Khweeliini, iyo kahi phi itthu impheelaaya uhimya ila iveeruswiila. Iyo immwaaca ntthu anonkhumelela masakha menci, masi hinhiya uvilela.

Moone itthu inhimyaaya iveerusu 15 ni 17 cinvaranaca niila iveeruswiila: “Uhiipithe, khampa ntthu ootakhala nrima, nipuro nowaattamana uwannyawe nasariya wiira umpanke itthu yootakhala; Uhikwanyulace nipuro nimmumulaawe. Kontha, hataa ukhalaka wiira nasariya naamora imaara 7, uyo naahala wunwa-tho. Masi atthu oohinamaana anaahala uwuluwa nlattu wohasara. Nwanannyaa amoraka, uhuutteele; Ni akakathuwaka, uhihiye nrimaa wuutthapaka.”—Miru. 24:15-17.

Atthu akhwaawe anoopuwela wiira iveerusu 16 immwaaca ntthu novara matampi, masi nottharuwa ni noturuwela ukhalana upatthani ni Nluku. Wootakihera, ahooleli ottiini eeli o Inglaterra ahantikha yeeraka wiira anamalalyeera okhalayi ni ophiyaaru anaarumeleliha iyo itthwiiyo. Ayo ahooleli ottiinnyaayo aheera wiira iyo pooti umwiiriha ntthu wuupuwela wiira uyo “pooti uvara itampi cuulupale, masi nanlelo uhihiya unfenta Nluku ni unciveliha Nluku nlattu woottharuwa.” Iyo pooti untteeliha nrima ntthu himpheela uhiya uvara matampi. Uyo atthunaka pooti wuupuwela wiira, hataa avaraka matampi ikwaha cinci, Nluku naahala unlevelela khula ukati.

Masi iyo kahi phi itthu impheelaaya uhimya iveerusu 16.

Nuulumo noluuka iheperewu nitaphuleliye “naamora” ni “amoraka” nhina iveerusu 16 ni 17, pooti waaca citthu cinci. Nno nuulumonno pooti waaca umora weekhweeli—toko, mwannama nokakathuwa amoraka munttalani, ntthu nomora waculu inupa amorelaka vathi, awula nluku nimmorela vathi. (Deut. 22:4, 8; Amos 9:9) Masi ciicammo, nno nuulumonno pooti uhaaca umora weekhweeli, toko ila iveeruswiila: “Yehova naahoolela meettelo a ntthu cancivelaka iphiro cawe. Hataa uyo amoraka, khanhala wiikhoromela, kontha Yehova nanvara moono.”—Isaa. 37:23, 24; Miru. 11:5; 13:17; 17:20.

Masi moone itthu yuulumalyaawe purusoore nosomiha icikola cuulupale neehaniya Edward Plumptre. Uyo heera co: “Nuulumo neekereku nintaphuleliya [“umora”], khanivo nipuro ninromoliyaaya naacaka uvara matampi.” Phimaana namasoma nkiina notaphulela iveerusu 16 eeraka co: “Ntthu naalupattha apoovu a Nluku, neevarihaca nteko wo mahala, kontha ayo anawoopwa. Masi atthu oohinamaana khanoopwa!”

Coo, Miruku 24:16 yeeraka “umora,” khinaaca uvara matampi. Masi immwaaca ntthu anonkhumelela masakha menci. Ila ituninya yoohinamaaneela, ntthu nasariya pooti uweryaaciya ni unkhumelela masakha makhwaawe. Mpaka uyo pooti ulupatthiya venci naakhulupale ookuvernu. Masi hataa cankhumelelaka citthu cotheennyo, uyo pooti ukupali wiira Nluku naahala unkavihera uvilela khula marikariko. Muupuwele ikwaha ciwonneenyu atthu anonswalela Nluku caakhumelaka saana citthu caya. Nlattuni iyo inkhumelelaaya? Iyo inkhumelela kontha “Yehova nawaamaaliha atthu otheene ammora ni naawunwusa atthu owiicooromelela otheene.”—Isaa. 41:1-3; 145:14-19.

“Nasariya” khunontteela nrima awoonaka akhwaawe yaakhumelelaka masakha. Uhiya commo, uyo nawiimaaliha nlattu woocuwela wiira “ale ammoova Nluku eekhweeli, cinaahala uweettela saana citthu cotheene, kontha ayo anaamoova.”—Ekles. 8:11-13; Jó 31:3-6; Isaa. 27:5, 6.