MWAHA WOOSOMIYA 17
“Kinwiihanani apatthannyaaka”
“Kinwiihanani apatthannyaaka, kontha kihoohimyerani citthu cotheene ciwiiwalyaaka Apaapa.”—JOAU 15:15.
NCIPO 13 Cristo, o Nosso Exemplo
NINHALA WIITTHUCANI? *
1. Wiira atthu eeli akhalane upatthani woolipa, isiyani inlamuliyaaya upanka?
WIIRA atthu eeli akhalane upatthani woolipa, cihaavo citthu cinlamuliyaaya upanka. Itthu yoopacera ukhanle uviriha ukati anari nkhayi, woopaca mwaha, uvahana miruku ni khula ntthu uhimya citthu cinkhumelenle muukumini wawe. Yapankaka commo phinhalaaya ukhitiri ukhalana upatthani woolipa. Masi ukhalana upatthani woolipa ni Yesu ukati nkiina unaarika. Nlattuni?
2. Itthuni yoopacera innirikihela ukhalana upatthani ni Yesu?
2 Itthu yoopacera innirikihela ukhalana upatthani ni Yesu, ukhalaka wiira khaninapaca umoona. Makristau enci yaakhala ukati woseekulu yoopacera ciicammo khayaamoonale Yesu. Waanookhalaru commo, apostolu Peturu aheera: “Uhookhalaru wiira khannapaca umoona, nyuuva nnanfenta. Uhookhalaru wiira nna va khannomoona, nyuuva nnamwaamini.” (1 Pet. 1:8) Iyo inthoonyera wiira hiiva pooti ukhitiri ukhalana upatthani woolipa ni Yesu, hataa ukhalaka wiira khaninapaca umoona.
3. Itthuni yonayeeli innirikihela ukhalana upatthani ni Yesu?
3 Itthu yonayeeli phi ila: hiiva khaninkhitiri umuulumana Yesu. Ukati woolompa, hiiva nimmuulumana Yehova. Hiiva ninlompa mwancina na Yesu, masi hataa ukhalaka commo, khaninamuulumana Yesu. Khweliini, Yesu khampheela wiira nimuulumane ukati unlompeehu. Kontha isiyani? Kontha ulompa ukhanle uswali, ni Yehova paahi phinlamuliyeehu unswalela; khaninlamuliya unswalela ntthu nkhwaawe. (Mat. 4:10) Hataa ukhalaka commo, hiiva pooti uthoonyera wiira ninanfenta Yesu.
4. Itthuni yoneeraru innirikihela ukhalana upatthani ni Yesu, ni isiyani ninhaleehu wiitthuca nhina ula mwahoola?
4 Itthu yoneeraru: Yesu nkhala wiirimu, ni hiiva khaninkhitiri uviriha ukati nkhayi nuuyo. Masi hataa ukhalaka commo, hiiva pooti ucuwela citthu cinci ca Yesu. Nhina ula mwahoola, ninaahala wuupuseriya citthu ninlamuliyeehu upanka wiira nilipihace upatthaniihu ni Yesu. Masi woopacera, nttwee noone nlattuni otheene cihu ninlamuliyeehu ukhalana upatthani woolipa ni Kristu.
NLATTUNI NINLAMULIYEEHU UKHALA APATTHANI A YESU?
5. Nlattuni ninlamuliyeehu ukhala apatthani a Yesu? (Uwehe ciicammo ikwaaturu “ Ukhala mpatthani a Yesu unawuukhaliha mpatthani a Yehova” ni “ Unwehere ratta Yesu.”)
5 Nihaana nikhalaka apatthani a Yesu wiira nikhalane upatthani womaana ni Yehova. Nlattuni? Nlattu wo citthu piili. Itthu yoopacera: Yesu howiirela attharyaawe: “Apaapa anawuufentani, kontha nyuuva nnaakifenta.” (Joau 16:27) Uyo ciicammo heera: “Khaavo nhala waaphiyeera Apaapa hipacale ukiphwanya.” (Joau 14:6) Umananiha ukhala mpatthani a Yehova woohipaca ukhalana upatthani woolipa ni Yesu, unaalikanaca nuumananiha ukela mpaani masi woohivira wankhora. Yesu ahotakihera itthu imocaaru ukati wenryaawe wiira uyo khanle “nkhora wokhontwaa.” (Joau 10:7) Itthu yonayeeli: Yesu naatakiha ratta-raatta makhalelo arinaaya Athumwaane. Uyo howiirela attharyaawe: “Ule konne mi, ciicammo howoona Apaapa.” (Joau 14:9) Phimaana inanna imoca hiiva yoncuwela ratta Yehova, ukhanle usoma makhalelo a Yesu. Nancuwelaka ratta Yesu, ninaahala utepa unfenta. Ni natepaka unfenta Yesu, ninaahala ciicammo utepa waafenta Athumwaane.
6. Nlattuni-tho ninlamuliyeehu utotha ukhalana upatthani ni Yesu? Utaphulele.
6 Nihaana nikhalanaka upatthani ni Yesu wiira mavekelweehu yaakhuliye. Nalompaka, khuntosa paahi wiira: “Mwancina na Yesu.” Nihaana nikupaliki wiira Yehova honvahacera Yesu waakhula mavekelweehu. Yesu ahowiirela maapostolu: “Citthu cotheene cinhaleenyu ulepela mwancina naka, mi kinaahala upanka.” (Joau 14:13) Ninaacuwela wiira Yehova naaviriyana ni nawaakhula mavekelweehu. Masi Yehova apheelaka waakhula nivekelo nihu, uyo nonvahacera Yesu wiira aapanke itthu Yehova ilakenlyaawe. (Mat. 28:18) Phimaana, Yehova hinaaya waakhula mavekelweehu, uyo naaniweha wakhala wiira ninaweettela ikano Yesu inivahalyaawe. Yesu heera: “Kontha mwaalevelelaka apinaatamu coottheka caya, Athumwaninyu ciicammo anaahala wuulevelelani coottheka cinyu; masi mwaahaaleveleleke apinaatamu coottheka caya, Athumwaninyu ciicammo khanhala wuulevelelani coottheka cinyu.” (Mat. 6:14, 15) Khweeliini, ikhanle itthu yofayita cinene hiiva waawacera saana akhwiihu toko Yehova ni Yesu cinniwaceraaya!
7. Tipani nhala uphwanyera ifayita cinene wiivaherera wa Yesu?
7 Atthu ankhalana upatthani woolipa ni Yesu phinhala paahi uphwanyera ifayita cinene wiivaherera wa Kristu. Nincuwela cani iyo? Kontha Yesu heera wiira aanaahala ‘uvaha ukumyaawe wiira awoopole apatthannyaawe.’ (Joau 15:13) Hataa ciicammo atthu akhanle khalayi hinaaya Yesu uwa watuninyani, anaahala wiitthucihiya wiira yancuwele Yesu ni yanfente. Alopwana ni athiyana toko Aparahaamu, Sara, Moocesi ni Raapi anaahala wunwelelihiya, masi ahaana yarwaaka ukhala apatthani a Yesu wiira yaakhele ukumi woohimala.—Joau 17:3; Mite. 24:15; Mabere. 11:8-12, 24-26, 31.
8-9. Toko cinthoonyeraaya Joau 15:4, 5, ukhalana upatthani ni Yesu unnikavihera uvara ntekoni, ni nlattuni uyo ntekooyo ukhanlyaaya wofayita?
8 Hiiva unaanitteela nrima cinene nlattu woovara nteko woolalyeera ni wiitthuciha ihapari comaana co Umwene wamoca ni Yesu. Ukati Yesu waaryaawe watuninyani, uyo aari mwiitthucihi omaana. Uturuwela wawe wiirimu, Yesu hokhala nhooleli o nloko no makristau ni nanlelo naawacera nteko woolalyeera ni wiitthuciha ihapari comaana. Yesu nawoona ni naavaha ifayita khula itthu weeva impankaa wiira waakavihere atthu enci uncuwela uyova ni Athumwaane. Khweeliini, hiiva ninkhitiri uvara uyo ntekooyo kontha Yehova ni Yesu anaanikavihera.—Usome Joau 15:4, 5. *
9 Nuulumo na Nluku ninaathoonyera sana-saana wiira naapheela unciveliha Yehova, nihaana unfenta Yesu ni wiikurumica wiira nno nifentonno nihilolove. Phimaana, nttwee noone citthu cese ninlamuliyeehu upanka wiira nikhale apatthani a Yesu.
NINLAMULIYA UPANKA ISIYANI WIIRA NIKHALE APATTHANI A YESU?
Weeva unhala ukhala mpatthani a Yesu (1) wancuwelaka ratta, (2) watakihaka citthu coopuwelaawe ni caapankaawe, (3) waakaviheraka asunnawe Kristu ni (4) wakaviheraka citthu cinlakeliya mumphwinkoni wa Yehova (Uwehe iparaagarafu 10-14) *
10. Itthuni yoopacera ninlamuliyeehu upanka wiira nikhale apatthani a Yesu?
10 (1) Uncuwele Yesu. Ninhala uncuwela Yesu nasomaka ilivuru ya Matewus, Markus, Luka ni Joau. Nakumihaka ukati wiira nuupuwele ihantisi co mbiiblyani cinooluma makhalelo a Yesu, ninawiitthuca unfenta ni unhisimu Yesu. Uyo aanawaawacera ratta atthu. Wootakihera, Yesu khaawacera attharyaawe khampa ipottha hataa ukhalaka wiira uyo aari Pwiiyaaya. Uhiya commo, uyo aanaawuulumana ni aanawaahimyera citthu coopuwelaawe ni caamwiira wanrimani wawe. (Joau 15:15) Awoonaka attharyaawe anari ni masukhuli, uyo waanaamwiira uthunku ni aanawunla wamoca naayo. (Joau 11:32-36) Hataa alupatthi a Yesu yaanaakupali wiira ale yaaviriyana ihapari caalalyaawe, phaakhala apatthannyaawe. (Mat. 11:19) Natakihaka mananna Yesu caawaceraawe attharyaawe, hiiva ninawiiwanana naakhwiihu, ninaakhala ootteeliya nrima ni ninaatepa unsukhuru ni unfenta Yesu.
11. Itthuni yonayeeli ninlamuliyeehu upanka wiira nikhale apatthani a Yesu, ni kontha isiyani iyo ikhanle itthu yofayita?
11 (2) Utakihe citthu coopuwelaawe ni caapankaawe Yesu. Nacuwelaka mananna Yesu coopuwelaawe ni neekurumicaka utakiha, upatthaniihu nuuyova unaahala utepa ulipa. (1 Akor. 2:16) Ninhala untakiha cani Yesu? Woone ntakihero nimoca. Yesu khaahoolelihera upanka citthu cancivela, masi aanawiikurumica waakavihera akhwaawe. (Mat. 20:28; Aroo. 15:1-3) Ukhala wiira Yesu phoopuwelaawe commo, uyo aanawiivaherera waapankela citthu akhwaawe ni aanawaalevelela. Uyo khaakuva urusiya nlattu wo citthu coolumeliyaawe naatthu. (Joau 1:46, 47) Yesu khanwehera pusya ntthu nlattu wo citthu coohinamaana uyo ntthuuyo caapankalyaawe khalayi. (1 Tim. 1:12-14) Waawehera akhwiihu toko Yesu caaweheraawe ikhanle itthu yofayita, kontha Yesu heera: “Atthu otheene anaahala ucuwela wiira nyuuva nkhanle attharyaaka: mwafentanaka.” (Joau 13:35) Wiikohe co: “Kiireke kinantakiha Yesu kiikurumicaka wiiwanana ni mayamunnaaka ni naasirokoraka o wanlokoni?”
12. Itthuni yoneeraru ninlamuliyeehu upanka wiira nikhale apatthani a Yesu, ni manannani ninlamuliyeehu upanka iyo?
12 (3) Waakavihere asunnawe Kristu. Citthu cotheene cimpankeehu wiira naakavihere asunnawe Yesu, uyo nwehera khampa ninompankela uyova. (Mat. 25:34-40) Yesu haaruma makristau oothanliya ulalyeera ihapari co Umwene ni waapanka eetthuci. Navaraka uyo ntekooyo, ninthoonyera wiira ninawaakavihera asunnawe Kristu. (Mat. 28:19, 20; Mite. 10:42) Makristau oothanliya khayaahala ukhitiri ulalyeera ihapari comaana ntuninyani motheene veekha caya, woohikaviheriya naale akhanle “ikhontwaa cikiina.” (Joau 10:16) Waakhala wiira weeva umpanka mphantte ikhurupu yokhontwaa cikiina, uhiliyale wiira khula nkwaha weeva unvaraa uyo ntekooyo, khunaathoonyeraka nifento asunnawe Kristu paahi, masi ciicammo unthoonyera wiira unanfenta Kristu.
13. Ninlamuliya weettela cani ikano Yesu ivahalyaawe nhina Luka 16:9?
13 Ahaavo mananna makhwaawe owaakavihera asunnawe Kristu. Inanna imoca ukhanle ucanka nsurukhwiihu wiira nikavihere nteko Yehova ni Yesu unhoolelaaya. (Usome Luka 16:9. *) Wootakihera, hiiva pooti uvaha micanko wiira nikavihere nteko woolalyeera ntuninyani motheene. Uyo nsurukhuuyo unaakavihera ulalyeeriya ihapari comaana mapuro oottayi, uteka ni urehererya mapuro ooswaleliya Yehova ni unaavareliya nteko wiira akaviheriye akhwiihu caakhumelenle ihasara. Uhiya commo, hiiva pooti ucanka nsurukhwiihu wiira nikavihere nloko nihu awula pooti unkavihera munna nomooneehu wiira naathweennya. (Miru. 19:17) Napankaka nnyo citthunnyo, ninaatepa ukhala apatthani a Yesu ni a Yehova.
14. Toko cinthoonyeraaya Efesu 4:15, 16, itthuni yoneecese ninlamuliyeehu upanka wiira nikhale apatthani a Yesu?
14 Ukavihere citthu cinlakeliya mumphwinkoni woothotokanihiya wa Yehova. Yesu khanle nhooleli o nloko no makristau, ni uyo haavahacera atthu ookhuluvelya wiira aniwacere. Hiiva nakaviheraka citthu cinlakelaaya ayo atthwaayo, ninaalipihaca upatthaniihu ni Yesu. (Usome Efesu 4:15, 16. *) Wootakihera, nna va nimpheela wiira Isalau co Umwene cotheene cirivo civareliye nteko ratta-raatta. Nlattu wo iyo, ahaavo maloko atakanihiye wiira nikhale nloko nimoca paahi, ni mapuro oolalyeera ahotthonkomanihiya ni mananna makhwaawe. Upanka ayo marukunuswaayo, unaakavihera uhirihakaca venci nsurukhu uncankiya. Masi nlattu wo marukunuso apankiye, anamalalyeera akiina ahaana yiilamalelihaka makhalelo makhwaawe. Ayo atthunaka yahopatthanaca cinene ni mayamunnaaya ni asirokoraya o wanlokoni naaryaaya. Masi nna va aholepeliya wiira arwee nloko nikiina. Yesu naakhala ootteeliya cinene awoonaka ayo atthari ookhuluvelyaayo yattharaka ni yakaviheraka citthu cinlakeliya mumphwinkoni wa Yehova!
UKHALANA UPATTHANI WOOHIMALA NI YESU
15. Manannani upatthaniihu ni Yesu cinhalaaya utepa ulipa wahoolo?
15 Makristau oothanliya ni nnepa wowaarya anaaweherera urwaa ukhala ni Yesu mpaka, ni ulamulela nkhayi nuuyo Mumweneni wa Nluku. Ayo anhala ukhala ni Kristu—anaahala umoona, umuulumana ni uviriha ukati mwinci anari ni Yesu. (Joau 14:2, 3) Ale anweherera ukhala wapeephoni watuninyani ciicammo anaahala ufentiya ni uwaceriya ni Yesu. Ayo khanhala umoona Yesu, masi upatthannyaaya nuuyova unaahala utepa khala woolipa ukati unhalaaya ukhala wapeephoni Yehova ni Yesu itthenkacalyaaya.—Isai. 9:6, 7.
16. Iparakhani cinhaleehu waakhela nakhalaka apatthani a Yesu?
16 Yesu naanilattula wiira nikhale apatthannyaawe. Natthunaka nlattulo nawe, ninawaakhela iparakha cinci, toko nnya: uyo naanifenta ni naanikavihera; ninaakhalana niweherero noorwaa uphwanya ukumi woohimala. Ni itthu yuulupale cinene, ukhanle ucuwela wiira upatthaniihu ni Yesu unaahala uniphwanyiha iparakha yuulupale cinene ihinlikananiya: upatthani woolipa naathumwaane Yesu, Yehova! Khweeliini ikhanle iparakha yuulupale cinene hiiva wiihaniya apatthani a Yesu!
NCIPO 17 “Eu Quero!”
^ par. 5 Maapostolu yahokhala myaakha cinci yamuulumanaka ni yanvaranaka nteko Yesu. Phimaana yahokhitiri ukhalana upatthani woolipa ni Yesu. Yesu ciicammo mpheela wiira hiiva nikhale apatthannyaawe. Masi ahaavo marikariko arineehu maapostolu yahaarinaaya. Ula mwahoola unaahala wuuluma citthu cinnirikihela ukhala apatthani a Yesu ni ninaahala woona isiyani ninlamuliyeehu upanka wiira nikhitiri ukhalana upatthani woolipa ni woohimala nuuyova.
^ par. 8 Joau 15:4 Nhihiye ukhala wamoca ni miiva, ni mi kinaahala ukhala wamoca ni nyuuva. Toko nritta uhineemihaaya mihokorokho waahikhaleke munrini waya, nyuuva ciicammo khannohala ukhitiri wiimiha mihokorokho mwahiyaka ukhala wamoca ni miiva. 5 Mi kikhanle mwiri; nyuuva nkhanle miritta. Ule hinhiya ukhala wamoca ni miiva, ni mi kihihiyaka ukhala wamoca nuuyo, nawiimiha mihokorokho cinci, kontha mwaahikhaleke ni miiva, khiivo inhaleenyu ukhitiri upanka.
^ par. 13 Luka 16:9 Ciicammo kinwiirelani co: Mwaapanke apatthani nvarelaka nteko mihakhu coohisariya; wiira nnya caahikhale, ayo yawaakheleleni mapuro oohimala ankhalaaya.
^ par. 14 Efesu 4:15 Masi kuuhimyerakani ikhweeli, nuunuwe nhina citthu cotheene, nlattu wo nifento, ninttharaka ule khanle nhooleli, Kristu. 16 Nlattu wo uyo, irutthu yotheene inawaataana ni inawiiwanana nlattu wo miphantte cinvaha ile impheeliya. Wakhalaka wiira khula mphantte unaavara nteko ratta, unaakavihera irutthu wuunuwa, ukati uneelipihaaya nnifentoni.
^ par. 58 ILATARATO: (1) kati wooswali waamuci, hiiva pooti usoma makhalelo ni miteko ca Yesu. (2) Wanlokoni, ninlamuliya wiikurumica wiira niiwanane ni mayamunneehu. (3) Neekurumicaka wuulalyeerani, ninthoonyera wiira ninawaakavihera asunnawe Kristu. (4) Maloko yatakanihiyaka wiira nikhale nloko nimoca paahi, hiiva ninlamuliya ukavihera itthu ilakenlyaaya mahumu.
