MWAHA WOOSOMIYA 45
Mwaakavihere akhwiinyu wiiwelela malamulo a Kristu
‘Coo, nrwee, ni mwaapanke eetthuci atthu, mwawiitthucihaka wiiwelela citthu cotheene cuurumalyaakani.’—MAT. 28:19, 20.
NCIPO 89 Nviriyane, mwiiwelele ni ncaalihiye
NINHALA WIITTHUCANI? *
1. Isiyani Yesu yaarumalyaawe attharyaawe nhina Matewus 28:18-20?
WUNWELELIHIYA wawe, Yesu ahowoonanana attharyaawe u Kalileya. Uyo aapheela waahimyera itthu yofayita cinene. Isiyani? Iyo yantikhiye nhina Matewus 28:18-20.—Nsome. *
2. Makohoni anhaleehu woopela mwaha?
2 Ilelo, hiiva ciicammo nihaana nivaraka nteko wo waapanka etthuci Yesu waarumalyaawe attharyaawe. Phimaana, ninaahala woopela mwaha makoho mararu. Noopacera, uhiya paahi uwiitthuciha malamulo a Nluku atthari a Yesu ophiyaaru, isiyani-tho ninlamuliyeehu upanka? Nonayeeli, anamalalyeera otheene wanlokoni isiyani inlamuliyaaya upanka wiira yaakavihere atthu ansomihiya Ibiiblya? Ni nihoko noneeraru, ninlamuliya waakavihera cani mayamunna ahiile ulalyeera wiira aturuwele uvara nteko wo waapanka eetthuci?
NWIITTHUCIHE WIIWELELA MALAMULO A KRISTU
3. Isiyani ihinlamuliyeehu uliyala nhina itthu Yesu yaarumalyaawe attharyaawe?
3 Malamulo a Yesu khanrikarika wiiwa. Hiiva nihaana niwiitthucihaka atthu citthu Yesu cirumalyaawe. Masi ihaavo itthu ihinlamuliyeehu uliyala. Yesu khenre: ‘Nwiitthucihe atthu citthu cotheene cuurumalyaakani.’ Masi uyo enre: ‘Nwiitthucihe wiiwelela citthu cotheene cuurumalyaakani.’ Iyo maanaaya wiira ukati wonsomiha ntthu Ibiiblya, khawantosa paahi umwiitthuciha citthu cinlamuliyaawe upanka, masi nihaana ninthoonyeraka mananna oweettela citthu cimmwiitthuciheehu. (Mite. 8:31) Kontha isiyani nihaana nipankaka commo?
4. Umwiitthuciha ntthu “wiiwelela” maanaaya isiyani? Ntakihere.
4 Umwiitthuciha ntthu “wiiwelela” maanaaya isiyani? Wiira nicuweleehe, nttwee nimuupuwele purusoore nowiitthuciha atthu weettiha ikaaro. Uyo nopaca uwiitthuciha nsaala malamulo omparapaarani. Masi wiira awiitthucihe wiiwelela ayo malamulwaayo, uyo haana apankaka itthu ikhwaawe. Uyo haana akelaka nkaaroni wamoca ni ntthu nonsomihaawe ni umoona eettihaka ikaaro, wiira anthoonyere mananna cinlamuliyaawe weettela malamulo yiitthucihiyaawe nsaala. Nna ntakiheronna ninniitthuciha isiyani?
5. a) Toko cinthoonyeraaya Joau 14:15 ni 1 Joau 2:3, isiyani ninlamuliyeehu waalakihera atthu anaasomiheehu Ibiiblya? b) Ntakihere mananna cinhaleehu waakavihera atthu anaasomiheehu Ibiiblya wiira yeettele citthu cineetthucaaya.
5 Naasomihaka atthu Ibiiblya, hiiva ninaawiitthuciha malamulo a Nluku. Masi uwiitthuciha malamulo a Nluku paahi khuntosa. Nihaana naalakiheraka mananna oweettela citthu cineetthucaaya. (Nsome Joau 14:15; * 1 Joau 2:3. *) Ni citthu hiiva cimpankeehu, pooti waathoonyera atthu anaasomiheehu Ibiiblya mananna oweettela mattharelelo o mbiiblyani ucikolani, untekoni ni ukati unkhalaaya yathukaka. Hiiva pooti waahimyera mananna mattharelelo o mbiiblyani cinikhikicenryaaya awula mananna cinikavihenryaaya uthanla upanka itthu yomaana. Nakhalaka wamoca ni ntthu nonsomiheehu Ibiiblya, hiiva pooti unlompa Yehova ni unlepela wiira amweettihere ni nnepaawe wowaarya.—Joau 16:13.
6. Isiyani ninlamuliyeehu upanka wiira niwiitthucihe atthu anaasomiheehu Ibiiblya wiiwelela malamulo a Yesu?
6 Isiyani-tho ninlamuliyeehu upanka wiira niwiitthucihe atthu anaasomiheehu Ibiiblya wiiwelela malamulo a Yesu? Hiiva nihaana naakaviheraka ale anaasomiheehu Ibiiblya wiira apheele uvara nteko wo waapanka eetthuci. Masi ahaavo atthu ansomihiya Ibiiblya anoova uvara uyo ntekooyo. Phimaana, ninlamuliya waavilela ni waakavihera ucuweleeha itthu inhimyaaya Ibiiblya. Citthu cineetthucaaya mbiiblyani caavaraka nrima, ayo anaahala upheela ulalyeera. Ninhala waakavihera cani atthu anaasomiheehu Ibiiblya wiira apheele ulalyeera?
7. Ninhala unkavihera cani ntthu nonsomiheehu Ibiiblya wiira apheele ulalyeera?
7 Nyuuva pooti unkoha ntthu nonsomiheenyu Ibiiblya: “Ikhweeli ciitthucaleenyu mbiiblyani cuukavihenreni cani muukumini winyu? Woonela winyu, niireke khaavo atthu akiina ampheela wiiwa nnyo ikhweelinnyo? Isiyani nyuuva inlamuliyeenyu upanka wiira mwaakavihere ayo atthwaayo?” (Miru. 3:27; Mat. 9:37, 38) Munthoonyere ikaruma cinvareleehu nteko wuulalyeerani ni munhiye uthanla ikaruma inoonaawe wiira yanhala waakavihera asimucyaawe, asipatthannyaawe awula atthu anaavaranaawe nteko. Munvahe ifolyetu cinci ni munlakihere mananna oolalyeera saana avarelaka nteko nnyo ifolyetunnyo. Ni uyo akhalaka namalalyeera oohipattisiya, nyuuva nhaana nlalyeeraka nkhayi nuuyo wiira mmwiitthucihe.—Ekles. 4:9, 10; Luka 6:40.
MANANNA MAYAMUNNA O WANLOKONI CINLAMULIYAAYA WAAKAVIHERA ALE ANSOMIHIYA IBIIBLYA
8. Kontha isiyani atthu anaasomiheehu Ibiiblya ahaana yanfentaka Nluku ni waafenta akhunanaya? (Nwehe ikwaaturu “ Mananna o waakavihera atthu anaasomiheenyu Ibiiblya unfenta Nluku.”)
8 Muupuwele wiira Yesu honiruma uwiitthuciha atthu “wiiwelela citthu cotheene” cirumalyaawe. Nnyo citthunnyo cinaahela nhina malamulo meeli moolupale—unfenta Nluku ni unfenta nkhunanihu. Ayo malamulo meelyaayo khanhiyana ni nteko woolalyeera ni wo waapanka eetthuci. (Mat. 22:37-39) Manannani? Itthu yuulupale inniiriha ulalyeera nikhanle nifento—unfenta wihu Nluku ni waafenta wihu akhwiihu phinniiriha ulalyeera. Ninaacuwela wiira atthu akiina anaasomiheehu Ibiiblya atthunaka anawoova ulalyeera. Masi hiiva ninlamuliya waalipiha, naahimyeraka wiira Yehova naahala waakavihera, ni vakaani-vakaani anaahala ukhitiri umaliha woova waya. (Isaa. 18:1-3; Miru. 29:25) Ikwaaturu yo ula mwahoola inaathoonyera mananna cinhaleehu unkavihera ntthu nonsomiheehu Ibiiblya wiira atepe unfenta Nluku. Masi mayamunna o wanlokoni ciicammo pooti waakavihera atthu ansomihiya Ibiiblya wiira atepe unfenta Nluku. Manannani?
9. Ntthu neetthucihiya weettiha ikaaro manannani cineetthucaawe citthu cofayita?
9 Muupuwele tootho ntakihero na purusoore nomwiitthuciha ntthu weettiha ikaaro, masi vano moone itthu impankaawe ntthu neetthucihiya. Ule neetthucihiya weettiha ikaaro nonkoma nkaaroni nkhayi ni purusoore nomwiitthuciha. Masi manannani uyo cineetthucaawe? Uyo neetthuca anviriyanaka purusoore nomwiitthuciha ni aawehaka atthu akhwaawe aneettiha ikaaro saana mparapaarani. Wootakihera, purusoore pooti unthoonyera ntthu neettiha ikaaro saana ni neemela wiira aweherere ikaaro cikhwaawe uvira. Awula pooti unthoonyera ntthu nkhwaawe neettiha ikaaro nowukula iluusu cawe oonaka wiira ihaavo ikaaro inwa uhoolo wawe. Atthu oweettiha ikaaro saana toko ayo anaamwiitthuciha citthu cofayita ntthu nolakiheriya weettiha ikaaro.
10. Isiyani inhala unkavihera ntthu nonsomiheehu Ibiiblya urwaa uhoolo?
10 Iyo phi itthu inonkhumelela ntthu nonsomiheehu Ibiiblya anceraka unswalela Yehova. Uyo khaneetthuca paahi anviriyanaka ntthu nonsomiha Ibiiblya, masi ciicammo nawiitthuca awehaka meettelo omaana atthu akhwaawe anonswalela Yehova. Vano isiyani inhala unkavihera ntthu nonsomiheehu Ibiiblya urwaa uhoolo? Uwa umikutthaanoni co wanlokoni. Kontha isiyani? Kontha arwaaka umikutthaanoni, uyo naahala wiitthuca citthu cinci, naahala ulipihaca waamini wawe ni naahala wancera utepa unfenta Nluku. (Mite. 15:30-32) Kahi iyo paahi; uyo arwaaka umikutthaanoni, ntthu nonsomiha Ibiiblya naahala unkavihera waacuwela mayamunna akhwaawe. Ntthu nonsomiheehu Ibiiblya atthunaka naahala woona wiira marikariko anaananaawe, ciicammo akhanle marikariko anaananaaya ayo mayamunnaayo. Uyo naahala waacuwela mayamunna ni asirokorihu anthoonyera nifento. Nttwee noone matakihero vakaani.
11. Matakiheroni ntthu nonsomiheehu Ibiiblya nohalaawe woona wanlokoni, ni ayo anhala unkavihera cani?
11 Nwuupuwele athiyana ansomihiya Ibiiblya anwuunuwiha asaanaaya woohaawannyaya. Usalau yo Umwene ayo anaamoona nrokorihu ciicammo nowuunuwiha asaanaawe veekha, masi hinhiya waawaana umikutthaanoni. Woona mananna nrokorihu cineekurumicaawe, unawaavara nrima ayo athiyanaayo. Awula mmuupuwele ntthu nosomihiya Ibiiblya unonrika uhiya unlya soone. Usalau yo Umwene, uyo nancuwela munneehu khitinri uhiya unlya soone. Uyo munnooyo nanhimyera namasoma Ibiiblya wiira unfenta Nluku phimwiirihile wiiwelela malamulwaawe. (2 Akor. 7:1; Afili. 4:13) Vano uyo munnooyo naamwiirela ntthu nosohimiya Ibiiblya: “Nyuuva ciicammo pooti ukhitiri uhiya unlya soone!” Wiiwa itthu yankhumelenle uyo munnooyo unaamwiiriha ntthu nosomihiya Ibiiblya ukhuluvela wiira nuuyova ciicammo naahala ukhitiri utthema itthu inonrika. Awula mmuupuwele mmirawo nosomihiya Ibiiblya. Uyo naamoona mmirawo nkhwaawe unontteela nrima nlattu wookhala Saahiti a Yehova. Phimaana uyo naatotha ucuwela nlattuni uyo mmirawooyo untteeliyaawe nrima cinene.
12. Nlattuni uneereehu wiira khula ntthu wanlokoni pooti waakavihera urwaa uhoolo ale ansomihiya Ibiiblya?
12 Ntthu nosomihiya Ibiiblya oonaka meettelo omaana o mayamunna enci wanlokoni, nawiitthuca wiiwelela nlamulo na Kristu ninniruma unfenta Nluku ni unfenta nkhunanihu. (Joau 13:35; 1 Tim. 4:12) Ni toko conneehu, ntthu nonsomiheehu Ibiiblya pooti uwiitthucera mayamunna yaakhumelenle marikariko uyova anaananaawe. Uwoona ayo mayamunnaayo unankupaliha wiira uyova ciicammo naahala ukhitiri urukunusa meettelwaawe wiira akhale ntthari a Kristu. (Deut. 30:11) Khula ntthu wanlokoni pooti wiikurumica upanka itthu wiira aakavihere urwaa uhoolo atthu ansomihiya Ibiiblya. (Mat. 5:16) Vano nyuuva? Isiyani impankeenyu wiira mwaakavihere atthu ansomihiya Ibiiblya anwaaka umikutthaanoni?
MWAAKAVIHERE ATTHU AHIILE ULALYEERA WIIRA ATURUWELE ULALYEERA
13-14. Isiyani Yesu yaapankilyaawe ukati mapostolwaawe waaryaaya ni masukhuli?
13 Hiiva nimpheela waakavihera mayamunneehu ni asirokorihu ahiile ulalyeera wiira aturuwele uvara nteko woolalyeera ni waapanka eetthuci. Wiira nicuwele mananna ninhaleehu waakavihera, nttwee noone isiyani Yesu yaapankilyaawe wiira aakavihere mapostolu yaari ni masukhuli.
14 Nihuku Yesu naavariyaawe wiira eeviye, mapostolu otheene “yahonhiya ni yahotthawa.” (Mark. 14:50; Joau 16:32) Isiyani Yesu yaapankilyaawe ukati mapostolwaawe waaryaaya ni masukhuli? Wunwelelihiya wawe, Yesu ahowiirela attharyaawe: “Nhoove! Nrwee, mwaattonkele mayamunnaaka [wiira kihonwelelihiya].” (Mat. 28:10a) Yesu khaawoocyaale mapostolwaawe. Hataa ukhalaka wiira mapostolu yahontthawa, uyo nanlelo ahowiihana “mayamunnaaka.” Toko Yehova, Yesu ahothoonyera ukhala ntthu nakiriri ni oolevelela.—2 Mam. 13:23.
15. Ninaawehera cani mayamunneehu ahiile ulalyeera?
15 Inanna imoca, hiiva ninawaafenta cinene ale ahiile urwaa wuulalyeerani. Ayo akhanle mayamunneehu ni hiiva ninawaafenta! Ni nanlelo ninawuupuwela nteko womaana uvanryaaya khalayi—akhwaawe ahoviriha myaakha cinci yavaraka nteko wa Yehova. (Mabere. 6:10) Anaaninukhela venci ayo mayamunnaayo! (Luka 15:4-7) Ninlamuliya untakiha cani Yesu ni uthoonyera wiira ninawaafenta mayamunneehu ni asirokorihu ahiile ulalyeera?
16. Ninhala uthoonyera cani wiira ninawaawacera mayamunneehu ahiile ulalyeera?
16 Mwaalattule umikutthaanoni ale ahiile ulalyeera. Mapostolu a Yesu yaari ni masukhuli. Masi Yesu ahaalipiha ni ahaalattula wankutthaanoni waahalaawe upanka naattharyaawe. (Mat. 28:10b; 1 Akor. 15:6) Hiiva ciicammo nihaana naalattulaka umikutthaanoni mayamunneehu ahiile ulalyeera, wakhala wiira ayo khanwa umikutthaanoni. Nhiliyale wiira ayo pooti uhaakuva uwa ikwaha yoopacera inhaleenyu waalattula, ni nyuuva atthunaka nhaana mwaalattulaka ikwaha cinci. Khweeliini, Yesu ahokhala ootteeliya ukati attharyaawe waatthunalyaaya nlattulo nawe, ni hiiva ciicammo ninaakhala ootteeliya!—Nwehe ciicammo Matewus 28:16 ni Luka 15:6.
17. Isiyani ninlamuliyeehu upanka wakhalaka wiira ntthu hiile ulalyeera howa wankutthaanoni?
17 Nwaakhelele saana ale ahiile ulalyeera. Yesu ahowaakhelela saana attharyaawe woonanaca wawe naayo. Uyo phaapacenre urwaa uwuulumana. (Mat. 28:18) Isiyani ninlamuliyeehu upanka wakhalaka wiira munna hiile ulalyeera howa Usalau yo Umwene? Nihaana nirwaaka umwaakhelela. Hiiva atthunaka pooti uhicuwela itthu yo wuuluma. Masi woohimuulihaca muru, hiiva pooti umwaattamela ni umwiirela: “Uhokitteela nrima nlattu woowoonani, munna!”
18. Manannani cinhaleehu waakavihera ale ahiile urwaa wuulalyeerani?
18 Mwaakhuluvelihe wiira nnaahala waakavihera. Atthari a Yesu yoopuwela wiira khaayaahala ukhitiri ulalyeera ihapari comaana ntuninyani motheene. Masi Yesu ahaakhuluveliha, awiirelaka: “Mahuku otheene kiri ni nyuuva.” (Mat. 28:20) Niireke iyo yahaakavihera atthari a Yesu? Iyee. Uvira waya mahuku vakaani, ayo yahancera wiikurumica ‘wiitthuciha ni ulalya ihapari comaana.’ (Mite 5:42) Mayamunna ahiile ulalyeera ciicammo anaapheela ucuwela wiira hiiva ninaahala waakavihera. Ayo mayamunnaayo atthunaka anoona wiira khanhala ukhitiri uturuwela ulalyeera. Phimaana, nihaana waakhuluveliha wiira ninaahala ukhala wamoca naayo. Ni yaturuwelaka ulalyeera, hiiva pooti waakhumana nkhayi wuulalyeerani. Napankaka commo, ayo unaahala waatteela nrima nlattu wo mananna cinhaleehu waakavihera. Naathoonyeraka ale ahiile urwaa wuulalyeera wiira akhanle mayamunneehu, ninaahala waakavihera ni atthu otheene wanlokoni anaahala ukhala ootteeliya.
NIMPHEELA UVARA MPAKA UMWIISO NTEKO YESU UNIVAHALYAAWE
19. Isiyani hiiva nimpheeleehu, ni nlattuni?
19 Ninhala uvara nteko woolalyeera ni wo waapanka eetthuci mpaka yaakhani? Mpaka wanhalaaya umalamalihiya ila ituninya yoohinamaaneela. (Mat. 28:20; nwehe mphantte wo Glossário wantikhiye“Final do sistema de coisas.”) Masi niireke ninaahala ukhitiri? Iyee, hiiva niholakela uvara uyo ntekooyo mpaka umwiiso! Ninaakhala ootteeliya navarelaka nteko ukatiihu, ikuru cihu ni citthu cirineehu wiira naatothe ale ‘anoonihera uratteene uphavela ukumi woohimala.’ (Mite. 13:48) Napankaka iyo, hiiva ninantakiha Yesu. Uyo aheera: “Iyoolyaaka miivano ikhanle upanka intthunaawe ule kirumale ni umaliha uvara ntekwaawe.” (Joau 4:34; 17:4) Ni hiiva ciicammo iyo phi itthu nimpheeleehu. Nimpheela uvara mpaka umwiiso nteko Yesu univahalyaawe. (Joau 20:21) Ni nimpheela wiira akhunanihu, hataa ciicammo ale ahiile ulalyeera, avare wamoca ni hiiva uyo ntekooyo.—Mat. 24:13.
20. Toko cinthoonyeraaya Afilipo 4:13, nlattuni ninlamuliyeehu ukupali wiira ninaahala ukhitiri uvara nteko Yesu univahalyaawe?
20 Ninaacuwela wiira nteko Yesu univahalyaawe unaarika. Masi hiiva khaniri veekha. Yesu ahohimya wiira aahala ukhala ni hiiva. Ukati woovara nteko wo waapanka eetthuci, hiiva “ninvara nteko nkhayi ni Nluku” ni “wamoca ni Kristu.” (1 Akor. 3:9; 2 Akor. 2:17) Iyo inaanikupaliha wiira ninaahala ukhitiri uvara uyo ntekooyo mpaka umwiiso. Uvara uyo ntekooyo ni waakurumica akhwiihu wiira avare, khweeliini ikhanle iparakha yuulupale!—Nsome Afilipo 4:13. *
NCIPO 79 Mwaakavihere ukhala oolipa
^ par. 5 Yesu haaruma attharyaawe waapanka eetthuci ni uwiitthuciha wiiwelela citthu cotheene cirumalyaawe. Ula mwahoola unaahala uthoonyera manannani ninlamuliyeehu upanka itthu Yesu inirumalyaawe. Ula mwahoola ukumihiye nhina irevista Ukhalenla 1 yo Julho yo 2004, ipaagina 14 mpaka 19.
^ par. 1 Matewus 28:18 Yesu ahowaattamelaca ni ahowiirela co: “Kihovahiya ukhulupale wotheene wiirimu ni vathi. 19 Coo, nrwee, ni mwaapanke eetthuci atthu olapo cotheene, mwaapattisaka mwancina na Athumwaane, ni na Mwaana, ni no nnepa wowaarya, 20 mwawiitthucihaka wiiwelela citthu cotheene cuurumalyaakani. Ni ncuwele wiira mahuku otheene kiri ni nyuuva, mpaka wiimaleloni ulumwenku.”
^ par. 5 Joau 14:15 Wakhala wiira nnaakifenta, nyuuva nnaahala wiiwelela malamulwaaka.
^ par. 5 1 Joau 2:3 Co phinkhitiriihu woona wiira ninancuwela: naahihiyeke wiiwelela malamulwaawe.
^ par. 20 Afilipo 4:13 Citthu cotheene kinkhitiri nlattu wa ule nokivaha ikuru.
^ par. 70 ILATARATO: Nrokorihu nanhimyera ntthu nonsomihaawe Ibiiblya citthu cinlamuliyaawe upanka wiira atepe unfenta Nluku. Wahoolo, ule nosomihiya Ibiiblya naapanka citthu cihimyeriyaawe ni nrokorihu nonsomiha Ibiiblya.
