MWAHA WOOSOMIYA 9
Amirawo—Isiyani inlamuliyeenyu upanka wiira nkhuluveliye?
“Nyuuva nnaawaakhela amiraweenyu khampa ukame.”—ISAA. 110:3.
NCIPO 39 Um Bom Nome
NINHALA WIITTHUCANI? *
1. Ifayitani irinaaya amirawo wanlokoni?
AMIRAWO, nyuuva pooti ukavihera cinene mumphwinkoni wa Yehova. Nyuuva nkhanle atthu ookhomaala ni nhaana ikuru cinene. (Miru. 20:29) Khacimala citthu cimpankeenyu wiira mwaakavihere mayamunneenyu ni asirokorinyu o wanlokoni. Atthunaka nyuuva waanoocivelani cinene ukhala arumiya o wanlokoni. Masi, atthunaka nyuuva nnoopuwela wiira mayamunna o wanlokoni anwoonani uyeva ni anoopuwela wiira khannaaya ukhomaala wiira nkhale nrumiya o wanlokoni. Unookhalaru commo, nyuuva amirawo pooti upanka citthu cinhala wuukaviherani wiira mayamunna o wanlokoni yuukhuluveleni.
2. Isiyani inhaleehu wiitthuca nhina ula mwahoola?
2 Nhina ula mwahoola, ninaahala usoma ntakihero na mwene Davidi. Ciicammo, ninaahala wuupuwela citthu caakhumelenle mamwene eeli o Yuuta—Asa ni Yehosafaati. Ninaahala woona marikariko yaaphwanyile ayo alopwanaayo, citthu caapankilyaaya wiira amalihe ni citthu cineetthucaaya amirawo.
UMWIITTHUCERE MWENE DAVIDI
3. Isiyani mmirawo inlamuliyaawe upanka wiira aakavihere mayamunna o wanlokoni owuuluvala?
3 Naryeene mmirawo, Davidi aanooryooryaca citthu caacivela atthu enci. Waanoonannya wiira uyo aari mmirawo aarina upatthani woolipa ni Yehova. Uyo ciicammo ancuwela wiipa, ni aneepaka wiira ankavihere mwene Sawuli, mwene aathanliye ni Nluku. (1 Sam. 16:16, 23) Vano weeva mmirawo, cihaavo citthu cinooryaa cinhala waakavihera akhunanaa wanlokoni? Wootakihera, weeva pooti waacuwela amunneehu o wanlokoni owuuluvala, ahinkhitiri uvarela nteko itableti awula telefooni ukati unsomaaya Ibiiblya veekha awula ukati wo mikutthaano. Wakhala wiira unaacuwela umpotolaca telefooni awula itableti, unoonela cani uvarela nteko itthu incuwelaa wiira waakavihere ayo amunnaayo? Ayo khweeliini unaahala waatteela nrima venci.
Davidi ahothoonyera ukhala mmirawo ookhuluvelya ukati waavahaceriyaawe uwacera ikhontwaa caathumwaane. Uyo ahokhikicera ikhotwaa ukati waatupheliyaaya ni urso (Nwehe iparaagarafu 4)
4. Manannani amirawo cinlamuliyaaya untakiha Davidi? (Nwehe ilatarato iri wakaapani.)
4 Khula uwakati, Davidi aanaathoonyera wiira aari ntthu ookhuluvelya. Wootakihera, naryeene mmirawo, Davidi ahowacera saana ikhontwaa caathumwaane. Ni nhiliyale wiira uyo waari nteko wowoopiha! Moone itthu Davidi yaamwiirenlyaawe Sawuli wahoolo: “Pwiiya, miiva ntekwaaka ukhanle uliha ni utafiti ikhontwaa caapaapa. Ukati waawilyaawe kharamu (ciicammo urso), atthawihaka ikhontwaa imoca, kahomoomolaniha mpaka unvara ni umwaakha ikhontwaa yaacisalyaawe.” (1 Sam. 17:34, 35) Davidi ancuwela wiira uyova ahaana awaceraka ikhontwaa caathumwaane ni aholipa nrima wiira akhikicere. Nyuuva amirawo, pooti untakiha Davidi mweekurumicaka wiira nwacere saana khula nteko unhaleenyu uvahaceriya.
5. Toko cinthoonyeraaya Isaalimu 25:14, itthuni yuulupale cinene mmirawo inlamuliyaawe upanka?
5 Naryeene mmirawo, Davidi ahokhalana upatthani womaana ni Yehova. Ni khiivo itthu ikhwaawe Davidi yoonaawe ukhalana ifayita cinene, uvikana upatthani waarinaawe ni Yehova. Phimaana uyo khaalemeliha cinene ulipa nrima waarinaawe ni woorya wawe wiipa. Moonelwaawe Davidi, Yehova khaari Nlukwaawe paahi, masi ciicammo aari mpatthannyaawe muulupale. (Nsome Isaalimu 25:14. *) Mmirawo, itthu yuulupale cinene inlamuliyaa upanka, ukhanle ulipihaca upatthannyaa naathumwana o wiirimu. Wapankaka commo, pooti uvahaceriya mirintti cinci wanlokoni.
6. Atthu akiina yaamoonela cani Davidi?
6 Itthu yoorika yankhumelenle Davidi waari uhiwehiya ratta naakhunanawe. Wootakihera, ukati weevaherenryaawe umwaattakanana Koliyasi, mwene Sawuli ahomananiha unhiiha Davidi, amwiirelaka: “Weeva ummirawo.” (1 Sam. 17:31-33) Ni uhinaphiya uyo ukatyuuyo, muulupalyaawe Davidi ahoolumaca citthu caathoonyera wiira uyo amoona Davidi ukhala mmirawo oohikhuluvelya. (1 Sam. 17:26-30) Masi Yehova khoopuwela wiira Davidi aari mmirawo oohikhomaala ni oohikhuluvelya. Yehova anancuwela saana Davidi, ni ukhala wiira Davidi ahonkhuluvela mpatthannyaawe, Yehova, uyo ahokhitiri untthema Koliyasi.—1 Sam. 17:45, 48-51.
7. Ihantisi ya Davidi inwiitthuciha isiyani?
7 Ntakihero na Davidi ninwiitthuciha isiyani? Nihaana niitthucaka uweherera. Ale anoocuwela ikhumelo inamwannyaa, pooti uhaakuva woona wiira weeva uhoonuwa. Masi ukupali wiira Yehova khanweha ikhove ya ntthu paahi. Uyo nawuucuweleeha weeva ni naacuwela citthu cinkhitiryaa upanka. (1 Sam. 16:7) Ulipihace upatthannyaa ni Yehova. Itthu yankavihenre Davidi ulipihaca upatthannyaawe ni Yehova waari uweha citthu Yehova cumpilyaawe. Uyo aaneekurumica wuupuwela manannani nnyo citthunnyo cintthoonyeraaya makhalelwaawe ule umpile. (Isaa. 8:3, 4; 139:14; Aroo. 1:20) Itthu ikhwaawe inlamuliyaa upanka, ukhanle unlepela Yehova wiira oovahe ikuru weeva cimpheelaa. Wootakihera, atthu weeva anaasomanaa anawutarawaca nlattu wookhala Saahiti a Yehova? Wakhala wiira iyo itthwiiyo inawuukhumelela, unlompe Yehova ni unlepele wiira ookavihere waanana ayo marikarikwaayo, ni uhihiye weettela citthu cineetthucaa mbiiblyani, mmalivuruni ni mmavidiyuni cihu. Khula ikwaha unhalaa woona wiira Yehova hookavihera waanana marikariko, weeva unaahala utepa unkhuluvela. Ni wankhuluvelaka cinene Yehova, akhunanaa anaahala ciicammo utepa wuukhuluvela.
Ahaavo mananna menci amirawo anlamuliyaaya wiiyeviha ni waakavihera akhwaaya (Nwehe iparaagarafu 8-9)
8-9. Isiyani yankavihenre Davidi uweherera uphiya ukati waahalaawe wancera ulamulela? Ntakihero na Davidi ninwiitthuciha isiyani amirawo?
8 Moone itthu ikhwaawe yoorika yankhumelenle Davidi. Uwakati waathanliyaawe wiira akhale mwene o Isarayeli, Davidi ahaana awehereraka myaakha cinci wiira ancere ulamulela. (1 Sam. 16:13; 2 Sam. 2:3, 4) Uyo ukatyuuyo, isiyani yankavihere uweherera? Davidi uhiya ukhala acukulacaka, uyo aheekurumica upanka itthu yaakhitiryaawe. Wootakihera, ihaavo ikwaha yaatthawenlyaawe ncoko wo mafilisteu. Davidi ahovarela nteko uyo ukatyuuyo wiira awaanane alupatthi aasarayeli. Nlattu woopanka commo, uyo ahokhikicera ncoko wo Yuuta wiira ahikele alupatthi.
9 Ntakihero na Davidi ninwiitthuciha isiyani amirawo? Upanke yotheene inhalaa ukhitiri wiira waakavihere mayamunnaa o wanlokoni. Woone ntakihero na munna mmoca neehaniya Ricardo. * Ikhumelo inamwannyaawe, uyo aapheela ukhala piyoneeru owiicaaverya. Masi mahumu yenre wiira uyo ahaana eetthencakaca saana. Ricardo khaanyanyanle itthu yaapheelaawe ni khaarusiye, masi aheekurumica uvara saana nteko woolalyeera. Uyo neera: “Koopuwelaka uttuli, mi kinawoona wiira wahoreera wiikurumica urukunusa makhalelwaaka wiira kiitthenkace. Mi kaheekurumica uturuwela uwootola atthu waacivela woopaniya myaha co mbiiblyani ni kaaneetthenkacaka saana kihinaaya urwaa uwootola. Mpaka kahokhitiri umphwanya ntthu aapacenryaaka unsomiha Ibiiblya. Ukati weekurumicaaka wuulalyeerani, mi kantepa uhoova.” Nna co, Ricardo khanle piyoneeru owiicaaverya omaana ni ciicammo hokhala nrumiya owanlokoni.
10. Isiyani Davidi yaapankilyaawe hinaaya ulakela upanka itthu yuulupale?
10 Moone itthu ikhwaawe yankhumelenle Davidi. Uwakati Davidi ni alopwanaawe wantthawaaya mwene Sawuli, ayo yahaahiya amucyaaya mmawannyaya wiira arwee ukhottoni. Anaryeene ukhottoni, yahowa alupatthi mmawannyaya ni waacisa asimucyaaya. Ukhala wiira Davidi aari nakhotto muulupale, uyo atthunaka aahala wuupuwela wiira anhala ukhitiri upanka itthu wiira awoopole atthu yaacisiye. Masi uhiya upanka commo, uyo ahontotha Yehova wiira anhimerye itthu yooreera upanka. Akaviheriyaka ni Abiatar, Davidi ahonkoha Yehova: “Kitthimakeleke ila ikhurupu yo malatarawiila?” Yehova ahontthunihera Davidi, ni ahonkhuluveliha wiira anhala ukhitiri waavara. (1 Sam. 30:7-10) Iyo ihantisiiyo inwiitthuciha isiyani?
Amirawo ahaana yaalepelaka ikano mahumu (Nwehe iparaagarafu 11)
11. Isiyani inlamuliyaa upanka wapheelaka ulakela upanka itthu?
11 Wapheelaka ulakela upanka itthu, waakohe akhunanaa itthu yooreera upanka. Waalepele asithumwanaa wiira yuukavihere. Ciicammo, ulepele ukaviheriya ni mahumu oocuwelaca. Yehova nawaakhuluvela ayo alopwanaayo, phimaana weeva ciicammo pooti waakhuluvela. Yehova nowoona mahumu ukhala “itthuvo” co wanlokoni. (Efesu 4:8) Weeva unaahala upanka saana weekurumicaka utakiha waamini urinaaya ayo alopwanaayo ni wattharaka ikano comaana cinoovahaaya. Vano nttwee noone citthu cinniitthucihaaya ntakihero na mwene Asa.
UMWIITTHUCERE MWENE ASA
12. Makhaleloni yaathonyenryaawe Asa ukhala wawe mwene?
12 Ukati Asa waaryaawe mmirawo, uyo aari ntthu owiiyeviha ni oolipa nrima. Wootakihera, uwakati waakhwilyaaya athumwaane yeehaniya Abias, Asa ahokhala mwene ni ahomalamaliha uswaleliya attontto nlaponi motheene. Asa ciicammo “ahaaruma ayuuta wiira antothe Yehova, Nluku omayanhataataaya, ni yiiwelele Nlamulo ni marumo.” (2 Ikor. 14:1-7) Ni waawilyaawe Zeraa o Etiópia, naanatoropa 1 milhão wiira aane ikhotto naayuuta, Asa ahothoonyera ucuwelaca ni ahototha ukaviheriya ni Yehova, eeraka: “Oo Yehova, weeva khunwacera wakhala wiira atthu anaakaviheraa ari enci awula khanakuru. Unikavihere, sontte Yehova, Nlukwiihu, kontha ninookhuluvela weeva.” Ayo moolumo omaanaayo anthoonyera wiira Asa aanaakhuluvela Apaapaawe o wiirimu, ni “Yehova ahaatthema anatoropa o Etiópia.”—2 Ikor. 14:8-12.
13. Isiyani yankhumelenle Asa wahoolo, ni nlattuni?
13 Weeva khweeli unawaamini wiira uwaanana anatoropa 1 milhão yaari itthu yoorika cinene. Waahookhalaru commo, Asa ahokhitiri waatthema. Wooriipiha nrima, ukati wankhumelenlyaaya itthu yankaani yoorika, Asa khaatothile ukaviheriya ni Yehova. Uyo waari uwakati woopopihiyaawe ni mwene o Isarayeli eehaniya Baasa. Asa aatothile ukaviheriya ni mwene o Siiriya. Nlattu woolakela upanka iyo itthu yoohilokeeyo, Asa aheewaanela masakha menci! Yehova ahonruma porofeeta Hanani urwaa umwiirela Asa co: “Anatoropa a mwene o Siiriya ahokuluphuwa mmatatani waa, ukhala wiiraunkhuluvenle mwene o Siiriya, kahi Yehova, Nlukwaa.” Ni khweeli, ukhuma ule ukatyuule, Asa khaakhanle-tho ni nnema.(2 Ikor. 16:7, 9; 1 Mam. 15:32) Isiyani hiiva ineetthuceehu?
14. Unhala uthoonyera cani wiira unakhuluvela Yehova? Toko cinthoonyeraaya 1 Timotiyu 4:12, isiyani inhala wuukhumelela waahihiyeke unkhuluvela Yehova?
14 Uhihiye ukhala ntthu owiiyeviha ni uhihiye unkhuluvela Yehova. Ukati upattisiyaa, weeva uhothoonyera wiira uhaana waamini woolipa ni unankhuluvela Yehova. Ni Yehova ahokhala ootteeliya venci ukati woowaakhelela weeva wiira upanke mphantte ikhurupu yaamucyaawe. Phimaana, itthu inlamuliyaa upanka ukhanle uhihiya unkhuluvela Yehova. Pooti uhirika unkhuluvela Yehova ukati woolakela citthu cuulupale cinhala urukunusa makhalelwaa. Vano ukati woolakela citthu cankaani? Unaareera unkhuluvela Yehova ukati woolakela upanka khula itthu, hataa cikhalaka citthu cankaani, toko uthanla mathukelo, ni ciicammo ukati woolakela upanka citthu cuulupale, toko uthanla nteko ni citthu coohala uvara uhoolo! Uhaakhuluvele ankhilyaa. Masi wiikurumice utotha mattharelelo o mbiiblyani anhala wuukavihera ulakela upanka itthu yomaana. Vano, weettele itthu inhalaa wiitthuca. (Miru. 3: 5, 6) Wapankaka commo, Yehova naahala ukhala ootteeliya venci ni mayamunna o wanlokoni anaahala wuuhisima.—Nsome 1 Timotiyu 4:12. *
UMWIITTHUCERE MWENE YEHOSAFAATI
15. Khampa cinthoonyeraaya 2 Ikoronika 18:1-3; 19:2, citthuni coohinamaana Yehosafaati caapankilyaawe?
15 Khweeliini, khampa ciryaaya atthu otheene, weeva ukhanle ntthu oopahuwa ni ukati nkiina unaavonyaka. Masi iyo khinlamuliya wuuhiiha wiikurumica uvara cinene miteko ca Yehova. Woone itthu yankhumelenle mwene Yehosafaati. Uyo ahaana makhalelo omaana. Ukati waaryaawe mmirawo, “uyo aanantotha Nluku aathumwaane ni aanaweettela malamulwaawe.” Uyo ciicammo ahaaruma akhulupale weetta ilapo yotheene yo Yuuta wiira awiitthucihe apoovu myaha ca Yehova. (2 Ikor. 17:4, 7) Waahookhalaru wiira Yehosafaati aari ntthu omaana, ikwaha cikiina uyo aholakela upanka citthu coohiloka. Ni nlattu woolakela upanka citthu coohiloka, uyo aholakiya naatthu Yehova yaarumilyaawe wiira anlake. (Nsome 2 Ikoronika 18:1-3; 19:2. *) Ihantisyaawe inniitthuciha isiyani?
Amirawo oohinyoonyaciya ni ookhuluvelya anaahisimiya venci (Nwehe iparaagarafu 16)
16. Itthu yankhumelenle munna Rajeev iwiitthucihile isiyani?
16 Utthune ni weettele ikano cinvahiyaa. Pooti ukhalaka wiira, toko amirawo akhwaawe, weeva unawuurika ulakela isiyani inlamuliyaa uhoolelihera muukumi waa. Masi uhikhale ni masukhuli. Woone itthu yankhumelenle munna mmoca neehaniya Rajeev. Uyo hottonka makhalelwaawe ukati waaryaawe mmirawo, eeraka: “Ukati nkiina, mi akaacuwela isiyani yaapheelaaka utthara muukumini waka. Toko amirawo akhwaawe, mi waakicivela paasi uthuka, uhiya urwaa umikutthaano ni wuulalyeerani.” Isiyani yankavihenre Rajeev? Ikano yaavahiyaawe ni humu mmoca ooreera nrima phankavihenre. Rajeev heera: “Uyo humuuyo ahokikavihera wuupuwela itthu inhimyaaya 1 Timotiyu 4:8.” Rajeev ahiiyeviha ni ahotthara ikano yaavahiyaawe. Uyo ahoopuwela cinene isiyani yaalamuliyaawe uhoolelihera muukumini wawe. Uyo neera: “Mi kaholakela uhoolelihera muukumi waka citthu coominepani.” Isiyani yankhumelenle? Rajeev hohimya, eeraka: “Waavahiyaaka iyo ikannweeyo, waavinre ukati vakaani mi nuukhala nrumiya o wanlokoni.”
WAATTEELIHE NRIMA ATHUMWANA O WIIRIMU
17. Mayamunna owuuluvala anwoonela cani amirawo?
17 Mayamunna owuuluvala anaawoonani ukhalana ifayita cinene nyuuva amirawo, nnonswalela Yehova “wamoca” naayo! (Sof. 3:9) Ayo unawaacivela cinene woona mananna cinvareenyu miteko cinvahaceriyeenyu wanlokoni, niikuru cinyu cotheene ni ntteeliyaka nrima. Ayo khweeliini anaaciveliya venci ni nyuuva.—1 Jo. 2:14.
18. Toko cinthoonyeraaya Miruku 27:11, Yehova nowoonela cani amirawo anonswalela?
18 Amirawo, nhiliyale wiira Yehova nawuufentani venci ni nawuukhuluvelani. Khalayi, uyo aheera wiira amirawo enci yanhala wiivaherera niiraati. (Isaa. 110:1-3) Uyo naacuwela inanna cinonfenteenyu ni naacuwela wiira nnawiikurumica wiira munswalele ratta. Phimaana, mwaavilele akhwiinyu ni mwiivilele nyuuva asineeneenyu. Mwavonyaka, nhikhotte utthenkaciya ni ulakiya. Nwehere iyo khampa itthu Yehova impankaawe wiira ookavihereni. (Mabere. 12:6) Mwiikurumice uvara saana miteko cinvahaceriyeenyu. Ni itthu yuulupale cinene phi ila: nhina wo citthu cotheene cinhaleenyu upanka, mwaatteelihe nrima Apaapeenyu o wiirimu.—Nsome Miruku 27:11. *
NCIPO 135 “Ukhalane ankhili, mwanaka”
^ par. 5 Mmirawo oopattisiya o wanlokoni akhalanaka upatthani woolipa ni Yehova, uyo naahala upheela uvara cinene miteko ca Yehova. Masi wiira akhalihiye nrumiya o wanlokoni, uyo haana akhalaka ntthu oohisimiya ni ookhuluveliya wanlokoni. Isiyani mmirawo inlamuliyaawe upanka wiira ooniye ukhala ntthu ookhuluvelya wanlokoni?
^ par. 5 Isaalimu 25:14 Ammwiiwelela Yehova phinkhalana upatthani woolipa nuuyova. Ni uyo nawaacuweliha nleehano nawe.
^ par. 9 Macina makiina ahaakakhanihiya.
^ par. 14 1 Timotiyu 4:12 Uhinhiye ntthu oovyaavyeehacaka nlattu wookhala mmirawo. Masi, ukhale ntthu ooreera utakihiya naatthu ookhuluvelya nhina wo moolumacerwaa, meettelwaa, nifento naa, waamini waa, makhalelwaa omaana.
^ par. 15 2 Ikoronika 18:1 Yehosafaati ahaana mihakhu cinci ni uttitthima cinene, masi uyo ahonhiya mwanawe uthela watthokoni wa Akabi. 2 Phimaana, cinaavinreene myaakha, uyo ahorwaa unthotola Akabi u Samariya. Ni Akabi aheeva ikhontwaa ni imope cinci, ni nnyo ahovaherera itthuvo mwancina na Yehosafaati wamoca ni alopwana yaarinaawe. Ni ahonkhanyereriha Yehosafaati wiira arwee wamoca nuuyo waana ikhotto u Ramote-Gileade. 3 Akabi, mwene o Isarayeli, ahonkoha Yehosafaati, mwene o Yuuta: “Ninaarwaaca nkhayi u Ramote-Gileade?” Uyo ahomwaakhula eeraaka: “Mi kinhala ukhala wamoca ni weeva, apoovwaaka anhala ukhala wamoca naapoovwaa ni anaahala wuukavihera ukhottoni.” 2 Ikoronika 19:2 Jeú, mwaana a Hanani nawooni, ahorwaa umoonana mwene Yehosafaati ni ahomwiirela: “Niireke nnolamuliya unkavihera ntthu oohinamaana, ni waafenta ale anonthanya Yehova? Nlattu wo iyo, Yehova hooviruwelani.”
^ par. 18 Miruku 27:11 Ukhalane ankhili, mwanaka, wankitteelihaa nrima, wiira kimwaakhule ule nkiveehaca.
