Mi kiyariye mwaakha wo 1983. Waaryaaka mwaana, mi kahaana ukumi womaana. Masi upiiha waka myaakha 10, yahancera ukiwerya venci irutthu yotheene. Uvira waya myaakha miili, nihuku nimoca, konwale kihikhitiriki wiinyeenyiha irutthwaaka. Hataa kimananihaka cani, mi akaakhitiri wiinyeenyiha metto caka, kontha khacaarina-tho ikuru. Ukhuma nne nihukunne, akikhitinri-tho weetta. Nlattu wo iyo iretteeyo, mi akuunuwale saana. Phimaana mpaka ilelo, irekamelwaaka kinkhala toko mwaana.

Uvira waya myeeri vakaani kiwerennyaka, athiyana eeli Masaahiti a Yehova yahowa ukootola, ni mmocooyo eehaniya Florence. Mi kaanawiipithaka awaaka ntthu uwaani. Masi nne nihukunne, mi kahotthuna uwuulumana ale athiyana eelyaale. Ukati wancenryaaya wuuluma ipeephoni, mi kahopuwela itthu yeewalyaaka ukati waarinaaka myaakha 5. Uyo ukatyuuyo, misiyonaariyu mmoca eehaniya Jethro, aakhala u Suriname, anwaaka aliteeyeehu khula mweeri ikwaha imoca wiira aasomihe Ibiiblya apaapa. Jethro ankiwacera saana, ni aanaakicivela cinene. Ciicammo, ataata ni apiipi yankicisaka umikutthaanoni co Masaahiti a Yehova caapankesiya aliteeyeehu. Phimaana, ukati Florence waakikohalyaawe wakhala wiira kinaapheela wiitthuca-tho myaha cikiina, mi kahotthuna.

Florence ahoturuwela ukootola wamoca naawannyawe aneehaniya Justus, wiira yookisomihe Ibiiblya. Wancera waya ukisomiha, ayo yahoona wiira mi akaacuwela usoma, phimaana yahokitthuciha. Wahoolo, mi kahancera ukhitiri usoma veekha caka. Nihuku nimoca, Florence ni Justus yahokihimyera wiira yaholepeliya urwaa uvara nteko woolalyeera u Suriname. Phimaana khaarivo-tho ntthu nkiina u Orealla oohala ukisomiha Ibiiblya. Masi wahokitteela nrima woona waka wiira Yehova khakiliyanle.

Uhinavira ukati mwinci, piyoneeru nkiina neehaniya Floyd ahowa u Orealla. Alalyeeraka mmawaani, uyo ahokiphwanya. Ukati waakilattunlyaawe wiira ancere ukisomiha Ibiiblya, mi kahothyaa. Uyo ahokikoha: “Unthyaani?” Mi kahonhimyera wiira kahosomihiya ibroxura O Que Deus Requer de Nós? Ni kahancera usoma ilivuru Conhecimento Que Conduz à Vida Eterna. * Ni kahonhimyera nlattuni waahiilyaaka usoma Ibiiblya. Floyd ahokisomiha ilivuru Conhecimento Que Conduz à Vida Eterna, masi woohipica ahotamiheriya nipuro nikiina. Toothooni, akarina-tho ntthu ookisomiha Ibiiblya.

 Mwaakha wo 2004, yahowa u Orealla mapiyoneeru owiivaherera eeli. Mmoca eehaniya Granville ni nkiinooyo neehaniya Joshua. Ukati waalalyeeraaya mmawaanni, ayo ciicammo yahokiphwanya. Ayo yahokikoha wakhala wiira kanhala upheela usomihiya Ibiiblya, ni mi kahothyaa. Mi kahaalepela wiira yancere ukisomiha ilivuru Conhecimento Que Conduz à Vida Eterna ukhuma wiipaceroni, kontha kaapheela uwoona wakhala wiira yanhala ukitthuciha citthu cimocaaru ni citthu ceetthucihiyaaka naatthu yaapacenre ukisomiha. Granville ahokihimyera wiira aliteeyaaka campankiya mikutthaano. Cahovira myaakha 10 kihikhumaka wapuwani, masi mi kaapheela urwaa umikutthaanoni. Phimaana, Granville ahokiweela, ahokonkomiha nkariinyu ni ahokisova mpaka Usalau yo Umwene.

Wahoolo, Granville ahokikurumica wiira kikele Escola do Ministério Teocrático. Uyo ahokiirela: “Weeva khunkhitiri weetta, masi unaakhitiri wuulumaca. Wahoolo unaahala utaphulela mwaha waatthu otheene wanlokoni. Iyo khweeliini inaahala wiirannya!” Ayo moolumwaayo yahokikavihera uhoova.

Kahancera ulalyeera wamoca ni Granville. Masi aliteeya yaakhalaaka iparapaara khacaalokile; wanrika weetta niikariinyu. Phimaana kahonlepela Granville wiira akipakhere nkariinyuni yommatatani ni akirweehe mapuro yaalalyeereehu. Iyo itthwiiyo yahokikavihera. Mweeri wo Abril wo 2005, mi kihopattisiya. Wahoolo, mayamunna yahokiitthuciha uwacera ilivuru ni ikaruma cooruma co wanlokoni.

Mwaakha wo 2007, apaapa yahopinttuwa nkalawani ni yahokhwa. Amucyaaka yahokhala ni masukhuli menci. Granville aholompa wamoca ni hiiva ni ahonimaaliha anisomelaka iveerusu cinci co mbiiblyani. Uvira waya myaakha miili, yahonikhumelela ihara ikhwaawe. Granville ciicammo ahopinttuwa nkalawani ni ahokhwa.

Wanlokoni nihu nankaani, nahokhala ni masukhuli menci; khanaarina-tho humu ni aari nrumiya mmoca paahi. Ukhwa wa Granville wahokiwerya cinene; uyo aari mpatthannyaaka muulupale. Uyo aari mpatthani ookhuluvelya, ankiwacera nhina citthu coominepani ni mwiirutthuni waka. Uvira waya mahuku vakaani nakhwile, kahovahiya usoma irevista Ukhalenla wankutthaanoni. Mi kahokhitiri usoma iparaagarafu coopacera, masi kahancera wunla ni akaakhitiri umaala, mpaka kahokhuruwa wapaalukuni.

Ukati waawilyaaya unikavihera u Orealla mayamunna o nloko nikiina, phancilyaaka wiicoona ratta. Ciicammo, mayamunna o Peteli yahonveleeliha waaliteeya wihu piyoneeru owiivaherera nkiina neehaniya Kojo. Wahokitteela nrima uwoona amaama ni mwanhimaaka o mwankaani yanceraka usoma Ibiiblya ni upattisiya. Wahoolo, mweeri wo Março wo 2015, mi kahokhala nrumiya o wanlokoni. Uvira waya ukati, kahopaceriha utaphulela mwaha waatthu otheene wanlokoni. Nne nihukunne, mi kahoopuwela itthu yoolumalyaawe Granville: “Wahoolo unaahala utaphulela mwaha waatthu otheene wanlokoni. Iyo khweeliini inaahala wiirannya!” Uyo ukatyuuyo, yahokikhuma miithori ni kahothyaa nlattu woosukhuru venci.

Nhina ividiyu co JW Broadcasting^®, kihaacuwela mayamunna arina masakha miiva arinaaka. Hataa ukhalaka wiira aretta toko miiva, cihaavo citthu cinci cimpankaaya ni anaakhala ootteeliya. Miiva ciicammo pooti wiikurumica upanka citthu cikiina. Mi kaapheela wiikurumica uvara venci nteko wa Yehova. Phimaana, kihokhala piyoneeru owiicaaverya. Ni mweeri wo Setembro wo 2019, iheerannya itthu yahaawehereraka: kihokhala humu o wanlokoni nihu naarina anamalalyeera 40.

Kinawaasukhuru asunnaka ni asirokoraka akisomihale Ibiiblya ni akikavihenre urweehela uhoolo nteko wa Yehova. Venci-venci, kinansukhuru Yehova nlattu woohikiliyala.