1. Ikhweelini ca Mpattusi o citthu cotheene ciitthucihiyeenyu?

WAKHALAKA wiira nyuuva nnyariye watthokoni yo Masaahiti a Yehova, atthunaka nyuuva mwancenre wiitthucihiya ikhweeli ca Yehova ikhumelo inamwaniinyu. Asithumwaninyu ahowiitthucihani wiira Yehova khanle Mpattusiihu, haana makhalelo omaana ni nopheela waapankela apinaatamu citthu comaana.—Upha. 1:1; Mite. 17:24-27.

2. Atthu akiina anaawehera cani ale ankupali wiira Nluku haavo ni phumpile citthu cirivo?

² Masi ahaavo atthu enci ahinaamini wiira Nluku haavo ni wiira uyo phumpale citthu cirivo. Ayo atthwaayo ankupali wiira ukumi uphattuwacile veekha ni wiipaceroni, citthu cikumi cooyevaca cinene vakaani-vakaani cahancera uthatuwaca mpaka waakhanlyaaya citthu cikumi cuulupale. Atthu enci anooluma commo, akhanle atthu oosoma cinene. Ayo atthunaka anoopuwela wiira nlattu woosoma awula wookhala masiyentista, citthu cinhimyaaya Ibiiblya cikhanle cowoothiya, ni atthu oohicuwelaca ni oohisoma phinkupali wiira Nluku humpa citthu cirivo.

3. Kontha isiyani nihaana nilipihacaka waamini wihu?

³ Niireke citthu cinoolumaaya ayo atthwaayo pooti ukhitiri unikupaliha wiira Yehova khanakhala Mpattusiihu? Wiira nicuwele, otheene cihu nihaana nuupuwelaka mananna cinaakhuleehu nna nikohonna: Nlattuni ninkupaliihu wiira Yehova phi Mpattusi? Ninkupali iyo kontha phi itthu yiitthucihiyeehu? Awula kontha nihokumiha ukati wiira nicuweleehe ni asineeneehu ninnoona citthu cinnithoonyera wiira uyo khweeliini phiri Mpattusi? (1 Akor. 3:12-15) Hataa ukhalaka wiira nancenre unswalela Yehova khalayi, otheene cihu nihaana nihihiyereraka ulipihaca waamini wihu. Napankaka commo, khaninhala uthephiya naatthu aneetthuciha “miruku ca apinaatamu ni citthu cowootoothiya” cinvirikana niitthu inhimyaaya Nuulumo na Nluku. (Akol. 2:8; Mabere. 11:6) Wiira ula mwahoola unikavihere ulipihaca waamini wihu wiira Nluku phumpile citthu cirivo, ninaahala woopela mwaha (1) nlattuni atthu enci uhinkupalyaaya  wiira numpiye ni Nluku, (2) isiyani inlamuliyeehu upanka wiira nilipihace umwaamini winyu Yehova, Mpattusiinyu ni (3) isiyani inlamuliyeenyu upanka wiira waamini winyu uhilolove.

4. Toko cinthoonyeraaya Maberewu 11:1 ni niwehero naya, waamini isiyani?

⁴ Atthu enci anoopuwela wiira uthoonyera waamini unkhala ukupali itthu ihirivo. Masi Ibiiblya inthoonyera wiira iyo khinakhala ikhweeli. (Nsome Maberewu 11:1 ni niwehero. *) Cihaavo citthu cinnikupaliha awula cinlipihera waamini wihu citthu cirivo masi cihinoonnya. Wootakihera, Yehova, Yesu ni Umwene wa Nluku cihaavo masi khacinoonnya. (Mabere. 11:3) Saahiti a Yehova mmoca somile Bioquímica neera co: “Cihaavo citthu cokhweeli isiyensiya cihinvaanyihaaya cinnikupaliha wiira Nluku haavo.”

5. Nlattuni atthu enci uhinkupalyaaya wiira haavo Mpattusi ompile citthu cirivo?

⁵ Nyuuva pooti wiikohaka co: ‘Cihaavo citthu cinci cinthoonyera wiira Nluku haavo ni phumpile citthu cirivo. Vano, nlattuni atthu enci uhinaaminnyaaya wiira Nluku phumpile citthu cirivo?’ Atthu enci khanaaya weemela ni utotha ucuwela ikhweeli. Wootakihera, Saahiti a Yehova mmoca neehaniya Robert neera co: “Ukhala wiira ucikolani khanaasomihiya wiira Nluku phumpile citthu cirivo, mi akaakupali wiira Nluku phinumpile. Masi waapiihilyaaka myaakha 20 kahowoopana mwaha Masaahiti a Yehova. Uyo phuukati waakhitinryaaka wiiwa ikhweeli co mbiiblyani cinthoonyera wiira Nluku phumpile citthu cirivo.” *​—Nwehe ikwaaturu ineera “ Itthu yuulupale inlamuliyaaya ucuwela ayari.”

6. Kontha isiyani atthu akiina khankupali wiira haavo Nluku ompile citthu cirivo?

⁶ Atthu akiina khankupali wiira Nluku haavo kontha aneera wiira ankupali paasi citthu cinoonnya. Hataa yiiraka commo, cihaavo citthu cinci ayo atthwaayo cihinoonaaya, masi cinkupalyaaya wiira cihaavo, toko iphyoo. Inanna imocaaru, waamini unoolumiya mbiiblyani ukhanle waamini unlipiheriya ni “citthu cirivo masi cihinoonnya.” (Mabere. 11:1) Atthu enci khampheela ukumiha ukati ni wiikurumica ucuweleeha nnyo citthunnyo wakhala wiira khweeliini cihaavo awula mena. Ntthu hineekurumica utotha ucuwela wakhala wiira haavo Nluku ompile citthu civiro nawaakuva ukupali wiira Nluku khaavo.

7. Niireke atthu otheene asomile cinene khankupali wiira Nluku haavo ni phumpile citthu cirivo wiirimu ni vathi? Ntaphulele.

⁷ Ahaavo masiyentista yaalakenle usoma citthu cinthoonyera wiira Nluku haavo ni phumpile citthu  cirivo wiirimu ni vathi. * Toko Robert, moopenleehu mwaha wiipaceroni, masiyentista enci atthunaka yaakupali wiira Nluku khaavo kontha ucikolani khayiitthucihiye wiira uyo haavo. Hataa ukhalaka commo, ahaavo masiyentista enci ancuwenle ni anonfenta Yehova. Toko ayo masiyentistaayo, hiiva otheene nihaana nilipihacaka umwaamini wihu Nluku, hataa ukhalaka wiira naatthu oosoma cinene. Khaavo ntthu nkhwaawe nohala unipankela iyo itthwiiyo.

8-9. a) Nikohoni nimpheeleehu woopela mwaha? b) Kontha isiyani usoma citthu cumpilyaawe Nluku inkhala itthu yomaana?

⁸ Isiyani inlamuliyeenyu upanka wiira nlipihace umwaamini winyu Mpattusi? Nttwee noopele mwaha citthu cese cinlamuliyeenyu upanka.

⁹ Nsome citthu cumpalyaawe Nluku. Nyuuva nnohala ulipihaca umwaamini winyu Mpattusi mwakumihaka ukati wiira nweheehe ratta inama, miri ni itthonttwa cumpiye. (Isaa. 19:1; Isai. 40:26) Mweekurumicaka usoma ilivuru cinooluma nnyo citthunnyo nnaahala utepa ukupali wiira Yehova thi Mpattusi. Ikwaha cinci, ilivuru awula irevista cihu cinaakhalanaka myaha cinooluma citthu cowumpiya. Atthunaka nyuuva unawuurikani wiiweeha nnyo myahannyo; hataa ukhalaka commo, nhituphe ukati woosomaka. Mwiikurumice usoma ni wiiweeha itthu inhimyaaya. Ni nhiliyale ukela nsayitini wihu wiira moone-tho ividiyu cinttonkaca citthu cowumpiya conneehu mmakonkereesuni civinre.

10. Nttonkace ntakihero ninthoonyera wiira haavo Mpattusi ompile citthu cirivo. (Nwehe Arooma 1:20)

¹⁰ Ukati woosomasoma citthu cumpilyaawe Nluku, mweeserere nuutta citthu cinthoonyera wiira Nluku khweeliini haavo. (Nsome Arooma 1:20. *) Muupuwele ila itthwiila: nyuuva atthunaka nnaacuwela wiira ncuwa nihaana ifayita kontha uviha waya unaakavihera wiira watuninyani ukhale ukumi. Masi ncuwa napharelaka ninaakumiha ciicammo mooro wowoopiha cinene uneehaniya raios ultravioleta. Uyo unkhala mooro wowoopiha cinene ni pooti unipanka pusya hiiva ninkhala vathi waya ncuwa. Phimaana, yahaana ikhalaka itthu yoonikhikicera wiira uyo moorooyo uhinipahe. Ni khweeli ihaavo innikhikicera! Isiyani yeeyo? Iriyari irimu ihaavo itthu ineehaniya gáz ozônio. Iyo inaattipiha uyo moorooyo wiira uhiphiye watthayani. Mooro wowoopiha unsuwaaya ncuwa wakhalaka mwinci, gáz ozônio inaayinciviha wiira yaakuve uttipiha uyo moorooyo. Nyuuva khannokupali wiira haavo tthenkacile iyo itthwiiyo wiira yaakhikicere apinaatamu? Ni khannokupali wiira yooyo tthenkacilyooyo khanle Mpattusi oocuwelaca ni oofenta cinene?

11. Nnohala uphwanya vayi myaha cinhala ulipihaca ukupali winyu wiira Nluku haavo ni phumpile citthu cirivo? (Nwehe ikwaaturu ineera “ Ikaruma cinnikavihera ulipihaca waamini wihu”.)

¹¹ Mwapheelaka uphwanya citthu cikhwaawe cinhala ulipihaca waamini winyu wiira Nluku haavo ni phumpile citthu cirivo, ntothe nhina Índice de Publicações da Torre de Vigia ni nhina isayiti jw.org. Nyuuva pooti wancera usoma myaha co mphantte uneera ““Será Que Houve Um Projeto?” Nnya myahannya cinkhala cankaani ni cinawoopela mwaha citthu cowumpiya cotheene. Ni nnyo myahannyo cinaathoonyera mananna anamasoma cimmananihaaya utakiha citthu cowumpiya cinoonaaya.

12. Ukati woosoma Ibiiblya, citthuni cinlamuliyeehu weeserera nuutta?

¹² Nsome Ibiiblya. Saahiti a Yehova somile Bioquímica romoliye wiipaceroni khaakupali wiira  haavo Nluku ni wiira uyo phumpile citthu cirivo. Masi wahoolo uyo ahancera umwaamini Nluku. Uyo neera: “Itthu yaakikavihenre wancera umwaamini Nluku khacaari paahi myaha cosiyensiya caasomilyaaka. Masi waamini waka ciicammo waalipihiya ni citthu ceetthucilyaaka mbiiblyani.” Nyuuva atthunaka nnaacuwela citthu cinci cineetthucihaaya Ibiiblya. Masi wiira nlipihace umwaamini winyu Mpattusi, nhaana nhihiyereraka usoma Nuulumo na Nluku. (Jos. 1:8; Isaa. 119:97) Ntothe woona mananna Ibiiblya cinttonkacaaya uratteene ihantisi cinci. Mweeserere nuutta inatiri cihimiye mbiiblyaani ni mananna khula mphantte wo nnyo inatirinnyo cinkaviheranaaya wiiwannyaa. Upanka commo unaahala ulipihaca waamini winyu wiira haavo Mpattusi oocuwelaca ni oofenta rumale wantikhiya Ibiiblya. *—2 Tim. 3:14; 2 Pet. 1:21.

13. Nttonkace ikano imoca yofayita imphwanyeehu mbiiblyani.

¹³ Ukati woosoma Ibiiblya, ntothe woona mananna ikano co mbiiblyani cinkaviheraaya cinene. Muupuwele ila itthwiila: khalayi cinene, Ibiiblya yahohimya wiira ntthu onciva nsurukhu pooti ‘wiiphwanyiha masakha menci.’ (1 Tim. 6:9, 10; Miru. 28:20; Mat. 6:24) Niireke iyo itthwiiyo ala mahukwaala khineerannya? Ilivuru A epidemia do narcisismo * ineera co: “Atthu anhoolelihera utotha maali phaattu antepa uriipiya nrima ni weetta acukulacaka. Ntthu pooti uhintteela nrima ni utankanya ukumyaawe nlattu wonciva nsurukhu paahi.” Khweeliini, ikano yo mbiiblyani innikurumica uhitepa uniciva nsurukhu ikhanle ikano yofayita cinene! Munnokhitiri nyuuva wuupuwela ikano co mbiiblyani cikhwaawe citokale wuukaviherani? Neemelaka wiira nuupuwele ikano comaana cotheene cimphwanyannya mbiiblyani, ninaakhitiri woona wiira khweeli haavo Mpattusi oofenta nopheela unikavihera wiira nihitepe uhuva. Wuupuwela iyo itthwiiyo, unaanikurumica utotha ikano ca Mpattusi wiira nicuwele coweetta muukumini wihu. (Tiya. 1:5) Ni napankaka commo, ninaahala ukhala nitteeliyaka.—Isai. 48:17, 18.

14. Isiyani inhaleenyu wiitthuca ukati woosoma Ibiiblya?

¹⁴ Ukati woosoma Ibiiblya, ntothe uncuwela Yehova. (Joau 17:3) Coo, nyuuva nnaahala ucuwelela makhalelo arinaawe Yehova yiitthucileenyu ukati mwaasomasomeenyu citthu cowumpiya. Ni nnaahala wiitthuca wiira Yehova khweeliini haavo ni khanakhala Nluku noromolaciya wamalakuni paahi. (Nkw. 34:6, 7; Isaa. 145:8, 9) Ukati unhaleenyu uvira muncuwelaka Yehova, umwaamini winyu unaahala utepa ulipa, utepa unfenta ni umpatthanana.

15. Kontha isiyani unaareera waahimyeera akhunaninyu citthu cinkupaliinyu?

¹⁵ Mwaahimyeere akhunaninyu myaha ca Nluku cineetthuceenyu. Mwapankaka commo, umwaamini winyu Nluku unaahala utepa ulipa. Vano ntthu wakhalaka wiira khanaamini wiira Nluku haavo ni nyuuva khannocuwela coomwaakhula, isiyani inlamuliyeenyu upanka? Ntothe mmalivuruni ni mmarevistani cihu citthu cimmuuluma Nluku ni nrwee mwanhimyeere uyo ntthuuyo. (1 Pet. 3:15) Nyuuva ciicammo pooti unlepela namalalyeera oocuwelaca wiira ookavihereni. Ni hataa uyo ntthuuyo hikupaliki citthu cinhimyaaya Ibiiblya, myaha cisomaleenyu khansomale mahala. Nnyo myahannyo cinaahala ulipihaca waamini winyu. Nlattu wo iyo, nyuuva khannohala uthepiya naale aneehimyerera ucuwelaca, yiiraka wiira Nluku khaavo.

16. Isiyani inhala unikhumelela nahiyereraka ulipihaca waamini wihu?

¹⁶ Hataa ukhalaka wiira nancere unswalela Yehova khalayi, nihaana nanlelo nihihiyereraka ulipihaca waamini wihu. Kontha isiyani? Kontha neetthalaka, waamini wihu pooti uririyaca. Nhiliyale  wiira waamini unkhala ukupali citthu cirivo masi cihinoonnya; ni citthu cihinoonnya khacimpica uliyaliya. Phimaana apostolu Paulu aheera wiira uhimwaamini Nluku inkhala “itampi inaakuva unihapusa.” (Mabere. 12:1) Isiyani inlamuliyeehu upanka wiira waamini wihu uhiririyace?—2 Atesal. 1:3.

17. Isiyani inhala unikavihera ulipihaca waamini wihu?

¹⁷ Yoopacera, nhihiyerere unlepela Yehova nnepaawe wowaarya. Kontha isiyani? Kontha waamini ukhanle nhokorokho wo nnepa wowaarya. (Akalas. 5:22, 23) Naahikhalaneke nnepa wowaarya wa Yehova, khaninhala ukhitiri ulipihaca umwaamini wihu. Naahihiyerereke ulepela nnepa wowaarya, Yehova naahala univaha uyo nnepooyo. (Luka 11:13) Ukati wonlepela, pooti waneereehu woorirukureryaca: “Nnivahe waamini venci.”—Luka 17:5.

18. Iparakhani inhimiya nhina Isaalimu 1:2, 3 irineehu hiiva ilelo?

¹⁸ Yonayeeli, nhihiyerere usoma Nuulumo na Nluku veekha.(Nsome Isaalimu 1:2, 3. *) Ukati wantikhiyaaya ila isaalimwiila, asarayeli yaarina ilivuru yo Malamulo a Nluku yaari vakaani. Masi mamwene ni anankuttho yahaana ilivuru co Malamulo, ni caviraka myaakha saapa, “alophwana, athiyana, asinamwane” ni atthu olapo cikhwaawe yaakhala u Isarayeli yahaana yarwaaka uviriyana Nlamulo na Nluku nihuku naasomiya waatthuni. (Deut. 31:10-12) Ukati wa Yesu, atthu vakaani paasi phaarina ilivuru Cowantikhiya Cowaarya; ilivuru cinci caakhala mmasinakoka. Masi ilelo atthu enci ahaana Ibiiblya yotheene awula miphantte caya. Nwo unkhala ucaaliya cinene! Ninhala uthoonyera cani wiira ninaasukhurweela?

19. Isiyani inlamuliyeehu upanka wiira nilipihace waamini wihu?

¹⁹ Hiiva ninthoonyera wiira ninaasukhurweela ukhalana wihu Nuulumo na Nluku naahihiyerereke usoma. Nihivyaavyeehe usoma Ibiiblya veekha, nuupuwelaka co: ‘Kinaahala usoma kakhalanaka ukati.’ Nihaana nipankaka iporokaraama ni wiihelela iwoora yoohala usoma Ibiiblya, ni wiikurumica utthara iyo iporokaraameeyo. Napankaka commo, ninaahala ukhitiri ulipihaca waamini wihu.

20. Isiyani nlamuliyeehu ulakela upanka?

²⁰ “Acuwelaci ni anamasoma” khanaamini itthu inhimyaaya Nuulumo na Nluku, masi hi khanimpheela ukhala toko ayo. Hi ninaakupali Ibiiblya. (Mat. 11:25, 26) Ni Ibiiblya ihaana ifayita kontha inaanikavihera ucuwela kontha isiyani ila ituninyeela icanryaaya masankiho ni isiyani Yehova inhalaawe upanka wiira amalihe ayo masankihwaayo. Coo, nlakele ulipihaca waamini winyu ni mwiikurumice waakavihera akhwiinyu umwaamini Mpattusiihu. (1 Tim. 2:3, 4) Ni nhoocye uweherera nihuku atthu otheene watuninyani ninhalaaya wuuluma itthu inhimyaaya Apokalipise 4:11: “Thi weeva Yehova Nlukwiihu, unoophwanela uttitthimihiya, . . . kontha uhumpa citthu cotheene ni nlattu wawaa cihokhumelela ni cihumpiya cimpheelaa.”