Apaapa apattisiye mwaakha wo 1913 isitati yoo Nova York, anarina myaakha 25. Munna Russell phaataphulenle mwaha wo mpattiso. Wahoolo, apaapa yahothamela u Trinidad ni yahaathela athiyana yeehaniya Constance Farmer, yaari Namasoma Ibiiblya oohinyoonyaciya. Apaapa yaanankaviheraka mpatthannyaaya eehaniya Wiiliam Brown wooniha ividiyu co “Fotodrama da Criação”. Ayo khayaahiyale woonihera nnyo ividiyunnyo mpaka ukati munna Brown waarumiyaawe urwaa ulalyeera mphantte unkela ncuwa wo África mwaakha wo 1923. Apaapa ni amaama nanlelo yaakhala u Trinidad. Ayo yaapanka mphantte ikhurupu yomakristau anweherera urwaa wiirimu.

Apaapa ni amaama yahaana asaana 9. Mwaana oomwiitthuca, yanvahale ncina na Rutherford, nlattu wa munna aahoolela mphwinko Sociedade Torre de Vigia. Mi kiyariye nihuku 30, mweeri wo Dezembro 1922, ni ncina naka kivahiye nlattu wa Clayton Woodworth, aari namatikha irevista Idade de Ouro (ilelo ineehaniya Despertai!). Asipaapeehu yaanaapheela wiira nisome ucikola vakaani, masi yaanaatepa unisovenriha ulakela wahoolo uvara miteko coominepani. Amaama yaanaacuwela uvarela nteko ratta-raatta Ibiiblya wiira ankupalihe ntthu aamulumanaaya. Apaapa waanawaacivela unittonkela ihantisi combiiblyani, yattikhinyaka irutthwaaya yotheene wiira acivihace ihantisi yaattonkaaya.

Apaapa ni amaama khayiikurumicale mahala. Mi ni asunnaka eeli nahorwaa usoma uKiliyati (Gileade), ni asirokoraka araru yahovira myaakha cinci yavaraka nteko weepiyoneeru u Trinidad ni u Tobago. Ntakihero nomaana ninivahalyaaya asipaapeehu ni citthu cotheene ciniitthucihalyaaya cihonikavihera ‘waaliya wanupani ya Yehova’ ni ‘uthapuruwa mmapuwani ca Nlukweehu’.—Isaa. 92:13.

Inupeehu naari nipuro naathukumanaaya mayamunna yapheelaka urwaa wuulalyaani. Mapiyoneeru  yaanaathukumana uwaani ni yaanaamuulumaka venci munna George Young, misiyonaariyu oo Canadá aatokile uwa u Trinidad. Apaapa ni amaama yaanaamuupuwelaka munna Brown ni amwaarawe ale yaari apatthannyaaya yaakhalanaaya wuulalyeerani, yaarwaale mphantte unkela ncuwa wo África ule ukatyuule. Citthu cotheenennyo, cahokivaha ikuru wiira kancere ulalyeera ukati waarinaaka myaakha 10.

Ule ukatyuule irevista cihu coopelaka mwaha ittiini cowootha, unyonka waananakoso ni isiyaasa, caanaahimyeeha woohikhuwakhuwa. Phimaana, mwaakha wo 1936, ahooleli ottiini oo Trinidad yahontheperya kovernatoore ukhottiha ilivuru co mphwinko Torre de Vigia. Nahovitha ilivuru caarineehu ni nahovarela nteko cotheene mpaka umaliha. Ukati woolalyeera, naanaweetta ikhurupu mparapaarani awula naanaweetta niicinka ninacisale makhanta owantikhaciya ni naanaavaha nlattulo. Ciicammo nahokela ikhurupu yowasitati yoo Tunapuna wiira nilalyeere mapuro oottayi u Trinidad, nivarelaka nteko ikaro yooruma. Waanaaciva! Makhalelo oominepani otheene ayo, yahokivaha ikuru wiira kipattisiye ukati waarinaka myaakha 16.

Yoohiyeriya yeekristau ivahiyaka naamucyaaka ni citthu coopacera caakikhumelenle, cahokikavihera upheela uvara nteko weemisiyonaariyu. Nanlelo waanaakicivela uyo ntekooyo ukati waarwaalyaaka ncoko wo Aruba mwaakha wo 1944, nipuro naapacenryaaka ulalyeera ni Edmund Cummings. Nahotteeliya cinene kontha nahokhitiri waathukumaniha atthu 10 nihuku no Nuupuwelelo no mwaakha wo 1945. Uvira waya uyo mwaakhooyo, nahokhumelelihiya nloko noopacera ule ncokoole.

Wahoolo, kahonlalyeera nthiyana anvaranaaka nteko eehaniya Oris Williams. Oris ahomananiha waakihera cinene citthu ceetthucihaaya ittiini yaaswalyaawe. Masi ahotthuna usoma Ibiiblya ni aheetthuca itthu Ibiiblya khweeliini ineetthucihaaya. Nihuku 5 mweeri wo Janeiro 1947, Oris ahopattisiya. Wahoolo, nahocivelana ni nahothelanaca. Novembro o mwaakha wo 1950, uyo ahopacera uvara nteko weepiyoneeru. Kinari ni Oris, ukumyaaka ‘wahothapuruwa’ wo mananna makina.

Mwaakha wo 1955, naholattuliya urwaa usoma uKiliyati. Miiva ni Oris nahohiya ntekweehu, nahotumiha inupeehu ni citthu caarineehu ni nahokhuma u Aruba. Nihuku 29 mweeri wo Julho 1956, nahomaliha usoma iturma 27 yooKiliyati ni nahorwaaniya u Nigéria.

Oopuwelaka ule ukatyuule, Oris aheera: “Yehova pooti unkhitiriha ntthu ulamalela makhalelo oomaana ni oorikarika omamisiyonaariyu. Awanuwaka yaanaapheela ukhala misiyonaariyu, masi mi akaapheela. Waakicivela ukhalana inupaaka ni waayara asaana. Masi woonalyaaka wiira nihaana nilalyeeraka woohipica, kahorukunusa moopuwelelwaaka. Ukati waamalihalyaaka usoma uKiliyati, kahopheela cinene uvara nteko weemisiyonaariyu. Masi ukati wankenleehu paketi Queen Mary, munna Worth Thornton, aavara nteko nkapineeti wa munna Knorr, ahoniirela wiira neette salaama ni aheera wiira naarwaa uvara nteko uPeteli. Ule ukatyuule kahoopuwela: ‘Eh, mena!’ Masi woohivira ukati mwinci, kaholamalela ni waahokicivela uPeteli. Kahaakhela miteko cinci. Nteko waakicivenle cinene waari waakhelela atthu yaawa wootola iPeteli. Kinawaafenta atthu, ni ule ntekoole waanaakikavihera ukhala nkhayi ni mayamunna oo Nigéria. Enci yaawa anatteelenle, anoocaale, niitala ni nintthona. Waanaakicivela cinene waawacera ayo mayamunnaayo, kaavahaka yotheene yaapheelaaya. Uyo waari nteko wa Yehova ni waanaakitteeliha nrima.” Khweeliini, khula nteko wahonikavihera uvira nitepaka ‘uthapuruwa’ venci.

Mwaakha wo 1961, nahothukumana amuciru u Trinidad. Munna Brown ahonittonkela citthu cinci cankhumelenle u África. Miiva kahottonka inanna yaaviraaya yencivaka anamalalyeera u Nigéria. Munna Brown ahokikapatta ni ahowiirela apaapa: “Munna Johnny, nyuuva khankhitinri urwaa u África, masi Woodworth hokhitiri!” Vano apaapa phaakiirelaaya: “Worth, uhihokoleele uttuli! Uhihokoleele uttuli!” Ulipihiya ayo manannaayo ni mayamunna oocuwelaca, wahokikavihera utepa upheela uvara ratta nteko wa Yehova.

Mwaakha wo 1962, kahocaaliya ukhala myeeri 10 kisomihiyaka-tho uKiliyati nturmani nummeru  37. Woohipica, kahovahiya nteko woowacera iPeteli yoo Nigéria, kontha ule ukatyuule, munna Wilfred Gooch aahoolela miteko cooPeteli yoo Nigéria aholattuliya usoma iturma nummeru 38 yooKiliyati ni ahorwaaniya u Inglaterra. Toko munna Brown, mi kaheetta cinene ni kahaacuwela mayamunna enci oo Nigéria. Unookhalaru wiira khayaarina citthu cinci cirinaaya atthu ankhala ilapo coothaciriya, ayo khayaakhalaka yacukulacaka ni yaanaatteeliya ni citthu caarinaaya. Iyo inthoonyera wiira nsurukhu awula maali kahi phinniphwanyiha utteeliya weekhweeli. Wanaareera woona wiira ayo yaawaaka umikutthaanoni anareerale ni anawanre saana, hataa ahikhalanaka maali. Mmakonkreesuni, enci yaakelaka ikaaro cuulupale awula yankelaka bolekaja * (hinkarera oohikhuneeliya nopankiya ncoko yoole). Akarera enci, yaakhalaka owantikhaciya moolumo ootepa ureera, toko: “Ipahari yuulupale impankiya ni maaci ooweela vakaani-vakaani.”

Itthu yaahimyaaya nno nuulumonno yaari ikhweeli. Wiikurumica vakaani wa khula ntthu uhaana ifayita. Ni hiiva ciicammo ninaakavihera neekurumicaka. Mwaakha wo 1974, Nigéria phaari nipuro naapancenre ukhala anamalalyeera 100.000, woohaalikelela Estados Unidos. Nahoona wiira nteko woolalyeera ‘wahothapuruwa’.

Ukati nteko woolalya waatepaaya wuunuwa, yahancera ikhotto u Nigéria, yaalavaniye ukhuma mwaakha wo 1967 mpaka 1970. Mayamunna yaakhala mphantte nkhwaawe wo mooloko Níger, nipuro neehaniya Biafra, khayaakhitiri uphiyeera uPeteli. Masi hiiva khanaalamuliya waahiya yaathwaaka iyoolya yoominepani. Toko cittonkalyaaka wuupaceroni, naholapuwa moolokoole imara cinci, nahihiyaka unlompa ni unkhuluvela Yehova.

Kinawuupuwela ratta-raatta ukati wowoopihoole waalapuwakeehu mooloko Níger. Waanawoopiha kontha anatoropa yeettaka ninikokho wakaputthini, cahaavo iretta ni citthu cikhwaawe cowoopiha. Waanaarika anatoropa unihiya niviraka kontha yaanoona ukhala alavilavi, masi waanaatepa urika cinene uphiya u Biafra, kontha iphiro yoo Biafra yaakhala yootthukiya. Nihuku nimoca, kahorwaa uwootola mayamunna yaakhala isitati yoo Enugo. Wiira kikhitiri, kahaana kilapuwaka mooloko Níger ukhuma u Asaba mpaka u Onitsha — niikalawa uhiyu. Ikwaha ikhwaawe, kaarwaale uwootola mahumu yaakhala u Aba. Ule ukatyuule, waanaakhottihiya uphariyeliya iluusu uhiyu, nlattu wokhotto. Ni ukati waarwaalyaaka u Port Harcourt, mayamunna yahaana yaakuvaka umalihaka nkutthaano ninivekelo, kontha anatoropa yahokhitiri utthukula iphiro yoo Biafra.

Waathotola mayamunna yaari itthu yofayita wiira naakavihere unkhuluvela Yehova wiira aanaahala waawacera ni nifento, ni naalipihe wiira ahikelakele isiyaasa ni akhale owiiwanana. Ayo yahokhitiri uvilela ile ikhottweele, yencivihaka wiiwanana ni ufentana, uvikana uhiiwananiya waacanre nlattu wokhotto. Kahocaaliya cinene ukhala nkhayi naayo ule ukati woorikoole!

Mwaakha wo 1969, munna Milton Henschel phaahoolela Nthukumano Wolapo Cinci woopenle mwaha “Nnema Watuninyani”, waapankiye nhina Estádio Yankee, u Nova York. Mi kaanankavihera ni kaheetthuca citthu cinci. Wahoreera ukavihera kontha mwaakha wo 1970, kaanaahala ukavihera utthenkaca Nthukumano Wolapo Cinci woopenle mwaha “Atthu Ooreera Nrima” waapankiye u Lagos, u Nigéria. Uyo nkutthaanooyo aapankiye inamanle phiyaaru ikhotto ni waahomala saana nlattu Yehova ahonikavihera. Uyo waari nthukumano woopacera waapankiye niiluka 17, yaawile atthu 121.128 ni waapattisiyaaya atthu 3.775 — uyo waari mpattiso muulupale waapankiye ukhuma nihuku no Pentekositi. Ahowa munna Knorr, Henschel ni akhwaawe yaawale ni matteke owaalukariya u Estados Unidos, ni Inglaterra. Ukati waakavihenryaaka utthenkaca ule nthukumanoole waari ukati waakhanlyaaka ninteko mwinci muukumini waka. Ule ukatyuule, anamalalyeera yahotepa wuncerya!

Myaakha 30 civinre kinari u Nigéria, kahovara nteko wo mootoli o isirikwiitu ni kahokhala humu nootola iPeteli, mphantte unkela ncuwa wo África. Mamisiyonaariyu yaanasukhuru cinene yawaceriyaka ni yalipihiyaka nrima! Yaakhala itthu yookitteeliha nrima waathoonyera wiira ayo khayaaliyaliye. Uyo ntekooyo wahokithoonyera wiira unaareera unwacera khula ntthu. Upanka iyo,  kahi wiira paasi unawaakavihera atthwaayo ‘uthapuruwa’, masi ciicammo mphwinko wa Yehova unaakhala woolipa ni wowiiwanana.

Yehova phaanikavihenre uvilela masakha ni iretta caarivo nlattu wokhotto. Iparakha caanivahaawe caanawoonannya. Oris aheera:

“Imaara cinci, ooyeeli cihu yaanaaniweryaaka malaariya. Nihuku nimoca, Worth aarwaaniye usipiritaali hiicuwelaka. Yeeriye wiira uyo khaahala uvona, masi ahomoona nafaasi! Wancenryaawe wiicuwela, Worth ahonlalyeera nfurumeeru anwacera. Nihuku nikhwaawe, kahorwaa ni Worth umootola nfurumeeruule, eehaniya Nwambiwe. Uyo ahotthuna wiitthucihiya ikhweeli ni wahoolo waya ahokhala humu owanlokoni, u Aba. Miiva ciicammo kahokhitiri waakavihera atthu enci uncuwela Yehova, mpaka ciicammo amaka owiikurumica uswali. Masi itthu itepale unitteeliha nrima uri waacuwela ni waafenta cinene apoovu oo Nigéria, unicivela makhalelwaaya, ilema caya ni iluukaaya.”

Ila phi itthu ikhwaawe yiitthucaleehu: Wiira ‘nithapuruwe’ ukati naavareehu nteko ilapo ikina, nahaana niitthucaka waafenta mayamunneehu, hataa ilema caya civirikanaka cinene niilema cihu.

Umaliha wihu uvara nteko uPeteli yoo Nigéria, nahorumiya mwaakha wo 1987 urwaa ukhala mamisiyonaariyu ncoko woo Santa Lúcia, u Caribe. Waari nteko womaana, masi wo marikariko onaanaano. U África, nlopwana mmoca aanawaathela athiyana enci. Masi u Santa Lúcia, itthu yoohinamaana yaari alopwana ni athiyana ukhalakhala nkhayi woohirwaa uthelanaca ukuvernu. Unookhalaru commo, ikuru cirinaaya Nuulumo na Nluku, cahaakavihera ale yaasomiheehu Ibiiblya urukunusa makhalelwaaya.

Masi nahokela wuuluvala ni ukuru cihu cahancera uvukuwa. Phimaana, mayamunna o Mphwinko wo Mahumu Unhoolela yahonithoonyera nifento ni yahonilattula uthamela uPeteli yoo Brooklyn, mwaakha wo 2005. Woocukuliha nrima, mwaakha wo 2015 Oris ahokhitiriya ni nlupatthiihu muulupale, ukhwa. Akinoona coottonka inanna yaakhanlyaaka ooripiyaaka nrima ule ukatyuule. Masi mahuku otheene kinansukhuru Yehova nlattu wa Oris. Uyo aari mpatthannyaaka omaana. Oris aari nthiyana ooreera nrima ni ahaana makhalelo omaana. Myaakha 68 cotheene nikhanleehu nkhayi, kaanaaciveliya ni uyo. Niheetthuca wiira itthu imphwanyiha utteeliya muuthelanani ni wanlokoni, uri waahisima ale annihoolela, ulevelelana niiraati, wiiyeviha ukati wotheene ni woonihera makhalelo onhokorokho wonnepa.

Nakhalaka ni masukhuli, naananlepelaka Yehova wiira anikavihere uhihiya unswalela. Ukati nnya citthunnya ‘waanirukunusaaya nrima’, isukhuli caarineehu caanaavira—ni citthu comaana cinaahala ukhumelela uhoolo!—Isai. 60:17; 2 Akor. 13:11.

Yehova hocaaliha nteko waavaraaya apaapa, amaama ni mayamunna akina u Trinidad ni u Tobago. Irelatooriyu coomalela cinthoonyera wiira atthu 9.892 ari monswalela Yehova. Mayamunna enci anaakavihera nloko naka u Aruba, ni ahaavo maloko 14 aneekurumica uvara nteko u Aruba. Vano u Nigéria, anamalalyeera ahenciva mpaka uphiya 381.398. Ni u Santa Lúcia ahaavo atthu 783 anaakihera Umwene wa Yehova.

Nna co, myaakha caka cinaapwaha 90. Iwaacaka ale anaaliya wanupani ya Yehova, Isaalimu 92:14 ineera: “Hataa yuuluvalaka, anaahala wiimiha mihokorokho; nanlelo anaahala ukhala ookhomala ni oowinciva ukumi.” Kinaasukhuru cinene nlattu wo mananna cikhanlyaaka kinswalelaka Yehova muukumini waka. Yoohiyeriya yoominepani yofayita yankhenlyaaka ihokilipiha wiira kiikurumice unswalela Yehova niikuru caka cotheene. Nifento nookhuluvelya na Yehova, nihokikhitiriha ‘uthapuruwa mmapuwani ca Nlukwaaka’.—Isaa. 92:13.