MWAHA WOOSOMIYA 7
NCIPO 51 Nihiivahererya wa Yehova!
Ninwiitthucera isiyani ale yaari manazireu khalayi?
“Uyo nohala ukhala ntthu owaarya uhoolo wa Yehova mahuku otheene anhalaawe ukhala nazireu.”—MANU. 6:8.
ITTHU INHALEEHU WIITTHUCA
Mananna makhalelo aale yaari manazireu cinniitthucihaaya ulipa nrima ni wiikurumica uleva citthu cikhwaawe wiira ninswalele Yehova.
1. Isiyani aswali a Yehova okhalayi yaapankilyaaya?
NYUUVA nnawoona ukhalana ifayita upatthaniinyu ni Yehova? Khweeliini, nnawoona ukhalana ifayita! Ni kahi thi nyuuva paahi nnoona ukhalana ifayita upatthaniinyu ni Yehova. Ukhuma nenne nokhalayi, atthu enci yaheecoona toko nyuuva cineecooneenyu. (Isaa. 104:33, 34) Atthu enci cihaavo citthu caalevaaya wiira answalele Yehova. Ni iyo phi itthu yaapankaaya manazireu ilapo yo Isarayeli khalayi. Manazireu yaari phaapani ni isiyani inlamuliyeehu uwiitthucera?
2. a) Manazireu yaari phaapani? (Manummeru 6:1, 2) b) Kontha isiyani asarayeli akhwaawe waalakenlyaaya ukhala manazireu?
2 Nuulumo “narizeu” niiluuka iheperewu naataphulela wiira “oothanliya” awula “oovahereriya.” Manazireu yaari asarayeli owiikurumica ni yaamini uleva citthu cikiina wiira answalele Yehova. Nlamulo na Moceesi naanawaatthunihera alopwana awula athiyana uthanla ukhala nazireu nhina mahuku yaahalaaya ulakela. a (Nsome Manummeru 6:1, 2. b) Ukati nsarayeli waalakelaawe ukhala nazireu, uyo ahaana attharaka malakihero asarayeli akhwaawe yahaattharaaya. Masi nlattuni nsarayeli waathanlaawe ukhala nazireu? Atthunaka nlattu wonfenta Yehova ni nlattu woosukhuru iparakha cawe.—Deut. 6:5; 16:17.
3. Manannani apoovu a Nluku ilelo cinooniheraaya makhalelo toko o manazireu?
3 Ukati upacenryaaya “nlamulo na Kristu” ni waamanlyaaya nlamulo na Moceesi, apoovu a Nluku khayaalamuliya-tho ukhala manazireu. (Akalas. 6:2; Aroo. 10:4) Masi, toko manazireu okhalayi, ilelo apoovu a Yehova khanhiya woonihera upheela waya unswalela ninrimaaya wotheene, nuukumyaaya wotheene, nimoopuwelelwaaya otheene ni niikuru caya cotheene. (Mark. 12:30) Ukati unvaherereehu ukumiihu wa Yehova, hiiva ninankhuluveliha Yehova itthu ninrimeehu wotheene. Wiira nitthare itthu inonkhuluveliheehu, hiiva nihaana nipankaka itthu impheelaawe Yehova ni wiivaherera unswalela uyova. Ninaahala wiitthuca manannani manazireu yaapankaaya itthu yankhuluvelihaaya Yehova. Ciicammo, ninaahala woona manannani ntakihero naya ninnikaviheraaya wiira hiiva ciicammo nipanke itthu inkhuluvelihileehu Yehova ukati unvaherereehu ukumiihu. c (Mat. 16:24) Nttwee noone matakihero makhwaawe.
MWAAMINI ULEVA CITTHU CIKIINA WIIRA MUNSWALELE YEHOVA
4. Toko cinhimyaaya Manummeru 6:3, 4, isiyani manazireu yaalevaaya?
4 Nsome Manummeru 6:3, 4. d Manazireu khayaalamuliya uwurya nipha ni hataa ulya citthu cikiina, toko uva owuuma ni oohuuma. Asarayeli akhwaawe yahaari manazireu yaanaawurya nipha ni ciicammo yanlya uva, ukhala wiira khayaari itthu yootakhala ulya nnyo citthunnyo. Ibiiblya ineera wiira ‘iviinyu inawaatteeliha nrima apinaatamu ni ikhanle itthuvo ya Nluku.’ (Isaa. 104:14, 15) Waahookhalaru commo, manazireu yaholakela uleva nnyo citthunnyo. e
Nyuuva nnawaamini uleva citthu cikiina toko manazireu caalevaaya? (Nwehe iparaagarafu 4-6)
5. Madián ni Marcela isiyani yaalakenlyaaya upanka, ni nlattuni?
5 Toko manazireu, hiiva ciicammo ninawiikurumica uleva citthu cikiina wiira nivare cinene nteko wa Yehova. Nttwee noone ntakihero na Madián ni Marcela. f Ala anamathelanaala yahaana makhalelo omaana. Madián anvara nteko ni ayoca yaakhala inupa yooreera cinene. Masi yaapheela wuncerera nteko wanvarelaaya Yehova. Ayo yaholakela upanka marukunuso. Ayo aheera co: “Naholakela uhiya uthumakaca citthu cinci. Nahothamela inupa ikiina yankaani ni nahotumiha ikaarweehu.” Madián ni Marcela khayaakhanyererihiya wiira apanke commo. Ayoca yaahothanla upanka commo kontha yaapheela wuncerera nteko wanvarelaaya Yehova. Ayo unawaatteela nrima cinene nlattu wo citthu cilakenlyaaya upanka.
6. Kontha isiyani hiiva ninawiikurumica uleva citthu cikiina? (Nwehe ilatarato.)
6 Aswali a Yehova ilelo anaatteeliya ni anawiikurumica wiira akhalane ukati wonswalela. (1 Akor. 9:3-6) Yehova khannikhanyereriha wiira niikurumice ayo manannaayo. Ni citthu mayamunna akiina cilevilyaaya khacinakhala cootakhala. Wootakihera, akiina aholeva nteko womaana waacivela, inupa ni hataa mihuwo caya. Enci aholakela uviriha ukati mwinci ahinathela awula ahinatheliya, awula ahoweherera uvira ukati wiira ahaakuve waayara asaana. Akiinaayo aholakela ukavihera mapuro oothwa anamalalyeera, hataa yacuwelaka wiira anhala ukhala uttayi naamucyaaya ni naasipatthannyaaya. Enci iriyariihu nihaamini uleva citthu cikiina, kontha nimpheela unvaha Yehova itthu inkhitiriihu. Nkupali wiira Yehova naawoonani ukhalana ifayita cinene mwaaminiki uleva citthu cikiina wiira munswalele, hataa nlevaka citthu cankaani awula cuulupale.—Mabere. 6:10.
MWAAMINI UVIRIKANA NAATTHU AKHWAAWE
7. Kontha isiyani yaaryaaya itthu yoorika nazireu weettela itthu yaakhuluvelihilyaawe? (Manummeru 6:5) (Nwehe ilatarato.)
7 Nsome Manummeru 6:5. g Manazireu khayaalamuliya umettha ikharari. Ayo yaari mananna onttitthimiha cinene Yehova. Wakhala wiira nsarayeli aari nazireu ukati mwinci, ikharari cawe canhala wuunuwa ni aanaakavihera akiinaayo uncuwelela. Wakhalaka wiira akiinaayo yaananhisima ntthu aari nazireu ni yaananlipiha wiira hihiye nteko ulakenlyaawe, wanhala unkavihera waamini ukhala ntthu oovirikana naakhwaawe. Masi wooriipiha nrima, wahaavo ukati asarayeli wahaahisimaaya ni wahaakaviheraaya manazireu. Uwakati wa porofeeta Amos, asarayeli yanrukunuwenle Yehova yaanaavaha iviinyu manazireu. Ayo atthunaka yaapheela wiira yaatthekihe ni ahiiwelele nlamulo naahimya wiira khayaalamuliya uwurya iviinyu. (Amos 2:12) Manazireu yaalamuliya ukhala oolipa nrima wiira akhitiri umalihera itthu yaalakenlyaaya ni ukhala oovirikana naatthu akiina.
Nazireu eettela itthu yaakhuluvelihilyaawe antthuna ukhala oovirikana naatthu akhwaawe (Nwehe iparaagarafu 7)
8. Itthu yaamwiirannyenle Benjamin inoolipihani cani?
8 Nikaviheriyaka ni Yehova, hiiva ciicammo ninaahala ukhitiri ulipa nrima ni ukhala oovirikana naatthu akhwaawe, hataa ukhalaka wiira nikhanle atthu oomaala. Moone ntakihero na Benjamin, rina myaakha 10 nokhala u Noruega. Nlattu wokhotto yo Ucrânia, icikola yaasomaawe yahopanka ifesta wiira yoonihere waakavihera atthu o Ucrânia. Anacikola yahaana yiipaka icipo ni uwara ikuwo cokoore yopantera yo Ucrânia. Wiira hipanke mphantte wo ile ifesteele, Benjamin khaattamacile nipuro naapankiya ifesta. Apurusoora amoca yahomoona. Ayo yahomwiihana ni yahomwiirela wiira atthu otheene yaananweherera. Benjamin ahowaattamela apurusoora ni ahowiirela: “Mi akimpanka mphantte ifesta cosiyaasa. Masaahiti a Yehova enci anaatthukiya nlattu woohirwaa ukhottoni.” Apurusooraawe yahaamini itthu Benjamin yaahimenryaawe ni yahomwiirela wiira pooti wahaakelaawe ile ifesteele. Atthu yaasomanaawe Benjamin yahancera unkohakoha nlattuni wahaaphiilyaawe wafestani. Benjamin ahokhala owoova mpaka aahanle vakaani wunla, masi uyo aholipa nrima ni ahaahimerya atthu otheene nsaala itthu yaahimenryaawe apurusoora. Wahoolo, Benjamin ahaahimerya asithumwaane wiira ahoona mananna caakaviheriyaawe ni Yehova uhimya itthu yaakupalyaawe.
9. Ninhala untteeliha cani nrima Yehova?
9 Atthu enci anaacuwela wiira hiiva nikhanle oovirikana, kontha ninaamwiiwelela Yehova. Hi nihaana nilipaka nrima wiira naahimerye akhunanihu wiira nikhanle Masaahiti a Yehova, toko untekoni awula ucikolani. Ukati masakha anviraaya yatepacaka ntuninyani, unaatepa urika weettela ikano co mbiiblyani ni waalalyeera akhunanihu ihapari comaana. (2 Tim. 1:8; 3:13) Khula ukati unlipeenyu nrima wiira nkhale oovirikana naathu akhwaawe, muupuwele wiira nnantteeliha nrima Yehova.—Miru. 27:11; Mal. 3:18.
MMWEESE YEHOVA NIPURO NOOPACERA MUUKUMINI WINYU
10. Kontha isiyani yaaryaaya itthu yoorika manazireu utthara malakihero ari nhina Manummeru 6:6, 7?
10 Nsome Manummeru 6:6, 7. h Manazireu khayaalamuliya umwaattamelela ntthu ookhwa. Atthunaka hiiva pooti wuupuwela wiira iyo khayaari itthu yoorika upanka. Masi iyo yaanaasankiha venci manazireu wakhalaka wiira ahokhwa mmucyaaya. Ule uwakatyuule, ntthu akhwaaka, atthwaayo yaholemalela waattamelela mayithyaayo. (Joau 19:39, 40; Mite. 9:36-40) Masi manazireu khayaalamuliya waattamelela mayithi. Waahookhalaru commo, ayo yanviriha uyo ukati woorikooyo yacukulaka. Nazireu khaahiya weettela itthu yaalakenlyaawe. Iyo yoonihera wiira uyo ahaana waamini woolipa. Khweeliini, Yehova aanawaavaha ikuru manazireu wiira akhitiri uvilela ayo masakhaayo.
11. Isiyani inlamuliyeehu upanka ukati woolakela khula itthu inaahela nhina amuciihu? (Nwehe ilatarato.)
11 Hi khaninkusera iperwa wiivaherera wihu wa Yehova nhina citthu cinlakeleehu ni citthu caamuciihu. Hi ninawiikurumica wiira naaverye amuciihu citthu cinaathwa, masi hi khaninaahela nipuro noopacera amuciihu unvikana Yehova. (Mat. 10:35-37; 1 Tim. 5:8) Uwakati nkhwaawe, ninaalakelaka upanka citthu asipaapeehu cihinaacivela, masi cinoncivela Yehova.
Nyuuva nnaakupali uhoolelihera upanka impheelaawe Yehova khampa itthu yoopacera, hataa ukhalaka ukati woorika? (Nwehe iparaagarafu 11) i
12. Isiyani amunna Alexandru yaapankilyaaya ni isiyani yahaapankilyaaya ukati wo marikariko watthokoni waya?
12 Moone ntakihero na amunna Alexandru ni amwaaraya aneehaniya Dorina. Ayo yahopacera usoma Ibiiblya ni uvira waya mwaakha mmoca, anuunu Dorina yaholakela uhiya ni yaapheela wiira awannyaya ciicammo ahiye. Amunna Alexandru yahaahimerya amwaaraya niihisima wiira khaahala uhiya. Amwaaraya khawaacivenle ni yahomananiha waahiha awannyaya usoma Ibiiblya. Amunna Alexandru aheera wiira khayaacuwela nlattuni amwaaraya waapankaaya commo ni wahaarikela cinene. Uwakati nkhwaawe, anuunu Dorina yaanawaataraca amunna Alexandru ni yanwuuluma pusya. Uhaavo ukati amunna Alexandru yaapheelakaaya uhiya usoma Ibiiblya, masi ayo khayaahiile umweesa Yehova nipuro noopacera ni ciicammo khayaahiile uwoonihera nifento ni ihisima amwaaraya. Nlattu wo meettelo omaana aamunna Alexandru, amwaaraya yaholakela uturuwela usoma Ibiiblya ni nuuwakatyaaya, yahopattisiya.—Moone ividiyu Alexandru ni Dorina Vacar: “Ole oniphenta, Toopixa Murima ni Tooreera Murima ” nhina isiyani jw.org yeemakhuwa.
13. Manannani hiiva ninhaleehu woonihera wiira ninanfenta Yehova ni ninawaafenta amuciihu?
13 Yehova phipattusile umuci. Uyo nopheela wiira amuciihu atteeliyeke. (Efesu 3:14, 15) Napheelaka utteeliya weekhweeli, hiiva nihaana nipankaka citthunnyo toko Yehova cimpheelaawe. Nkupali wiira Yehova naatteeliya oonaka wiikurumica winyu wiira munswalele ni ciicammo mwaawacere amuciihu ni nwoonihere nifento ni ihisima.—Aroo. 12:10.
MWAAKURUMICE AKHUNANINYU WAATAKIHA MANAZIREU
14. Tipani venci-venci hiiva nolamuliyeehu unlipiha?
14 Atthu otheene aneevaherera unswalela Yehova anlamuliya waamini uleva citthu cikiina nlattu wonfenta. Ukati nkhwaawe, upanka iyo unaarika. Ninhala waakurumica cani atthu akiina utthuna uleva citthu cikiina wiira answalele Yehova? Hiiva pooti waalipiha nimoolumweehu. (Jó 16:5) Niireke mayamunna akiina wanlokoni winyu anaamananiha urukunusa makhalelwaaya wiira yuncerere nteko unonvarelaaya Yehova? Nyuuva nnawaacuwela amirawo ammananiha woonihera ulipa nrima wiira akhale oovirikana naakhunanaya ucikolani, hataa ukhala wiira unawaarika venci? Nnaakhitiri umuupuwela munna awula ntthu nosomihiya Ibiiblya neekurumica umwiiwelela Yehova, hataa amucyaawe yahiciveliyaka? Mwiivaherere upanka khula itthu inkhitiriinyu wiira mwaalipihe ayo atthwaayo, muulumaka citthu comaana, mwaattottopelaka nlattu woolipa nrima nhina citthu cotheene cinompankelaaya Yehova.—File. 4, 5, 7.
15. Manannani atthu akhwaawe cinaakaviheraaya mayamunna anvara nteko wowiivahereriya ukati wotheene?
15 Uwakati nkiina, hiiva pooti waakavihera mayamunneehu yiivaherenre uvara nteko wa Yehova uwakati wotheene. (Miru. 19:17; Mabere. 13:16) Iyo phi itthu yaapankilyaaya anuunwiihu amoca owuuluvala ankhala u Sri Lanka. Nsurukhu ayo anuunwaayo waakhelaaya anareformanri wahoncereriya. Vano, ayo yaholakela waakavihera mayanuunu eeli mapiyoneeru yahaarina nsurukhu wiira arweehele uhoolo ntekwaaya weepiyoneeru. Khula mweeri, ayo anuunwaayo yaanawaavaha nsurukhu ayo mapiyoneeraayo wiira anlivele telefooni o wapuwani waya. Ayo anuunwaayo khweeliini yahoonihera ukhalana nrima womaana!
16. Isiyani hiiva inwiitthucereehu manazireu?
16 Khweeliini, hi niheetthuca venci nintakihero no manazireu. Ulakela wo manazireu ciicammo uhonitthuciha itthu yofayita cinene ya Apaapeehu, Yehova. Ayo anaacuwela wiira hiiva nimpheela waatteeliha nrima ni ninaatthuna uleva citthu cikiina wiira naaswalele. Ayo anaanittitthimiha nlattu woonihiya wiira nithanle mwaaneeneehu woonihera mananna cinaafenteehu. (Miru. 23:15, 16; Mark. 10:28-30; 1 Jo. 4:19) Itthu yaalakelaaya upanka ale yaakhala manazireu inawoonihera wiira Yehova nawoona citthu cinleveehu nlattu wonfenta ni naanifenta nlattu wo citthu cotheene cinompankeleehu. Nipanke yotheene inkhitiriihu wiira nihihiye unswalela Yehova ni wiivaherera wiira ninvahe ile inkhitiriihu.
NNOHALA WAAKHULA CANI?
-
Manannani manazireu caalipaaya nrima ni citthu caakupalyaaya uleva?
-
Manannani hiiva ninhaleehu waakurumica akhunanihu waatakiha manazireu ni uleva citthu cikiina wiira avare cinene nteko wa Yehova?
-
Itthu yaalakelaaya upanka ale yaakhala manazireu inniitthuciha isiyani ya Apaapeehu, Yehova?
NCIPO 124 Nkhale ookhuluvelya
a Hataa ukhalaka wiira manazireu akiina yaahoothanliya ni Yehova, asarayeli enci yaari manazireu yahowiivaherera ninrimaaya wotheene.—Nwehe ikwaaturu “ Manazireu oothanliya ni Yehova.”
b Manummeru 6:1 Yehova ahomwiirela Moceesi co: 2 Waahimerye uwiirele asarayeli co: Wakhala wiira alopwana awula athiyana anaathanla ukhala nazireu a Yehova.
c Uwakati nkhwaawe, ilivuru cihu cinawaalikaniha manazireu naale anvara nteko wowiivahereriya ukati wotheene. Masi nhina ula mwahoola, ninhala wuuluma manannani atthu otheene niivaherenre wa Yehova ninhaleehu waatakiha manazireu.
d Manummeru 6:3 Hiwurye iviinyu yo vinagre ni nipha nookela iviinyu. Hiwurye nanka itthu yopankiya ni uva, hilye uva cikhale cikithi awula cowuumihiya. 4 Hilye nanka iyoolya inkela uva, ukhuma uva cikithi mpaka makahapapaaya ukati wotheene unhalaawe ukhala nazireu.
e Unkhala toko wiira khuuvo nteko manazireu waavahaceriyaaya wiira avare, uhiya paahi ukhala nazireu.
f Nwehe mwaha uneera “Decidimos simplificar a nossa vida” mphantte uneera “Experiências de Testemunhas de Jeová” nsayitini jw.org yeekunya.
g Manummeru 6:5 Khanlamuliya umetthiya ikharari mahuku otheene eevaherenryaawe ukhala nazireu. Uyo haana uhihiyerera ukhala owaarya, uhiya ikharari cawe cunnuwacaka mpaka umalihera mahuku yaalakenlyaawe ukhala nazireu a Yehova.
h Manummeru 6:6, Khanlamuliya umwaattamelela ntthu ookhwa mahuku otheene yeevaherenryaawe ukhala nazireu a Yehova. 7 Hataa athumwaane, anumwaane, anyeenyaawe awula anuunwaawe yakhwaaka, uyo khanlamuliya uwaattamaca wiira hooninye uhirya ni Yehova, kontha haana mmuru wawe itthu inonhimya ukhala nazireu a Nluku.
i ILATARATO: Nazireu nari uwannyawe, nawoona mayithi a mmucyaawe anfentaawe. Nlattu wo itthu inkhuluvelihilyaawe Yehova, uyo khanlamuliya urwaa wuusikhani.
