1. Nlattuni uhintikhineehu wiira ilelo ninkhala “mahuku ookhicera”?

WEEVA uyariye unavinre mwaakha wo 1914? Wakhala commo, ikhumelo iyareliyo, weeva unkhala “mahuku ookhicera” o ila ituninyeela. (2 Tim. 3:1) Yesu ahohoolelihera uhimya citthu cinci caahala ukhumelela ukati wo mahuku ookhicera: ikhotto, uthwaa woyoolya, uttettemela wotthaya, iretta, winciva citthu cinvirikaniha malamulo ni ulupatthiya atthu anonswalela Yehova. (Mat. 24:3, 7-9, 12; Luka 21:10-12) Otheene cihu, ninawiiwa wiira cinaakhumelela nnya citthunnya. Ciicammo ninaawoona atthu yathoonyeraka meettelo toko ale yantikhalyaawe apostolu Paulu. (Uwehe ikwaaturu “ Mananna ciryaaya atthu ilelo”.) Hiiva ninonswalela Yehova, khanintikhina mena vakaani wiira ilelo ninkhala “mphantte wookhicera womahuku.”—Mik. 4:1.

2. Makohoni ninlamuliyeehu ucuwela waakhuliya waya?

² Ukhuma 1914 mpaka ilelo, uhovira ukati mwinci. Phimaana, pooti waneereehu wiira ilelo ninkhala wuumaleloni “mahuku ookhicera.” Ukhala wiira umala wotuninya uri wakhiviru cinene, nihaana nicuwelaka waakhuliya waya makoho moolupale toko ala: Citthuni cinhala wiirannya wuumaleloni “mahuku ookhicera”? Isiyani Yehova impheelaawe wiira nipanke niwehererakoono wiirannya nnyo citthunnyo?

3. Toko cinhimyaaya inatiri iri nhina 1 Atesalonika 5:1-3, atthu o ntuninyani anhala ukhuwela isiyani?

³ Usome 1 Atesalonika 5:1-3. Paulu naaromola “nihuku na Yehova.” Nhina ila iveeruswiila, “nihuku na Yehova” unaaciya ukati unhala wancera yatupheliyaka Ibabilooniya Yuulupale (ittiini cowootha cotheene ntuninyani), ni unhala umalela ukhottoni yo  Harmacetom. (Apoka. 16:14, 16; 17:5) Nihinaaya wancera nno ‘nihukunno’, atthu o ntuninyani anaahala ukhuwela: “Nnema ni mpuha!” Ahooleli anasiyaasa anaaromolaka moolumo toko ayo yoopelaka mwaha waatanaca wolapo. * Masi ukhuweliya “nnema ni mpuha” uhimiye mbiiblyani inhala ukhala itthu ikhwaawe. Kontha isiyani? Kontha, ukati unhalaaya ukhuweliya “nnema ni mpuha,” atthu enci anhala wuupuwela wiira khweeliini ahooleli anasiyaasa ahokhitiri ukhaliha ituninya nipuro no nnema ni noopuhiya cinene. Masi khweeliini, atthu o ntuninyani anaahala woona yapaceraka “masakha moolupale” ni, wuumaleloni ayo masakhaayo, unaahala “wowaakuvya waaphwanya utankanyiya.”—Mat. 24:21.

4. a) Citthuni cihincuweleehu nhina ukhuweliya wo “nnema ni mpuha”? b) Isiyani incuweleehu?

⁴ Cihaavo citthu cincuweleehu nhina ukhuweliya wo “nnema ni mpuha.” Masi cihaavo citthu cikiina cihincuweleehu. Toko nnya: khanincuwela isiyani inhala uwiiriha atthu o ntuninyani ukhuwela iyo itthwiiyo ni khanincuwela manannani cinhalaaya ukhuwela. Ciicammo khanincuwela wakhala wiira unhala ukhuweliya wo nkwaha mmoca awula unhala ukhuweliya ikwaha cinci. Hataa ukhalaka cani, ihaavo itthu incuweleehu: khaninlamuliya wiithepya, nuupuwelaka wiira ahooleli anasiyaasa ahokhitiri uwaana nnema ntuninyani. Uhiya commo, ukhuweliya “nnema ni mpuha” phi itthu Ibiiblya inniirelaaya wiira niweherere. Iyo inhala uthoonyera wiira “nihuku na Yehova” nimpheela upacera!

5. Toko cinthoonyeraaya 1 Atesalonika 5:4-6, ninlamuliya wiitthencaka cani nihinaphiya “nihuku na Yehova”?

⁵ Usome 1 Atesalonika 5:4-6. Moolumo a Paulu anthoonyera wiira nihaana niitthenkacaka nihinaphiya “nihuku na Yehova.” Khaninlamuliya ‘urupa ikhove toko atthu akhwaawe cimpankaaya.’ Nihaana ‘ukhala niweheehaka’ ni uhiitthaala. Wootakihera, nihaana wiiweheeha ratta wiira nihikelakele myaha cosiyaasa co ntuninyani. Neekelakelihaka isiyaasa, ninaahala “upanka mphantte wotuninya.” (Joau 15:19) Hiiva ninaacuwela wiira Umwene wa Nluku paahi phinhala uwaana nnema watuninyani.

6. Ninlamuliya waakavihera cani atthu, ni nlattuni?

⁶ Masi khuntosa paahi hiivano uhiitthaala. Nihaana ciicammo naakaviheraka akhwiihu wiira yunwe ni yiitthuce citthu cihimiye mbiiblyani cinhala ukhumelela ntuninyani wahoolo. Uhiliyale: yanceraka masakha moolupale, khunhala ukhala ukati wiira atthu alakele wancera unswalela Yehova. Phimaana, ikhanle itthu yofayita cinene hiivano ulalyeera nenna co! *

7. Isiyani Yehova inwehereraawe wiira nipanke ilelo?

⁷ Ukati vakaani unhaleela nihinaphiya “nihuku” nawe, Yehova noweherera wiira hiiva  niikurumice cinene uvara nteko woolalyeera. Otheene cihu nihaana ‘nitepaka uvara cinene nteko wa Apwiiya.’ (1 Akor. 15:58) Yesu ahohimya itthu ninlamuliyeehu upanka. Yesu ukati waahimyaawe citthu cofayita cotheene caahala ukhumelela mahuku ookhicera, uyo aheera: “Ciicammo, ilapo cotheene, ihapari comaana cihaana cilalyeeriyaka toko.” (Mark. 13:4, 8, 10; Mat. 24:14) Wuupuwele ila: khula ukati weeva unrwaa wuulalyeerani, unaakavihera wiirannya ila inatiri yo mbiiblyaniila!

8. Uneetta cani ntekweehu woolalyeera ntuninyani motheene?

⁸ Uneetta cani ntekweehu woolalyeera ntuninyani motheene? Khula mwaakha, atthu enci anawiiwa ihapari comaana co Umwene wa Nluku. Woone mananna ciwaalyaaya yincivaka anamalalyeera ntuninyani motheene. Mwaakha wo 1914, yaarivo anamalalyeera 5.155 yaaphwanyannya ilapo 43. Ilelo, ahaavo anamalalyeera 8,5 milhões amphwanyannya ilapo 240! Masi ntekweehu nanlelo khunaphiya umwiiso. Khaninlamuliya uhiya waalalyeera atthu wiira Umwene wa Nluku paahi phinhala ukhitiri umaliha masakha otheene o ntuninyani.—Isaa. 145:11-13.

9. Nlattuni uhinlamuliyeehu uhiya ulalyeera?

⁹ Hiiva ninhala uhiya ulalyeera paahi Yehova eeraka wiira nteko uhomala. Ukatini nanlelo unhaleela wiira atthu ancuwele Yehova Nluku ni Yesu Kristu? (Joau 17:3) Khanincuwela. Masi itthu nincuweleehu phi ila: ahinancera masakha moolupale, atthu otheene ‘anoonihera uratteene uphavela ukumi woohimala’ ahaana ukati wootthuna ihapari comaana. (Mite. 13:48) Ninlamuliya waakavihera cani ayo atthwaayo uhinaaya uphiya ukati wo masakha moolupale?

10. Citthuni Yehova cinnivahaawe wiira niwiitthucihe atthu ikhweeli?

¹⁰ Avarelaka nteko mphwinkwaawe woothotokanihiya, Yehova naanivaha yotheene impheeleehu wiira niwiitthucihe atthu ikhweeli. Wootakihera, ninawiitthucihiya cinene unkutthaanoni weeriyari isumana. Uyo nkutthaanooyo unaaniitthuciha itthu yoohala wuuluma ukati umpaceriheehu umuulumana ntthu, ukati unturuweleehu umootola ni ukati woosomiha Ibiiblya. Uhiya iyo, mphwinko woothotokanihiya wa Yehova uhonivaha Ikaruma Cinnikavihera Wiitthuciha. Nnyo ikarumannyo cinaanikavihera . . .

•   upacera woopwa myaha,

• wuuluma ni mananna oohala unkavihera ntthu uncivela mwaha unonlalyeereehu,

• waasovenriha atthu wiira apheele wiitthuca-tho,

• wiitthuciha ikhweeli nisomihaka Ibiiblya ni

• waalattula atthu wiira akele nsayitini wihu ni wiira awe Usalau yo Umwene.

Khweeliini, khawantosa paahi ukhalana nnya ikarumannya. Nihaana nivarelaka nteko. * Wootakihera, wuupuwele wiira uhomoopana mwaha womaana ntthu mpheela wiitthuca. Wakhalaka wiira uhonhiyera ifolyeetu awula irevista, uyo naahala usoma veekhaawe imaara cinci mpaka ukati unhalaa umootola-tho. Khula mweeri, otheene cihu nihaana niikurumicaka uvara nteko cinene wuulalyeerani ihapari comaana.

11. Nlattuni untthenkaciyaaya mphantte woosomiya Ibiiblya veekha mwinternetini?

¹¹ Itthu ikhwaawe Yehova inaavahaawe atthu wiira aakavihere wiitthuca ikhweeli, ukhanle mphantte woosomiya Ibiiblya veekha mwinternetini uneehaniya Curso da Bíblia On-line, nhina jw.org. (Ukele wantikhiye ENSINOS BÍBLICOS > LIÇÕES ON-LINE.) Nlattuni utthenkaciyaaya iyo ikuuruswiiyu? Khula mweeri, atthu enci ntuninyani motheene anaatotha wiitthuca Ibiiblya mwinternetini. Myaha ciri nsayitini wihu pooti waakavihera ayo atthwaayo wiitthuca ikhweeli co Nuulumo na Nluku. Uhiya commo, weeva atthunaka pooti umuulumana ntthu noona ihaaya usomihiya Ibiiblya. Wamphwanyaka ntthu commo, unthoonyere nsayitini wihu mphantte unsomiya Ibiiblya veekha mwinternetini. *

12. Isiyani ntthu inhalaawe wiitthuca nhina ikuurusu yoosomiya Ibiiblya mwinternetini?

¹² Ikuurusu yoosomiya Ibiiblya mwinternetini inawuuluma nnya myahannya: “A Bíblia e seu Autor”, “Os principais personagens da Bíblia” ni “A mensagem da Bíblia sobre um futuro melhor”. Khula mwaha unawiitthuciha . . .

• mananna Ibiiblya cinonkaviheraaya ntthu,

• Yehova tipani, Yesu tipani ni malayikha phaapani,

• nlattuni Nluku uwumpalyaawe apinaatamu ni

• nlattuni unkhumelelaaya citthu coohinamaana ni uhuva.

Myahannyo ciicammo ninaataphulela manannani Yehova cinrwaawe . . .

• umaliha uhuva ni ukhwa,

• uwunweleliha atthu ookhwa ni

• umalamaliha ikuvernu caapinaatamu wiira ulamulele Umwene wa Nluku.

13. Ntthu somale Ibiiblya veekha mwinternetini, niireke khanlamuliya usomihiya-tho ni Saahiti a Yehova? Utaphulele.

¹³ Ntthu somale Ibiiblya veekha mwinternetini, khunakhala wiira khanlamuliya usomihiya-tho ni Saahiti a Yehova. Kontha Yesu nivahale hiiva iparakha yo waapanka eetthuci. Myaha co mwinternetini cipankiye wiira caakavihere atthu upheela wiitthuca-tho. Ayo yapheelaka wiitthuca-tho, atthunaka anaahala upheela usomihiya Ibiiblya. Wuumaleloni khula mwaha wo mwinternetini, nihaavo nipuro ntthuuyo ninlamuliyaawe upotola wiira alepele usomihiya Ibiiblya ni Saahiti a Yehova. Yavarelaka nteko isayitiihu, khula nihuku atthu oovikana 230 ntuninyani motheene anaalepela usomihiya Ibiiblya! Khweeliini, usomihiya Ibiiblya ni Saahiti a Yehova ikhanle itthu yofayita cinene!

14. Toko cinthoonyeraaya moolumo a Yesu nhina Matewus 28:19, 20, nihaana niikurumicaka upanka isiyani? Ni nlattuni ukhanlyaaya itthu yofayita upanka iyo?

¹⁴ Usome Matewus 28:19, 20. Ukati wo waasomiha atthu Ibiiblya, nihaana niikurumicaka ‘waapanka eetthuci ni uwiitthuciha weettela citthu cotheene cirumalyaawe Yesu.’ Nihaana  naakaviheraka atthu ucuwela wiira ikhanle itthu yofayita cinene ayova uthanla unswalela Yehova ni waakihera Umwennyaawe. Iyo maanaaya wiira nihaana naasovenrihaka atthu weettela citthu cineetthucaaya, wiivaherera wa Yehova ni upattisiya. Commo paahi, ayo phinhalaaya woopwa naphiyaka nihuku na Yehova.—1 Pet. 3:21.

15. Khaninlamuliya urihakaca ukati nipankaka isiyani? Ni nlattuni?

¹⁵ Toko ciitthucaleehu, nihaattamela cinene ukati unhalaaya umalamalihiya ila ituninyeela. Phimaana, khaninlamuliya urihakaca ukati naasomihaka Ibiiblya atthu ahimpheela urukunusa mirima caya wiira answalele Yehova. (1 Akor. 9:26) Ukati unhaleela wiira nivare ntekweehu uri vakaani cinene! Atthu enci ahaana yiiwaka ihapari co Umwene, uhinaaya umala ukati.

16. Toko cihimiyaaya nhina Apokalipise 18:2, 4, 5, 8, isiyani makristau eekhweeli otheene inlamuliyaaya upanka? (Uwehe ciicammo niwehero no vathi ipaagina.)

¹⁶ Usome Apokalipise 18:2, 4, 5, 8. Nnya iveerusunnya cinaathoonyera itthu ikiina Yehova inwehereraawe wiira apanke ale anonswalela. Makristau eekhweeli otheene ahaana yathoonyeraka wiira ahokhuma Ibabilooniya Yuulupale. Ntthu nsoma Ibiiblya hinaaya wiitthuca ikhweeli, uyo atthunaka aapanka mphantte ittiini yowootha. Uyo atthunaka khaalova wuuswalini awula wamitekoni cikiina cottiini yeettelaawe. Ni mpaka pooti ukhala wiira aanaavahaka nsurukhu wakereeca wawe. Masi ntthu nsoma Ibiiblya apheelaka ukhala namalalyeera oohipattisiya, uyo haana akhumaka ittiini yowootha khuliiru. Uyo haana antikhaka iwarakha yoohimyaca wiira hokhuma ikereeca yaaryaawe awula haana athoonyeraka ni mananna makiina wiira hohiya iyo ikereeceeyo. Uyo ntthuuyo haana apankaka itthu imocaaru wakhala wiira mpanka mphantte mphinko woothotokanihiya nkiina unkavihera Ibabilooniya Yuulupale. *

17. Ntekoni nkristau uhinlamuliyaawe utthuna, ni nlattuni?

¹⁷ Nkristau eekhweeli khanlamuliya uvara nteko unkavihera Ibabilooniya Yuulupale. (2 Akor. 6:14-17) Wootakihera, uyo khaahala utthuna uvara nteko nkereeca. Uhiya commo, nkristau khaahala utthuna alepeliya wantekoni wawe wiira arwee avare miteko wanupani invareliya nteko niittiini yowootha. Ni nkristau wakhala wiira naavara nteko wo mmatatani awula haana nakoswaawe, khaahala urwaa utotha ikhiparuwa awula umweeciha nakoswaawe mapuro anvariya miteko co Ibabilooniya Yuulupale. Ni khaahala uthuna avahiyaka nteko ayo mapurwaayo. Nlattuni ninlamuliyeehu upanka commo? Kontha Nluku noona  ukhala coohiirya nnyo ittiinnyo. Hiiva khanimpheela ukavihera itampi caya.—Isai. 52:11. *

18. Munna mmoca aathoonyenre cani wiira naweettela mattherelelo o mbiiblyani nhina nteko unvaraawe?

¹⁸ Humu mmoca aari karpinteeru. Myaakha cene uttuli, nlopwana mmoca ahonlepela wiira arwee avare nteko wakereeca yo wasitani waakhalaawe. Uyo nlopwanooyo aanacuwela wiira munneehu khaatthunaka eehaniyaka uvara miteko mmakereeca. Masi ila ikwaheela, ule nlopwanoole aanoovelavela ni ampheelaca ntthu oohala urwaa uvara nteko wakereeca. Hataa ukhalaka commo, humu aholakela weettela mattharelelo o mbiiblyani ni ahokhotta urwaa uvara ule ntekoole. Uvira waya isumana, ijornal yo ule ncokoole yahokumihera ilatarato ya nlopwana nkiina akhomelaka nsalapa wo yeele ikereeceele. Waari wiira munneehu ahotthuna urwaa uvara ule ntekoole, uyo phaahala ukhumelihiya wajornalini akhomelaka nsalapa. Wuupuwele mananna uyo caahalaawe uwehiya ni mayamunnaawe o wanlokoni! Wuupuwele ciicammo mananna Yehova caahalaawe ukhala.

19-20. a) Isiyani yiitthucaleehu mpaka va? b) Isiyani-tho inhaleehu wiitthuca?

¹⁹ Toko cinthoonyeraaya inatiri yo mbiiblyani, itthu yuulupale inhala upacera ukhumelela ntuninyani ukhanle ukhuweliya “nnema ni mpuha.” Masi Yehova honithoonyera wiira ahooleli o ntuninyani khanhala ukhitiri uwaana nnema noohimala watuninyani. Vano isiyani ninlamuliyeehu upanka uhinaphiya ukati wookhuweliya “nnema ni mpuha” ni woomalamalihiya ituninya yoohinamaana? Yehova mpheela wiira niikurumice uvara nteko woolalyeera ni waapanka eetthuci. Ukati yooyo, nihaana ninyemaka khuliiru ittiini cowootha. Iyo maanaaya wiira khaninlamuliya waatanaca mena vakaani niittiini yowootha ni uhitthuna uvara miteko cinkavihera Ibabilooniya Yuulupale.

²⁰ Cihaavo citthu cikhwaawe cinhala ukhemelela wuumaleloni “mahuku ookhicera.” Ni cihaavo citthu cikhwaawe Yehova cimpheelaawe wiira nipanke. Citthuni cinhala ukhumelela? Citthuni ninlamuliyeehu upanka? Isiyani ninlamuliyeehu upanka wiira niitthenkace? Nnyo phi citthu cinhaleehu wiitthuca nhina mwaha nkiina unhaleehu usoma.