MWAHA WOOSOMIYA 48
‘Nweheehe uhoolo’
“Miithwaa ahaana yaweheehaka uhoolo, iyee, uweheehe uhoolo.”—MIRU. 4:25.
NCIPO 77 Luz Num Mundo Sombrio
NINHALA WIITTHUCANI? *
1-2. Ninhala weettela cani ikano iri nhina Miruku 4:25? Nvahe ntakihero.
MUUPUWELE citthu cinwiirannyeela ala mayamunnaala. Nrokorihu mmoca nawuupuwela mananna caakhalaawe ratta khalayi. Masi nnava uyova haana marikariko menci. Hataa ukhalaka commo, uyo nrokorihuuyo khanhiya wiikurumica unswalela Yehova. (1 Akor. 15:58) Khula nihuku, uyo nawiicuupuwela akhalaka upeephoni naasipatthannyaawe. Nrokorihu nkiina nawuupuwela wiira wanlokoni haavo ntthu mpankile itthu yoohiloka ni uyo nrokorihuuyo naalakela unlevelela ni uliyala itthu itthekeliyaawe. (Akol. 3:13) Munna mmoca o wanlokoni ahovara itempi cinci khalayi, masi uyo nawiikurumica upanka yotheene inkhitiryaawe wiira hihiye unswalela Yehova.—Isaa. 51:10.
2 Isiyani mayamunna ooraaru inoopuwelaaya? Otheene caya anoopuwela citthu cokhalayi, masi khankhala yaweheehaka uttuli. Uhiya wuupuwela citthu coottuli, ayo ‘anweheeha uhoolo.’—Nsome Miruku 4:25. *
3. Nlattuni ninlamuliyeehu ‘uweheeha uhoolo’?
3 Nlattuni ninlamuliyeehu ‘uweheeha uhoolo’? Ntthu neetta munttalani khaahala ukhitiri weetta saana wakhalaka wiira khula ukati naarukunuwa wiira awehe uttuli. Inanna imoca, hiiva khaninhala ukhitiri unswalela Yehova saana nakhalaka ukati mwinci nuupuwelaka citthu cokhalayi.—Luka 9:62.
4. Isiyani inhaleehu wiitthuca nhina ula mwahoola?
4 Nhina ula mwahoola, ninaahala wuuluma citthu tthaaru cinlamuliyeehu unyema, cinhala uniiriha utepa wuupuwela citthu cokhalayi. Nnyo citthunnyo cikhanle: (1) uninukhela makhalelo yaarineehu khalayi, (2) ukhala niicuku nlattu wootthekeliya, ni (3) utepa uriipiya nrima nlattu wo matampiihu. Ukati wo woopela mwaha khula itthu, ninaahala woona ikano co mbiiblyani cinhala unikavihera uliyala “citthu coottuli” ni wiikurumica wiira nitthimakele “citthu coohoolo.”—Afili. 3:13.
UNINUKHELA MAKHALELO YAARINEEHU KHALAYI
Citthuni caahala unihiiha uweheeha uhoolo? (Nwehe iparaagarafu 5, 9, 13) *
5. Isiyani ihimiye nhina Eklesyaste 7:10 hiiva ihinlamuliyeehu upanka?
5 Nsome Eklesyaste 7:10. * Ila iveeruswiila khayiirale wiira unaatakhala ukoha: “Kontha isiyani mahuku okhalayi phaari omaana?” Kontha ukhitiri wuupuwela citthu comaana cokhalayi ikhanle iparakha Yehova inivahalyaawe. Masi iyo iveeruswiiyo ineera: “Uhiire: ‘Kontha isiyani mahuku okhalayi phaari oomaana uvikana mahuku olelo?’” Ni moolumacero makhwaawe, itthu yoonanara ukhanle ulattaniha makhalelweehu okhalayi ni makhalelweehu ophiyaaru. Ibiiblya ikhwaawe, iyo iveeruswiiyo itaphuleliye co: “Uhikohe wiiraka: ‘Kontha isiyani khalayi citthu cotheene caari comaana.’ Ukoha iyo itthwiiyo unthoonyera ulolo.”
Ukhuma waya Wiciipitu, itthuni yoohinamaana asarayeli yaapankilyaaya? (Nwehe iparaagarafu 6)
6. Nlattuni unoopihaaya ukhala ukati mwinci noopuwelaka wiira khalayi phaakhaleehu saana? Nttonke ntakihero.
6 Nlattuni unoopihaaya ukhala ukati mwinci noopuwelaka wiira khalayi phaakhaleehu saana? Kontha ninhala wuupuwela paahi citthu comaana, masi ninaahala uliyala citthu coohinamaana caanikhumelela. Muupuwele itthu yaakhumelenle asarayeli. Ukhuma waya Wiciipitu, ayo yahaakuva uliyala mananna caahuvaaya. Ayo yoopuwela paahi icoolya comaana caalyaaya Wiciipitu. Ayo yeera: “Cinaaninukhela cinene ihopa caakhureehu mahala Wiciipitu, misiri, maraka, aaliyu-pooro, isepola ni aaliyu!” (Manu. 11:5) Masi niireke icoolya cotheene nnyo khweeliini caari ‘comahala’? Mena, khacaari comahala! Asarayeli yanhuvela cinene nnye icoolye nnye. Ule ukatyuule, ayo yaari ipottha Wiciipitu ni yanhuvihiya venci. (Nkw. 1:13, 14; 3:6-9) Masi ayo wahoolo yaholiyala uhuva wotheene waarinaaya ni yahancera waanukhela makhalelo yaarinaaya khalayi. Asarayeli yahothanla wuupuwela citthu comaana caakhumelenle khalayi, uhiya wuupuwela citthu comaana Yehova caapankenlyaawe. Yehova wahonriipa nrima cinene nlattu wo iyo.—Manu. 11:10.
7. Isiyani yankavihenre nrokorihu uhitepa wuupuwela makhalelo yaarinaawe khalayi?
7 Isiyani inhala unikavihera wiira ahininukhele makhalelo yaarineehu khalayi? Muupuwele itthu yankhumelenle nrokorihu ancenre uvara nteko uPeteli yo Brooklyn, mwaakha wo 1945. Uvira waya myaakha avaraka nteko uPeteli, uyo ahothelanaca ni munna nkiina aavara nteko uPeteli, ni ooyeeli ahokhala myaakha cinci yavaraka nteko nkhayi uPeteli. Masi mwaakha wo 1976, awannyawe uyo nrokorihuuyo yahowerennya cinene. Nrokorihu neera wiira awannyawe ahinaaya ukhwa, yahonvaha ikano caahala unkavihera ukati waahalaawe ukhala nankhweli. Awannyawe yenre: “Muuthelanani wihu hiiva nihokhala ootteeliya venci. Atthu enci khantteeliya toko hiiva cikhanleehu ootteeliya.” Masi ayo ciicammo yahonkurumica nrokorihu, yamwiirelaka: “Nhitepe wuupuwela cinene citthu cokhalayi—hataa ukhalaka wiira khannohala uliyala nnyo citthunnyo. Nuukatyaaya, uriipiya winyu nrima unaahala uvukuwa. Nhitepe ukhala ni masukhuli. Nsukhuru iparakha cotheene caakhenleenyu ni citthu comaana cuukhumelenleni. Ukhitiri wuupuwela citthu cinikhumelenle khalayi ikhanle iparakha inivahalyaawe Nluku.” Iyo khweeliini yaari ikano yomaana!
8. Uhitepa wuupuwela cinene citthu cokhalayi wankavihenre cani nrokorihu?
8 Uyo nrokorihuuyo ahotthara ikano yaavahiyaawe naawannyawe. Uyo khaahiile unswalela Yehova mpaka ukati waakhwilyaawe, narina myaakha 92. Hinaaya ukhwa, nrokorihu aheera: “Koopuwelaka myaakha coopwaha 63 cikhanlyaaka kivaraka nteko wa Yehova ukati wotheene, kinawoona wiira khweeliini kihokhalana ukumi wookitteeliha nrima.” Kontha isiyani? Uyo hottonka: “Itthu khweeliini innitteeliha nrima ukhanle ufentana ni mayamunneehu ni uweherera ukhala wamoca naayo upeephoni watuninyani, ninswalelaka Nlukwiihu Muulupale, Nluku mmoca eekhweeli, Yehova.” * Khweeliini, ntakihero nawe uyo nrokorihuuyo ninaaniitthuciha uweheeha citthu coohoolo!
UKHALA NIICUKU NLATTU WOOTTHEKELIYA
9. Toko cinhimyaaya Levitiku 19:18, ukatini unrikaaya unlevelela ntthu?
9 Nsome Levitiku 19:18. * Wakhalaka wiira munneehu o wanlokoni, mpatthaniihu awula mmuciihu honipanka itthu yoohinamaana, unaarika unlevelela. Wootakihera, nrokorihu mmoca ahomootheriha nrokorihu nkiina winnya nsurukhu. Wahoolo, uyo nrokorihuuyo ahorwaa unlepela nsammaha nrokorihu aamoothenryaawe. Masi nrokorihu ootheriyooyo khaakhitinri uliyala ile itthwiile. Ihopaca wuukhumelelani itthu toko iyo? Hataa ukhala wiira khinapaca wuukhumelelani, pooti ukhala wiira mwahopankiya itthu yoohiloka ni nyuuva mwahoopuwela wiira khamwaahala unlevelela ntthu oopankaleni iyo itthwiiyo.
10. Isiyani inhala unikavihera naahikhitiriki uliyala itthu yootakhala ipankiyeehu?
10 Isiyani inhala unikavihera wakhalaka wiira khaninkhitiri uliyala itthu yootakhala ipankiyeehu? Nhiliyale wiira Yehova nawoona citthu cotheene. Uyo naacuwela citthu cotheene cinnikhumelela, ni hataa citthu cootakhala cimpankiyeehu naatthu akiina. (Mabere. 4:13) Uyo naakhala ooriipiya nrima anoonaka nihuvaka. (Isai. 63:9) Ni naakhuluveliha wiira naahala umaliha citthu cohinamaana cotheene cinnikhumelela.—Apoka. 21:3, 4.
11. Kontha isiyani waalela akhwiihu unaanikavihera?
11 Ciicammo, nhiliyale wiira waalevelela akhwiihu unaanikavihera hiiva. Iyo phi itthu yaacuwelenlyaawe nrokorihu ootherihiye winnya nsurukhu. Wahoolo, uyo ahokhitiri unlevelela nrokorihu aamotherihale ni aholiyala itthu yaakhumelenle. Nrokorihu ahoona wiira naalevelelaka akhwiihu, Yehova ciicammo naanilevelela. (Mat. 6:14) Uyo ancuwela wiira ule aamootherihale khaapankile itthu yomaana; masi hataa ukhalaka commo, nrokorihu aholakela unlevelela. Nlattu woopanka commo, nrokorihu ahokhala ootteeliya ni ahancera unswalela Yehova ratta.
UTEPA URIIPIYA NRIMA NLATTU WO MATAMPIIHU
12. 1 Joau 3:19, 20 inniitthuciha isiyani?
12 Nsome 1 Joau 3:19, 20. * Otheene cihu ninaakhalaka ooriipiya nrima nlattu wo matampiihu. Wootakihera, akiina anaakhala ooriipiya nrima nlattu wo citthu cootakhala cipankilyaaya ahinaaya wiitthuca ikhweeli. Akhwaawe unawaariipa nrima nlattu woopanka citthu coohiloka anapattisiyeene. (Aroo. 3:23) Khweeliini ninaapheela upanka citthu comaana, masi “otheene cihu ninaatthekaka imaara cinci.” (Tiya. 3:2; Aroo. 7:21-23) Ninaacuwela wiira uriipiya nrima nlattu wo matampiihu khunciva, masi ukati nkiina unaareera. Kontha isiyani? Kontha waniriipaka nrima nlattu wo citthu cootakhala cipankaleehu, ninaahala upheela urukunusa nrimeehu ni wiikurumica wiira nihituruwele upanka nnyo citthunnyo.—Mabere. 12:12, 13.
13. Kontha isiyani utepa uriipiya nrima nlattu wo matampiihu unawoopiha?
13 Nlattu wo matampiihu, hiiva pooti utepa ukhala ooriipiya nrima. Awula uriipiya nrima nlattu wo matampi Yehova anilevelenlyaawe. Uriipiya nrima iyo inanneeyo pooti unipanka pusya. (Isaa. 31:10; 38:3, 4) Toko cani? Muupuwele itthu yankhumelenle nrokorihu aakhala ooriipiya nrima venci nlattu wo citthu coohiloka caapankilyaawe khalayi. Uyo neera: “Mi koopuwela wiira keekurumica unswalela Yehova mahala, kontha uyo atthunaka khaahala ukoopola.” Enci atthuna phinoopuweleehu commo. Masi ratta! Utepa uriipiya nrima nlattu wo matampiihu unawoopiha. Kontha isiyani? Kontha Sotwani wanhala untteela nrima cinene nahiyaka unswalela Yehova nlattu wo wuupuwela wiira Yehova honinyanyala, masi khweeliini hininyanyanle!—Nwehe ciicammo 2 Akorintu 2:5-7, 11.
14. Ninhala ucuwela cani wiira Yehova khaninyanyanle?
14 Masi nyuuva atthunaka nnawiikoha co: ‘Kinhala ucuwela cani wiira Yehova khakinyanyanle?’ Ukoha winyu commo, unthoonyera wiira Yehova pooti wuulevelelani. Khalayi, irevista Ukhalenla yaheera co: “[Ukati nkiina] . . . ninawoona wiira khaninkhitiri uhiya upanka itthu yoohiloka ni ninaaturuwela upanka iyo itthwiiyo ikwaha cinci. Iyo atthunaka ikhanle itthu ipacenreehu upanka nihinaaya wancera unswalela Nluku. . . . Masi nhoocee. Nhuupuwele wiira nvarale itampi ihimphwanela uleveleliya. Sotwani nopheela nyuuva muupuwele wiira khunoophwanelani uleveleliya. Uriipiya winyu nrima nlattu woopanka iyo itthwiiyo, unthoonyera wiira khantepale upanka itthu yootakhala. Nhoocee wiiyeviha ni unlompa Nluku, mwanlepelaka wiira ooleveleleni ni ookavihereni. Hataa ukhalaka wiira nhopanka iyo itthu yoohilokeeyo ikwaha cinci, mmwaattamele Nluku khampa mwaana cinrwaawe waathumwaane yamphwanyaka itafaawuti. Mwapankaka commo, Yehova naahala wuukaviherani, nlattu woonamaana wawe wooniroranya.” *
15-16. Mayamunna akhwaawe yiicoonale cani ucuwela waya wiira Yehova khweeliini khaanyanyanle?
15 Mayamunna enci wahaataphuwa nrima ukati wonnyaaya wiira Yehova khweeliini khaanyanyanle. Wootakihera, munna mmoca ahokaviheriya ukati waasomalyaawe mwaha mmoca wo mphantte uneehaniya “A Bíblia Muda a Vida das Pessoas”. Mwaha waasomaawe waattonka ihantisi ya nrokorihu ahaakupali wiira anfentiya ni Yehova nlattu wo citthu coohinamaana caapankilyaawe khalayi. Uyo nrokorihuuyo khaakupali wiira anfentiya ni Yehova. Ni hataa upattisiya wawe, uyo nanlelo oopuwela wiira khaafentiya ni Yehova ni ahokhala myaakha cinci oopuwelaka commo. Masi woopuwenlyaawe wiivaherera wa Yesu, uyo nrokorihuuyo ahancera ukupali wiira khweeliini anfentiya ni Yehova. *
16 Usoma ihantisyaawe uyo nrokorihuuyo, unkavihenre cani ule munnoole? Uyo hantikha: “Ukati waaryaaka mmirawo, ikwaha cinci kaanoonaka ipornografia. Mphiyaaruni, mi kihoona-tho. Kahorwaa waalepela mahumu wiira akikavihere ni kiri mookhitiri uhiya iyo itthu yoohinamaaneeyo. Mahumu ahokithoonyera wiira Nluku naakifenta ni khanle nakiriri. Masi ukati nkiina kinawuupuwelaka wiira khunkiphwanela ufentiya ni Yehova. Usoma ihantisyaawe ule nrokorihuule uhokikavihera venci. Nnava, kinaacuwela wiira koopuwelaka wiira Nluku khanlamuliya ukilevelela unaalikana nuwiira wiivaherera wa Mwanawe khuntosa wiira itampi caka cileveleliye. Kaheesa mphanttyaayaru ule mwahoole wiira kisome ni kuupuwele khula ukati unhalaaka wuupuwela wiira khunkiphwanela ufentiya ni Nluku.”
17. Isiyani yankavihenre Paulu uhitepa ukhala ooriipiya nrima nlattu wo matampyaawe okhalayi?
17 Matakihero toko ayo anaanuupusera itthu yankhumelenle apostolu Paulu. Hinaaya ukhala nkristau, Paulu ahovara matampi menci. Paulu khaaliyanle citthu coohiloka caapankilyaawe, masi uyo khaakhala khula ukati oopuwelaka nnyo citthunnyo. (1 Tim. 1:12-15) Uyo aawehera woopoliya wawe ni Yesu khampa itthuvo yaavahiyaawe ni Nluku. (Akalas. 2:20) Phimaana, Paulu khaatepa ukhala ooriipiya nrima nlattu wo matampyaawe okhalayi, masi uyo aheekurumica uvara cinene nteko wa Yehova.
NWEHEEHE UHOOLO!
Nlakele uweheeha uhoolo (Nwehe iparaagarafu 18-19) *
18. Niitthucale isiyani nhina ula mwahoola?
18 Isiyani yiitthucaleehu mpaka va? (1) Ukhitiri wuupuwela citthu cokhalayi ikhanle iparakha inivahilyaawe Yehova. Hataa ukhalaka wiira khalayi phaakhaleehu saana, ukumi unhaleehu ukhalana upeephoni phinhala utepa ukhala womaana. (2) Akhwiihu atthunaka anaahala unitthekela, masi nalakelaka waalevelela, ninaahala ukhitiri unswalela Yehova saana. (3) Natepaka uriipiya nrima nlattu wo matampiihu okhalayi, khaninhala ukhitiri unswalela Yehova unitteelaka nrima. Phimaana, toko Paulu, nihaana nikupaliki wiira Yehova honilevelela.
19. Nincuwela cani wiira upeephoni khaninhala wuupuwela citthu cooniriipiha nrima cokhalayi?
19 Hiiva ninaaweherera ukhalana ukumi woohimala. Ni upeephoni khaninhala wuupuwela citthu cooniriipiha nrima cokhalayi. Ibiiblya yaacaka uyo ukatyuuyo, ineera: “Citthu cokhalayi khacinhala wuupuweliya-tho.” (Isai. 65:17) Muupuwele ila: atthu akhwaawe akhanle myaakha cinci yanswalelaka Yehova, nnava ahooluvala, masi upeephoni, otheene anaahala uturuwela ukhalana irutthu yeemiravo. (Jó 33:25) Phimaana, mwiikurumice uhitepa wuupuwela citthu cokhalayi. Muupuwele ni nweheehe citthu coohoolo!
NCIPO 142 A Esperança Que Nos Dá Coragem
^ par. 5 Wuupuwela citthu cokhalayi unaareera. Masi ratta! Natepaka wuupuwela citthu cokhalayi, citthu comaana cinkhumelela nnava khacinhala unitteeliha nrima, ni mpaka pooti uliyala iparakha Nluku cinhalaawe univaha uhoolo. Ula mwahoola unaahala wuuluma citthu tthaaru cinlamuliyeehu unyema, cinhala uniiriha utepa wuupuwela citthu cokhalayi. Ciicammo ninaahala woopela mwaha ikano co mbiiblyani ni citthu caakhumelenle mayamunneehu cinhala unikavihera.
^ par. 2 Miruku 4:25 Miithwaa ahaana yaweheehaka uhoolo, iyee, uweheehe uhoolo.
^ par. 5 Eklesyaste 7:10 Uhiire: “Kontha isiyani mahuku okhalayi phaari oomaana uvikana mahuku olelo?” Kontha khunakhala ucuwelaca unoopankiha ukoha commo.
^ par. 8 Nwehe irevista Ukhalenla 1 yo Julho 2004, ipaagina 23 mpaka 29.
^ par. 9 Levitiku 19:18. Uhaalivelele itthu yootakhala inoopankaaya asaana aapoovwaa ni uhaaviruwele; uhaana unfentaka nkhwaa toko cineefentaa. Miiva ki Yehova.
^ par. 12 1 Joau 3:19 Coo, phinhaleehu ucuwela wiira nineettela ikhweeli ni ninaahala umaaliha nrimeehu uhoolo wawe 20 khula ukati nrimeehu unhalaaya unihukhumu wiira nihovonya, kontha Nluku muulupale uvikana nrimeehu ni uyo naacuwela citthu cotheene.
^ par. 14 Nwehe irevista Ukhalenla 1 yo Novembro 1954, ipaagina 170.
^ par. 15 Nwehe irevista Ukhalenla 1 yo Agosto 2011, ipaagina 20 ni 21.
^ par. 62 ILATARATO: Uninukhela makhalelo yaarineehu khalayi, ukhala niicuku nlattu wootthekeliya ni utepa uriipiya nrima nlattu wo matampiihu—nnya citthunnya cinkhala toko upurula mirintti coolemela. Nnyo pooti unihiiha weetta saana munttalani unhala uniphwanyiha ukumi woohimala.
^ par. 69 ILATARATO: Nahiyaka upurula nnyo mirinttinnyo, unaanitaphuwa nrima, ninaakhala ootteeliya ni ninaakhalana ikuru wiira niweheehe uhoolo.
