1. Citthuni mayamunna enci cinlevaaya ni nlattuni?

AHAAVO atthu enci anonswalela Nluku anaamini uleva citthu cikhwaawe. Mayamunneehu ni asirokorihu enci aholakela uhithela awula uhitheliya. Akhwaawe athelanne anaalakela uhaakuva waayara asaana. Amuci akiina anawaamini uhikhalana mihakhu cinci. Isiyani inwiiriha ulakela commo? Kontha ampheela wiikurumica urweehela uhoolo uvara miteko ca Yehova. Ayo anaatteeliya nrima ni citthu cirinaaya ni anankhuluvela Yehova wiira naahala waavaha citthu cotheene cimpheelaaya. Niireke ayo mayamunnaayo anaahala uttharuwa wanihukuni? Mena vakaani! Nincuwela cani iyo? Nincuwela iyo kontha Yehova ahaakavihera atthu yanswalela khalayi toko Aparahaamu, “Athumwanaya atthu otheene arina waamini.”—Aroo. 4:11.

2. a) Toko cinhimyaaya Maberewu 11:8-10, 16, nlattuni Aparahaamu waaminnyaawe uthama isittatti yo Ur? b) Isiyani inhaleehu wiitthuca nhina ula mwahoola?

² Aparahaamu aanaapuha ukati waakhalaawe isittatti yo Ur. Masi uyo ahaamini uleva citthu cotheene caarinaawe. Kontha isiyani? Kontha uyo anweherera “isittatti ithipeliye ni maluku oolipa.” (Nsome Maberewu 11:8-10, 16. *) Iyo ‘isittattiiyo’ ikhanle isiyani? Marikarikoni yankhumelenle Aparahaamu uwakati waawehereraawe utekiya iyo isittattiiyo? Ninhala untakiha cani Aparahaamu ni makristau o mahukweehu atthanre ntakihero nawe?

3. “Isittatti” yaawehereraawe Aparahaamu yaari isiyani?

³ Isittatti yaawehereraawe Aparahaamu ukhanle Umwene wa Nluku.  Yesu Kristu phikhanle mwene ni nohala ulamulela wamoca ni makristau oothanliya 144.000. Paulu heera wiira uyo Umwennyooyo ikhanle “isittatti ya Nluku nkumi, Yerusalemu o wiirimu.” (Mabere. 12:22; Apoka. 5:8-10; 14:1) Yesu ahowiitthuciha attharyaawe ulompa wiira alepele uwa uyo Umwennyooyo ni upanke itthu impheelaawe Nluku vathiva, toko wiirimu.—Mat. 6:10.

4. Toko cinhimyaaya Uphattuwaca 17:1, 2, 6, isiyani Aparahaamu yaacuwelaawe nhina “isittatti,” awula Umwene Nluku waakhuluvelihalyaawe?

⁴ Niireke wiira Aparahaamu ancuwela mananna caahalaaya utthonkomanihiya Umwene wa Nluku? Mena. Myaakha cinci, uyo mwahooyo waari “isiiri yowaarya.” (Efesu 1:8-10; Akol. 1:26, 27) Masi Aparahaamu ancuwela wiira asiculawe akhwaawe yaahala ukhala mamwene. Kontha iyo phi itthu Yehova yankhuluvelihalyaawe. (Nsome Uphattuwaca 17:1, 2, 6. *) Aparahaamu aanawaamini inatiri ca Nluku ni waakhala toko aanaamoona ule aahala ukhala Mwene Oothanliya o wuumweneni wa Nluku, awula Mesiya. Phimaana Yesu ahowiirela ayuuta co: “Athumwaninyu Aparahaamu yahotteeliya cinene nlattu wooweherera woona nihuku naka; ayo yahoona ni wahaatteela nrima.” (Joau 8:56) Unawoonannya wiira Aparahaamu ancuwela wiira asiculawe akhwaawe yaanaahala ukela muumweneni waahala ukaviheriya ni Yehova, ni uyo ahaamini unweherera Yehova wiirannyeeha inatiri yaapankalyaawe.

5. Nincuwela cani wiira Aparahaamu anweherera “isittatti” itthenkaciye ni mwaneene Nluku?

⁵ Aparahaamu aathoonyenre cani wiira anweherera “isittatti” awula Umwene utthenkaciye ni Nluku? Yoopacera, Aparahaamu ahokhotta wiikelakeliha nhina ikuvernu caapinaatamu. Aparahaamu khaakhala nipuro nimoca; uyo aari namathamathama ni khankavihenre nanka mwene mmoca. Ciicammo, Aparahaamu khaamananihale utthenkaca umwennyaawe. Uyo khaahiile umwiiwelela Yehova, anwehereraka wiirannyeeha inatiri yaakhuluvelihalyaawe. Upanka wawe commo, Aparahamu hothoonyera wiira aanaamwaamini Yehova cinene. Nttwee noone marikariko yankhumelenle ni isiyani nineetthuceehu ni ntakihero nawe.

6. Isittatti yo Ur yaari cani?

⁶ Isittatti yo Ur yaahiilyaawe Aparahaamu yaari  yookhikiceriya ni yo mpuha. Atthu yaakhala nwo yaari oosoma ni oothaciri. Iyo isittattiiyo yaatekeliye muuru woorekama ni miphantte miraru yaarukureriye ni myooloko cowiisa. Atthu yaakhala isittatti yo Ur yancuwela wantikha ni yancuwela Matemática. Ni unkhala toko iyo isittattiiyo naari nipuro neettiya nakoso, kontha anamathipa yahoonelela makhanta aananakoso. Cahaavo inupa cootekiya niipolooku coopahiya, coorepokariya ni coopintariya niikhinampo. Inupa cikhwaawe cahaana ikatti 13 awula 14 caarina ipuwa caya coopapattheliya ni maluku.

7. Kontha isiyani Aparahaamu ahaana ankhuluvelaka Yehova?

⁷ Wiira Aparahaamu aamini uhiya uttuli ile isittatti yoopuhiyeele, uyo ahaana ankhuluvelaka Yehova wiira aanaahala unwacera ni unkhikicera wamoca naamucyaawe. Kontha isiyani? Kontha Aparahaamu ni Sara yaahala ukhala woonene mmaheemani ilapo yo Kanaa. Ayo khayaahala ukhala-tho inupa cootekiya niipolooku, cookhikiceriya ni muuru awula ni myooloko. Phimaana khawaahala urika Aparahaamu wamoca naamucyaawe utupheliya naalupatthi.

8. Isiyani yankhumelenle Aparahaamu?

⁸ Aparahaamu ampanka itthu yaapheelaawe Nluku. Masi hataa wakhalaka commo, uyo yahonkhumelela masankiho. Nkwaha mmoca yahovola itala cinene ncoko Aparahaamu weereliyaawe ni Yehova wiira arwee. Aparahaamu khaarina mananna o waaliha amucyaawe. Phimaana uyo aholakela uthamela Wiciipitu awehereraka umala itala. Masi Aparahaamu uphiya wawe nwo, amwaarawe yahocisiya ni Farawoo, nhooleli o iyo ilapweeyo. Ni Yehova ahomwiirela Farawoo wiira anturusele Aparahaamu amwaarawe. Munnokhitiri wuupuwela mananna Aparahaamu caakhanlyaawe hinaaya uturuseliya amwaarawe?—Upha. 12:10-19.

9. Marikarikoni Aparahaamu naamwaarawe yaananaawe?

⁹ Ciicammo Aparahaamu wamoca naamwaaraawe yahaana marikariko oorika uvilela. Amwaarawe Aparahaamu khayaakhitiri waayara asaana. Ni ayo yahokhala myaakha cinci waaripaka nrima nlattu woohikhitiri uyara. Phimaana Sara aholakela waavaha awannyawe ipotthaawe yeehaniya Hakari. Uyo ooniha wiira apankaka commo anhala uyareliya asaana niipotthaawe. Masi ukati Hakari waarupanlyaawe irukulu ahancera uhinhisima Sara. Ni Sara ahancera uhinwacera ratta Hakari mpanka ahonthawiha wapuwaniva.—Upha. 16:1-6.

10. Itthuni yankhumelenle Sumayili ni Isaaki yaahala unrikihela Aparahaamu unkhuluvela Yehova?

¹⁰ Vano nuuwakatyaaya Sara ahorupala irukulu ni ahonyara mwaana mmoca na Aparahaamu yanvahacale ncinanawe Isaaki. Aparahaamu aananfenta cinene asaanaawe Sumayili ni Isaaki. Masi nlattu wo mananna Sumaliyi canwaceraawe Isaaki, Aparahaamu ahomoomola Sumayili wamoca naanumwaane, Hakari. (Upha. 21:9-14) Wahoolo, Yehova ahonlepela Aparahaamu wiira ancise mwanawe Isaaki wiira anvaherere itthuvo Yehova. (Upha. 22:1, 2; Mabere. 11:17-19) Nhina wo citthu cotheene cankhumelenle, Aparahaamu ahaana ankhuluvelaka Yehova wiira anhala wiirannyeeha inatiri cankhuluvelihalyaawe nhina asaana yaayanryaawe.

11. Kontha isiyani Aparahaamu ahaana athoonyeraka uvilela ukati wanwehereraawe Yehova?

¹¹ Muukumini wawe motheene Aparahaamu ahaana eetthucaka uvilela anwehereraka Yehova. Uyo atthunaka aarina myaakha 70 ukati waathamalyaawe wamoca naamucyaawe isittatti yo Ur. (Upha. 11:31–12:4) Ni cahovira myaakha 100 Aparahaamu akhalaka mmaheemani eettaka ilapo yo Kanaa. Aparahaamu khwaale narina myaakha 175. (Upha. 25:7) Masi uyo khaamoonale Yehova apankaka itthu yankhuluvelihalyaawe yo waavaha asiculaawe Aparahaamu ile ilapweele. Ni ciicammo uyo khoonale isittatti awula Umwene wa Nluku utthenkaciyaka. Masi hataa ukhalaka commo, Ibiiblya ineera wiira Aparahaamu khwaale “nooluvanle ni oosukhuru.” (Upha. 25:8) Hataa yankhumelelaka marikariko, Aparahaamu ahaana waamini woolipa, ni ahonweherera Yehova wantteelaka nrima.  Isiyani yankavihenre Aparahaamu uvilela? Uyo aakhitinri uvilela kontha muukumini wawe motheene, Yehova ahonkhikicera ni aananwacera khampa mpwanaawe.—Upha. 15:1; Isai. 41:8; Tiya. 2:22, 23.

12. Isiyani inweherereehu, ni isiyani inhaleehu woopela mwaha?

¹² Toko Aparahaamu, hiiva ninaaweherera isittatti ithipeliye ni maluku oolipa. Masi khaninaweherera utekiya waya. Kontha Umwene wa Nluku uhotikitheriya mwaakha wo 1914 ni uhancera ulamulela wiirimu. (Apoka. 12:7-10) Masi hiiva ninweherera wiira uyo Umwennyooyo ulamulele ituninya yotheene. Uhinaaya uphiya uyo ukatyuuyo, anaahala unikhumelela marikariko menci toko yankhumelenle Aparahaamu ni Sara. Niireke ale anonswalela Yehova ilelo anaakhitiri untakiha Aparahaamu? Ihantisi co mayamunna cikumiheriye nrevistani Ukhalenla, cinaathoonyera wiira ilelo ahaavo atthu enci anthoonyera waamini ni anvilela toko Aparahaamu ni Sara. Nttwee noopele mwaha nnyo ihantisinnyo ni noone itthu inniitthucihaaya.

13. Ihantisi ya munna Bill iwiitthucihaleni isiyani?

¹³ Mwaamini uleva citthu cikiina wiira munswalele ratta Nluku. Napheelaka uhoolelihera muukumini wihu isittatti ya Nluku, awula Umwene wa Nluku, nihaana nilevaka citthu cikiina toko Aparahaamu caapankalyaawe. (Mat. 6:33; Mark. 10:28-30) Moone ntakihero na munna Bill Walden. * Mwaakha wo 1942 ukati Bill wancenryaawe usoma Ibiiblya ni Masaahiti a Yehova, uyo ansoma wuuniversidade yo Estados Unidos wiira akhale enginheiro. Umaliha wawe usoma apurusooryaawe yahomwaaverya nteko, masi Bill ahokhotta. Uyo ahahimyeera apurusooryaawe wiira apheela unvarela nteko Nluku uhiya ukhala enginheiro. Uvira waya mahuku vakaani Bill nahonkhumele ncina nawe wiira arwee utoropani. Athoonyeraka ihisima uyo ahokhotta urwaa utoropani, phimaana aholivihiya nsurukhu mwinci ni aheereliya wiira anhala utthukiya myaakha mithanu, masi uvira waya myaakha miraru uyo ahotthukuliya. Wahoolo, uyo aholattuliya urwaa usoma icikola yo Gileade ni ahorwaa uvara nteko weemisiyonaariyu u África. Woohipica Bill ahonthela Eva, ni ooyeeli yaheekurumica uvara nteko wa Yehova u África. Nuukatyaaya ayo yahoturuwela u Estados Unidos wiira yaawacere anumwaane Bill.  Bill heera: “Unaakitteela nrima cinene koopuwelaka iparakha ikhalannyaaka nlattu wookhala myaakha 70 kinvarelaka nteko Yehova. Khula ukati kinansukhuru Yehova nlattu wookikavihera uthanla nteko womaana.” Nyuuva nnawaamini wiivaherera uvara nteko wa Yehova ukati wotheene?

14-15. Ihantisi ya munna Aristotelis wamoca namwaaraawe iwiitthucihaleni isiyani?

¹⁴ Nhiweherere wiira khanhala wuukhumelelani masakha muukumini winyu. Ntakihero na Aparahaamu ninaaniitthuciha wiira hataa naale yiivaherenre uvara nteko wa Yehova ukati wotheene anawaakhumelela masakha. (Tiya. 1:2; 1 Pet. 5:9) Iyo phi itthu yankhumelenle munna Aristotelis Apostolidis. * Uyo pattisiye mwaakha wo 1946 u Grécia ni mwaakha wo 1952 ahompakanela nrokorihu Eleni. Ooyeeli yaapheela unvarela nteko Yehova, masi Eleni yahonphwanya iretta. Uyo aahowiipiya muukookoni. Itthu yaamwiipale yahokumihiya, masi uvira waya myaakha vakaani anathelanacaleene yahomwiipa tootho. Mameetiku yahomooperari nrokorihu Eleni, ni wooperariya wawe uyo khaakhitiri weetta ratta ni waananrika wuulumaca. Masi uyo khaahiile unvarela nteko Yehova hataa awerennyaka ni alupathiyaka naaholeli ukuvernu ule ukatyuule.

¹⁵ Munna Aristotelis ahokhala myaakha 30 aawaceraka amwaaraawe. Myaakha cotheenennyo uyo ahovara nteko wanlokoni khampa humu, hokavihera utthenkaca ikonkereesu ni hokavihera uteka Isalau co mikutthaanu cuulupale. Vano, mwaakha wo 1987, Eleni nari wuulalyeerani nkhora woluwani yaakenlyaawe wahompwesa unthanani ni uyo ahorakala. Uyo ahokhala myaakha miraru naari wankorini wooheetta ni woohulumaca mpaka waakhwilyaawe. Aristotelis malihenre uttonkaca ihantisyaawe eeraka co: “Myaakha civinre ahokikhumelela masakha menci ni masakha makhwaawe yaari oorika uvilela yahaawehereraka wiira yanhala ukikhumelela, phimaana kahaana kilipaka cinene ni wiikurumica wiira kihihiye uvilela. Masi Yehova khanhiya ukivaha ikuru cimpheelaka wiira kikhitiri uvilela masakha ankikhumelela.” (Isaa. 94:18, 19) Yehova nawaakavihera atthu anonswalela aniikurumica unvarela nteko hataa yaakhumelelaka masakha.

16. Ikanoni yomaana munna Knorr yaavahalyaawe amwaarawe?

¹⁶ Nhihiye wuupuwela citthu comaana cinrwaa ukhumelela uhoolo. Aparahaamu aaweheeha itthuvo  caahalaawe uvahiya ni Yehova ni iyo yahonkavihera uvilela marikariko yankhumelela. Arokorihu Audrey Hyde khayaahiile uweheeha citthu caahala waakhumelela uhoolo, hataa wakhalaka wiira awannyaya oopacera yeehaniya Nathan Knorr yahowerennya ni yahokhwaa ni hataa ciicammo wakhalaka wiira awannyaya onayeeli, Glenn Hyde, yahaaphwanya iretta ineehaniya Alzheimer. * Ayo anhimya wiira itthu yaakavihenre, yaari itthu yaahimyeriyaaya naawannyaya Knorr ahinaaya ukhwaa. Arokorihu Audrey aneera: “Awannyaka Nathan yahokuupusera: ‘Nakhwaakavale khaninhuva-tho, ni iparakha cinweherereehu khweeliini ninaahala waakhela.’ Vano ayo yahokiirela: ‘Nweheehe itthuvo inhaleenyu waakhela uhoolo ni mwiikurumice waakavihera akhwiinyu. Iyo inaahala wuukaviherani ukhala ootteeliya.’” Iyo ikhanle ikano yomaana innikurumica waakavihera akhwiihu ni inniphwanyiha utteeliya nlattu wo ‘niweherero nirineehu’!—Aroo. 12:12.

17. a) Nlattuni unlamuliyeehu uweheeha iparakha cinhaleehu waakhela uhoolo? b) Weettela itthu inhimiya nhina Mikeya 7:7, unhala unikavihera cani waakhela iparakha wahoolo?

¹⁷ Ilelo, cihaavo citthu cinci cinnithoonyera wiira nihaana niweheehaka iparakha cinhaleehu waakhela uhoolo. Citthu cinkhumelela ntuninyani cinthoonyera wiira ninkhala wiimaleloni mahuku ookhicera o ila ituninyeela. Woohipica, khaninhala uweherera wiira Umwene wa Nluku ulamulele ituninya yotheene. Nhina iparakha cinci cinhaleehu waakhela unaahala unitteela nrima cinene uwoona atthu anaafenteehu yunwelelihiyaka. Uyo ukatyuuyo, Yehova naahala unthuvela Aparahaamu nlattu wo waamini ni uvilela waarinaawe ni naahala umunweleliha wamoca naamucyaawe. Niireke nyuuva nnaahala ukhala uyo ukatyuuyo wiira mmwaakhelele Aparahaamu wamoca naamucyaawe? Iyee nnaahala ukhala! Mwaaminiki uleva citthu cikhwaawe wiira nhoolelihere Umwene wa Nluku muukumini winyu, mwaahihiyeke waamini hataa yuukhumelelakani masakha ni mweetthucaka unweherera Yehova nvilelaka.—Nsome Mikeya 7:7. *