1-2. Kontha isiyani makristau eekhweeli ahaana yapheelaka usoma ilivuru yo Levitiku?

APOSTOLU Paulu ahomwantikhela iwarakha mpatthannyaawe mmirawo Timotiyu, amwiirelaka: “Cowantikhiya cotheene ciphattuwale wa Nluku ni cihaana ifayita.” (2 Tim. 3:16) Iyo inaahela nhina ilivuru yo Levitiku. Weeva unoonela cani iyo ilivuru yo mbiiblyaniiyo? Enci, anoopuwela wiira Levitiku ikhanle ilivuru yoocara malamulo ahirina ifayita mahuku olelo. Masi makristau eekhweeli kahi phinoopuwelaaya commo.

² Ilivuru yo Levitiku yantikhiye khalayi, myaakha 3.500 uttuli. Unookhalaru commo, Yehova hosunka iyo ilivurwiiyo ‘wiira iniitthucihe.’ (Aroo. 15:4) Ilivuru yo Levitiku inaanithoonyera mananna Yehova cinoopuwelaawe nhina myaha cinci. Phimaana, hiivano nihaana nipheelaka usoma iyo ilivurwiiyo. Khweeliini, khacimala citthu cinniitthucihaaya ilivuru yo Levitiku. Nttwee noopele mwaha citthu cese cinniitthucihaaya.

3. Nlattuni waavahereriyaaya itthuvo Nihuku Noolepela Uleveleliya?

³ Itthu yoopacera: Wiira Yehova atthune itthuvo cinonvaheehu, nihaana nincivelihaka. Khula mwaakha imaara imoca, naanaakhala Nihuku Noolepela Uleveleliya. Apoovu asarayeli yaanaathukumana ni nankuttho muulupale aanaavaherera itthuvo. Nnyo itthuvonnyo caanawaakavihera asarayeli uhiliyala wiira ayo yaanaapheela uleveleliya itampi caya. Masi nankuttho muulupale hinaaya ucisa iphome yonama Nipuro Nootepa Waarya, uyo ahaana apacaka uvara nteko nkiina. Uyo ntekooyo phaatepale ukhala wofayita cinene uvikana uleveleliya itampi ca asarayeli.

4. Toko cinthoonyeraaya Levitiku 16:12, 13, Nihuku Noolepela Uleveleliya, nankuttho muulupale aapanka isiyani ikwaha yoopacera yaakelaawe Nipuro Nootepa Waarya? (Uwehe ilatarato iri wakaapani.)

 ⁴ Usome Levitiku 16:12, 13. Wuupuwele itthu yaakhumelela Nihuku Noolepela Uleveleliya. Nankuttho muulupale naakela ntabernaakuluni. Ntata nimoca, uyo cisale ikikhompe yoocara ilumpani yoonukhela. Ntata nikiina, uyo cisale itthu yowooru ucarihalyaawe mooro wolumpani. Uyo naweemela uhoolo waya ikuwo inttiyelela Nipuro Nootepa Waarya. Nihuku Noolepela Uleveleliya, nankuttho aanaakela imaara tthaaru Nipuro Nootepa Waarya, masi ila ikhanle ikwaha yoopacera. Athoonyeraka ihisima cinene, uyo naakela Nipuro Nootepa Waarya ni naweemela uhoolo waya Ikasa yo Nleehano. Ukhala nne nipuronne waathoonyera wiira uyo aari uhoolo wa Yehova! Vano, nankuttho muulupale nawiitthela ilumpani mmooroni, ni nipuronno ninawancera unukhelaca cinene! * Wahoolo, uyo naakela-tho Nipuro Nootepa Waarya nacisale iphome yotthuvo yoolepela uleveleliya itampi. Uhoona? Nankuttho aapacera upaha ilumpani hinaaya urwaana iphome yotthuvo yoolepela uleveleliya itampi.

5. Isiyani ineetthuceehu ni mananna caavareliyaaya nteko ilumpani Nihuku Noolepela Uleveleliya?

⁵ Isiyani ineetthuceehu ni mananna caavareliyaaya nteko ilumpani Nihuku Noolepela Uleveleliya? Ibiiblya ineera wiira Yehova nowehera khampa ilumpani mavekelo ampankaaya atthu ookhuluvelya anonswalela. (Isaa. 141:2; Apoka. 5:8) Wuupuwele wiira nankuttho muulupale aanaathoonyera ihisima ukati woorwaana ilumpani uhoolo wa Yehova. Inanna imoca, hiiva ukati wonlompa Yehova, nimmwaattamela niihisima cinene. Ninansukhuru cinene Mpattusi otuninya yotheene kontha honitthunihera wiira nimwaattamele, toko mwaana cinwaattamelaawe athumwane. (Tiya. 4:8) Uyo naanaakhelela khampa asipatthannyaawe! (Isaa. 25:14) Iyo ikhanle iparakha yuulupale cinene, ni niholakela uhipanka nanka itthu inhala unriipiha nrima Yehova.

6. Nankuttho muulupale ahaana apacaka upaha ilumpani hinaaya uvaherera itthuvo. Iyo itthwiiyo inniitthuciha isiyani?

⁶ Ciicammo wuupuwele wiira nankuttho muulupale ahaana apacaka upaha ilumpani hinaaya uvaherera itthuvo. Commo, uyo aanaacuwela wiira aananciveliha Yehova ukati woovaha itthuvo. Iyo itthwiiyo inniitthuciha isiyani? Umuupuwele Yesu. Ninaacuwela wiira Yesu aawaale watuninyani uvaherera ukumyaawe khampa itthuvo. Masi hinaaya upanka iyo, uyo ahaana apacaka upanka itthu yuulupale cinene—itthu yuulupale cinene uvikana uwoopola apinaatamu. Itthuni yeeyo? Uyo ahaana uhihiya umwiiwelela Yehova ukati wotheene waahalaawe ukhala watuninyani wiira Yehova atthune itthuvo yaahalaawe uvaherera. Commo, Yesu phaahalaawe uthoonyera wiira upanka citthu toko Yehova cimpheelaawe, phi itthu yomaana. Yesu aanaahala waathoonyera atthu otheene wiira mananna Yehova cinlamulelaawe akhanle omaana ni osariya.

7. Kontha isiyani mananna Yesu caakhalaawe yahontteeliha nrima Yehova?

⁷ Ukati wotheene Yesu ukhanlyaawe watuninyani, ahomwiiwelela Yehova sana-saana. Yesu khaahiile waakihera mananna Athumwaane cinlamulelaaya, hataa attehattehiyaka awula hataa yankhumelelaka marikariko—ni mpaka hataa acuwelaka wiira aanaahala wiiviya ni mananna oowerya. (Afili. 2:8) Ukati waakhanlyaawe ni marikariko, Yesu aholompa “akhuwelaka cinene ni onlaka.” (Mabere. 5:7) Mavekelo eekhweeli a Yesu yaathoonyera wiira uyo aananvaresesa Yehova wanrimani wawe ni ayo mavekelwaayo yahonkavihera uhihiya umwiiwelela Nluku. Yehova  aawehera mavekelo a Yesu khampa ilumpani yoonukhela cinene. Mananna Yesu caakhalaawe yahontteelihiya nrima Yehova venci. Ni Yesu ahothoonyera wiira mananna Yehova cinlamulelaawe, khweeliini akhanle omaana.

8. Manannani ninlamuliyeehu untakiha Yesu?

⁸ Hiiva ciicammo pooti untakiha Yesu. Manannani? Neekurumicaka umwiiwelela ni unvaresesa Yehova. Yookhumelelaka marikariko, ulompe ni nrimaa wotheene unlepelaka Yehova wiira ookavihere upanka itthu inoncivela. Wapankaka commo, weeva unaahala uthoonyera wiira unawaakihera mananna Yehova cinlamulelaawe. Uhiya iyo, wuupuwele wiira Yehova khanhala utthuna mavekelweehu wakhalaka wiira ninaapanka citthu cootakhala cinonrusa. Masi, wakhalaka wiira ninaapanka citthu comaana, Yehova naahala utthuna mavekelweehu eekhweeli. Ayo anhala ukhala toko ilumpani yoonukhela cinene. Ni ukupali wiira weeva wakhalaka ntthu eemaani ni wamwiiwelelaka Yehova, uyo unaahala untteela nrima cinene.—Miru. 27:11.

9. Nlattuni asarayeli waavahaaya itthuvo co nnema?

⁹ Itthu yonayeeli: Ninonswalela Yehova kontha ninansukhuru. Ninhala wiitthuca iyo itthwiiyo ukati unhaleehu woopela mwaha itthuvo caavahaaya asarayeli ceehaniya itthuvo co nnema. Nnyo itthuvonnyo cahaana ifayita cinene muuswalini weekhweeli nlaponi yo Isarayeli khalayi. * Ilivuru yo Levitiku inaataphulela wiira nsarayeli pooti waavahaawe itthuvo yo nnema “wiira athoonyere usukhuru.” (Lev. 7:11-13, 16-18) Uyo khaavaha iyo itthuvweeyo nlattu wookhanyererihiya,  masi aavaha kontha aanaapheela. Yaari itthuvo nsarayeli yaalakelaawe veekha cawe uvaha kontha ananfenta Nlukwaawe, Yehova. Ntthu aavaha iyo itthuvweeyo, amucyaawe ni anankuttho yaanalya inama yaavahereriye. Masi miphantte cikiina conama aavahiya paahi Yehova. Miphantteni?

10. Itthuvo co nnema, cihimiye nlivuruni yo Levitiku 3:6, 12, 14-16, cinlikana cani ni nteko Yesu unvarenlyaawe Yehova?

¹⁰ Itthu yoneeraru: Nlattu wonfenta Yehova, ninawiikurumica unvarela nteko womaana. Yehova aawehera makhura onama khampa mphantte womaana wonama yaavahereriye. Uyo ahohimya wiira citthu co mwiirutthuni conama, toko ifyo ni hapa caari citthu cofayita cinene. (Usome Levitiku 3:6, 12, 14-16.) Phimaana, Yehova aanaatteeliya cinene amoonaka nsarayeli avahaka makhura, ifyo ni hapa onama. Nsarayeli aapanka iyo, aathoonyera wiira aanaapheela cinene unvaha Yehova itthu yomaana. Inanna imoca, Yesu aheekurumica wiira anvahe Yehova itthu yomaana yaarinaawe. Nlattu wonfenta Nluku, Yesu ahovara nteko niirooho yotheene. (Joau 14:31) Upanka impheelaawe Nluku yaari itthu yantteeliha nrima Yesu. Uyo aanaafenta cinene nlamulo na Nluku. (Isaa. 40:8) Khweeliini, Yehova ahokhala ootteeliya cinene umoona Yesu apheelaka niiraati unswalela!

11. Nteko unonvareleehu Yehova manannani cinlattanacaaya ni itthuvo co nnema? Ni iyo innimaaliha cani?

¹¹ Toko itthuvo co nnema caavahereriya khalayi, nteko unonvareleehu Yehova, ukhanle nteko ulakenleehu uvara wiira nithoonyere mananna cinonfenteehu Yehova. Hiiva nimpheela unvaha Yehova irineehu yomaana kontha ninanfenta ni nrimeehu wotheene. Wuupuwele mananna Yehova cinontteelaaya nrima awoonaka atthu imiliyawu cene yaalakelaka veekha caya unswalela, nlattu wonfenta uyova ni nlattu woofenta malamulwaawe. Ni unaanimaaliha wuupuwela wiira Yehova nawoona ni naavaha ifayita kahi paahi citthu cimpankeehu, masi uyo nawoona ni naavaha ifayita ciicammo itthu irineehu wanrimani. Wootakihera, wakhala wiira nyuuva nhooluvala ni khannokhitiri-tho uvara cinene nteko wa Yehova toko cimpheeleenyu, nkupali wiira uyo naacuwela nipuro cinvelavelaaya ikuru cinyu. Atthunaka nyuuva nnawoona wiira khiivo irineenyu yoohala unvaha Yehova. Masi uyo nawoona nifento ninyu ninwiirihani upanka ile inkhitiriinyu. Uyo unantteela nrima cinene ukati unaakhelelaawe itthu yomaana inkhitiriinyu unvaha.

12. Yehova oonela cani itthuvo co nnema, ni iyo innilipiha nrima manannani?

¹² Isiyani cinniitthucihaaya itthuvo co nnema? Ukati mooro waapaahaaya miphantte comaana conama, mwiisi waanaawela wiirimu ni Yehova aanaakhala ootteeliya cinene. Phimaana, wakhala wiira weeva uheevaherera uvara nteko wa Yehova ni unawiikurumica unvarela nteko womaana, ukupali wiira Yehova unantteela nrima venci. (Akol. 3:23) Wuupuwele mananna Yehova ciryaawe ootteeliya nlattu wo nteko weeva unonvarelaa. Itthu Yehova inoonaawe ukhala yofayita khunakhala nteko mwinci. Masi wakhala wiira weeva unonvarela nteko nlattu wonfenta, uyo nawoona ukhala wofayita cinene uyo ntekooyo. Ni khweeliini, Yehova khanhala uliyala iyo mpaka.—Mat. 6:20; Mabere. 6:10.

13. Toko cinthoonyeraaya Levitiku 9:23, 24, Yehova aathoonyenre cani wiira uyo phaathanlale anankuttho o phiyaaru?

¹³ Itthu yoneecese: Yehova naavaha iparakha mphwinkwaawe woothotokanihiya wo watuninyani. Wuupuwele itthu yaakhumelenle mwaakha wo 1512 AEC, ukati waamalihiyaaya utthenkaciya itabernaakulu vathi mwaako Sinai. (Nkw. 40:17) Moocesi ahohoolela isukuhuulu Arawu naasaanaawe waathanliyaaya wiira akhale anankuttho. Asarayeli yanoothukumana wiira awoone  anankuttho yavahereraka itthuvo conama coopacera. (Lev. 9:1-5) Yehova aathoonyenre cani wiira uyo phaathanlale anankuttho o phiyaaru? Ukati Arawu ni Moocesi waavahaaya iparakha apoovu, Yehova ahowaana mooro waapahale itthuvo yaavahereriya wakhilompini.—Usome Levitiku 9:23, 24.

14. Kontha isiyani mananna Yehova caathoonyenryaawe wiira aanaakavihera unankuttho wa Arawu naasaanaawe anaaniphwanyiha ifayita ilelo?

¹⁴ Mooro waakhumale wiirimu waathoonyera isiyani? Wathoonyera wiira Yehova aanaakavihera unankuttho waavahiyaawe Arawu ni asaanaawe. Ukati asarayeli woonalyaaya wiira anankuttho o phiyaaru yaanaakaviheriya ni Yehova, khweeliini ayo ciicammo yahopheela waakavihera. Niireke iyo inaaniphwanyiha ifayita hiivano? Iyee! Unankuttho waasarayeli waathoonyera paahi unankuttho muulupale waahala ukhala. Kristu phikhanle Nankutthweehu Muulupale, ni uyo naahala ukhalana mamwene ni anankuttho 144.000 anhala uvara nteko nkhayi ni uyo wiirimu.—Mabere. 4:14; 8:3-5; 10:1.

15-16. Isiyani inthoonyera wiira “ipottha yookhuluvelya ni yankhili” inaakaviheriya ni Yehova?

¹⁵ Mwaakha wo 1919, Yesu ahothanla ikhurupu yankaani yo makristau oothanliya wiira akhale “ipottha yookhuluvelya ni yankhili.” Iyo ipottheeyo phinhoolela nteko woolalyeera ni phinaavaha atthari a Kristu “iyoolya ukati umpheelaaya”. (Mat. 24:45) Niireke cihaavo citthu cinnithoonyera wiira khweeliini ipottha yookhuluvelya inaakaviheriya ni Nluku?

¹⁶ Sotwani ni ituninyaawe nawiikurumica cinene wiira arikarikihe nteko unvaraaya ipottha yookhuluvelya. Waari wiira ipottha yookhuluvelya khinkaviheriya ni Yehova, iyo khayaahala ukhitiri uvara nteko uvahiyaaya. Masi hataa yakhalaka masakha akumihacalyaaya ikhotto piili cuulupale caakhumelenle ntinuniyani, ulupatthiya  venci, uthwaa nsurukhu ni uhuvihiya woohisariya, ipottha yookhuluvelya ni yankhili khinhiya waatthenkacera iyoolya yoominepani atthari a Kristu watuninyani. Wuupuwele iyoolya yoominepani yo mahala yinci irivo ilelo, niiluuka coopwaha 900! Iyo inthoonyera wiira ipottha yookhuluvelya inaakaviheriya ni Nluku. Woone itthu ikhwaawe inthoonyera iparakha ca Yehova: nteko woolalyeera. Ihapari comaana cinaalalyeeriya “ntuninyani motheene munkhaliya.” (Mat. 24:14) Khweeliini, ilelo Yehova naahoolela ni naavaha iparakha mphwinkwaawe woothotokanihiya.

17. Ninhala uthoonyera cani wiira ninaakavihera mphwinko Yehova unvarelaawe nteko ilelo?

¹⁷ Unaareera wiikoha co: ‘Kinaasukhuru nlattu woopanka mphantte mphwinko woothotokanihiya wa Yehova?’ Citthu cinnithoonyera wiira Yehova naakavihera mphwinkwaawe cinawoonannya ratta-raatta, khampa mooro waakhumale wiirimu ukati wa Moocesi ni Arawu. Khacimala citthu cinlamuliyeehu usukhurwela. (1 Atesal. 5:18, 19) Manannani ninlamuliyeehu uthoonyera wiira ninaakavihera mphwinko Yehova unvarelaawe nteko ilelo? Nihaana utthara malakihero ankumihiya mbiiblyani anvahiyeehu mmalivuruni cihu ni ciicammo mmikutthaanoni, mmamithukumanoni cosirikwiitu ni mmakonkreesuni. Uhiya iyo, hiiva pooti uthoonyera wiira ninaakavihera, neekurumicaka cinene uvara nteko woolalyeera ni wiitthuciha.—1 Akor. 15:58.

18. Isiyani weeva ilakenlyaa upanka?

¹⁸ Ulakele weettela citthu cotheene ciitthucaleehu nlivuruni yo Levitiku. Yoopacera, utothe unciveliha Yehova wiira uyo atthune itthuvo cinonvahaa. Yonayeeli, unswalele Yehova nlattu wonsukhuru. Yoneeraru, unvarele nteko womaana Yehova nlattu wonfenta. Ni yoneecese, ukavihere niiraati mphwinko Yehova unvahaawe iparakha. Napanka citthu cotheenennyo, ninaahala unthoonyera Yehova wiira inaanicivela iparakha irineehu yookhala Masaahityaawe!