1. Isiyani impankaaya mayamunna enci wiira avare cinene miteko ca Yehova?

UKATI ila ituninyeela unviraaya yatepaka waattamela umwiiso, nihaana nteko mwinci. (Mat. 24:14; Luka 10:2; 1 Pet. 5:2) Otheene cihu nimpheela wiikurumica uvara cinene nteko wa Yehova. Enci anawiikurumica wuncerera ukati unvirihaaya yalalyeeraka. Akhwaawe ampheela wancera uvara nteko weepiyoneeru. Ahaavo ampheela uvara nteko u Peteli awula utekateka mapuro answaliihu. Ni akhwaawe enci anawiikurumica wiira akhale arumiya awula mahumu o wanlokoni. (1 Tim. 3:1, 8) Yehova naakhala ootteeliya cinene awoonaka ayo mayamunnaayo yiivahereraka uvara miteko cawe cinene!—Isaa. 110:3; Isaa. 6:8.

2. Ninkhalaka cani wakhalaka wiira khaninkhitiri uvara cinene nteko wa Yehova khampa cimpheeleehu?

² Masi ukati nkiina, khaninkhitiri uvara cinene nteko wa Yehova khampa cimpheeleehu. Yaniirannyeelaka iyo itthwiiyo, hiiva atthunaka ninaakhala oonyoonyiya. Awula atthunaka ninaakhala ooriipiya nrima cinene kontha khaninvahaceriya nteko waapheeleehu cinene wanlokoni nlattu wo wuuluvala awula itthu ikhwaawe. (Miru. 13:12) Iyo phi itthu yaawiirannyenle arokorihu Melissa. * Ayo yampheela cinene uvara nteko u Peteli awula usoma Icikola ya Anamalalyeera Umwene. Masi ayo aneera: “Nna co nlattu wo wuuluvala cinene akinlamuliya wantikha ipetição. Akinhala uvara-tho nnyo mitekonnyo. Koopuwelaka iyo itthwiiyo, kinaakhala ooriipiya nrima cinene.”

3. Isiyani amirawo atthunaka inlamuliyaaya wiitthuca ahinaaya uvahaceriya nteko muulupale wanlokoni?

³ Amirawo pooti uhiwiirannyeela iyo itthwiiyo, masi cihaavo ciicammo citthu cinaananaaya. Amirawo akiina anaacuwelaca, anaakhitiri ulakela upanka citthu comaana ni ahaana ikuru cowaakhitiriha uvara nteko cinene. Masi ahinaaya uvahaceriya nteko, ayo atthunaka ahaana yiitthucaka uweherera, ukhalana ankhili omaana ni ukhala atthu  ohisima. Nyuuva amirawo mweekurumicaka uthoonyera makhalelo omaana ampheeliya wiira nvahaceriye nteko, nnaahala woona wiira nnyo mitekonnyo nnohala uvahaceriya ukati wahaaweherereenyu. Moone itthu yankhumelenle Nick. Ukati waarinaawe myaakha 20, uyo ahokhala ooriipiya nrima cinene nlattu woohithanliya ukhala nrumiya o wanlokoni. Uyo neera: “Mi koopuwenle wiira ihaavo yahaapankaaka saana.” Masi Nick khoocyeele. Uyo aheekurumica uvara saana miteko cankaani caavahaceriyaawe. Ilelo, uyo novara nteko nhina Ikhurupu yo Mahumu Anhoolela Ipeteli.

4. Isiyani inhaleehu wiitthuca nhina ula mwahoola?

⁴ Unawuuriipani nrima cinene nlattu woohikhitiri uvara nteko waapheeleenyu cinene? Paasi mmuulumane Yehova ni munhimyeere inannna cineeconeenyu. (Isaa. 37:5-7) Ciicammo, nwuulumane mayamunna oocuwelaca wiira yuuvaheni miruku cinhala wuukaviherani wuncerera nteko unonvareleenyu Yehova ni mwiikurumice utthara nnyo mirukunnyo. Mwapankaka commo, nyuuva nnaahala uvahaceriya nteko awula wiirannyeeha mpika wiihelenleenyu. Masi toko caakhumelenlyaaya arokorihu Melissa aromoliye nhina ula mwahoola, pooti ukhalaka wiira khamunhala uvahaceriya uvara nteko umpheeleenyu cinene. Yookhumelelakani iyo itthwiiyo, isiyani inhala wuukaviherani wiira utteeliya winyu uhimale? Wiira naakhule nno nikohonno, ninaahala woopela mwaha (1) isiyani inhala wuutteelihani nrima, (2) isiyani inlamuliyeenyu upanka wiira muncerere utteeliya winyu nrima ni (3) mipikani co munnepani cinlamuliyeehu wiihelela wiira utepe unitteela nrima.

5. Wiira unitteele nrima, isiyani inlamuliyeehu upanka? (Nwehe Eklesyaste 6:9)

⁵ Eklesyaste 6:9 inaattonkaca isiyani inhala unitteeliha nrima. (Nsome. *) Ntthu notteeliya nrima ‘nicitthu vakaani cirinaawe’ naacuwela usukhurweela irinaawe ni unantteela nrima. Masi ntthu nototha citthu cinci nokhala ukati wotheene amananihaka ukhalana citthu cihirinaawe. Isiyani ineetthuceehu? Wiira unitteele nrima, nihaana nisukhurweelaka citthu cirineehu ni uhimananiha utotha citthu cihinhaleehu ukhitiri ukhalana awula upanka.

6. Nlattaniheroni nimpheeleehu woopela mwaha ni isiyani ninhalaaya uniitthuciha?

⁶ Niireke ninaahala ukhitiri ukhala ootteeliya nicitthu nnava cirineehu? Atthu enci anooniha wiira mena, kontha atthu otheene unawaacivela ukhalana citthu cinwa phiyaaru awula cahaarinaaya. Masi toko conneehu, citthu cirineehu nnava khweeliini pooti unitteeliha nrima. Nlattuni waneereehu commo? Wiira naakhule nno nikohonno, nttwee noopele mwaha nlattanihero na Yesu nimphwanyannya nhina Matewus 25:14-30, nimmuuluma nlopwana aahiyenre nsurukhu anantekwaawe wiira ampanke nakoso. Nno nlattaniheronno ninaahala uniitthuciha matteeleliyo nrima nicitthu nnava cirineehu.

7. Nttonkace vakaani nlattanihero na Yesu.

⁷ Woottonkaca nno nlattaniheronno, Yesu ahomuuluma nlopwana aapheela urwaa uttayi. Hinaaya urwaa, ahowiihana anantekwaawe araru ni ahonvaha khula nanteko italentu wiira amweette nakoso. * Uyo ancuwela wiira citthu caakhitiryaaya anantekwaawe caanaavirikana. Phimaana, ahonvaha nanteko oopacera italentu thanu, nanteko onayeeli italentu piili ni nanteko oneeraru italentu imoca. Nanteko oopacera ni onayeeli yaheekurumica cinene ni yahenciviha italentu caavahiyaaya naapwiiyaya, masi nanteko oneeraruuyo khiivo yaavarenlyaawe nsurukhu waavahiyaawe. Phimaana apwiiyaawe yahomoomola ni unlaphacera.

8. Kontha isiyani nanteko oopacera ahaana isariya yontteela nrima?

⁸ Nanteko oopacera ahaana isariya yontteela nrima cinene kontha ahovahiya italentu thanu  wiira ampanke nakoso. Iyo yaathoonyera wiira apwiiyaawe yaanankhuluvela, kontha waakhala nsurukhu mwinci! Vano nanteko onayeeli aakhanle cani? Nari ntthu nkhwaawe, uyo atthunaka anhala unyoonyiya nlattu woohivahiya italentu thanu toko nanteko oopacerooyo. Masi niireke phaakhanlyaawe commo?

9. Isiyani Yesu ihuulumalyaawe amwaacaka nanteko onayeeli? (Nwehe Matewus 25:22, 23)

⁹ Nsome Matewus 25:22, 23. * Yesu khenre wiira nanteko onayeelyuuyo wahonriipa nrima nlattu woovahiya italentu piili paasi. Yesu ciicammo khenre wiira uyo nantekooyo ahokhala oonyoonyiya ni aheera: ‘Masi mi ciicammo kinneekurumica uvara nteko khampa ule vahiye italentu thanuule! Vano ala apwiiyaala yaakivaherani italentu piili paasi? Ukhala wiira mi khankoona ukhala nanteko omaana, paasi kinaathipela ula nsurukhwaayoola, ni nikwaha uwacera citthu caka.’

10. Isiyani yaapankilyaawe nanteko onayeeli?

¹⁰ Nanteko onayeeli ahotthuna nteko waavahiyaawe ni aheekurumica cinene umpaka nakoso aapwiiyaawe khampa caapankilyaawe nanteko oopacera. Phimaana, uyo ahokhitiri winciviha italentu caavahiyaawe. Ni ahotthuveliya nlattu wo nteko waavanryaawe ni wiikurumica wawe. Apwiiyaawe yahokhala ootteeliya cinene ni yahonvahacera miteko cikhwaawe!

11. Isiyani inhala wuukaviherani utteeliya nrima?

¹¹ Hiiva ciicammo neevahereraka uvara khula nteko unvahaceriyeehu mumphwinkoni wa Yehova ninaahala utepa utteeliya nrima. ‘Mwiivaherere niikuru cinyu cotheene’ uvara nteko woolalyaa moolumo a Nluku ni uvara miteko cikhwaawe co  wanlokoni. (Mite. 18:5; Mabere. 10:24, 25) Mwiitthenkace wiira nkomentari ratta umikutthaanoni. Mwiitthenkace saana mwavahiyaka upanka mphantte wankutthaanoni wo weeriyari isumana. Ni mahumu yoolepelakani upanka itthu wanlokoni, nhicerewe ni nthoonyere ukhala ntthu ookhuluvelya. Mwalepeliyaka upanka itthu wanlokoni nhuupuwele wiira uyo ukhanle nteko woohifayita ni khannolamuliya urihakaca ukatiinyu. Mwiikurumice cinene wiitthuca uvara saana nteko uvahaceriyeenyu. (Miru. 22:29) Mweekurumicaka nnaahala utepa waakuva ikhomaala mminepani ni wuutteelani nrima. (Akalas. 6:4) Ciicammo, khunhala wuurikani wuutteelani nrima mwawoonaka akhwiinyu wanlokoni yavahaceriyaka miteko cuulupale nyuuva cimpheeleenyu.—Aroo. 12:15; Akalas. 5:26.

12. Isiyani yaapankilyaaya arokorihu Melissa ni Nick wiira atepe ukhala ootteeliya?

¹² Nnaawuupuwela arokorihu Melissa yaapheela uvara nteko u Peteli ni usoma Icikola ya Anamalalyeera Umwene? Ayo khakhitinri upanka nnyo citthunnyo, masi aheera co: “Mi kinawiikurumica cinene uvara ntekwaaka weepiyoneeru, ni kinawiikurumica ulalyeera nimananna makhwaawe. Phimaana unaakitteela nrima cinene.” Ni isiyani Nick moopenleehu mwaha wiipaceroni, yaapankilyaawe ukati wahaathanliyaawe ukhala nrumiya o wanlokoni? Uyo neera co: “Mi kaheekurumica uvara miteko caarinaaka, toko ulalyaa ihapari ca Nluku ni uvaha ikomentaariyu comaana wanlokoni. Mi ciicammo kahantikha ipetição wiira kirwee kavare nteko u Peteli ni uvira waya mwaakha, kaheehaniya.”

13. Isiyani inhala wuukhumelelani mweekurumicaka ninrimeenyu wotheene uvara miteko civahaceriyeenyu nnava? (Nwehe Eklesyaste 2:24)

¹³ Nyuuva mweekurumicaka ninrimeenyu wotheene uvara miteko civahaceriyeenyu nnava, niireke nnaahala uvahaceriya-tho miteko cikiina wahoolo? Iyee, pooti nnaahala uvahaceriya, toko cankhumelenlyaaya Nick. Masi hataa ukhalaka wiira makhalelweenyu anaalikanaca naarokorihu Melissa, nyuuva pooti wuutteelani nrima nlattu wo citthu cinkhitiriinyu upanka nnava. (Nsome Eklesyaste 2:24. *) Ni itthu inhala utepa wuutteelihani nrima ukhanle ucuwela wiira Apwiiyeenyu, Yesu Kristu, anaatteeliya nrima cinene yoonaka wiikurumica winyu.

14. Wakhala wiira nnava ninaavara cinene nteko wa Yehova, niireke khaninlamuliya wiihelela mipika co mminepani? Ntaphulele.

¹⁴ Wakhalaka wiira ninneekurumica cinene uvara nnava nteko wa Yehova, niireke iyo inthoonyera wiira khaninlamuliya wuncerera nteko unonvareleleehu? Mena! Niihaana niihelelaka mipika co mminepani. Mipika co mminepani cinaanikavihera ulalyeera ratta, wiitthuciha saana ni utepa waakavihera cinene mayamunneehu. Wiira nikhitiri wiirannyeeha nnyo mipikannyo, nihaana nikhalanaka ankhili omaana ni wiiyeviha. Uhiya uhoolelihera wiicuupuwela hiiva paasi, nihaana niivahereraka waapankela citthu comaana akhunanihu.—Miru. 11:2; Mite. 20:35.

15. Mipikani cinhala wuukaviherani utepa utteeliya nrima?

¹⁵ Mipikani cinlamuliyeenyu wiihelela? Munlepele Yehova wiira ookavihereni wiihelela mipika cinhaleenyu ukhitiri wiirannyeeha. (Miru. 16:3; Tiya. 1:5) Nnoonela cani wiivaherera uvara nteko weepiyoneeru ookavihera awula owiicaaverya, uvara nteko u Peteli awula nteko wootekateka mapuro answaliihu? Nnoonela cani wiitthuca iluuka ikhwaawe awula uthamela ncoko nkhwaawe wiira nkavihere cinene nteko woolalyeera? Wiira ncuwele mananna owiirannyeeha nnyo mipikannyo, nsome ikapiitulu 10 nhina ilivuru Organizados Para Fazer a Vontade de Jeová awula nwuulumane mahumu o wanlokoni winyu. * Mwiikurumicaka wiirannyeeha mipika cinyu, unaahala wuutteelani  cinene nrima ni atthu otheene anaahala woona wuunuwa winyu mminepani.

16. Isiyani inlamuliyeenyu upanka wakhalaka wiira khannokhitiri wiirannyeeha mipika coopenleehu mwaha?

¹⁶ Vano wakhalaka wiira khannokhitiri wiirannyeeha mipika coopenleehu mwaha, isiyani inlamuliyeenyu upanka? Nhaana wiikurumica wiihelela mipika cikiina cinooneenyu wiira nnaahala ukhitiri wiirannyeeha. Nttwee noone nnyo mipikannyo.

17. Toko cinthoonyeraaya 1 Timotiyu 4:13, 15, isiyani munna inlamuliyaawe upanka wiira acuwele wiitthuciha saana?

¹⁷ Nsome 1 Timotiyu 4:13, 15. * Wakhala wiira nyuuva mwaalopwana ni nhopattisiya, mwiikurumice ucuwela utaphulela myaha co mbiiblyani ni wiitthuciha. Kontha isiyani? Kontha ‘mwaweheehaka saana’ mananna oosoma ratta, nyuuva nnaahala ukhitiri wiitthuciha ni utaphulela myaha wanlokoni cinhala waakavihera cinene mayooviriyana. Mwiihelele mpika usoma ni uvarela nteko khula mpantta wobroxura Melhore a Sua Leitura e o Seu Ensino. Nsome khula mpantta ikwahaayaru ni mwitthenkace uwaani nvarelaka nteko itthu inhimyaaya uyo mpanttooyo; ni mwaayaka upanka mphantte wankutthaanoni, nvarele nteko itthu yiitthucileenyu nhina iyo ibroxureeyo. Munlepele ankhili humu nowacera wanlokoni mananna ootaphuleliya myaha co mbiiblyani awula nwuulumane mahumu makhwaawe “aneekurumica uvara nteko wo wuuluma ni wiitthuciha”, wiira yuukavihereni ulokihaca meettuciherweenyu. * (1 Tim. 5:17) Nhitothe paasi uvarela nteko itthu inhimyaaya iyo ibroxureeyo, masi venci-venci ntothe waakavihera mayooviriyana wuncerera waamini waya ni waalipiha wiira yeettele citthu cineetthuciheenyu. Mwapankaka  commo, nnaahala waatteeliha nrima ale anooviriyanani ni nyuuva nnaahala utepa utteeliya nrima.

18. Isiyani inhala unikavihera ukhitiri ulalyeera saana?

¹⁸ Otheene cihu nihovahaceriya nrintti muulupale wo waalalyeera atthu ni waapanka eetthuci. (Mat. 28:19, 20; Aroo. 10:14) Waanoocivelani wiitthuceeha uvara saana uyo nteko muulupalyooyo? Paasi, nsome ni nvarele nteko mipantta co mbroxurani Melhore a Sua Leitura e o Seu Ensino. Ukati woopanka commo, mwiihelele mipika. Mwaalivuru o mikutthaano Vida e Ministério Cristãos ni ividiyu cinthoonyera mananna oowoopana myaha atthu wuulalyeerani cinooneehu wankutthaanoni wo weeriyari isumana, ciicammo cinaaniitthuciha ulalyeera saana. Nttehe utakihera nnyo myahannyo ni moone myahani cintepa wuukhumelani saana wuulalyeerani. Mwapankaka citthu cotheenennya, nnaahala ukhitiri wiitthuciha saana ni unaahala wuutteelani nrima cinene.—2 Tim. 4:5.

19. Isiyani inlamuliyeenyu upanka wiira nkhitiri uthoonyera makhalelo omaana?

¹⁹ Nhiliyale wiira mpika muulupale cinene unlamuliyeenyu wiihelela, ukhanle wiikurumica uthoonyera makhalelo anoncivela Yehova. (Akalas. 5:22, 23; Akalas. 3:12; 2 Pet. 1:5-8) Ninhala upanka cani iyo? Wootakihera, nyuuva atthunaka nnopheela ulipihaca waamini winyu. Wiira nkhitiri ulipihaca waamini urineenyu, nhaana nsomaka myaha co mmalivuruni cihu cinttonkaca malipihero waamini wihu. Ividiyu cinci co JW Broadcasting^® cinaattonkaca ihantisi co mayamunneehu ni asirokorihu anthoonyera waamini cinene hataa yakhalanaka masakha. Woona nnyo ividiyunnyo ni wiikurumica waatakiha ayo mayamunnaayo unaahala wuukaviherani cinene.

20. Isiyani inhala unikavihera ukhala ootteeliya ni uhitepa uniriipa nrima?

²⁰ Khweeliini, otheene cihu waanaanicivela uvara cinene nteko wa Yehova uvikaniha cinvareehu nnaco. Upeephoni ninaahala unswalela Yehova niikuru cihu cotheene. Masi uhinaphiya uyo ukatyuuyo, nihaana niikurumicaka nenna co upanka inkhitiriihu. Napankaka commo, ninaahala ukhala ootteeliya ni khunhala utepa uniriipa nrima. Ciicammo, ninaahala unttitthimiha ni unttottopela Yehova, ‘Nlukwiihu ootteeliya.’ (1 Tim. 1:11) Phimaana, otheene cinitteelihe nrima miteko cinkhitiriihu unvarela Yehova!