anhala waakavihera anamathelana makristau ulakela citthu comaana.

3. a) Tipani nlamuliya ulakela wakhala wiira anamathelana ahaana yaayaraka asaana awula mena? b) Ntthareleloni no mbiiblyani ninlamuliyaaya wuupuwela apatthannyaaya ni amucyaaya anamathelana?

³ Mapuro makiina, atthu anweherera wiira ale athelanne phiyaaru yaayare asaana woohipica. Ni anamathelana enci anaakhanyererihiya naamucyaaya awula naatthu akiina wiira yaayare asaana. Munna mmoca o Ásia, neehaniya Jethro, heera: “Wanlokoni, ale yaayanre asaana anawaakhanyereriha anamathelana ahirina asaana wiira ayare.” Munna nkiina o Ásia, neehaniya  Jeffrey, heera: “Akiina anaawiirela anamathelana ahirina asaana wiira ayo khanhala ukhalana ntthu owaawacera yooluvalaka.” Masi anamathelana ahaana yalakelaka iyo itthwiiyo. Ni ikhanle itthu inlamuliyaaya ulakela veekha caya; uyo ukhanle nrinttyaaya. (Akalas. 6:5, niwehero.) Apatthani ni amuci ahaana isariya yoopheela wiira ale athelanne phiyaaru atteeliye. Masi atthu otheene ahaana yoopuwelaka wiira waayara asaana awula mena, ikhanle itthu inlamuliyaaya ulakela anamathelana.—1 Atesal. 4:11.

4-5. Citthuni piili cuulupale anamathelana cinlamuliyaaya woopela mwaha, ni ukatini unreera uleehana uyo mwahooyo? Utaphulele.

⁴ Ukati woolakela waayara asaana awula mena, ooyeeli ahaana yuupuwelaka citthu piili cuulupale: Yoopacera, ayo ampheela waayara asaana yaakhani? Yonayeeli, ayo ampheela waayara asaana akavi? Ukatini unreera woopela mwaha iyo? Ni kontha isiyani unaareera wuupuwela nnya citthunnya?

⁵ Ikwaha cinci, anamathelana yaalamuliya usikisana ahinaaya uthelanaca, wakhala wiira anaahala waayara asaana awula mena. Nlattuni? Kontha unaareera cinene ooyeeli wuupuwela itthu imocaaru nhina uyo mwahooyo. Nlopwana ni nthiyana athelanne ahaana ciicammo yoopuwelaka wakhala wiira aheetthenkaca wiira ayare awula mena. Akhwaawe anlakela uyara waviraka mwaakha mmoca awula miili anathelanne kontha waawacera asaana umpheela ukati ni ikuru. Ayo anaaweherera vakaani kontha ampheela ukhalana ukati wowiilemaleliha makhalelo aanamathelana. Upanka commo, unawaakavihera ulemalelana ahinaaya waayara asaana.—Efesu 5:33.

6. Yuupuwelaka mahuku ankhaleehu, isiyani anamathelana akhwaawe inlakelaaya upanka?

⁶ Anamathelana akhwaawe anlakela waatakiha asaana araru a Nowee naasaaraya. Ayo khayaakuvale waayara asaana ukati waathelannyaaya. (Upha. 6:18; 9:18, 19; 10:1; 2 Pet. 2:5) Yesu holattaniha mahuku ankhaleehu ilelo ni “mahuku a Nowee,” ni khweeli unawoonannya wiira ninkhala “mahuku oosuphyaaca, oorikarika uvilela.” (Mat. 24:37; 2 Tim. 3:1) Nlattu wo iyo, anamathelana akhwaawe anaalakela uhaakuva waayara asaana wiira yiikurumice uvara cinene nteko wa Yehova.

7. Manannani mattharelelo amphwanyannya nhina Luka 14:28, 29 ni Miruku 21:5 cinhalaaya waakavihera anamathelana?

⁷ Ukati woolakela wakhala wiira anaahala waayara asaana ni ukati woolakela asaana akavi ampheelaaya waayara, anamathelana oocuwelaca ‘anaawehera ihisapu yoohala uliva.’  (Usome Luka 14:28, 29.) Manyari oocuwelaca anaacuwela wiira uwuunuwiha asaana ikhanle itthu impheela nsurukhu, masi ciicammo ukati ni ikuru. Phimaana, ikhanle itthu yofayita manyari wiikoha co: ‘Niireke ooyeeli cihu nihaana nivaraka nteko wiira nikhitiri ulihera itthokweehu? Niireke nihosikisana citthuni khweeliini cimpheeleehu wiira nilihere itthokweehu? Wakhalaka wiira ooyeeli cihu ninaahala uvara nteko, tipani nhala waawacera asaaneehu? Ntthu nhala waawacera, nhala urukunusa manannani moopuwelelo ni meettelo aasaaneehu?’ Anamathelana anoopela mwaha nnyo citthunnyo anthoonyera wiira anaweettela ikano inhimyaaya Miruku 21:5.—Usome.

8. Marikarikoni anamathelana makristau anlamuliyaaya uweherera, ni isiyani ntheli oofenta inlamuliyaawe upanka?

⁸ Mwaana naapheela ni unamphwanela wiira athumwaane ni anumwaane avirihe ukati nuuyova ni wiira aleve ikuru caya yanwaceraka. Phimaana, anamathelana yaattharanihaka asaana, awula yaayarelaka ahinaaya wuunuwa, pooti waarika unwacera ratta khula mwaana. Anamathelana akhwaawe apankale iyo, aneera wiira ayo khanoona yoohimya ni yoopanka. Nnyari nthiyana pooti ukhala owoocya cinene. Ni nlattu wowoocya, uyo pooti uhikhitiri usoma, ulompa ni urwaa wuulalyeerani. Itthu ikhwaawe inhala unrika nnyari ukhanle uviriyana ratta ni uphwanyera ifayita mikutthaano. Unawoonannya wiira ntheli oofenta naahala wiikurumica wiira aakavihere amwaarawe waawacera asaana, akhalaka umikutthaanoni ni uwaani. Wootakihera, uyo pooti waakavihera amwaarawe uvara miteko co wapuwani. Uyo khanhala uhiya uhoolela Uswali Waamuci, aakaviheraka atthu otheene uphwanyera ifayita. Ni khanhala uhiya urwaa wuulalyeerani naamucyaawe.

9-10. Isiyani manyari inlamuliyaaya upanka wiira yaakavihere asaanaaya?

⁹ Isiyani manyari inlamuliyaaya upanka wiira yaakavihere asaanaaya wiitthuca unfenta Yehova? Anlamuliya waakhikicera cani wiira anyeme citthu cowoopiha co ntuninyani yoohinamaana inkhaleehu? Moone citthu manyari cinlamuliyaaya upanka.

¹⁰ Mmuulumane Yehova mwanlepelaka wiira ookavihereni. Muupuwele ntakihero na Manowaa ni amwaarawe, yannyanre Sansau. Ukati Manowaa waacuwenlyaawe wiira aanaahala unnyara mwaana, ahonlepela Yehova wiira ankavihere ucuwela mananna oohala umuunuwiha uyo mwaanooyo.

11. Inannani manyari anlamuliyaaya utakiha ipankalyaawe Manowaa, ihimiye nlivuruni yo Masuwiisi 13:8?

¹¹ Munna Nihad ni amwaarawe, aneehaniya Alma, ankhala u Bósnia-Herzegovina, aheetthuca ni ntakihero na Manowaa. Ayo aneera:  “Nahopanka itthu yaapankalyaawe Manowaa, nahonlepela Yehova wiira aniitthucihe ukhala manyari omaana. Ni Yehova ahaakhula mavekelweehu ni mananna oovirikana—avarelaka nteko Ibiiblya, ilivuru cihu, mikutthaano ni ikonkreesu.”—Usome Masuwiisi 13:8.

12. Ntakiheroni Yusufu ni Mariya naavahalyaaya asaanaaya?

¹² Nwiitthucihe ni nthoonyero. Citthu cimpankeenyu pooti urukunusa cinene meettelo a mwaninyu uvikana citthu cinoolumeenyu. Khweeliini, Yusufu ni Mariya yahaavaha ntakihero nomaana asaanaaya otheene, ni hataa ciicammo Yesu. Yusufu aanawiikurumica uvara nteko wiira aalihere amucyaawe. Ciicammo, aanawaasovenriha asaanaawe wiira waacivele unswalela Yehova. (Deut. 4:9, 10) Nlamulo na Moocesi khanaakhanyereriha alopwana wiira yaacise amucyaaya usukuhuuluni yo Paasikuwa u Yerusalemu “khula mwaakha,” masi Yusufu aanawaacisa. (Luka 2:41, 42) Ukati wa Yusufu, manyari akhwaawe atthunaka waanaarika waacisa asaanaaya u Yerusalemu nlattu wowooniha wiira yaanaahala urihakaca nsurukhu, urika waakhikicera asaana ni urihakaca ukati mwinci. Masi Yusufu aanaavaha ifayita cinene miteko coominepani ni ahowiitthuciha asaanaawe ciicammo uvaha ifayita. Mariya ciicammo ahaavaha ntakihero nomaana asaanaawe. Uyo aanaacuwela sana-saana Cowantikhiya Cowaarya. Ni citthu coolumaawe ni caapankaawe, Mariya ahowiitthuciha asaanaawe ufenta Nuulumo na Nluku.

13. Inannani anamathelana yaatthanryaaya ntakihero na Yusufu ni Mariya?

¹³ Nihad ni Alma, aromoliye wiipaceroni, yaapheela utthara ntakihero na Yusufu ni Mariya. Upanka iyo wahaakavihera uwuunuwiha asaanaaya wiira anfente ni answalele Yehova. Inannani? Ayo anaattonkaca: “Ni meettelweehu, hiiva ninaamananiha unthoonyera mwanihu inanna cinreeraaya weettela mattharelelo a Yehova.” Nihad ciicammo heera: “Nkhalane meettelo ampheeleenyu wiira mwaninyu akhalane.”

14. Kontha isiyani manyari ahaana waacuwela atthu anaathukanaaya asaanaaya?

¹⁴ Mwaakavihere asaaniinyu waathanla apatthani omaana. Mayapaapa ni mayamaama ahaana yaacuwelaka atthuni asaanaaya anaathukanaaya ni citthu cimpankaaya. Iyo maanaaya wiira ahaana yaacuwelaka atthu asaanaaya anwuulumanaaya mwinternetini awula ntelefooneni waya. Ayo atthwaayo, pooti urukunusa cinene moopuwelelo ni meettelo aasaana.—1 Akor. 15:33.

15. Isiyani manyari ineetthucaaya ni ntakihero na Jessie?

¹⁵ Isiyani manyari inlamuliyaaya upanka wakhalaka wiira khancuwela cinene uvarela nteko ikomputatoori ni telefooni? Nnyari mmoca o Filipinas neehaniya Jessie, heera: “Hiiva khanaacuwela cinene uvarela nteko ikomputatoori awula telefooni. Masi khanaahiile waahimyera asaaniihu mananna cinoopihaaya nnyo citthunnyo cavareliyaka nteko pusya.” Jessie khaakhottihale asaanaawe unkhalana telefooni awula itablet nlattu uyova woohicuweleeha uvarela nteko. Uyo naattonkaca: “Mi kahaasovenriha asaanaaka uvarela nteko ikaruma caya wiira yiitthuce iluuka ikhwaawe, wiira atthenkace mikutthaano ni asome Ibiiblya khula nihuku.” Nsayitini jw.org^® (yeekunya), mphantte wantikhiye “Adolescentes,” cihaavo ikano nhina mananna ooveleeliha mensagem ni ilatarato mwinternetini. Mwakhala wiira nyuuva nhaana asaana, nhosoma ni nhoopela mwaha nnyo ikanonnyo naasaaniinyu? Nhoona wamoca naasaaniinyu ividiyu Sê Cuidadoso ao Usares Redes Sociais ni ividiyu Quem Está no Controlo – Tu  ou os Teus Dispositivos? * Nnyo myahannyo pooti wuukaviherani uwiitthuciha asaaniinyu unvarela nteko ratta telefooni awula itablet.—Miru. 13:20.

16. Isiyani manyari enci impankaaya, ni isiyani inkhumelela nlattu wo iyo?

¹⁶ Manyari enci anawiikurumica waatthenkacera asaanaaya ukati woohala waaphwanya apatthani omaana. Wootakihera, Endêni ni Bomine, anamathelana o Costa do Marfim, imaara cinci yaananlattulaka mootoli osirikwiitu wiira alukame wapuwani waya. Endêni naahimya: “Iyo ihonkavihera cinene mwanihu. Uyo ahancera uvara nteko weepiyoneeru ni nna va nawootola maloko mootoli osirikwiitu aahikhaleke.” Niireke nyuuva ciicammo pooti untthenkacera mwaninyu ukati wowaapanka apatthani omaana?

17-18. Ukatini manyari anlamuliyaaya wancera uwiitthuciha asaanaaya?

¹⁷ Mwancere uwiitthuciha asaana ahinaaya wuunuwa. Manyari yanceraka waasomiha asaana ahinaaya wuunuwa, unaareera cinene. (Miru. 22:6) Mmuupuwele Timotiyu. Ukati woonuwalyaawe, uyo aheetta mapuro menci nkhayi ni apostolu Paulu. Anumwaane Timotiyu, Eunise, ni apiipyaawe, Loide, yahomwiitthuciha ‘ikhumelo inamwannyaawe.’—2 Tim. 1:5; 3:15.

¹⁸ Anamathelana akhwaawe o Costa do Marfim, Jean-Claude ni Peace, ahokhitiri uwiitthuciha unfenta ni unswalela Yehova asaanaaya siita. Isiyani yaakavihenre wiira akhitiri upanka iyo? Ayo yahotthara ntakihero na Eunise ni Loide. Ayo aheera: “Hiiva nahaaleehera Nuulumo na Nluku asaaniihu ikhumelelo inamwannyaaya. Nancenre uwiitthuciha ukhuma ukati waayanreehu.”—Deut. 6:6, 7.

19. Waaleehera asaaniinyu Nuulumo na Nluku maanaaya isiyani?

¹⁹ ‘Waaleehera’ asaana maanaaya isiyani? Nuulumo noluuka iheperewu nitaphuleliye ‘waaleehera,’ maanaaya wiira “uturuwela wiitthuciha ikwaha cinci.” Wiira apanke iyo, manyari ahaana uhihiya uviriha ukati anari naasaanaaya. Ukati nkiina, uturuwela uwiitthuciha asaana itthu imocaaru unaanyoonya. Masi  manyari anlamuliya wiikurumica uwehera wiira uyo ukhanle ukati woohala waakavihera asaanaaya wiiweeha ni weettela Nuulumo na Nluku.

20. Utaphulele inanna manyari anlamuliyaaya utthara Isaalimu 127:4 ukati woowuunuwiha asaana.

²⁰ Mwaacuwele ratta asaaniinyu. Isaalimu 127 inawaalattaniha asaana ni masoka. (Usome Isaalimu 127:4.) Masoka ampankiya niikaruma coovirikanaca ni anaavirikana iyuunuwelo. Inanna imoca, asaana ciicammo anaavirikana. Phimaana, manyari ahaana yalakelaka inannani cinhalaaya uwiitthuciha asaanaaya. Anamathelana ankhala ilapo yo Israel akhitinri uwuunuwiha ratta asaana eeli wiira answalele Yehova, anaattonka itthu yaakavihenre: “Hiiva naanansomiha Ibiiblya khula mwaana veekha cawe.” Masi khula amuci ahaana yawehaceraka wakhala wiira ahaana yaasomihaka asaanaaya iyo inanneeyo, ni wakhala wiira anaahala ukhitiri.

21. Yehova naakavihera cani manyari?

²¹ Ukati nkiina, manyari pooti woona waarika cinene uwiitthuciha asaanaaya. Masi asaana ankhala itthuvo ya Yehova; manyari anlamuliya ukhuluvela wiira uyo naahala waakavihera. Yehova naaviriyana mavekelwaaya manyari. Uyo nawaakhula ayo mavekelwaayo avarelaka nteko Ibiiblya, ilivuru cihu, matakihero ni ikano co manyari akhwaawe ookhomaala wanlokoni.

22. Citthuni comaana manyari cinlamuliyaaya waavaha asaanaaya?

²² Ahaavo atthu aneera wiira nteko wa nannyari ummala asaana yapiihaka myaakha 20. Masi khweeliini, nnyari khanhiya ukhala nnyari. Ni citthu cofayita manyari cinlamuliyaaya waavaha asaanaaya cikhanle: nifento, ukati ni uwiitthuciha wiira answalele Yehova. Khula mwaana nhala uwehera ni inannaawe citthu ciitthucihiyaawe. Nrokorihu mmoca o Ásia, neehaniya Joanna Mae, neera: “Koopuwelaka mananna asithumwanaka cikiitthucihalyaaya, kinawaasukhuru cinene nlattu wookilaka ni wookiitthuciha unfeta Yehova. Ayo khakivahale ukumi paahi, masi ukumi ukivahalyaaya ukhanle womaana.” (Miru. 23:24, 25) Makristau enci yuunuwihiye naasithumwanaya anonfenta Yehova, anawiicoona commo.