1. Citthuni piili cinlamuliyeehu ukupali?

YEHOVA NLUKU nawaafenta cinene ale anonswalela. Uyo haafenta ni khanhala uhiya waafenta. Yehova ciicammo uncivela isariya. (Isaa. 33:5) Phimaana, pooti wankupaliihu citthu piili: (1) Yehova unanwerya nrima awoonaka ale anonswalela yahiwaceriyaka niisariya, ni (2)  uyo naakhuluveliha wiira inaahala upankiya isariya. Mwaha upacerihale nnya myahannya, * uhooluma Nlamulo Nluku nanrumalyaawe Moses waavaha asarayeli. Niheetthuca wiira nno Nlamulonno naalipiheriya ni nifento ni naanaakhuluveliha wiira atthu otheene awaceriye niisariya, hataa ni ale yahaakhitiri wiicaakiha. (Deut. 10:18) Nlamulo ninaathoonyera wiira Yehova nawaawacera ratta ale anonswalela.

2. Makohoni anhaleehu waakhula?

² Mwaakha wo 33, ukati waakhumelelihiyaaya nloko no makristau, Nlamulo na Moses nihomala. Vano makristau yaahala ukhala cani? Niireke makristau khayaahala ukhala ookhikiceriya nlattu woohikhalana-tho nlamulo noolipiheriya ni nifento ni nowaasovenriha atthu woonihera isariya? Mena vakaani! Makristau ahaakhela nlamulo nonaanaano. Nhina ula mwahoola, ninaahala wiitthuca nlamuloni naakhenlyaaya. Ciicammo, ninaahala waakhula ala makohwaala: Nlattuni nineereehu wiira nno nlamulonno ninlipiheriya ni nifento? Nlattuni nineereehu wiira nno nlamulonno ninawaasovenriha atthu uthoonyera isariya? Toko cineeraaya nno nlamulonno, ale arina ukhulupale anlamuliya waawacera cani akhwaaya?

3. Isiyani ikhanle “nlamulo na Kristu” nihimiye nhina Akalasiya 6:2?

³ Usome Akalasiya 6:2. Makristau anlamuliya weettela “nlamulo  na Kristu.” Ninaacuwela wiira Yesu khantikhale nipuro malamulo oohala weettela attharyaawe. Masi Yesu haahimyera malakihero, marumi ni mattharelelo. Citthu cotheene Yesu ciitthucihalyaawe cikhanle “nlamulo na Kristu.” Nhina iparaagarafu co vathi, nttwee noone citthu cinnikavihera ucuweleeha nno nlamulonno.

4-5. Yesu eetthucihale manannani, ni ukatini?

⁴ Yesu eetthucihale manannani? Woopacera, uyo eetthucihale ni citthu coolumaawe. Moolumo a Yesu yahaana ikuru. Uyo aanaawiitthuciha atthu ikhweeli ya Nluku, nlattuni numpiyeehu ni manannani Umwene wa Nluku cinhalaaya umaliha uhuva wa apinaatamu. (Luka 24:19) Yesu ciicammo eetthucihale ni ntakihero nomaana nivahalyaawe. Ni mananna Yesu caakhalaawe, haathoonyera attharyaawe mananna caalamuliyaaya ukhala.—Joau 13:15.

⁵ Yesu eetthucihale ukatini? Uyo eetthucihale ukati waavaraawe ntekwaawe watuninyani. (Mat. 4:23) Yesu ciicammo heetthuciha ukati wommwelelihiyaawe. Ukati mmoca, Yesu ahaakhumelela attharyaawe yaathukumanne—ookhalaka 500—ni ahaaruma eeraka: “Mwaapanke eetthuci.” (Mat. 28:19, 20; 1 Akor. 15:6) Ni hataa uturuwela wawe wiirimu, Yesu khahiyale waavaha malakihero attharyaawe khampa nhooleli o nloko no makristau. Wootakihera, mwaakha wo 96, Kristu aheera wiira apostolu Joau aalamuliya waalipiha ni waalaka makristau oothanliya.—Akol. 1:18; Apoka. 1:1.

6-7. a) Cantikhiye nipuroni citthu Yesu ciitthucihalyaawe? b) Ninhala uthoonyerani cani wiira ninawiiwelela nlamulo na Krisu?

⁶ Ninhala uphwanya vayi citthu Yesu ciitthucihalyaawe? Citthu cinci Yesu cuulumalyaawe ni cipankalyaawe ukati waaryaawe watuninyani cihantikhiya nhina ivangeeliyu cese. Masi ilivuru cotheene co mphantte uri Cowantikhiya Ceekristau ni Iluuka Ikereeku ciicammo pooti unikavihera ucuweleeha manaana Yesu cinoopuwelaawe. Nnyo ilivurunnyo yantikhale atthu yeettiheriya ni nnepa wootteela ni yaarina “ankhili a Kristu.”—1 Akor. 2:16.

⁷ Citthu cineetthuceehu: Citthu Yesu ciitthucihalyaawe cinaanikavihera mapuro otheene muukumini wihu. Phimaana, citthu cotheene cimpankeehu wapuwani wihu, untekoni, ucikola ni wanlokoni cinlamuliya weettiheriya ni nlamulo na Kristu. Wiira niitthuce nno nlamulonno, nihaana usoma Cowantikhiya Ceekristau ni Iluuka Ikereeku ni wuupuwela insomeehu. Wiira niiwelele  nno nlamulonno, ninlamuliya weettela malakihero, marumi ni mattharelelo otheene ari nhina nnyo ilivurunnyo. Neewelelaka nlamulo na Kristu, ninaamwiiwelela Ule cinonkhumakhuma citthu cotheene ciitthucihalyaawe Yesu—khanle Yehova, Nlukweehu onifento.—Joau 8:28.

8. Nlamulo na Kristu ninlipiheriya ni isiyani?

⁸ Yapheelaka utekiya inupa ratta, umpaceriya uthipiya ni uheliya maluku wiira ilipe. Atthu ankhala inupa yootekiya commo, khankhala yoovaka wiira inaahala umaruwa. Inanna imoca, nlamulo nomaana ninlamuliya ulipiheriya ni itthu yoolipa. Commo, atthu aneettela nno nlamulonno ankhala ookhikiceriya ni khankhala yoovaka. Nlamulo na Kristu ninlipiheriya ni itthu yooverihela ulipa—nifento. Nlattuni nineereehu wiira nno nlamulonno ninlipiheriya ni nifento?

9-10. Matakiheroni anthoonyera wiira citthu caapankaawe Yesu aapanka nlattu wo nifento, ni manannani cinlamuliyeehu untakiha?

⁹ Yoopacera, citthu cotheene Yesu caapankaawe aapanka nlattu wo nifento. Ikiriri awula uthunku waamwiira, unthoonyera wiira aanawaafenta akhunanawe. Yesu aanaawoonela uthunku atthu, phimaana aanaawiitthuciha, aanawaavoniha aretta, anawaavaha iyoolya ale yaavola itala ni aanaawummweleliha atthu ookhwa. (Mat. 14:14; 15:32-38; Mark. 6:34; Luka 7:11-15) Wiira apanke citthu cotheene ciyo, Yesu ahaana alevaka ukatyaawe ni ikuru cawe. Hataa ukhalaka commo, uyo aanaahoolelihera upanka citthu caapheelaaya akhunanawe, uhiya uhoolelihera upanka citthu caapheelaawe uyova. Ni itthu yuulupale cinene intepa uthoonyera nifento na Yesu, uri uvaha ukumyaawe wiira awoopole apinaatamu.—Joau 15:13.

¹⁰ Citthu cineetthuceehu: Hiiva ninontakiha Yesu ni mananna meeli: (1) uhoolelihera upanka citthu cimpheelaaya akhunanihu ni (2) wiitthuca utepa uwoonela uthunku atthu o ncoko unlalyeereehu. Uthunku unaaniiriha upheela waalalyeera ni uwiitthuciha ihapari comaana. Napankaka commo, ninawiiwelela nlamulo na Kristu.

11-12. a) Yesu thoonyenre cani wiira Yehova nawaawacera ale anonswalela? b) Manannani ninlamuliyeehu utakiha nifento na Yehova?

¹¹ Yonayeeli, Yesu hothoonyera wiira Athumwaane anawaafenta atthu. Ukati waaryaawe watuninyani, Yesu ahothoonyera mananna Yehova cinaawaceraawe ale anonswalela. Itthu imoca yiitthucihalyaawe phi ila: khula ntthu haana ifayita uhoolo wa Apaapeehu, Yehova. (Mat. 10:31) Yesu ciicammo heetthuciha wiira Yehova unancivela waakhelela ikhontwaa yoorimela ittharuwale ni inturuwela wanlokoni. (Luka 15:7, 10) Ni ciicammo hohimya wiira woopoliya wihu nikhanle nthoonyero wiira Yehova naanifenta hiiva.—Joau 3:16.

¹² Citthu cineetthuceehu: Manannani ninlamuliyeehu utakiha nifeto na Yehova? (Efesu 5:1, 2) Inanna imoca uri unwehera khula munneehu ni nrokorihu o wanlokoni toko ntthu rina ifayita cinene. Wakhalaka wiira “ikhontwaa yoorimela” ihonturuwela Yehova, hiiva ninlamuliya umwaakhelela ratta uyo ntthuuyo. (Isaa. 119:176) Inanna ikiina yontakiha Yehova uri uleva ukatiihu ni ikuru cihu wiira naakavihere mayamunneehu, venci-venci yapheelaka ukaviheriya. (1 Jo. 3:17) Naawaceraka ratta akhunanihu ni nifento, ninthoonyera wiira ninawiiwelela nlamulo na Kristu.

13-14. a) Nlamuloni Yesu nivahalyaawe nhina Joau 13:34, 35, ni kontha isiyani uneeriyaaya wiira nno nikhanle nlamulo nonaanaano? b) Ninlamuliya wiiwelela cani nno nlamulo nophiyaarunno?

¹³ Yoneeraru, Yesu haaruma attharyaawe uthoonyera nifento nowiivahereriya. (Usome Joau 13:34, 35.) Nlamulo na Moses naanaahimya wiira khula ntthu ahaana anfentaka nkhunanawe. Vano kontha isiyani uneeriyaaya wiira nlamulo nivahalyaawe Yesu nikhanle nlamulo nonaanaano? Kontha nlamulo na Yesu ninaaromola-tho itthu ikiina—unfente nkhunanaa khampa Yesu cuufentalyaawe. Wiira nipanke iyo, nihaana nooniheraka nifento  nowiivahereriya. * Nihaana naafentaka mayamunneehu ni asirokorihu venci uvikana mananna hiivano cineefenteehu. Ninlamuliya waafenta cinene, mpaka utthuna uleva ukumiihu wiira naakavihere mayamunneehu ni asirokorihu, khampa Yesu cipankilyaawe wiira anikavihere hiiva.

¹⁴ Citthu cineetthuceehu: Ninhala wiiwelela cani nno nlamulo nophiyaarunno? Woohincivihaca, nihaana wiivaherera uleva citthu cihu wiira naakavihere mayamunneehu ni asirokorihu—kahi paahi citthu cuulupale, toko uleva ukumiihu wiira naakavihere, masi ciicammo citthu cankaani. Toko uhihiya waapakherya nkaarooni wihu mayamunna yuuluvanle ampheela urwaa umikutthaanoni, uleva itthu innicivela wiira nintteelihe nrima nkhunanihu, awula uvarela nteko ukati unkhaleehu niiferiya wiira nikavihere yakhumelelaka ihasara. Otheene ayo ankhala mananna o wiiwelela nlamulo na Kristu. Nathoonyeraka nifento nowiivahereriya, nloko nihu ninaakhala nipuro khula ntthu nineecoonaawe ukhala ookhikiceriya ni woohoova.

15-17. a) Manannani citthu caapankaawe Yesu cinthoonyeraaya isariyaawe? b) Manannani ninlamuliyeehu untakiha Yesu?

¹⁵ Ibiiblya yeeraka wiira nihaana weettela “isariya”, inaaca upanka itthu Nluku inhimyaawe ukhala yomaana, ni upanka iyo itthwiiyo woohinthanla ntthu. Nlattuni nineereehu wiira nlamulo na Kristu ninawaasovenriha atthu uthoonyera isariya?

¹⁶ Yoopacera, moone manannani citthu caapankaawe Yesu cinthoonyeraaya isariyaawe. Ukati Yesu waaryaawe watuninyani, ahooleli ottiini yaanawaathanya ale yahaakhanle ayuuta, yaanawaathanya apoovu ni khayaawacera athiyana niihisima. Masi Yesu khaapanka commo. Uyo khaathanya atthu yahaakhanle ayuuta yaamwaamini. (Mat. 8:5-10, 13) Yesu aanawaalalyeera atthu otheene woohinthanla ntthu, akhale thaciri awula masikhini. (Mat. 11:5; Luka 19:2, 9) Yesu khaawacera pusya athiyana. Uhiya commo, Yesu anawaahisima ni aanawaawacera ratta, hataa ni ale yaahuva nlattu woothanyiya naakhwaaya.—Luka 7:37-39, 44-50.

¹⁷ Citthu cineetthuceehu: Napheelaka untakiha Yesu, nihaana waawacera atthu otheene ni mananna mamocaaru ni unlalyeera ihapari comaana otheene ule mpheela wiiwelela—hataa eettelaka ittiinini awula hataa akhalaka thaciri awula masikhini. Alopwana makristau anantakiha Yesu yaawaceraka athiyana niihisima. Napankaka commo, ninaathoonyera wiira ninawiiwelela nlamulo na Kristu.

18-19. Isiyani Yesu yiitthucihalyaawe nhina isariya, ni iyo inniitthuciha isiyani?

¹⁸ Yonayeeli, moone citthu ciitthucihalyaawe Yesu nhina isariya. Wootakihera, wuupuwele ile ninrumiyeehu ineera wiira nihaana naawaceraka akhwiihu khampa cimpheeleehu wiira niwaceriye. (Mat. 7:12) Otheene cihu nimpheela niwaceriyeke niisariya. Phimaana, nihaana naawaceraka akhwiihu niisariya. Napankaka commo, ayo anaahala upheela uniwacera niisariya. Vano hiiva naahiwaceriyeke niisariya? Yesu heetthuciha wiira Yehova ‘naahala upanka wiira awaceriye niisariya ale yaathanlalyaawe, anonlepela isontte-sontte uthana ni uhiyu.’ (Luka 18:6, 7) Ayo moolumwaayo akhanle itthu Yehova innikhuluvelihaawe: Nlukweehu naaweheeha masakha annihuviha ala mahuku ookhiceraala, ni waphiyaka ukati naahala unipankela isariya.—2 Atesal. 1:6.

¹⁹ Citthu cineetthuceehu: Neettelaka mattharelelo Yesu yiitthucihalyaawe, ninaakhitiri waawacera akhunanihu niisariya. Ni wakhala wiira khaniwaceriye niisariya ntuninyani ya Sotwani inkhaleehu, ninaamaalihiya nlattu woocuwela wiira Yehova naahala unipankela isariya.

20-21. a) Ale arina ukhulupale anlamuliya waawacera cani akhwaaya? b) Manannani nlopwana cinaathoonyeraawe nifento nowiivahereriya amwaarawe ni asaanaawe?

²⁰ Toko cineeraaya nlamulo na Kristu, ale arina ukhulupale anlamuliya waawacera cani akhwaaya? Ale arina ukhulupale anlamuliya waawacera akhunanaya ni nifento ni niihisima, kontha nlamulo na Kristu ninlipiheriya ni nifento. Ayo anlamuliya wuupuwela wiira Yesu mpheela wiira noonihereke nifento ukati woopanka khula itthu.

²¹ Watthokoni. Nlopwana haana waafenta amwaarawe ‘toko Kristu cifentalyaawe nloko no makristau.’ (Efesu 5:25, 28, 29) Wiira athoonyere nifento nowiivahereriya toko na Kristu, nlopwana haana uhoolelihera upanka citthu cimpheelaaya amwaarawe, uhiya uhoolelihera upanka citthu cimpheelaawe uyova. Alopwana akiina unawaarikela upanka iyo. Pooti ukhalaka wiira ayova khayuunuwihiye nipuro ninvahiya ifayita nifento ni isariya, phimaana ahaana nhapo woopanka citthu coohiloka. Masi wiira yiiwelele nlamulo na Kristu, ahaana uhiya nnyo mihaponnyo. Nlopwana athoonyeraka nifento toko na Yesu, naahisimiya naamwaarawe. Ciicammo haana apankaka iyo ukati woowuunuwiha asaana. Nnyari nothoonyera nifento neekhweeli khampanka ni khanooluma citthu cowaawereeha nrima asaanaawe. (Efesu 4:31) Uhiya commo, uyo nawaattottopela asaanaawe ni nawaahimyacera wiira nawaafenta. Iyo inaahala waakavihera asaanaawe woona wiira anaakhikiceriya ni khanhala ukhala yoovaka. Nlopwana nopanka commo, naafentiya ni naakhuluveliya naasaanaawe.

22. Toko cihimiyaaya nhina 1 Peturu 5:1-3, “ikhontwaa” cikhanle ca pani, ni cihaana ciwaceriyaka manannani?

²² Wanlokoni. Mahumu o wanlokoni no makristau ahaana wuupuwela wiira “ikhontwaa” khacinakhala cawaya. (Joau 10:16; usome 1 Peturu 5:1-3.) Cikhanle ca Yehova. Moolumo “nikhoto na Nluku,” “uhoolo wa Nluku,” ni “ale akhanle a Nluku” anaawuupusera mahumu wiira ikhontwaa cikhanle ca Yehova. Yehova mpheela wiira ikhontwaa  cawe ciwaceriye ratta ni nifento. (1 Atesal. 2:7, 8) Mahumu yavaraka ntekwaaya ni yawaceraka ikhotwaa ca Yehova ni nifento, ananciveliha Yehova, ciicammo anaafentiya ni anaahisimiya ni mayamunna o wanlokoni.

23-24. a) Ntthu avaraka matampi moolupale, ntekoni unkhalanaaya mahumu o wanlokoni? b) Woowacera nnyo myahannyo, citthuni mahumu cinlamuliyaaya wuupuwela?

²³ Ntekoni urinaaya mahumu ntthu o wanlokoni avaraka matampi moolupale? Ntekwaaya unaavirikana ni nteko waarinaaya mahumu ni masuwiisi o Isarayeli. Nlamulo na Moses naanaatthuniha wiira alopwana oothanliya awacere kahi paasi citthu cowuuswalini, masi ciicammo wuulumacera myaha cahaakhanle cowuuswalini ni wuulumacera ikhirini caapankiya. Masi ni nlamulo na Kristu, itthu inlamuliyaaya upanka mahumu uri paasi uwacera mphantte wo wuuswalini wo matampi avaralyaawe ntthuuyo. Ayo anaacuwela wiira uwacera myaha cihikhanle cowuuswalini ni cokhirini ukhanle nteko Nluku waavahalyaawe akhulupale ookuvernu. Ayo phinlamuliya uhukhumu, toko unliviha ntthu tthekale ni untthukela nkalapoosu.—Aroo. 13:1-4.

²⁴ Mahumu anwacera cani mphantte wo wuuswalini wo matampi avaralyaawe ntthu? Ayo anaavarela nteko Ibiiblya wiira awacere ratta mwahooyo ni wiira alakele itthu yoohala upankiya. Mahumu khanhiya wuupuwela wiira nlamulo na Kristu ninlipiheriya ni nifento. Nifento ninaahala waapankiha mahumu wuupuwela co: ‘Isiyani inlamuliya upankiya wiira akaviheriye atthu o wanlokoni apankiye itthu yoohinamaana?’ Ni ukati wonwacera ntthu tthekale, nifento ninaahala waapankiha mahumu wuupuwela co: ‘Niireke ule tthekale hottharuwa? Isiyani inlamuliya upankiya wiira akaviheriye uturuwela ukhalana upatthani womaana ni Yehova?’

25. Mwaha unhaleehu usoma unrwaa waakhula nikohoni?

²⁵ Ninaasukhuru cinene nlattu wo weettiheriya ni nlamulo na Kristu! Otheene cihu neekurumicaka wiiwelela nno nlamulonno, ninankavihera khula ntthu o wanlokoni woona wiira nloko nikhanle nipuro ninfentiyaawe, ninvahiyaawe ifayita ni ninkhikiceriyaawe. Unookhalaru commo, nanlelo ninkhala ntuninyani ‘atthu ootakhala nrima untepaaya ukhala oohinamaana.’ (2 Tim. 3:13) Khaninlamuliya wiitthaala. Nloko no makristau ninlamuliya upanka isiyani wiira nithoonyere isariya apankiyaka mwanhima citthu cosece ni ntthu muulupale? Mwaha unhaleehu usoma unaarwaa waakhula nno nikohonno.