MWAHA WOOSOMIYA 35
Munhisime khula ntthu wanlokoni na Yehova
“Niitho khanineerela ntata: ‘Akinoopheela’; ni muru khuneerela meetto: ‘Akinoopheelacani.’”—1 AKOR. 12:21.
NCIPO 124 Sempre Leais
NINHALA WIITTHUCANI? *
1. Yehova nowoonela cani atthu ookhuluvelya otheene anonswalela?
NLATTU wo nifento nawe, Yehova naawoona ukhalana ifayita atthu otheene ookhuluvelya anonswalela wanlokoni nawe. Hataa nivaraka miteko coovirikana wanlokoni, otheene cihu nihaana ifayita ni ninaakaviherana. Apostolu Paulu naanikavihera wiiweeha iyo itthu yuulupaleeyo. Manannani?
2. Toko cinhimyaaya Efesu 4:16, nlattuni ninlamuliyeehu uhisimana ni uvara nteko nkhayi?
2 Nhina iveerusu inlipihera ula mwahoola, Paulu naahimya wiira wanlokoni khaavo nolamuliya umwiirela nkhunanawe nonswalela Yehova: “Akinoopheela.” (1 Akor. 12:21) Wiira nikhale nnema wanlokoni, nihaana otheene cihu nihisimanaka ni nivaraka nteko nkhayi. (Nsome Efesu 4:16. *) Navaraka nteko nkhayi, atthu otheene wanlokoni anawiicoona ufentiya ni nloko ninaakhala noolipa.
3. Isiyani inhaleehu wiitthuca nhina ula mwahoola?
3 Manannani ninlamuliyeehu waahisima mayamunneehu o wanlokoni? Ula mwahoola, ninaahala woona manannani mahumu anlamuliyaaya waahisimu mahumu akhunanaya. Ciicammo, ninaahala woona manannani ninlamuliyeehu waalemeliha mayamunneehu ni asirokorihu alakenle ukhala athupa. Wiimaleloni, ninaahala wiitthuca manannani ninlamuliyeehu waahisima ale ahincuweleeha wuuluma iluukeehu.
MWAAHISIME MAHUMU AKHUNANINYU
4. Ikanoni iri nhina Arooma 12:10 inlamuliyaaya weettela mahumu?
4 Wanlokoni, khula humu nothanliya ni nnepa wowaarya wa Yehova ni citthu mahumu otheene cincuwelaaya cinaavirikana. (1 Akor. 12:17, 18) Mahumu akhwaawe athanliye mphiyaaruni ni khancuwelaca cinene. Akhwaawe cihaavo citthu cinhinkhitiryaaya upanka nlattu wo wuuluvala ni uweryaaciya. Unookhalaru commo, mahumu otheene ahaana ifayita. Phimaana, khaavo humu nlamuliya unweha humu nkhunanawe nuumwiirela: “Akinoopheela.” Uhiya commo, khula humu nlamuliya weettela ikano ivahalyaawe Paulu nhina Arooma 12:10.—Nsome. *
Humu nothoonyera wiira nawaahisima mahumu akhunanawe aaviriyanaka ratta (Nwehe iparaagarafu 5-6)
5. Mahumu anthoonyera cani wiira anaahisimana, ni nlattuni anlamuliyaaya upanka iyo?
5 Mahumu anhala uthoonyera cani wiira anawaahisima mahumu akhunanaya? Yaaviriyanaka ratta, venci-venci ukati unthukumanaaya wiira awacere myaha cuulupale co wanlokoni. Nlattuni unlamuliyaaya waaviriyana ratta mahumu akhwaaya? Moone itthu yoolumalyaaya irevista Ukhalenla 1 yo Outubro 1988 (yeekunya): “Mahumu anaahala ukupali wiira Yesu, avarelaka nteko nnepa wowaarya, pooti unkavihera khula humu o wanlokoni wuupuwela ikano yo mbiiblyani inhala waakavihera mahumu otheene ucuwela cowiira ukati wo wuulumacera mwaha muulupale awula woopheela ulakela itthu. (Mite. 15:6-15) Khaavo humu naakhela nnepa wowaarya veekha cawe.”
6. Manannani mahumu cinlamuliyaaya uvara nteko yiiwananaka, ni iyo inhala waakavihera cani mayamunna o wanlokoni?
6 Humu naahisima mahumu akhunanawe khammananiha khula ukati upacera wuulumaca uyova mahumu yathukumanaka. Uyo khammananiha wuulumaca khula ikwaha veekha cawe ni khanoopuwela wiira nruku unvahaawe phiri womaana ukati wotheene. Uhiya commo, uyo naahimya itthu inoopuwelaawe eeyevihaka ni hiicuunuwihaka. Akhwaawe yoolumaka itthu, uyo naaviriyana ratta. Ciicammo, uyo nawaathoonyera akhwaawe mattharelelo o mbiiblyani ni nawiikurumica weettela niirati malakihero anvahiyeehu ‘niipottha yookhuluvelya ni yankhili.’ (Mat. 24:45-47) Mahumu yathoonyeranaka nifento ni ihisima ukati unthukumanaaya wamoca, nnepa wowaarya unaakhala wamoca naayo ni unawaakavihera ulakela citthu cinhala waalipiha mayamunna o wanlokoni.—Tiya. 3:17, 18.
MWAAHISIME ALE AHITHENLE NI AHITHELIYE
7. Yesu aawehera cani athupa?
7 Wanlokoni ahaavo anamathelana enci ni akhwaawe ahaana asaana. Masi ciicammo ahaavo mayamunneehu ni asirokorihu alakenle ukhala athupa. Ninlamuliya waawehera cani ayo mayamunnaayo? Nihaana naaweheraka toko Yesu caaweheraawe athupa. Ukati waakhalaawe watuninyani, Yesu khaathenle. Ni uyo ahovarela nteko ukatyaawe ni ikuru cawe wiira avare nteko waarumiyaawe. Masi Yesu kheetthucihale wiira makristau anlamuliya uthela awula utheliya wiira ancivelihe Yehova. Unookhalaru commo, uyo hohimya wiira makristau akhwaawe yanhala ulakela uhithela. (Mat. 19:11, 12) Yesu aanawaahisima ale yahaathenle ni yahaatheliye. Uyo khaawoona ayo atthwaayo uhikhalana ifayita ni khoopuwela wiira ihaavo itthu yomaana inhaleelaaya.
8. Toko cinhimyaaya 1 Akorintu 7:7-9, isiyani Paulu yaakurumicalyaawe makristau wuupuwela?
8 Apostolu Paulu ciicammo aholakela ukhala nthupa toko Yesu. Paulu khaahimyale wiira ikhanle itthu yootakhala nkristau uthela. Uyo ancuwela wiira uthela ikhanle itthu inlamuliyaawe ulakela ntthu veekha cawe. Waahookhalaru commo, Paulu ahaakurumica makristau wuupuwelaca wakhala wiira yanhala ukhitiri unswalela Yehova anari athupa. (Nsome 1 Akorintu 7:7-9. *) Khweeliini, Paulu khaawoona uhikhalana ifayita makristau athupa. Hataa phimaana uyo ahonthanla mmirawo Timotiyu, ari nthupa, wiira awacere miteko cuulupale. * (Afili. 2:19-22) Khweeliini, unawoonannya wiira ikhanle itthu yoohinamaana wuupuwela wiira uhaavo nteko wanlokoni uhinomphwanela munna nlattu uyova wookhala nthupa awula nlattu woothela.—1 Akor. 7:32-35, 38.
9. Ninlamuliya uwehera cani ukhala nthupa awula uthela?
9 Yesu ni Paulu khayiitthucihale wiira makristau anlamuliya uthela awula ukhala athupa. Vano ninlamuliya uwehera cani uyo mwahooyo? Irevista Ukhalenla 1 yo Outubro 2012 (yeekunya), yahaakhula sana-saana nna nikohonna. Iyo yenre co: “Khweeliini citthu coopiili [ukhala nthupa awula uthela] cikhanle itthuvo ca Nluku. . . . Yehova khanoopuwela wiira athupa ahaana yoonaka ihaaya awula waaripa nrima nlattu woohithela awula woohitheliya.” Phimaana, nihaana naahisimaka mayamunneehu ni asirokorihu athupa o wanlokoni wihu.
Naahisimaka mayamunneehu ni asirokorihu athupa, isiyani ihinhaleehu upanka? (Nwehe iparaagarafu 10)
10. Naahisimaka mayamunneehu ni asirokorihu athupa, isiyani ihinhaleehu upanka?
10 Ninlamuliya uthoonyera cani wiira ninaahisima itthu ilakenlyaaya mayamunneehu ni asikorihu athupa? Unaareera wuupuwela wiira makristau akhwaawe akhanle athupa kontha ahoolakela uhithela awula uhitheliya. Ciicammo, ahaavo ale ampheela uthela, masi nanlelo khanaaya umphwanya ntthu owaacivela. Ni ahaavo ale akhweliye awannyaya awula amwaaraya. Hataa ukhalaka commo, niireke unaareera mayamunna o wanlokoni waakoha makristau athupa nlattuni uhithenlyaaya? Awula niireke unaareera uwaaverya ntthu oohala unthela? Ukati nkiina, munna nthupa pooti ulepela wiira aaveriye nthiyana oohala unthela. Masi uyo aahilepeleke, niireke unaahala uncivela akhumelelaka ntthu wanlokoni oomwaaverya nthiyana? (1 Atesal. 4:11; 1 Tim. 5:13) Moone itthu ihimyalyaaya mayamunneehu ni asirokorihu athupa nhina uyo mwahooyo.
11-12. Manannani caahaleehu waariipiha nrima mayamunneehu athupa?
11 Mootoli osirikwiitu mmoca nthupa neekurumica uvara sana-saana ntekwaawe, nohimya wiira uhithela unaawaana iparakha cinci. Masi uyo naakhala ooriipiya nrima mayamunna ni asirokorihu akhwaawe yankohaka nlattuni uyova uhinthelaawe. Munna nkhwaawe hithenle novara nteko u Peteli neera: “Uhaavo ukati mayamunna unkipankihaaya wuupuwela wiira ntthu hithenle awula hitheliye haana wooneliya uthunku. Iyo inaamwiiriha ntthu wuupuwela wiira uhithela awula uhitheliya khinakhala iparakha, masi ikhanle itthu inonwaanela masakha.”
12 Nrokorihu mmoca nthupa novara nteko u Peteli neera: “Mayamunna akiina anoopuwela wiira otheene ale ahithenle awula ahitheliye khula ukati unthukumanaaya ni mayamunna wiira athukathuke, anontotha ntthu oohala unthela awula waathela. Nkwaha mmoca, kahorwaa ilapo ikiina wiira kavare nteko waarumiyaaka u Peteli. Mi kaaphiyale uhiyu ni wahaavo nkutthaano. Arokorihu yaakakhelenle yahokihimyera wiira wanlokoni waya yahaavo mayamunna eeli yaarina ilikaaka. Ni yahokihimyera wiira khayaapheela ukaavyera munna oohala ukithela. Masi uphiya wihu Usalau yo Umwene, ayo yahokikusa mpanka nipuro naaryaaya mayamunna ooyeeli wiira kiwoopane mwaha. Ule ukatyuule miiva wamoca ni mayamunna ooyeeli wahonuula muru.”
13. Matakiheroni anonlipiha nrokorihu nthupa?
13 Nrokorihu nkiina hitheliye novara nteko u Peteli, neera: “Kinawaacuwela mapiyoneeru enci akhanle myaakha cinci anari athupa aneekurumica uvara ntekwaaya sana-saana ni unaatteela nrima. Ayo anaakavihera cinene wanlokoni. Ayo anawiiwehera ratta: khaneecoona ukhala oolupale waapwaha akhwaaya nlattu wookhala athupa ni khunaariipa nrima nlattu woohithela awula woohaayara asaana.” Phimaana ayo mayamunnaayo ahaana ifayita cinene wanlokoni! Atthu otheene anawiicoona uhisimiya ni ulemelihiya wanlokoni. Khaavo neecoona wiira naathanyiya ni khaavo neecoona ukhala muulupale waapwaha akhunanawe. Khula ntthu naacuwela wiira haana ifayita wanlokoni.
14. Ninlamuliya uthoonyera cani wiira ninawaahisima mayamunneehu ni asirokorihu athupa?
14 Mayamunneehu ni asirokorihu athupa ampheela wiira ahisimiye wanlokoni nlattu wo makhalelo omaana arinaaya, kahi nlattu woothela awula woohithela. Uhiya uwoonela uthunku, nihaana naahisimaka nlattu wookhala atthu ookhuluvelya. Napankaka commo, mayamunneehu ni asirokorihu athupa khanhala wuupuwela wiira ninwiirela: “Akinoopheela.” (1 Akor. 12:21) Uhiya commo, ayo anaahala woona wiira ninawaahisima ni ahaana ifayita wanlokoni
MWAAHISIME ALE AHINCUWELA WUULUMA RATTA ILUUKEENYU
15. Isiyani mayamunna akiina impankaaya wiira avare cinene nteko wa Yehova?
15 Mahukwaala, anamalalyeera enci aholakela wiitthuca iluuka ikhwaawe wiira akavihere cinene nteko woolalyeera. Wiira akhitiri upanka iyo, ayo ahaana yarukunusaka makhalelwaaya. Ayo anaakhuma nloko ninoolumiya iluuka incuwelaaya wiira arwee nloko nikiina ninoolumiya iluuka ihincuwelaaya ampheeliya anamalalyeera enci. (Mite. 16:9) Iyo ikhanle itthu inlakelaaya veekhaaya wiira anvarele nteko cinene Yehova. Hataa wakhalaka wiira ayo anaaviriha myaakha cinci wiira acuweleehe iluuka ineetthucaaya, khanhiya ukavihera wanlokoni. Makhalelo omaana ni ucuwelaca urinaaya unawaalipiha cinene mayamunna o wanlokoni. Khweeliini, ayo mayamunnaayo ninaawoona ukhalana ifayita cinene!
16. Isiyani mahumu inlamuliyaaya utthara yapheelaka unthala munna ukhala humu awula nruminya o wanlokoni?
16 Mahumu ahinthanle munna waale ukavihera wanlokoni ukhala nrumiya awula humu nlattu woocuwela awula woohicuwela iluuka inoolumiya wanlokoni. Ukati mahumu woowehacera wakhala wiira munna unamphwanela ukhala nrumiya awula humu, anlamuliya uweha itthu Ibiiblya inhimyaaya, woohiwehacera wakhala wiira naacuweleeha awula mena iluuka inoolumiya wanlokoni.—1 Tim. 3:1-10, 12, 13; Titu 1:5-9.
17. Isiyani ineekohaaya mayamunna athamenle ilapo ikiina?
17 Ahaavo mayamunna anthamela ilapo ikiina wamoca naamucyaaya nlattu woorikarikaca makhalelo ilapo inkhalaaya. Yathamelaka ilapo ikiina, asaanaaya ayo mayamunnaayo atthunaka ansoma icikola inoolumiya iluuka yo iyo ilapweeyo. Masi pooi ukhala wiira ilapo ithamenlyaaya nihaavo nloko awula ikhurupu inooluma iluukaaya. Vano yakhumelelaka iyo, anlamuliya urwaa woona mikutthaano vayi? Anhala urwaa woona mikutthaano nloko ninoolumiya iluuka yo iyo ilapweeyo awula nloko ninoolumiya iluukaaya?
18. Toko cinhimyaaya Akalasiya 6:5, ninhala uthoonyera cani wiira ninaahisima itthu ilakenlyaawe mwaneene itthoko?
18 Mwaneene ikhotto phinhala ulakela nipuroni amucyaawe ninhalaaya woona nkutthaano. Ukhala wiira iyo ikhanle itthu inlamuliyaawe ulakela ntthu veekhaawe, uyo haana oopuwelacaka isiyani inhala waaphwanyiha ifayita amucyaawe. (Nsome Akalasiya 6:5. *) Nihaana nihisimaka itthu inhalaawe ulakela nhooleli itthoko. Hataa athanlaka isiyani, nihaana niwaakhelelaka ayo amucyaayo wanlokoni ni nifento.—Aroo. 15:7.
19. Isiyani asineene itthoko inlamuliyaaya wuupuwelaca yalompaka?
19 Ukati nkiina, ayari pooti uthanla urwaa nloko ninoolumiya iluukaaya, masi asaanaaya ihincuweleehaaya saana. Ni wakhala wiira nno nlokonno niri ncoko unoolumiya iluuka yo iyo ilapweeyo, asaanaaya pooti waarika wiiweeha mikutthaano ni pooti uhihala wuunuwa mminepani. Kontha isiyani? Kontha asaana pooti uhala usoma icikola inoolumiya iluuka yo iyo ilapweeyo, woohikhala iluuka yaasithumwanaya. Yakhumelelaka iyo, nhooleli itthoko haana alompaka ni wuupuwelaca ratta isiyani inhala waakavihera asaanaawe wuunuwa mminepani: uyo haana uthanla wakhala wiira naahala waakavihera asaanaawe wiitthuceeha iluukaawe awula uthanla urwaa nloko ninoolumiya iluuka incuweleehaaya asaanaawe. Hataa alakelaka isiyani, mayamunna o nloko ninhalaawe uthanla ahaana yiikurumicaka cinene wiira uyo naamucyaawe yiicoone uhisimiya ni ukhalana ifayita.
Manannani cinhaleehu uthoonyera wiira ninawaahisima ale aneetthuca iluuka ikiina? (Nwehe iparaagarafu 20)
20. Ninhala uthoonyera cani wiira ninawaahisima mayamunneehu ni asirokorihu aneetthuca iluuka ikiina?
20 Nlattu wo citthu cotheene noopenleehu mwaha, maloko menci ninaahala waaphwanya mayamunneehu ni asirokorihu aneekurumica cinene wiitthuca iluuka ihincuwelaaya. Ukhala wiira khancuweleeha iluuka ineetthucaaya, ayo pooti waarika uhimya itthu inoopuwelaaya. Masi naahiweheeheke citthu cinvonyaaya ukati unoolumaaya, ninaahala woona wiira ayo ananfenta Yehova ni anaapheela unswalela. Naweheehaka makhalelo omaana arinaaya ayo mayamunaayo, ninaahala waalemeliha ni waahisima. Ciicammo khaninhala uwiirela “Akihoopheela” nlattu ayo woohicuweleeha wuuluma iluukeehu.
OTHEENE CIHU NIHAANA IFAYITA UHOOLO WA YEHOVA
21-22. Isiyani insukhurweeleehu venci?
21 Ninansukhuru venci Yehova nlattu uyo woonoona ukhalana ifayita wanlokoni nawe. Hataa nikhalaka alopwana, athiyana, athupa awula oothela, amirawo awula mapwaapwaawe ni hataa wakhalaka wiira ihaavo iluuka innirika, otheene cihu nihaana ifayita uhoolo wa Yehova ni ninawoonana ukhalana ifayita.—Aroo. 12:4, 5; Akol. 3:10, 11.
22 Nihihiye weettela ikano cineetthuceehu ni nlattanihero na Paulu, ninlattaniha nloko no makristau ni irutthu ya pinaatamu. Napankaka commo, hiiva ninaahala wiicoona ukhalana ifayita ni ciicammo ninaahala uwoona akhwiihu ukhalana ifayita wanlokoni na Yehova.
NCIPO 90 ‘Encorajemo-nos Uns aos Outros’
^ par. 5 Apoovu a Yehova anaavirikana ni anvara citthu coovirikana wanlokoni. Ula mwahoola unaahala unikavihera woona nlattuni ninlamuliyeehu unhisima khula ntthu wanlokoni na Yehova.
^ par. 2 Efesu 4: 16 Nlattu wo uyo, irutthu yotheene inawaataana ni inawiiwanana nlattu wo miphantte cinvaha ile impheeliya. Wakhalaka wiira khula mphantte unaavara nteko ratta, unaakavihera irutthu wuunuwa, ukati uneelipihaaya nnifentoni.
^ par. 4 Arooma 12:10 Nthoonyeranaka nifento no mayamunna, nwacerane saana. Mwiihooleliheke waattitthimiha akhwiinyu.
^ par. 8 1 Akorintu 7:7 Caahalaaya ureera alopwana otheene anaari toko mi. Masi, hataa ukhalaka commo, khunla ntthu vahiye ucuwelaca wawe ni Nluku, ntthu nkiina vahiye ni mananna makhwaawe ni nkiina, niinanna ikhwaawe. 8 Vano, kinwiirela ale ahithenle ni akhweliye awannyaya awula amwaaraya wiira phataari akhale toko ciryaaka miiva. 9 Masi, mwaahikhitiri wiivaraca nthele, kontha phataari uthela uhiya ukhala nsammwaka.
^ par. 8 Khanincuweleeha wakhala wiira Timotiyu ahokhala nthupa mpaka waakhwilyaawe.
^ par. 18 Akalasiya 6:5 Kontha khula ntthu nhala ucisa nrinttyaawe.
