MWAHA WOOSOMIYA 3
Yehova khanhala uhiya unikavihera
“Yehova aari ni Yusufu . . . , ni aanaankavihera wiira citthu cotheene caapankaawe cimweettele saana.”—UPHA. 39:2, 3.
NCIPO 30 Meu Deus, Meu Amigo e Pai
NINHALA WIITTHUCANI? a
1-2. a) Nlattuni nihinkhaleehu ootikhinihiya yanikhumelelaka masankiho? b) Ninhala wiitthucani nhina ula mwahoola?
HIIVA aswali a Yehova khaninkhala ootikhinihiya yaniphwanyaka masakha. Toko cinhimyaaya Ibiiblya, hi ninaacuwela wiira “nihaana naananaka marikariko wiira nikele muumweneni wa Nluku.” (Mite. 14:22) Ciicammo ninaacuwela wiira masakheehu otheene anrwaa umalihiya upeephoni, unhala uhikhala-tho “ukhwa, ucukulaca, wunla ni hataa yoowerya.”—Apoka. 21:4.
2 Yehova khampanka miiriirya wiira ahiniphwanye masankiho, masi uyo naanivaha ikuru wiira nivilele. Moone itthu apostolu Paulu yaahimenryaawe makristau o Roma. Uyo ahohimya masankiho menci yanvira uyova ni mayamunna akiina. Uyo heera: “Nhina wo citthu cotheenennya, ninaakhitiri utthema nlattu wa ule nifentile.” (Aroo. 8:35-37) Iyo inoonihera wiira Yehova pooti wuukaviherani, hataa mwaananaka marikariko. Nttwee noone mananna Yehova cankavihenryaawe Yusufu.
YANIKHUMELELAKA MARUKUNUSO WOWAAKUVYAACAWENE
3. Manannani makhalelo a Yusufu caarukunuwilyaaya woowaakuvyaaca?
3 Yakopi khaavithavitha inanna canfentaawe mwaamwanawe eehaniya Yusufu. (Upha. 37:3, 4) Iyo itthwiiyo yahomwiiriha Yusufu wooneliya nttima naasuulupalyaawe. Phimaana, ayo yahontumiha wiira akhale ipottha. Ni atthu yanthumile yahoncisa ni ciicammo yahontumiha khampa ipottha. Masi ula nkwahoola Yusufu aathumiye ni Potifari, nlopwana aahoolela atthu yankhalenla Farawoo. Ayo manannaayo, makhalelo a Yusufu yahorukunuwa wowaakuvyaacawene. Uyo aari mwaana aafentiya naathumwaane, masi vano ahokhala ipottha.—Upha. 39:1.
4. Marikarikoni hiiva atthunaka ninaananeehu?
4 Ibiiblya ineera co: “Citthu cinkhumelela uwakati uhinweherereehu cinawaaphwanya atthu otheene.” (Ekles. 9:11) Ayo moolumwaayo maanaaya wiira pooti unikhumelela citthu ‘cinaakhumelela atthu otheene.’ (1 Akor. 10:13) Uwakati nkiina, hi ninhuva nlattu wo waamini wihu. Atthu pooti unitarawaca awula unilupattha nlattu wo citthu cinkupaliihu. (2 Tim. 3:12) Hataa yanikhumelelaka marikarikoni, Yehova naahala wuukaviherani. Uyo aapankile cani iyo itthwiiyo ukati wa Yusufu?
Yehova ahonkavihera Yusufu hataa ukati waatumihiyaawe khampa ipottha Wiciipitu (Nwehe iparaagarafu 5)
5. Potifari aacuwelenle cani wiira Yusufu ankaviheriya ni Yehova? (Nwehe Uphattuwaca 39:2-6.)
5 Nsome Uphattuwaca 39:2-6. b Potifari ahoona wiira Yusufu aari mmirawo namiteko ni uyo ancuwela nlattuni. Ancuwela wiira Yehova “aanaankavihera [Yusufu] wiira citthu cotheene caapankaawe cimweettele saana.” c Nuuwakatyaaya, Potifari ahonthanla Yusufu wiira akhale nantekwaawe ookhuluvelya. Potifari ahonvahacera Yusufu inupaawe yotheene wiira awacere. Yaakhumelenle isiyani? Potifari ahoona wiira ahopanka itthu yomaana.
6. Manannani Yusufu ceecoonaawe nlattu wo masakha aananaawe?
6 Mmananihe wuupuwela itthu yoopuwelaawe Yusufu. Isiyani yaapheelaawe? Niireke wiira uyo oopuwela wiithoonya wiira ooniye ukhala ntthu omaana? Pooti ukhalaka wiira itthu yaapheelaawe waari utthukuliya wiira aturuwele waathumwaane. Kontha waahookhalaru wiira aahovahaceriya mirintti cuulupale, uyo aari ipottha ni aakhala ninlopwana ahanswalela Yehova. Masi Yehova khaapankihile wiira Potifari oopuwele untthukula Yusufu.
MASAKHEEHU YATEPACAKA
7. Manannani masakha a Yusufu yaaviraaya yatepaka? (Nwehe Uphattuwaca 39:14, 15.)
7 Toko cinhimyaaya Uphattuwaca ikapiitulu 39, amwaara a Potifari yahociveliya venci ni Yusufu. Ayo yaanonkhanyereriha wiira aarupane. Masi khula ikwaha ayo yankhanyererihaaya, uyo eera khaatthuna. Phimaana, ayo yahonviruwela ni yahomootheriha wiira uyova aapheela waatupheela wiira aarupane. (Nsome Uphattuwaca 39:14, 15. d) Potifari uhimeeriya wawe iyo itthwiiyo, ahoncisa Yusufu ni ahonrwaana nkhattya. (Upha. 39:19, 20) Masi yaari cani yeeyo ikhattyeeyo? Nuulumo noluuka iheperewu Yusufu naavarenlyaawe nteko aacaka ikhattya nataphuleliyaka, ninkhala “nlikitti.” Iyo maanaaya wiira nno naari nipuro nooripela cinene. (Upha. 40:15, niwehero.) Ciicammo, Ibiiblya inhimya wiira Yusufu ahotthukiya nuunyolo woyuuma mmettoni wawe ni ciicammo nsikoni. (Isaa. 105:17, 18) Masakha a Yusufu yanvira yatepaka, masi nlattu wookhala nlopwana ookhuluvelya, uyo ahokhala peresu oohitepa uhuvihiya.
8. Hataa masakha anaananeenyu yatepaka uvira yincivaka, isiyani nyuuva inlamuliyeenyu ukupali?
8 Nyuuva nhotoko waanana masakha yaawiirihileni ulompa cinene, masi masakhaayo yahotepaca? Iyo itthwiiyo pooti ukhumelela kontha ituninya ninkhaleehu inhooleliya ni Sotwani ni Yehova khannikhikicera wiira ahiniphwanye masakha. (1 Jo. 5:19) Unookhalaru commo, nyuuva pooti wankupaliinyu wiira Yehova naacuwela itthu inwiirani ni uyo nawuuwacerani. (Mat. 10:29-31; 1 Pet. 5:6, 7) Ciicammo, mbiiblyani Yehova naanikhuluveliha eeraka co: “Mi akinhala wuuhiya ni akinhala wuunyanyala.” (Mabere. 13:5) Yehova pooti wuukaviherani nyuuva, hataa mwaananaka masakha anooniheenyu toko wiira khanhala uvira. Nttwee noone mananna Yehova caapankilyaawe iyo itthwiiyo ni Yusufu.
Yehova ahonkavihera Yusufu hataa waaryaawe nkhattya mpaka ahokhalihiya nhooleli o maperesu (Nwehe iparaagarafu 9)
9. Isiyani inthoonyera wiira Yehova aari ni Yusufu ukati waaryaawe nkhattya? (Nwehe Uphattuwaca 39:21-23.)
9 Nsome Uphattuwaca 39:21-23. e Hataa ukhalaka wiira Yusufu ahotthukeliya nkhattya, Yehova ahonkavihera wiira citthu cotheene cimweettele saana. Manannani? Toko ceerannyaalyaaya ukati waakhalaawe wa Potifari, nkhalenli o maperesu ahancera unkhuluvela Yusufu. Woohivira ukati mwinci, Yusufu ahovahaceriya waawacera maperesu makhwaawe, mpaka Ibiiblya ineera wiira “nkhalenli o maperesu nhina citthu cotheene canvahacenryaawe Yusufu, khiivo itthu yanhela isukhuli.” Vano, Yusufu ahovahaceriya nteko waahala unkavihera uhikhala oopuwelaka citthu cooriipiha nrima ni eecoonaka ukhala veekha. Nno naari nrukunuso nahaawehereraawe. Peresu aakasariye nlattu woomananiha waarupana amwaarawe nhooleli khaalamuliya uvahaceriya nteko muulupale toko uyo. Masi iyo itthwiiyo yeerannyeele nlattu wo itthu imoca inhimyaaya Ibiiblya. Uphatthuwaca 39:23 ineera: “Yehova aari ni Yusufu, ni Yehova aanaapankiha wiira cimweettele saana citthu cotheene caapankaawe.”
10. Kontha isiyani pooti ukhalaka wiira Yusufu khoopuwenle wiira caanaamweettela saana citthu cotheene?
10 Mwiicuupuwele-tho nnari Yusufu. Woonela winyu, ukati Yusufu wootheriyaawe citthu coohiloka ni waatthukiyaawe nkhattya, niireke wiira uyova oopuwela wiira caanaamweettela saana citthu cotheene? Isiyani Yusufu yaapheelaawe ule ukatyuule? Niireke wiira aapheela uwaceriya ratta ninhooleli o nkhattya? Atthunaka mena. Itthu Yusufu yaapheelaawe pooti waari wooniya ukhala ntthu oohittheka ni utthukuliya nkhattya. (Upha. 40:14) Masi nlopwana Yusufu anleehenryaawe umuulumana Farawoo, khaapankile itthu yaaleeheriyaawe ni Yusufu. Phimaana, Yusufu ahokhala tootho myaakha miili nari nkhattya. (Upha. 40:23; 41:1, 14) Waanookhalaru commo, Yehova khaahiile unwacera Yusufu. Manannani?
11. Manannani Yehova cankavihenryaawe Yusufu wiira eerannyeehe itthu yaapheelaawe Yehova?
11 Yehova ahompankiha Farawoo uloha citthu cootikhiniha. Farawoo ahosanka ni aapheela ucuwela itthu yaalohilyaawe maanaaya isiyani. Vano ucuwela wawe wiira Yusufu ancuwela utaphulela citthu coolohiya, uyo ahoruma wiira atthukuliye nkhattya ni awaaniye. Yusufu akaviheriyaka ni Yehova, ahokhitiri utaphulela itthu yaalohilyaawe Farawoo ni uyo ahontikhinaca Yusufu nlattu wo nruku waavahalyaawe. Uyo ukatyuuyo, Farawoo ahoona wiira Yusufu ankaviheriya ni Yehova ni ahonvahacera wiira awacere nteko woothotokanihiya iyoolya ilapo yo Wiciipitu. (Upha. 41:38, 41-44) Unavinreene ukati vakaani, yahopacera itala. Masi kahi paahi Wiciipitu masi ciicammo ilapo yo Kanaa, waakhalaaya amucyaawe Yusufu. Vano, Yusufu aari owiitthenkaceene wiira oopole ucuulu waahala uphiya mpaka ukati wa Mesiya.
12. Manannani Yehova cankaviheraawe Yusufu nhina citthu cotheene caavaraawe?
12 Muupuwele citthu cotheene Yusufu civinryaawe. Tipani aamwiirihile Potifari wiira anvahacere mirintti Yusufu? Tipani aamwiirihile nkhalenle o maperesu wiira anvahacere anwacere ratta Yusufu, hataa akhalaka peresu? Tipani aamwiirihile Farawoo uloha citthu cootikhiniha ni tipani anvahile ucuwelaca Yusufu wiira ataphulele citthu caalohilyaawe Farawoo? Tipani ankurumicile Farawoo wiira anthanle Yusufu ukhala nhooleli ootthenkaca iyoolya yolapo yo Wiciipitu. (Upha. 45:5) Woohaanyihacera, Yehova phaakavihera. Uhookhalaru wiira Yusufu ahohuvihiya naasuulupalyaawe, Yehova ahorukunusa makhalelo a Yusufu wiira eerannyeehe itthu impheelaawe.
MANANNA YEHOVA CINHALAAWE WUUKAVIHERANI NHINA CITTHU COTHEENE CINVAREENYU
13. Niireke Yehova naanikhikicera wiira ahinikhumelele masakha?
13 Nineetthucera isiyani ihantisi ya Yusufu? Niireke Yehova naapankiha wiira ahiniphwanye masakha? Niireke Yehova naapanka miiriirya wiira nihihuve? Mena. (Ekles. 8:9; 9:11) Masi nkupali itthu imoca: Yehova naacuwela citthu cinnikhumelela ni nawiiwa ulompa wihu. (Isaa. 34:15; 55:22; Isai. 59:1) Ni uhiya commo, Yehova naanikavihera uvilela. Nopanka cani iyo itthwiiyo?
14. Manannani Yehova nonikaviheraawe ukati wo marikariko?
14 Inanna imoca Yehova cinnikaviheraawe ukhanle unimaaliha ni unilipiha. Ni ikwaha cinci, uyo nonikavihera ukati nimpheeleehu. (2 Akor. 1:3, 4) Iyo phi itthu yankhumelenle amunna neehaniya Eziz ankhala ilapo yo Turcomenistão. Ayo yaahotthukeliya nkhattya myaakha miili nlattu wo waamini waya. Uwicisu waya nihuku naahalaaka uhukhumwiya, munna mmoca ahokithoonyera ilivuru ya Isaiya 30:15, ineera: “Ikurwiinyu unhala ukhala umaala winyu ni ukhuluvela winyu.” Wuupuwela ila iveeruswiila uhokikavihera mahuku otheene akhanlyaaka nkhattya. Nyuuva nnaakhitiri wuupuwela nihuku Yehova oomaalihilyaaweni ni oolipihalyaaweni ukati waapheeleenyu?
15-16. Itthu yaakhumelenle anuunu Tori iwiitthucihaleni isiyani?
15 Ikwaha cinci, hi ninkhitiri woonelela wiira Yehova honikavihera anavinreene masankiho naarineehu. Arokorihu amoca aneehaniya Tori ahotoka woona iyo itthwiiyo. Ayo yahaana mwaamwanaya eehaniya Mason. Uyo ahowerennya iretta yo cancro myaakha 6. Unawoonannya wiira anuunu Tori yahoriipiya nrima venci. Khiivo itthu intepa unriipiha nrima nnyari uvikana iyo. Ayo aheera: “Mi kinaakupali wiira nnyari unaatepa unwerya umoona mwanawe ahuvaka uvikana caahalaawe uwerennya mwaneennyaawe.”
16 Anuunwiihu Tori khayaamala waarikela itafaawuti yaarinaaya. Masi nuuwakatyaaya, ayo yahancera wuupuwela mananna Yehova caakavihenryaawe uviriha ayo masakhaayo. Ayo aneera: “Koopuwelaka uttuli kinawoona mananna ntata na Yehova cikikavihenryaaya ukati waawerennyaawe mwanaka. Wootakihera, hataa mwanaka awerennyaka venci mpaka wahaalamuliyaawe uthotoliya, mayamunna yaanaweetta iwoora piili niikaaro yawaaka unithotola usipiritaali. Khula ikwaha aanaakhala ntthu oopheela ukikavihera. Ayo yankiweherera mapuro yaakheleliya atthu oothotola wiira akikavihere ile yaapheelaaka ukaviheriya. Ni ciicammo mayamunna yannikavihera yaniwaanelaka citthu caapheeleehu hataa ukhalaka ukati waanirikela venci.” Yehova ahaakavihera anuunu Tori avahaka yotheene yaapheelaaya wiira avilele ni ahonkavihera ciicammo mwanaya Mason.—Nwehe ikwaaturu “ Yehova ahonivaha itthu yaapheeleehu.”
NHILIYALE IPARAKHA YEHOVA CUUVAHALYAAWENI
17-18. Isiyani inhala unikavihera ucuwelela ni usukhurweela mananna Yehova cinnikaviheraawe? (Nwehe Isaalimu 40:5.)
17 Nsome Isaalimu 40:5. f Itthu impheelaawe ntthu neetta masinttaano ooweliya mwaako uri uphiya uculu waya mwaako. Uyo awelakoono, naweemelaca wiira oone mapuro ooreeraca. Inanna imocaaru, nyuuva nhaana nkumihaka ukati wiira muupuwele itthuvo cinoovahaaweni Yehova hataa nkhalanaka marikariko. Wuumaleloni wo khula nihuku, muupuwele co: ‘Manannani Yehova cikicaalihilyaawe ilelo? Uhookhalaru wiira khamalihile masakhaaka, manannani cikikavihenryaawe?’ Mmananihe utotha itthu Yehova yuupankenlyaaweni wiira ookavihereni.
18 Atthunaka nyuuva nnanlompa Yehova wiira avire masakheenyu. Nhaana isariya ni nnaapanka itthu yomaana. (Afili. 4:6) Masi ciicammo khaninlamuliya uliyala iparakha Yehova cinnivahaawe nenna co. Kontha Yehova naanikhuluveliha unilipiha ni univaha ikuru wiira nivilele. Phimaana, nhihiye unsukhuru Yehova nlattu wo citthu cotheene cinoopankelaaweni. Ala manannaala, nyuuva nnaahala ukhitiri woona mananna Yehova cinookaviheraaweni khampa cankavihenryaawe Yusufu.—Upha. 41:51, 52.
NCIPO 32 Escolhe o Lado de Jeová
a Yanikhumelelaka marikariko unaarika woona wiira Yehova naanikavihera. Masi hi pooti woona wiira uyo naanikavihera wiimaleloni ayo marikarikwaayo. Citthu caamwiirannyenle Yusufu cinaaniithuciha citthu cofayita. Hataa naananaka marikariko, Yehova pooti unikavihera wiira citthu cimpankeehu cineettele saana. Ula mwahoola unaahala uttonkaca manannani cinnikaviheraawe
b Uphattuwaca 39:2 Masi Yehova aari ni Yusufu, phimaana uyo ahokhala nlopwana yanlokela yotheene yaavaraawe ni ahovahaceriya uhoolela ipuwa ya pwiiyaawe, Potifari. 3 Ni apwiiyaawe yaanoona wiira Yehova aari ni Yusufu, ni wiira Yehova aanonkavihera umwiiraneela saana miteko cotheene caavaraawe. 4 Potifari aanaaciveliya ni Yusufu mpaka ohonkhaliha nantekwaawe. Phimaana, uyo anhonvahacera uhoolela wapuwani wawe ni utafiti citthu cotheene caarinaawe. 5 Ukhuma ukati nciipitu wanhiyenryaawe Yusufu uhoolela wapuwani wawe ni utafiti citthu cotheene caarinaawe, Yehova ahovaha iparakha inupa ya nciipitu nlattu wa Yusufu, ni Yehova aanaamwarusela iparakha citthu cotheene caarinaawe, wapuwani ni umattani. 6 Vano, Potifari ahohiya mmatatani mwa Yusufu citthu cotheene caarinaawe, ni khiiwo yaakhalelaawe isukhuli hataa vakaani, ihikhanle paasi itthu yoohala ulya. Ciicammo, Yusufu ahokhala ooreera ni ukhalana irutthu yooreera.
c Nhina iveerusu vakaani paahi, Ibiiblya inawuuluma marukunuso otheene yankhumelenle Yusufu ukati waaryaawe ipottha. Masi pooti ukhalaka wiira cahovira myaakha cinci ukati wankhumelelaaya nnyo citthunnyo.
d Uphattuwaca 39:14 phanceraaya ukhuwela, awiihanaka ananteko akhwaawe o wapuwani: “Mooneke! Nheperewu aniwiihenryaaya awannyaka, nopheela unoonihaca ihaaya. Ahowa wiira akirupanace, masi mi phanceraaka ukhuwaca niikurucaka cotheene. 15 Vano, ukiiwa wawe kikhuwelaka, hokihiyera ikuwaawe ni utthawela vate.”
e Uphattuwaca 39:21 Masi Yehova khanhiile Yusufu ni aananthoonyera nifento nookhuluvelya, ni aanankavihera wiira nhooleli onkhatteya aciveliye ni uyo. 22 Phimaana nhooleli onkhatteya ahonvahacera Yusufu waahoolela anantthukiya otheene yaaphwanyannya nkhatteya, ni thi uyova aawehaweha citthu cotheene caavariya nkhatteya. 23 Nhooleli onkhatteya khiiwo yaakhalelaawe isukhuli nhina citthu caatafitiya ni Yusufu , kontha Yehova aari ni Yusufu, ni Yehova aaneettihera saana miteko cotheene caavaraawe.
f Isaalimu 40:5 Khacimala citthu cipankalyaa, Oo Yehova, Nlukwaaka, Khacimala miteko caa cootikhiniha ni citthu cinoopuwelaa unipankela. Khaavo ntthu noolikanana. Hataa kilakelaka uttonkaca ni wuuluma, Nnyo khacimmala uttonkaciya!
