MWAHA WOOSOMIYA 37
“Kinaarwaa waathukumeliha atthu olapo cotheene”
“Ni mi kinaarwaa waathukumeliha atthu olapo cotheene, ni cinaahala uwaaniya citthu cofayita colapo cotheene.”—AGEU 2:7.
NCIPO 24 Venham Para o Monte de Jeová!
NINHALA WIITTHUCANI? *
1-2. Isiyani porofeeta Ageu yenryaawe wiira yanhala wiirannya ala mahukwaala?
ATTHU enci yoopwaale ukati waattettemenlyaaya itthaya u Nepal, mwaakha wo 2015 yenre co: “Nhina iminutu vakaani paasi, ilooja ni ipereetiyu cokhalayi cahancera uphomwaaca.” “Atthu otheene yahokhala owoova cinene. . . . Enci yenre wiira uyo ukatyuuyo itthaya yaattettemenle iminutu piili paasi. Masi koopuwelaka inanna caamaruwacaaya citthu, waakhala khampa caavinre myaakha cinci itthaya yattettemelaka.” Unari wiira nyuuva yahookhumelelani itthu toko iyo, khweeliini khamwaahala uliyala.
2 Ala mahuku ankhaleehwaala, uhaavo uttettemela kahi wotthaya yolapo imoca paasi, masi uttettemela wolapo cotheene ntuninyani ni nwo uttettemelanwo upacenre myaakha cinci uttuli. Porofeeta Ageu ahorumiya uhimya wiira iyo itthwiiyo yanhala wiirannya ala mahukwaala. Uyo ahantikha co: “Kontha cole phineeraawe Yehova, nhooleli aanakhotto: ‘Unhaleela ukati vakaani wiira toothooni kithukumelihe irimu, itthaya, ipahari ni itthaya yowuuma.’”—Ageu 2:6.
3. Nlattuni nineereehu wiira porofeeta Ageu khaacile uttettemela itthaya unkwanyulaca inupa ni citthu cikhwaawe?
3 Porofeeta Ageu khaacile uttettemela itthaya unkwanyulaca inupa ni citthu cikhwaawe. Masi uttettemela woolumilyaawe unaawaana ifayita. Kontha Yehova aheera co: “‘Ni mi kinaarwaa waathukumeliha atthu olapo cotheene, ni cinaahala uwaaniya citthu cofayita colapo cotheene; ni ila inupeela kinaahala ucariha uttitthima waka’, neera Yehova, nhooleli aanakhotto.” (Ageu 2:7) Iyo inatiriiyo yaakavihenre cani atthu yaakhala ukati wa porofeeta Ageu? Ni innikavihera cani ilelo? Nimpheela woopela mwaha ayo makohwaayo ni ucuwela manannani cinhaleehu ukavihera nteko unthukumeliha ilapo cotheene.
IHAPARI YAHAAKURUMICA ATTHU YAAKHALA UKATI WA POROFEETA AGEU
4. Yehova anrumenleni porofeeta Ageu urwaa uwoonanana ayuuta?
4 Yehova ahonvaha porofeeta Ageu nteko muulupale. Muupuwele itthu yaakhumelenle Ageu hinaaya uvahiya uyo ntekooyo. Ageu atthunaka aapanka mphantte ikhurupu ya ayuuta yaakhumile u Babilooniya yaturuwelaka u Yerusalemu, mwaakha wo 537 hinatthi uwa Kristu. Uphiya waya u Yerusalemu, ayo aswali a Yehova ookhuluvelyaayo yahancera uteka itempulu, awula inupa ya Yehova. (Estra 3:8, 10) Masi woohipica, yaheerannya itthu yooriipiha nrima. Atakhali yahancera waaririiha makhuva ayuuta ni waahiiha uteka itempulu ya Yehova. (Estra 4:4; Ageu 1:1, 2) Phimaana, mwaakha wo 520 hinathi uwa Kristu, Yehova ahonruma porofeeta Ageu urwaa uwoonanana ayuuta ni waalipiha makhuva wiira aturuwele uteka itempulu. *—Estra 6:14, 15.
5. Kontha isiyani ihapari ca porofeeta Ageu cahaalipiha apoovu a Nluku?
5 Porofeeta Ageu aapheela waavaha ayuuta ihapari coohala ulipihaca umwaamini waya Yehova. Athoonyeraka ulipa nrima, porofeeta Ageu ahowiirela co apoovu: “‘Nkhale ookhomaala otheene cinyu, atthu o ila ilapweela. Kontha mi kiri ni nyuuvaca,’ neera Yehova, nhooleli aanakhotto.” (Ageu 2:4) Nuulumo “Yehova, nhooleli aanakhotto” nahaalipiha cinene apoovu. Yehova naahoolela itoropa yo malayikha enci ammwiiwelela. Phimaana, ayuuta wiira akhale saana yahaana yankhuluvelaka Yehova.
6. Isiyani yaakhumelenle porofeeta Ageu waahimenryaawe apoovu inatiri yoothukumelihiya ilapo?
6 Yehova ahonruma porofeeta Ageu uwiirela ayuuta wiira anhala uthukumeliha ilapo cotheene. Iyo ihapariiyo yahaalipiha ayuuta yaalolovale ni yaahiile uteka itempulu, kontha yaathoonyera wiira Yehova aanaahala uthukumeliha ilapo yo Pérsia. Isiyani yaahala wiirannya? Yoopacera, apoovu a Nluku yanhala umaliha uteka itempulu. Ni hataa atthu yahaari ayuuta yanhala waatakaneelana ayuuta ni unswalela Yehova nkhayi nhina itempulu yaatekiye phiyaaru. Khweeliini, moolumo a porofeeta Ageu yahaalipiha cinene apoovu a Nluku!—Zakar. 8:9.
NTEKO UNTHUKUMELIHA ILAPO ALA MAHUKWAALA
Nyuuva munneekurumica uvara cinenenteko unttettemeliha ilapo co ntuninyani? (Nwehe iparaagarafu 7-8) *
7. Ntekoni unvareehu ilelo unthukumeliha ilapo cotheene? Ntaphulele.
7 Inatiri ya porofeeta Ageu innikavihera cani ilelo? Toko khalayi, Yehova naathukumeliha ilapo cotheene ilelo; masi ula nkwahoola, hiiva ninaakavihera uthukumeliha nnyo ilaponnyo. Muupuwele ila itthwiila: mwaakha wo 1914, Umwene wa Nluku wahancera ulamulela wiirimu ni Yehova honkhaliha Yesu Kristu Mwene o uyo umwennyooyo. (Isaa. 2:6) Ahooleli o ntuninyani yahorusiya nlattu woocuwela iyo itthwiiyo. “Mahuku avahaceriyaaya amalaponi ulamulela” yahophiya umwiiso waya. Nimoolumacero makhwaawe, wahomala ukati Yehova waakhanlyaawe haathanlaka mamwene wiira yaahoolele apoovwaawe. (Luka 21:24) Phimaana, ukhuma mwaakha wo 1919, apoovu a Yehova yahancera waahimyeera atthu otheene wiira Umwene wa Nluku paahi phi ikuvernu imoca inhala ukhitiri umaliha masakha otheene aapinaatamu. Ukhuma ule ukatyule, nteko woolalennya “nnya ihapari comaana co Umwene nnya” unaattettemeliha ituninya yotheene.—Mat. 24:14.
8. Toko cinthoonyeraaya Isaalimu 2:1-3, atthu o ntuninyani anwehera cani ihapari cinlalyeehu?
8 Atthu o ntuninyani anwehera cani ihapari cinlalyeehu? Atthu enci khacinaacivela ni anaakhotta wiiwelela. (Nsome Isaalimu 2:1-3. *) Atthu olapo co ntuninyani anaathukumela. Ayo anankhotta Nhooleli thanliye ni Yehova. Ayo atthwaayo anoopuwela wiira ihapari cinlalyeehu khacinakhala “ihapari comaana.” Ni mpaka ahaavo ahooleli annikhottiha uvara nteko woolalyaa nnyo ihaparinnyo! Hataa ahooleli osiyaasa enci yiiraka wiira ananswalela Nluku, ayo khanaamini uhiya uhoolela ni ukhulupale urinaaya. Phimaana, khampa ahooleli yaakhala ukati wa Yesu, ayo ananrukunuwela Yesu, Mwene thanliye ni Yehova ukati unaalupatthaaya attharyawe ookhuluvelya.—Mite. 4:25-28.
9. Isiyani Yehova impankaawe hataa atthu yakhottaka ihapari cawe?
9 Yehova naawehera cani atthu ankhotta wiiwelela ihapari cawe? Isaalimu 2:10-12 ineera: “Vano nyu mamwene, nthoonyere ukhalana ankhili omaana; ntthune ulakiya nyu masuwiisi o watuninyani. Munswalele Yehova nthoonyeraka umoova, ni nthoonyeraka utteeliya wanrimani winyu. Munttitthimihe mwaana, wiira Nluku hirusiye ni nyu, ni wiira nhikhwe niiphiro, kontha urusiya wawe unhala uwa nhiwehereraka. Atteeliye otheene ale anontthawelela Nluku.” Nlattu wo nifento nawe, Yehova nanlelo nawaavaha ukati alupatthyaawe wiira arukunuse mirima caya ni yaakhelele Umwene wa Nluku. Masi uyo ukatyuuyo unaavira umalaka. Ilelo ninkhala “mahuku ookhicera” o ila ituninyeela. (2 Tim. 3:1; Isai. 61:2) Nnava phuukati atthu unlamuliyaaya wiitthuca ikhweeli ca Nluku ni uthanla unswalela.
ATTHU AKIINA ANAAWEHERA RATTA UTTETTEMELA WOLAPO
10. Khampa cinhimyaaya Ageu 2:7-9, itthuni yomaana yaahala wiirannyaa nlattu woottettemelihiya ilapo co ntuninyani?
10 Ahaavo atthu anwehera ratta uttettemelihiya wolapo co ntuninyani waahimilyaawe porofeeta Ageu. Uyo hottonkaca isiyani yaahala ukhumelela ukati waahalaaya uttettemelihiya ilapo co ntuninyani: “citthu cofayita [awula atthu omaana] olapo cotheene” yanhala wancera unswalela Yehova. * (Nsome Ageu 2:7-9. *) Ni maporofeeta akhwaawe toko Isaiya ni Mikeya ciicammo yahooluma itthu toko iyo yaahala wiirannya ukati wo ‘mahuku ookhicera.’—Isai. 2:2-4, niwehero; Mik. 4:1, 2, niwehero noopacera.
11. Amunna Ken waakhanle cani nrimaaya ukati waapacerihalyaaya wiiwa ikhweeli co Umwene wa Nluku?
11 Wootakihera, muupuwele itthu yaakhumelenle amunna Ken, nnava anvara nteko nipuro ninhooleliya miteko cihu ntuninyani. Ukhuma nihuku naapacerihalyaaya wiiwa ihapari co Umwene wa Nluku mpaka nnva, cihovira myaakha 40. Masi mpaka ilelo, ayo amunnaayo anawuupuwela inanna caakhanlyaaya nrimaaya ukati wiiwalyaaya ihapari comaana. Ayo aneera: “Ikwaha yoopacera wiiwalyaaka ikhweeli co mbiiblyani, mi kahokhala ootteeliya cinene nlattu woocuwela wiira hiiva ninkhala ukati wo mahuku ookhicera. Mi kaheetthuca wiira kihaana kihiyaka uttharatthara citthu co ila ituninyeela, ni kahaana kikhalaka mphantte wa Yehova wiira kiphwanye ukumi woohimala. Phimaana, kahonlompa Nluku, kahohiya uttharatthara ila ituninyeela ni kahototha ukhikiceriya nuumwene wa Nluku. Ni uyo umwennyooyo khweeliini khunhala umalamala.”
12. Ala mahuku ookhiceraala, Yehova nttitthimihiya cani?
12 Otheene ninaakupali wiira Yehova ri mowaacaaliha apoovwaawe. Ala mahuku ookhiceraala, ninnowoona yunceryaaka atthu anonswalela Nluku. Mwaakha wo 1914, naari vakaani. Masi ilelo, niri atthu oopwaha 8 milhões nineekurumica unswalela Nluku ni atthu akhwaawe enci anawuupuwelela wamoca ni hiiva ukhwa wa Yesu Kristu khula mwaakha. Coo, wapuwani wawe Yehova va watuninyani va awula mphwinko uthotokanihalyaawe wiira upanke uswali weekhweeli unaavira utepaka ucara “citthu cofayita colapo cotheene.” Iyo ikhanle itthu inonttitthimiha Yehova. Masi itthu ikhwaawe ciicammo inttitthimiha ncina na Yehova akhanle marukunuso ayo atthwaayo ampankaaya wiira ahiye meettelo yaarinaaya khalayi ni athoonyere meettelo ophiyaaru.—Efesu 4:22-24.
Apoovu a Nluku ntuninyani motheene anaavara nteko wo waalalyeera atthu ihapari co Umwene wa Nluku waatteelaka nrima (Nwehe iparaagarafu 13)
13. Wuncererya wo atthu anonswalela Yehova uneerannyeeha inatirini cikiina co mbiiblyani? (Nwehe ilatarato yo wakaapani.)
13 Citthu cineerannya cotheenennyo cinawiirannyeeha inatiri cikhwaawe co mbiiblyani, toko ile imphwanyannya nhina Isaiya ikapiitulu 60. Iveerusu 22 yo iyo ikapiitulwiiyo ineera: “Atthu vakaani anaahala ukhala ikontu imoca. Ni ikhurupu yankaani inaahala ukhala ilapo yoolipa. Miiva Yehova kinaahala wiirannyeeha iyo itthwiiyo wowaakuvyaaca waphiyaka ukatyaaya.” Nlattu woovira yincivaka atthu anonswalela Nluku, inawiirannya itthu yooreera cinene. Yawaaka wamphwinkoni woothotokanihiya wa Yehova, ayo atthwaayo anaawaana ucuwelaca waya, ni ulalya niiraati “ihapari comaana co Umwene wa Nluku.” Ni apoovu a Yehova anaaphwanyera ifayita cinene ucuwelaca wo ayo atthwaayo Isaiya wiihannyaawe “ileeti yaamalaponi.” (Isai. 60:5, 16) Nlattu wo wiikurumica waya ayo alopwana ni athiyana oocuwelacaayo, unaakhitirya ulalya ihapari comaana nlaponi 240 ni cinaapankiya ilivuru niiluuka coopwaha 1.000.
ULA PHUUKATI WOOLAKELA UPANKA ITTHU
14. Isiyani inlamuliyaaya uthanla atthu otheene?
14 Nlattu Yehova woothukumeliha ilapo co ntuninyani ula ukati wookhiceroola, atthu enci ahaana yathanlaka wakhala wiira anhala ukhuluvela Umwene wa Nluku awula waakhuluvela ahooleli o ila ituninyeela. Iyo ikhanle itthu yuulupale inlamuliyaaya atthu otheene ulakela upanka. Hiiva nikhanle aswali a Yehova khaninaarukunuwela ahooleli ookuvernu. Khampa aswali a Yehova, ninawiiwelela malamulo ookuvernu, masi khanineekelakeliha myaha cosiyaasa co ila ituninyeela. (Aroo. 13:1-7) Hi ninaacuwela wiira Umwene wa Nluku paasi phinhala ukhitiri umaliha masakha aapinaatamu otheene. Uyo ukhanle Umwene uhimpanka mphantte wo ila ituninyeela.—Joau 18:36, 37.
15. Isiyani inhala uwiirannyeela apoovu a Nluku ilivuru ya Apokalipise inhimyaaya?
15 Ilivuru ya Apokalipise inaahimya wiira mahuku ookhicera, apoovu a Nluku yaanaahala uttehiya. Ni khweeliini ninaahala ulupatthiya cinene. Ahooleli ookuvernu anaahala unikhanyereriha waaswalela awula ukhala mphanttyaaya ni anaahala unlupattha otheene ule nohala ukhotta upanka impheelaaya. (Apoka. 13:12, 15) Ayo anaahala ‘waakhanyereriha atthu otheene, asaana ni oolupale, mathacari ni ahuvi, ipottha ni ale ahikhanle ipottha, wiira atthittiye moono wonlopwana awula wayuuci.’ (Apoka. 13:16) Khalayi, ntthu aari ipottha aanaaheliya ntthitto noohikhuma nanhimya mwaneene iyo ipottheeyo. Inanna imocaaru, mahuku olelo ahooleli ookuverno anhala upheela wiira atthu otheene akhalane ntthitto, awula athoonyere tipani nonkaviheraaya. Citthu cinoopuwelaaya ni cimpankaaya atthu phinhala uthoonyera wiira ayo ari mphantte waanasiyaaya.
16. Kontha isiyani nihaana wiiweheeha wakhala wiira khweeliini ninnonvaresesa Yehova?
16 Vano hiiva? Niireke ninaahala utthuna ukhalana nno ntthittonno? Ninaahala ukhala mphanttyaaya ayo ahoolelyaayo? Ntthu nohala waakhottela ayo ahoolelyaayo anaahala unkhumelela masakha ni citthu cinci cowoopiha. Ilivuru ya Apokalipise ineera wiira otheene ale ahinhala ukhalana ntthitto, khaavo nohala uthuma awula utumiha citthu. (Apoka. 13:17) Masi aswali a Nluku anaacuwela itthu Nluku inhalaawe waapanka ale anhala ukhalana ntthitto ninhimiya nhina Apokalipise 14:9, 10. Phimaana, uhiya waakhela nno ntthittonno, khula nswali a Yehova nhala wantikha mmatatani wawe co: “Kiri mphantte wa Yehova.” (Isai. 44:5) Ula phuukati wo wiiweheeha wakhala wiira khweeliini ninnonvaresesa Yehova. Wakhala wiira khweeliini ninanvaresesa, Yehova naahala unaakhelela ninrimaawe untteelaka!
UTTETTEMELA ITTHAYA WOOMALIHERA
17. Isiyani inlamuliyeehu wuupuwela nhina uvilela wa Yehova?
17 Ala mahuku ookhiceraala Yehova naavilela cinene. Uyo khaavo ntthu nompheelaawe wiira akhwe ukati unhalaawe waamalamaliha atthu oohinamaana. (2 Pet. 3:9) Yehova nawaavaha atthu otheene ukati woorukunusa mirima caya ni uthanla upanka citthu comaana. Masi nihaana nuupuwelaka wiira uvilela wa Yehova unaahala uphiya umwiiso. Ntthu nohala uviriiha ukati unvahiyaawe ni Nluku wiira arukunuse nrimaawe, nohala umalela khampa caamalenlyaawe Farawoo, ukati wa Moceesi. Yehova ahomwiirela Farawoo: “Unari wiira kahopheela, mi pooti waahalaaka wuutaphulelani ntata naka, weeva wamoca naapoovwaa, kuuwaanelakani ihasara yuulupale, ni wuumalamalihani va watuninyani va. Masi, kihoohiyani ukhala akumi nlattu wo ila itthwiila: wiira kuuthoonyereni ikuru caka ni wiira ncina naka nisipiye ntuninyani motheene.” (Nkw. 9:15, 16) Atthu olapo cotheene anaahala waamini—utthuna nuuhitthuna—wiira Yehova paasi thi Nluku eekhweeli. (Ezek. 38:23) Iyo itthwiiyo inhala wiirannya cani?
18. a) Inannani ikiina yoottettemela itthaya inoolumiya nhina Ageu 2:6, 20-22? b) Nincuwela cani wiira moolumo a Ageu anhala wiirannya wahoolo?
18 Uvira waya myaakha cinci Ageu nakhwile, apostolu Paulu ahorumiya ni Nluku uhimya wiira moolumo ari nhina Ageu 2:6, 20-22 yaahala wiirannya wahoolo. (Nsome. *) Apostolu Paulu hantikha co: “Nnava uyo hokhuluveliha wenryaawe: ‘Toothooni kinaahala uttettemeliha kahi paahi itthaya, masi ciicammo irimu.’ Nuulumo ‘toothooni’ ninthoonyera umalamalihiya citthu cinhala uttikhinyiya, citthu coopankaciya naatthu, wiira cihale citthu cihinhala uttikhinyiya.” (Mabere. 12:26, 27) Masi nwo uttettemelanwo unaavirikana nuuttettemela uhimiye nhina Ageu 2:7; nwo uttettemelanwo ukhanle umalamalihiya ale anhala ukhotta ukhulupale wa Yehova toko Farawoo.
19. Waviraka uttettemela wotthaya, isiyani inhala uhala? Nincuwela cani iyo?
19 Isiyani ihinhala uttikhinyiya ni umalamalihiya? Apostolu Paulu nawaakhula, wiira wawe: “Ukhala wiira nihaakhela Umwene wa Nluku uhinhala uttikhinyiya, nihihiye uphwanyera ifayita maana oonironya annithoonyeraawe Nluku, annikavihera uvara miteko ca Nluku toko cimpheelaawe nithoonyeraka umoova ni unhisima.” (Mabere. 12:28) Waviraka nwo uttettemela woomaliheranwo, Umwene wa Nluku paasi phinhala uhala ni unkookhala mpaka!—Isaa. 110:5, 6; Dan. 2:44.
20. Itthuni yomaana inlamuliyaaya uthanla atthu, ni ninhala waakavihera cani uthanla upanka iyo itthwiiyo?
20 Ukati uhanle uri vakaani! Atthu ahaana yathanlaka ukhalana nanlelo meettelo o ntuniyani awula wiikurumica weettela impheelaawe Nluku. Yathanlaka utthara meettelo o ntuniyani, anaahala ukhwa nihuku nookwanyulaciyaka ni Nluku ila ituninya yoohinamaaneela; masi yathanlaka weettela impheelaawe Nluku, anaahala uphwanya ukumi woohimala. (Mabere. 12:25) Navaraka nteko woolalyeera hiiva ninawaakavihera upana iyo itthu yomaaneeyo. Nihihiye waakavihera ayo atthwaayo ukhala mphantte wo Umwene wa Nluku, nihiliyalaka itthu Apwiya Yesu yoolumalyaaya: “Nnya ihapari comaana co Wuumweneni nnya cinaahala ulalennya ntuninyani motheene munkhaliya, yahimyeriyaka atthu o khula ilapo; vano phinhalaaya umala ulumwenku wotuninya”—Mat. 24:14.
NCIPO 40 Weeva uhonthanla?
^ par. 5 Ula mwahoola unaahala urukunusa mananna caataphuleleehu itthu inhimyaaya Ageu 2:7. Ninaahala wiitthuca mananna ookavihera nteko muulupale unthukumeliha ilapo cotheene. Ciicammo ninaahala woona manannani atthu akiina anweheraaya saana uyo ntekooyo ni akhwaawe ahinweheraaya ratta.
^ par. 4 Ninaacuwela wiira Ageu ahovara saana nteko waarumiyaawe ni Yehova, kontha itempulu yahomalihiya utekiya mwaakha wo 515 hinatthi uwa Kristu.
^ par. 8 Isaalimu 2:1 Kontha isiyani atthu olapo cinci anaapanka nkhitto ni apoovu enci anawuupuwela upanka citthu coohimancira? 2 Mamwene o watuninyani anawiitthenkaca ni ahooleli anaathukumana wiira amwaanane Yehova ni ule nthanlalyaawe. 3 Ayo aneera: “Nttwee niitthukule unyolo ni nikwattule mikhoyi cinitthukalyaaya.”
^ par. 10 Nna nrukunuso no itthu yaakupaliihu khalayi. Mmalivuruni wihu, nahooluma wiira kahi uyo hinttettemelihiyooyo phaahala uwiiriha atthu weettela uswali weekhweeli. Nwehe “Makoho Aanamasoma” nrevistani Ukhalenla 15 yo Maio yo 2006.
^ par. 10 Ageu 2:7 “Ni mi kinaarwaa waathukumeliha atthu olapo cotheene, ni cinaahala uwaaniya citthu cofayita colapo cotheene; ni ila inupeela kinaahala ucariha uttitthima waka,” neera Yehova, nhooleli aanakhotto. 8 “Iparasata ikhanle yawaka, ni iwooru ikhanle yawaka,” neera Yehova, nhooleli aanakhotto. 9 “Uttitthima unhalaaya ukhalana ila inupeela wahoolo unaahala uvikana inupa yaatekiye wiipaceroni,” neera Yehova, nhooleli aanakhotto. “Kinaahala uwaana nnema nna nipuronna,” neera Yehova, nhooleli aanakhotto.
^ par. 18 Ageu 2:6 Kontha cole phineeraawe Yehova, nhooleli aanakhotto: Unhaleela ukati vakaani wiira toothooni kithukumelihe irimu, itthaya, ipahari ni itthaya yowuuma. 20 Nihuku 24 no ule mweeryuule, Ageu ahaakhela nuulumo na Yehova ikwaha yonayeeli: 21 “Umwiirele Zorobabel, nhooleli o Yuuta: ‘Kinaahala uttettemeliha irimu ni itthaya. 22 Kinaahala ukwanyulaca ihice co mamwene ni kinaahala umalamaliha ikuru co mamwene olapo cotheene; kinaahala ukwanyulaca ikaaro cokhotto ni ale anvarela nteko nnyo ikaaronnyo; ikhavalu ni ale aneettiha nnyo ikhavalunnyo, otheene kinaahala waamalamaliha niikatana ya munnaaya.’”
^ par. 66 ILATARATO: Ageu aalipihaka makhuva apoovu wiira yiikurumice umaliha uteka itempulu. Ilelo, apoovu a Nluku anawiikurumica uvara nteko woolalya ihapari comaana. Amunneehu naamwaaraya yaahimyeeraka atthu uttettemela wotthaya unhala wiirannya woohipica.
