Ibiiblya inawoonihera sana-saana wiira Yehova naakhitiri ucuwela citthu cinhala wiirannya wahoolo. (Isai. 45:21) Masi iyo khinhimya manannani ni ukatini Yehova nolakelaawe ucuwela citthu cinhala wiirannya wahoolo. Phimaana, khanincuweleeha sana-saana mananna Yehova cinwaawe acuwelaka citthu coohoolo. Masi cihaavo citthu cinlamuliyeehu ukhuluvela.

Yehova naakhitiri upanka citthu cotheene, masi ukati nkiina uyo naalakela uhipanka citthu cikiina. Nlattu wookhalana ucuwelaca uhimmalela, Yehova naakhitiri woona khula itthu inhala wiirannya wahoolo. (Aroo. 11:33) Masi Yehova pooti ulakela uhoona citthu cinhala wiirannya wahoolo, kontha uyo naakhitiri wiivaraca sana-saana.—Nwehe ciicammo Isaiya 42:14.

Yehova khanooceela upanka itthu impheelaawe. Iyo itthwiiyo phimmwiiriha Yehova ulakela woona citthu cinhala wiirannya wahoolo. Manannani? Isaiya 46:10 ineera: “Ikhumelo wiipaceroni, mi kinnohimya citthu cinhala wiirannya wahoolo ni ukhuma nenne nokhalayi, kinnohimya citthu cihinaaya upankiya. Mi kineera co: ‘Ilakenlyaaka inaahala wiirannya ni kinaahala upanka yotheene yookicivela.’ ‘Ilakenlyaaka inaahala wiirannya ni kinaahala upanka yotheene yookicivela.’”

Yehova naakhitiri ucuwela citthu cinhala wiirannya wahoolo kontha uyo haana ikuru yoopankiha wiirannya citthu cimpheelaawe. Yehova khanoona citthu cinhala wiirannya wahoolo toko ntthu nocisa ilivuru inhimya citthu ciirannyeele ni nosoma wiira acuwele isiyani yiirannyeele wiimaleloni.Masi Yehova mwaneene pooti ulakela wiira citthunnyo ciirannye ukati uyova umpheelaawe. Ni uyo naapanka yotheene inkhitiryaawe wiira itthwiiyo yiirannye uyo ukatyuuyo.—Nkw. 9:5, 6; Mat. 24:36; Mite. 17:31.

Phimaana, mbiiblyani ahaavo moolumo toko “kihotthenkaca,” “kihopanka,” ni “kiholakela” waaciyaka ukati Yehova waahimilyaawe citthu caahala wiirannya wahoolo. (2 Mam. 19:25; niwehero; Isai. 46:11) Ayo moolumwaayo ankhumelela nhina nuulumo noluuka yoopacera yantikhiyaaya Ibiiblya. Nno nuulumonno nimmwaaca ‘ntthu noovarela nteko uloko’ wiira apanke khula itthu impheelaawe. (Jer. 18:4) Toko uyo ntthuuyo cincisaawe uloko akhalihaka mwaapu wooreera, Yehova pooti urukunusaca citthu wiira yiirannye ile impheelaawe.—Efesu 1:11.

Yehova nanhiya khula ntthu uthanla itthu impheelaawe upanka. Yehova khammwantikhelela ntthu citthu cinhala umwiirannyeela. Ni uyo khanwiiriha atthu omaana upanka itthu yaahala waapanka pusya awula waawaanela ihasara. Uyo nanhiya khula ntthu uthanla meettelo ampheelaawe ukhalana ni mpaka uyo naakhanyerera waalepela atthu otheene wiira athanle iphiro yomaana.

Muupuwele itthu yaawiirannyenle atthu yaakhala isittatti yo Niinive. Yehova ahohimya wiira iyo isittattiiyo yanhala umalamalihiya nlattu wo citthu coohinamaana atthwaayo caapankaaya. Masi ukati ayo atthwaayo woonihenryaaya uttharuwa, Yehova ‘aholakela uhaawaanela ihasara yenryaawe wiira anhala waawaanela ni khaamalamalihile.’ (Jonas 3:1-10) Yehova ahorukunusa itthu yaalakenlyaawe upanka kontha atthu o Niinive yahothanla urukunusa nrimaaya ni yaheewelela itthu yaalalyaawe Jonas. Ayo yahottharuwa ni khayaamalamalihiye.

Ntakihero nikhwaawe nikhanle na mwene eehaniya Siiru, aataphunle ayuuta yaarwaaniye u Babilooniya ni aahiile yarwaaka uteka itempulu ya Yehova. (Isai. 44:26–45:4) Mwene Siiru, o Pérsia, aheerannyeeha iyo inatiriiyo. (Estra 1:1-4) Yehova ahomwiiriha Siiru wiirannyeeha iyo inatiriiyo, masi woohinkhanyereriha wiira answalele. Weerannyeele commo kontha Yehova ahonhiya Siiru uthanla itthu yaahalaawe upanka ni uthanla tipani aahalaawe unswalela.—Miru. 21:1.

Khweeliini, citthu cinci cimwiiriha Yehova ulakela woona awula uhoona citthu cinhala wiirannya wahoolo. Ni uhimya ikhweeli, khaavo pinaatamu nocuweleeha iphiro ca Yehova awula mananna uyova cinoopuwelaawe ni citthu cimpankaawe. (Isai. 55:8, 9) Masi citthu cotheene Yehova cinoonihenryaawe cinaalipihaca waamini wihu wiira khula ukati uyo naapanka citthu comaana, hataa ukati unhimyaawe citthu cinhala wiirannya wahoolo.