Anuunu Hulda yahokhitiri uphwanya itthu yaapheelaaya
KHALAYI, nyuuva mwarwaaka ncoko wo Sangir Besar, wo Indonésia, atthunaka mwaanaahala uwoona mayanuunu araru anari umaka. Uyo ncokooyo, mayanuunu unawaacivela cinene urwaa umaka waasomiha atthu Ibiiblya. Masi ula nkwahoola, yaarwenle upanka itthu ikiina.
Ncoko wo Sangir Besar mphantte wooculu wo Indonesia
Ayo yanrwaa umaka, ukela mmaacini wiira alokotthace maluku moolupale moolupale unvikana boola ni ukumihera vate maaci. Yakumiheraka vate, ayo yaanonkoma wapankuni ni yanancera upwesakaca ayo malukwaayo niinyutto awula martelo wiira akhalihace macikaani toko mooce o mwalakhu. Ayo yamalihaka, yanhelakaca ayo maluku macikaannaayo mbaldini yankaani, wiirya ni yahaana yavattelaka isikatta anacisileene mpaka uphiya mmawannyaya. Vano, yaphiyaka, ayo malukwaayo yahaana yaheeleliyaka mmasaakhuni wiira apakhiriye mmakaaroni cuulupale ni urweehiye utekeliya iparapaara.
Anuunu Hulda yalokotthelaka maluku umaka
Anuunwiihu amoca yaakhitiri uvara uyo ntekooyo yeehaaniya Hulda. Ayo yanviriha ukati mwinci wiira avare uyo ntekooyo uvirikana nimayanuunu akiina. Ikwaha cinci, ayo yatumihaka ayo malukwaayo, nsurukhuuyo yaathumela iyoolya wapuwani waya. Masi ila ikwaheela, ayo yaapheela uthuma itthu ikiina. Ayo yaapheela uthuma itableti wiira akhitiri waavarela nteko aplikatiivu JW Library®. Anuunu Hulda yancuwela wiira ividiyu ni citthu cotheene ciri mwaaplikatiivuni canhala waakavihera wuulalyeerani ni ukati woopaka usoma wo veekha.
Anuunu Hulda yaanaaviriha iwoora piili khula uwicisu mweeri nteru ni nuusu yapwesakacaka maluku wiira acarihe ikamiyawu yuulupale. Vano umaliha waya yahophwanya nsurukhu ni yahothuma itableti.
Anuunu Hulda niitabletyaaya
Anuunu Hulda aheera: “Mi kaanaakhalaka owoocya ni yaanakiweryaaka irutthu nlattu woopwesakaca maluku, masi wakhitinryaaka uthuma itableti, mi kiholiyala mananna caakiweryaaya irutthu. Iyo itabletiiyo ihokikaviheera wuulalyeerani ni inaakikaviheera utthenkaca mikutthaano.” Ayo anuunnwaayo aheera ciicammo wiira itableti ihaakavihera cinene wuupaceroni iretta yokoronaviiru, kontha uyo ukatyuuyo miteko cihu naavara niinterneti. Hiivano ciicammo ninaakhala ootteeliya nrima cinene nlattu wowoona wiira anuunu Hulda ahokhitiri uphwanya itthu yaapheelaaya cinene.
