MWAHA WOOSOMYA 6
NCIPO 10 Ninvuwihe Yehova, Muluku Ahu!
“Nttottopele ncina na Yehova”
“Munttottopele uyova, aswali a Yehova, nttottopele ncina na Yehova.”—ISAA. 113:1.
ITTHU INHALEEHU WIITTHUCA
Wuupuwela itthu innikurumica uttitthimiha ncina noowaryaa na Yehova ukati wotheene.
1-2. Isiyani innikavihera ucuwela mananna Yehova cineecoonaawe nlattu wo citthu cinootheriyaawe?
MUUPUWELE ila itthwiila: Ntthu nyuuva nonfenteenyu cinene naawuulumani pusya ni naawootheryani itthu yoohiloka. Nyuuva nnaacuwela wiira itthu yuulumilyaawe khinakhala ikhweeli, masi atthu akhwaawe anapacera unkupali. Ayo atthwaayo anaavira yamwaruselaka iyo itthu yowoothiyeeyo ni atthu akhwaawe ciicammo anapacera ukupali. Mwaahala wiicoona cani? Wakhalaka wiira nyuuva nnaawoona ukhalana ifayita ayo atthwaayo ni wakhalaka wiira khunoocivelani wuulumiya pusya, nyuuva wanhala wuuripani nrima cinene, keera?—Miru. 22:1.
2 Nno ntakiheronno ninaanikavihera woona mananna Yehova ceeconnyaawe ukati woolumiyaawe pusya. Nlayikha nimoca nahohimya itthu yowoothiya nimwaacaka uyova. Nno nahonhimerya Hawa iyo itthu yowoothiyeeyo ni uyo ahokupali. Nlattu wo iyo itthu yowoothiyeeyo, asipaapeehu oopacera yahonrukunuwela Yehova. Ni nlattu wo iyo, itampi ni ukhwa uhaamwaryeela atthu otheene. (Upha. 3:1-6; Aroo. 5:12) Masakha otheene ninooneehu ilelo ntuninyani, toko ukhwa, ikhotto ni uhuva, ankhumelela nlattu wo citthu cowoothiya Sotwani coolumilyaawe ujardim yo Eeteni. Manannani Yehova cineecoonaawe awehaka masakha otheene akumiheriye ni Sotwani? Khweeliini, iyo inkhala itthu inonriipiha nrima cinene Yehova. Uhookhalaru commo, Yehova khanihukhumwiile ni khaniviruwenle. Masi uyo nanlelo khanle “Nluku ootteeliya.”—1 Tim. 1:11.
3. Iparakhani nirineehu?
3 Hiiva nihaana iparakha yookavihera woonihera wiira citthu coolumilyaawe Sotwani amwaacaka Yehova caari cowoothiya. Hi ninhala woonihera wiira uyo aanawootha neettelaka nlamulo noohirikarikaca, nineera: “Nttottopele ncina na Yehova” (Isaa. 113:1) Hiiva ninhala upanka iyo namuulumaka saana mwaneene nno ncina noowaryanno. Nyuuva nnaatthuna upanka iyo? Nttwee noone citthu tthaaru cinlamuliya uniiriha uttottopela ncina na Yehova ninrimeehu wotheene.
YEHOVA UNANTTEELA NRIMA NATTOTTOPELAKA NCINA NAWE
4. Kontha isiyani Yehova nootteeliyaawe nattottopelaka ncina nawe? Ntakihere. (Nwehe ciicammo ilatarato.)
4 Apaapeehu o wiirimu anaakhala ootteeliya yaanoonaka nittottopelaka ncina naya. (Isaa. 119:108) Atthu akhwaawe khaneecoona saana yaahittottopeliyeke ni ampheela wiira ukati wotheene attottopeliya ni yuulumiye saana. Niireeke wiira Yehova phiryaawe ciicammo? Unawoonannya wiira mena. Muupuwele nna ntakiheronna: Mwanhima nawaakapatta athumwaane ni naawiirela co: “Paapa, nyu nkhanle nnyari omaana!” Athumwaane anaathyaa ni anaatteeliya niitthu mwanaya yaahimenryaawe. Kontha isiyani? Niireeke wiira athumwaane unaatteela nrima kontha ampheela wiira ukati wotheene attottopeliye? Mena. Ayo anaacuwela wiira akhanle nnyari omaana, masi anaakhala ootteeliya yamoonaka mwanaya ooniheraka waafenta ni waasukhuru. Ayo anaacuwela wiira itthu impankaawe mwanaya inaahala unkavihera ukhala untteelaka nrima oonuwaka. Phimaana Yehova nokhalaawe ootteeliya nanttottopelaka.
Khampa nnyari nokhalaawe ootteeliya mwanaawe oonihera unfenta ni unsukhuru, ciicammo Yehova naatteeliya nattottopelaka ncina nawe (Nwehe iparaagarafu 4)
5. Nanttottopelaka Yehova isiyani inkavihereehu woonihera?
5 Nanttottopelaka Yehova, hiiva ciicammo ninawoonihera wiira Sotwani aanawootha ukati waanuulumilyaawe pusya. Manannani? Uyo enre wiira khaavo pinaatamu nohala ukhitiri unvaresesa Yehova ni waakiha ncina nawe. Uyo enre wiira otheene cihu ninaahala unhiya Yehova akhumelelaka ntthu nkhwaawe nohala univaha itthu yoonicivela. (Jó 1:9-11; 2:4) Masi nswali a Yehova ookhuluvelya eehaniya Jó ahoonihera wiira Sotwani aanootha. Vano hiiva? Khula ntthu iriyariihu haana iparakha yoovaresesa ncina na Yehova ni uhihiya unswalela uyova. (Miru. 27:11) Iyo khweeliini iparakha yuulupale hiiva irineehu.
6. Manannani ninhaaleehu untakiha mwene Davidi ni malevita? (Nemiya 9:5)
6 Nanfentaka Yehova, ninaahala upheela uttottopela ncina nawe ninrimeehu wotheene. Mwene Davidi ahantikha co: “Ukumyaaka wotheene uttottopele ncina na Yehova ni citthu cotheene cirinaaka cittottopele ncina naa.” (Isaa. 103:1) Davidi ancuwela wiira uttottopela ncina na Yehova waalikanaca nunttottopela mwanene Yehova. Weeriyaka ncina na Yehova anaaciya ciicammo makhalelwaawe, ni iyo inaanuupucera makhalelo omaana ni citthu cootikhiniha Yehova cimpankaawe. Davidi aapheela uttitthimiha ncina naathumwaane, kontha naari nowaarya. Ni aapheela upanka iyo ninrimaawe wotheene. Mananna mamocaaru, malevita yaanawaahoolela apoovu ukati wonttottopela Yehova. Ayo yaanawiiyeviha ni yaanaakupaleela wiira moolumwaaya khayaatosera wiira ahimyeehe uttottopeliya unomphwanela Yehova. (Nsome Nemiya 9:5. a) Khweeliini, nwo wiiyevihanwo wahontteeliha nrima Yehova.
7. Manannani ninhaaleehu unttottopela Yehova wuulalyeerani ni khula nihuku?
7 Hiiva ciicammo pooti unttottopela Yehova namuulumaka saana, ninsukhuruku ni ninfentaka. Ukati unlalyeereehu pooti wanoopuwelehu wiira itthu yuulupale cinene ukhanle waakavihera atthwaayo umwaattamela Yehova ni umoona wiira uyo akhanle Apaapeehu oofenta. (Tiya. 4:8) Hi unaanicivela uwoonihera ayo atthwaayo mbiiblyani wiira Yehova khanle Nluku oofenta, nasariya, oocuwelaca, nakuru ni wiira uyo haana makhalelo makhwaawe omaana. Inanna ikhwaawe yonttottopela Yehova ukhanle unswalela ni upanka yotheene inkhitiriihu wiira nintakihe. (Efesu 5:1) Upanka commo pooti uwiiriha atthu akhwaawe woona wiira hiiva ninaavirikana naatthu akhwaawe. (Mat. 5:14-16) Naakumananaka ayo atthwaayo, hi pooti waahimerya nlattuni ninvirikaneehu naatthu enci. Upanka commo pooti uwiiriha atthu akiina upheela wiitthuca-tho wiira ancuwele Nlukwiihu. Nanttottopelaka Yehova naayo manannaayo, uyo naakhala ootteeliya venci.—1 Tim. 2:3, 4.
YESU UNANTTEELA NRIMA ANOONAKA NITTOTTOPELAKA NCINA NA YEHOVA
8. Manannani Yesu aapacerihilyaawe uttottopela ncina na Yehova?
8 Va watuninyani va ni hataa wiirimu khaavo noncuwela Yehova sana-saana unvikana Yesu. (Mat. 11:27) Yesu nawaafenta Athumwaane ni naattottopela ncina naya. (Joau 14:31) Uhiyu woomalela wa Yesu va watuninyani va, uyo aholompa oolumaka nteko waavanryaawe. Uyo enre: “Mi kihaacuweliha ncina ninyu.” (Joau 17:26) Isiyani Yesu yaapheelaawe uhimya?
9. Nlataniheroni Yesu aahimilyaawe wiira anikavihere uncuwela saana Yehova?
9 Yesu khenre paahi waahimerya atthwaayo wiira Yehova nikhanle ncina na Nluku. Ayuuta Yesu yaawuulumanaawe yancuwela wiira Yehova nikhanle ncina na Nluku, masi Yesu ahoonihera makhalelo a Yehova. (Joau 1:17, 18) Wootakihera, Cowantikhiya Niiluuka Iheperewu cinaahimya wiira Yehova khanle nakiriri ni nawoonihera uthunku. (Nkw. 34:5-7) Yesu ahoonihera sana-saana mananna Yehova cinooniheraawe ikiriri ni uthunku ukati waamuulumilyaawe mwaana aalakenle uthama wapuwani waathumwaane. Noonakavale wiira athumwaane uyo mwaanooyo yahomoona nari uttayi, yahontthawelela ni yahonlevelela niiraati, hi ninaakhitiri wooneeha mananna Yehova nooniheraawe uthunku ni ikiriri. (Luka 15:11-32) Yesu hoonihera mananna Athumwaane ciryaaya.
10. a) Nincuwela cani wiira Yesu ahovarela nteko ncina nathumwaane ni aapheela wiira atthu akhwaawe antakihe? (Markus 5:19) (Nwehe ciicammo ilatarato.) b) Isiyani Yesu mpheelaawe wiira nipanke?
10 Niireke Yesu aanaapheela wiira atthu akhwaawe avarele nteko ncina naathumwaane? Khweeliini, uyo aanaapheela. Ahooleli ottiini akhwaawe yeera wiira uromola ncina na Nluku waakhala uhihisima nno ncinanno. Masi Yesu khaahiile wiira nnyo ilema coohikhuma mbiiblyaninnyo cinhiihe uromola ncina naathumwaane. Ikwaha imoca, Yesu ahonvoniha nlopwana mmoca aarina maciini. Uyo nlopwanooyo aakhala ncoko weehaniya wa Aceraseenu. Atthwaayo yahomoova Yesu cinene, mpaka yahonlepela wiira akhume ule ncokoole. (Mark. 5:16, 17) Waanookhalaru commo, Yesu aapheela wiira atthu o ule ncokoole acuwele ncina na Nluku. Phimaana, uyo ahomwiirela nlopwana anvonihilyawe wiira avire aahimeryaka atthu kahi itthu Yesu yaapankilyaawe, masi itthu Yehova yampankenlyaawe. (Nsome Markus 5:19. b) c Yesu aapheela wiira ncina naathumwaane nicuweliye ntuninyani motheene. (Mat. 24:14; 28:19, 20) Napankaka itthu inkhitiriihu wiira ncina na Yehova nicuweliye, ninantteeliha nrima Mweneehu, Yesu Kristu.
Yesu ahomwiirela nlopwana anvonihilyaawe wiira aahimerye atthu mananna caakaviheriyaawe ni Yehova (Nwehe iparaagrafu 10)
11. Yesu aawiithucihile attharyaawe wiira alompe isiyani, ni kontha isiyani iyo iryaaya itthu yofayita? (Ezekiyeli 36:23)
11 Yesu ancuwela wiira itthu Yehova yaalakenlyaawe waari ureeriha ncina nawe ni uvaanyiha citthu cotheeriyaawe. Phimaana, uyo ahowiitthuciha attharyaawe ulompa, yiiraka co: “Apaapeehu nri wiirimu, ncina ninyu nireerihiye.” (Mat. 6:9) Yesu ancuwela wiira uyo waari mwaha muulupale iriyari wo citthu cotheene cumpilyaawe. (Nsome Ezekiyeli 36:23. d) Khanivo nlayikha awula ntthu Yehova mumpilyaawe tepile wiikurumica ureeriha ncina na Yehova unvikana Yesu. Masi Yesu uwakati waatthukiyaawe, isiyani yootherihiyaawe? Unveeha Nluku! Yesu ancuwela wiira uveeha ncina nathumwaane yaari itampi yuulupale cinene. Vano uyova wootherihiya uvara iyo itampiiyo wahonwereeha nrima cinene. Pooti ukhalaka wiira iyo itthwiiyo phaamwiirihile Yesu ‘uriipiya nrima cinene’ hinaaya utthukiya.—Luka 22:41-44.
12. Manannani Yesu aareerihilyaawe ncina naathumwaane?
12 Wiira areerihe ncina naathumwaane, Yesu ahaana waanana masakha, toko uruwaninya ni wootheriya citthu coohiloka. Yesu ancuwela wiira ahowiiwelela athumwaane nhina citthu cotheene, ni khiivo itthu yoonanara yaapankilyaawe. (Mabere. 12:2) Uyo ciicammo ancuwela wiira Sotwani anhala unhuviha ule ukatyuule. (Luka 22:2-4; 23:33, 34) Sotwani aapheela upanka yootheene yaahalaawe ukhitiri wiira antthekihe Yesu. Masi Sotwani khaakhitinri! Yesu ahoonihera wiira Sotwani aanawootha ukati wenryaawe wiira Yehova kharina aswali anhala waamini unvaresesa yaaphwanyaka masakha moolupale.
13. Manannani nyuuva nnoohaleenyu untteeliha nrima Yesu?
13 Nyuuva nnaapheela untteeliha nrima mweneenyu Yesu? Paasi, nhihiye uttottopela ncina na Yehova. Nnohala upanka commo mweekurumicaka uwiitthuciha atthu akhwaawe makhalelo omaana a Nlukwiihu. Mwapankaka commo, nnawoonihera wiira nnantakiha Yesu. (1 Pet. 2:21) Khampa Yesu, nyuuva nnantteeliha nrima Yehova. Ni nnawoonihera wiira nwananiinyu Sotwani haana ufaalusu ni wootha cinene!
NATTOTTOPELAKA NCINA NA YEHOVA, HI NINAAKAVIHERA WOOPOLA UKUMI WAATTHU
14-15. Citthuni cootikhiniha cinhala wiiranya nawiitthucihaka atthu ncina na Yehova?
14 Nattottopelaka ncina na Yehova, hi ninaakavihera woopola ukumi waatthu enci. Nimpanka cani iyo itthwiiyo? Sotwani ‘haatthuka uwiitho atthu ahimmwaamini Nluku.’ (2 Akor. 4:4) Ayo atthwaayo anaakupali citthu cowoothiya ca Sotwani, toko cila: Nluku khavo, Nluku ri uttayi ni uyo khanaawacera apinatamu, Nluku khanle nakhirini ni nawaattarusa atthu oohinamaana mpaka. Sotwani naamwarusela nnya citthu cowoothiyannya, kontha nopheela unanariha ncina na Yehova ni nopheela wiira atthu ahimwaattamele Yehova. Masi uwakati hiiva ninvireehu nilalyeeraka, ninanhiiha Sotwani upanka iyo itthwiiyo. Hi ninaawiithuciha atthwaayo ikhweeli ca Apaapeehu ni, nlattu woopanka commo, hi ninawaattottopela. Vano isiyani inkhumelela?
15 Ikhweeli co nuulumoni na Nluku cihaana ikuru cinene. Hiiva nawiitthucihaka atthu myaha ca Yehova ni nawoonihera makhalelwaawe, inawiirannya itthu yomaana. Atthu Sotwani yaatthukilyaawe uwiitthu wiira ahicuwele ikhweeli anaahula miitho ni ayo atthwaayo anawancera woona makhalelo omaana a Apaapeehu. Ayo atthwaayo anaakhala ootikhinihiya yoonaka ikuru coohimalela ca Yehova. (Isai. 40:26) Ayo anawiitthuca unkhuluvela Yehova nlattu wosariyaawe yoohipahuwa. (Deut. 32:4) Uhiya commo, anawiitthuca venci ucuwelaca wa Yehova. (Isai. 55:9; Aroo. 11:33) Ni ciicammo, anaamaalihiya ukati aneetthucaaya wiira Yehova khanle nifento. (1 Jo. 4:8) Uwakati untepaaya umwaattamela Yehova, niweherero naya noorwaa ukhala upeephoni ninaatepa waakhalela neekhweeli. Ikhanle iparakha yomaana hiiva waakavihera atthu umwaattamela Yehova! Uwakati nineekurumiceehu upanka iyo, ninaathoonyera wiira ninvara nteko nkhayi ni Yehova.—1 Akor. 3:5, 9.
16. Manannani atthwaayo cinhalaaya wiicoona yeetthucaka ncina na Nluku? Ntakihere.
16 Atthunaka itthu impacereehu uwiitthuciha atthu nikhanle ncina na Nluku: Yehova. Ucuwela nno ncinanno pooti urukunusa makhalelo a ntthu rina nrima womaana. Wootakihera, mwanthiyana mmoca neehaniya Aaliyah e oonuwenle ncoko uhincivile atthu aneehimya ukhala makristau. Uyo khayancivela ittiinnyaawe ni kheecoona wiira ahaana upatthani ni Nluku. Masi makhalelwaawe yahorukunuwa ukati waapacenryawe usomihiya Ibiiblya ni Masaahiti a Yehova. Uyo ahopacera umoona Nluku khampa mpatthanyawe ni uyo ahokhala ootikhinihinya ukati weetthucilyaawe wiira ncina na Nluku nahofutthiya mmabiiblyani cikhwaawe ni yahoheliya moolumo toko Pwiiya. Wiitthuca ncina na Yehova waahorukunusa makhalelwaawe. Uyo heera: “Mpatthanyaaka muulupale haana ncina!” Vano isiyani yankhumelenle wiitthuca wawe ikhweeli? Uyo heera: “Kihaana nnema ninci wanrimani waka ni kinawoona wiira kihokhalana iparakha yuulupale.” Nlopwana mmoca neehaniya Steve ntekwaawe waari wiipa icipo ni uyo oonuwenle ittiini ya ayuuta olelo. Wahophiya ukati uyo waalakenlyaawe ukhuma iyo ittiiniiyo ni uhikela hataa ittiini ikiina, kontha ahoona ufaalusu mwinci nhina ittiini. Masi nuuwakatyaaya anumwaane yahokha ni uyo ahotthuna wancera usomihiya Ibiiblya ni Masaahiti a Yehova. Ukati weetthucilyaawe ncina na Nluku, uyo ahoopuwela cinene. Uyo heera: “Mi kaari kihineetthuca ncina na Nluku. Vano weetthucilyaaka, kahoona wiira Nluku khweeliini haavo ni nna co kinaamoona ukhala eekhweeli. Ule ukatyuule, mi kahoona wiira kahomphwanya mpatthannyaaka.”
17. Kontha isiyani nyuuva khannohiya uttitthimiha ncina na Yehova? (Nwehe ciicammo ilatarato.)
17 Ukati woolalyeera, nyuuva nnaawiitthucihaka atthu ncina noowaarya na Nluku? Nyuuva nnawaakaviheraka atthu woona makhalelo omaana a Nlukwiihu? Mwapankaka commo, nyuuva nnaattitthimiha ncina na Nluku. Nhihiyerere uttitthimiha ncina nowaarya na Yehova, mwaakavihera atthu uncuwela mwanene nno ncinanno. Mwapankaka commo, nyuuva nnaahala woopola ukumi waatthu enci. Nnaahala ciicammo untakiha Mweneehu Yesu Kristu, ni, venci-venci, nnaahala waatteeliha nrima cinene Apaapeehu, Yehova. Nhihiye ‘uttottopela ncina na Yehova mpaka’!—Isaa. 145:2.
Hi ninonttottopela Yehova nawiithucihaka atthu ncina na Nluku ni makhalelwaawe omaana (Nwehe iparaagrafu 17)
UTTOTTOPELA NCINA NA NLUKU . . .
-
unontteeliha nrima cani Yehova?
-
unontteeliha nrima cani Yesu?
-
unkavihera cani woopola ukumi waatthu?
NCIPO 2 Nsina Nanyu ti Yehova
a Nemiya 9:5 Ni malevita Jesuwa, Cadimiyeli, Bani, Hasabineiya, Serebiya, Hodiya, Sebaniya ni Petaiya yaheera: “Munwe ni munttitthimihe Yehova Nlukwiinyu, mpaka. Oo Yehova, attitthimihe ncina ninyu nuulupale, nimpwaha iparakha cotheene ni uttottopeliya wotheene.”
b Markus 5:19 Vano uyo khantthunihenre, masi ahomwiirela: “Uturuwele uwaani, ni waattonkele amucyaa citthu cotheene Yehova cuupankenlyaawe ni uthunku woonihenryaawe.”
c Hi ninaakupali wiira Markus ahoromola ncina na Yehova ukati wantikhilyaawe moolumo a Yesu. Phimaana, mbiiblyani Tradução do Novo Mundo nihantikhiya ncina na Yehova nhina iyo iveeruswiiyo. Moone niwehero no iyo iveeruswiiyo nhina Bíblia de Estudo.
d Ezekiyeli 36:23 “Mi khweeliini kinaahala ureeriha ncina naka nuulupale, ninanarihiye naatthu olapo cotheene, ni ninanarihaleenyu nyuuva wamoca naayo atthwaayo; ni ukati unhalaaka ureerihiya iriyariinyu ayo yoonaka, atthu olapo cotheene anaahala ucuwela wiira mi kikhanle Yehova,” neera Nkhulupale Pwiiya Yehova.
e Macina makhwaawe ahaakakhanihinya.
