1-2. a) Kontha isiyani Harmacetom ikhanle ihapari yomaana ivahiyaaya apinaatamu? b) Makohoni anhaleehu waakhula?

AHAAVO atthu anoopuwela wiira wahoolo, ntuninyani inaahala ukhumelela ikhotto yuulupale unhalaaya uttikhiya ibomba coohala ukwanyulaca ituninya yotheene awula anoopuwela wiira inaahala ukhumelela ihasara inhala umalamaliha ituninya yotheene. Masi iyo khinakhala itthu ineetthucihaaya Ibiiblya. Uhiya commo, Ibiiblya ineetthuciha wiira, woohipica, uhoolo unkeleehu inaahala ukhumelela ikhotto inhala uwaana citthu comaana. Iyo ikhottweeyo ineehaniya Harmacetom, ni itthu Ibiiblya inhimyaaya yaacaka iyo ikhottweeyo, ikhanle ihapari yomaana inlamuliya unitteeliha nrima! (Apoka. 1:3) Ikhotto yo Harmacetom khinhala waahasara apinaatamu, masi inhala uwoopola! Manannani?

² Ibiiblya ineera wiira ikhotto yo Harmacetom inhala uwoopola atthu imalihaka ikuvernu ceepinaatamu. Iyo ikhottweeyo inaahala uwoopola apinaatamu ukati unhalaaya waamalamaliha atthu oohinamaana ni waahiya paahi atthu ooreera nrima. Ikhotto yo Harmacetom ciicammo inaahala uwoopola apinaatamu ukati unhalaaya ukhikicera ituninya wiira ihitankanyiye. (Apoka. 11:18) Wiira niiweehe citthu cotheene nnyo, ula mwahoola unaahala waakhula makoho macese: Harmacetom isiyani? Citthuni cinhala ukhumelela hinaaya uwa Harmacetom? Isiyani ninlamuliyeehu upanka wiira noopwe ukati wo Harmacetom? Isiyani ninlamuliyeehu upanka wiira nivilele nna va Harmacetom utepalyaawe ukhala wakhiviru?

3. a) Nuulumo “Harmacetom” maanaaya isiyani? b) Toko cinthoonyeraaya Apokalipise 16:14, 16, nlattuni uneereehu wiira Harmacetom khaninakhala ncina no nipuro nirivo watuninyani?

³ Usome Apokalipise 16:14, 16. Nuulumo “Harmacetom” ninromoliya imaara imoca paahi mbiiblyani. Nno niphattuwacale ni nuulumo noluuka iheperewu nintaphuleliya “mwaako Megido.” (Apoka. 16:16; niwehero) Megido yaari isitati yoosarayeli khalayi.  (Jos. 17:11) Masi Harmacetom khaninakhala ncina no nipuro nirivo watuninyani. Harmacetom ukhanle ukati unhalaaya uthukumana “mamwene otheene o watuninyani” wiira anrukunuwele Yehova. (Apoka. 16:14) Masi, nhina ula mwahoola, neeraka “Harmacetom,” ciicammo ninaaca ikhotto inhala wiirannya yathukumanaka mamwene o watuninyani wiira anrukunuwele Yehova. Nincuwela cani wiira Harmacetom khaninakhala ncina no nipuro nirivo watuninyani, masi nikhanle nthoonyero? Woopacera, kontha khuuvo mwaako uneehaniya Megido. Yonayeeli, kontha ncoko wo uMegido kaninakhala nipuro nuulupale cinene wiira atosere “mamwene otheene o watuninyani” wamoca ni anatoropaaya ni ikaruma caya cokhotto. Yoneeraru, toko cinhaleehu wiitthuca nhina ula mwahoola, ikhotto yo Harmacetom inhala wancera ukati “mamwene” o ntuninyani unhalaaya waatuphela apoovu a Nluku, ankhala mapuro oovirikanaca ntuninyani motheene.

4. Kontha isiyani ikhotto yuulupale yoomalela ya Nluku ihaana ncina noolikanaca ni Megido?

⁴ Nlattuni Yehova uvahalyaawe ikhottwaawe yuulupale yoomalela ncina noolikanaca ni Megido? Kontha Megido ni ciicammo ncoko wo mooloko Jezreel waattamenle uMegido yaari mapuro caaniye ikhotto cinci. Ni ukati nkiina, Yehova aanaakela nnyo ikhottonnyo. Wootakihera, “waattamenle maaci o uMegido,” Nluku ahonkavihera suwiisi nsarayeli Baraki wiira akhitiri waatthema anatoropa yaahooleliya ni Siisera. Baraki ni porofeeta nthiyana Teepora yahonsukhuru Yehova nlattu wo ntikhiniho naapankalyaawe, aakaviheraka utthema ikhotto. Ayo yahiipa yeeraka: ‘Ukhuma wiirimu itthonttwa cihomwaattakanana Siisera. Mooloko Kisom uhaakhupa.’—Masuw. 5:19-21.

5. Itthuni yuulupale invirikaniha ikhotto yo Harmacetom ni ikhotto Baraki yaanalyaawe?

⁵ Baraki ni Teepora yaamalihenre ncipo naya yiiraka: “Sontte Yehova, alupatthyaa otheene akhwe, masi ale anoofenta akhale toko ncuwa ninkhuma nuwaarya waya.” Ukhottoni yo Harmacetom, alupatthi a Nluku ciicammo anaahala ukhwa ni ale anonfenta anaahala woopwa. Masi ihaavo itthu yuulupale invirikaniha nnyo ikhotto piili nnyo. Ukhottoni yo Harmacetom, apoovu a Nluku khanhala waana ikhotto. Ayo khanhala ukhalana nanka ikaruma cokhotto! Khweeliini, ‘ikuru caya unhala ukhala umaala ni unkhuluvela’ Yehova ni anatoropaawe o wiirimu.—Isai. 30:15; Apoka. 19:11-15.

6. Citthuni Yehova cinhalaawe uvarela nteko wiira aamalamalihe awanannyaawe ukhottoni yo Harmacetom?

⁶ Nluku nhala waamalamaliha cani awanannyaawe ukhottoni yo Harmacetom? Uyo pooti uvarela nteko citthu cinci, toko uttettemela wotthaya, ipula yo maluku ni itari. (Jó 38:22, 23; Ezek. 38:19-22) Uyo pooti waapankiha awanannyaawe wiira yiivanane yaayoru. (2 Ikor. 20:17, 22, 23) Ni uyo pooti waaruma malayikha wiira yaamalamalihe atthu oohinamaana. (Isai. 37:36) Hataa avarelaka nteko itthuni, Yehova naahala utthema. Awanani otheene anaahala umalamalihiya. Ni anasariya otheene anaahala woopwa.—Miru. 3:25, 26.

7-8. a) Toko cinthoonyeraaya 1 Atesalonika 5:1-6, isiyani inhalaaya ukhuwela ahooleli o ntuninyani? b) Kontha isiyani inaahala woopiha cinene iyo itthu yowoothiyeeyo?

⁷ Ukhuweliya “nnema ni mpuha” nihinaphiya “nihuku na Yehova.” (Usome 1 Atesalonika 5:1-6.) Nhina 1 Atesalonika 5:2, yeeriyaka “nihuku na Yehova” unaaciya ukati wo ‘masakha moolupale.’ (Apoka. 7:14) Ninhala ucuwela cani ukati unhalaaya wancera ayo masakhaayo? Ibiiblya inaahimya wiira ninaahala uwoona atthu yakhuwelaka cinene khampa cihinatokwaaya ukhuwela khalayi. Iyo phinhala uthoonyera wiira uhophiya ukati wo masakha moolupale.

⁸ Nwo unhala ukhala ukhuweliya wo “nnema ni mphuha” uhimiye mbiiblyani. Nlattuni ahooleli o ntuninyani unhalaaya ukhuwela iyo itthwiiyo? Niireke ahooleli ottiini anaahala ciicammo wiikelakeliha wiira akhuwele wamoca naahooleli o ntuninyani? Atthunaka anaahala wiikelakeliha. Masi ukhuweliya “nnema ni mpuha” inhala ukhala itthu yowoothiya ikiina inhalaaya ukumihera maciini. Ni  iyo itthu yowoothiyeeyo inaahala woopiha cinene. Enci anhala uyoona ukhala ninnema, masi khweeliini, ayo woohipica anaahala waakhumelela masakha moolupale cinene ahinatoko thanku ukhumelela watuninyani. Khampa cineeraaya Ibiiblya, ayo atthwaayo unaahala “wowaakuvya waaphwanya utankanyiya, toko nthiyana cinomphwanyaaya uhupeera apheelaka uyara.” Vano isiyani inhala waakhumelela atthu ookhuluvelya anonswalela Yehova? Ayo atthunaka anaahala utikhinihiya ukati unhalaaya wancera masakha moolupale, masi anhala ukhala owiitthenkaceene.

9. Niireke Yehova nhala umalamaliha ituninya ya Sotwani wo nkwaha mmoca? Utaphulele.

⁹ Ukati wa Nowee, Yehova ahomaliha ulumweeku woohinamaana wotheene wo nkwaha mmoca. Masi ituninya ya Sotwani, uyo khanhala umalamaliha wo nkwaha mmoca. Uhiya commo, uyo nokoopanka citthu piili cuulupale. Yoopacera, uyo nhala umalamaliha iBabilooniya Yuulupale, cikhanle ittiini cowootha cotheene co ntuninyani. Yonayeeli, ukhottoni yo Harmacetom, uyo naahala umalamaliha mphantte nkhwaawe wotuninya ya Sotwani, woohihiya uttuli ikhurupu caanasiyaasa, caanatoropa ni caananakoso. Nttwee noopele mwaha ratta nnya citthu piili cuulupalennya.

10. Toko cinthoonyeraaya Apokalipise 17:1, 6, ni 18:24, nlattuni Yehova unhalaawe umalamaliha iBabilooniya Yuulupale?

¹⁰ “Uhukhumwiya nthiyana ootepa uraruwa.” (Usome Apokalipise 17:1, 6; 18:24.) Nlattu wo iBabilooniya Yuulupale, atthu enci khanhisima ncina na Nluku. Iyo inawiitthuciha citthu cowoothiya ca Yehova. Ikhalaka toko nthiyana ooraruwa, ittiini yowootha inanhiya Nluku ni inawaatanaca niikuvernu caanasiyaasa. Iyo inaawaahuviha ni inawaakha misurukhu caya atthwaaya; ihowiiva atthu enci, mpaka ciicammo atthu yanswalela Nluku. (Apoka. 19:2) Yehova nhala umalamaliha cani iBabilooniya Yuulupale?

11. Isiyani ikhanle “nsene nooseerya,” ni manannani “inyaka khuumi” caya cinhalaaya urukunuwela iBabilooniya Yuulupale?

¹¹ Wiira ammalamalihe “nthiyana ootepa uraruwa,” Yehova nhala uvarela nteko “inyaka khuumi” co “nsene nooseerya.” Nno nsenenno ukhanle mphwinko woothotokanihiya uneehaniya Nações Unidas. Inyaka khuumi cikhanle ikuvernu caanasiyaasa  cinkavihera mphwinko woothotokanihiya wo Nações Unidas. Waphiyaka ukati Nluku uthanlalyaawe, nnyo ikuvernunnyo cinaahala urukunuwela iBabiloniya Yuulupale. Nnyo cinaahala “untankanya ni unhiya pwitipwiti”—cinaahala ucisa mihakhu cawe ni uthoonya citthu coohinamaana cotheene cipankalyaawe. (Apoka. 17:3, 16) Umalamalihiya iBabilooniya Yuulupale unhala ukhala wowaakuvya, phimaana unhalaaya ukhala toko wiirannyaale “nihuku nimoca.” Otheene ale ankavihera ittiini yowootha unaahala waawerya nrima. Kontha, iBabilooniya Yuulupale inawuulumaka yiisipaka: “Kinowonkoma wahiceni khampa apwiyamwene, akinakhala nankhweli ni akinhala ukhweliya.”—Apoka. 18:7, 8.

12. Isiyani Yehova ihinhalaawe waahiya atthu o ntuninyani yapankaka, ni kontha isiyani?

¹² Yehova khanhala waahiya atthu o ntuninyani yaamalamalihaka apoovwaawe. Atthu anonswalela Nluku ahottitthimiha ncina nawe ni ahomwiiwelela ukati waarumalyaawe wiira akhume iBabilooniya Yuulupale. (Mite. 15:16, 17; Apoka. 18:4) Ayo ahovara nteko cinene wiira yaakavihere akhwaaya ukhuma iBabilooniya Yuulupale. Phimaana, ale anonswalela Yehova khunhala waaphwanya ‘uttarusiya’ wo iBabilooniya Yuulupale. Hataa ukhalaka commo, waamini waya unaahala uttehiya.

13. a) Gogue tipani? b) Toko cinthoonyeraaya ilivuru ya Ezekiyeli 38:2, 8, 9, ukatini unhalaaya upacera ikhotto yo Harmacetom?

¹³ Utupheliya apoovu a Nluku ni Gogue. (Usome Ezekiyeli 38:2, 8, 9.) Ittiini cowootha cotheene camalamalihiyaka, inhala uhala ittiini imoca paahi watuninyani. Ittiini ya ale anonswalela Yehova phinhala uhala paahi, khampa mwiri unoopwa veekha caya nipuro nivinre iphyoo yuulupale. Unawoonannya wiira Sotwani nhala ukhala oorusiya cinene. Uyo nhala uthoonyera uviruwa wawe avarelaka nteko mahimyo o malayikha ootakhala—nhina Apokalipise aneehaniya “moolumo ookumiheriya oohiirya.” Nlattu wo mahimyo yaala, unaahala wiikhumeleliha mphwinko awula ikhurupu ya atthu olapo co ntuninyani wiira yaatuphele apoovu a Nluku. (Apoka. 16:13, 14) Uyo mphwinkooyo uneehaniya “Gogue olapo yo uMagogue.” Ukati atthu o ntuninyani unhalaaya waatuphela apoovu a Yehova, phuukati unhalaaya upacera ikhotto yo Harmacetom.—Apoka. 16:16.

14. Isiyani Gogue inhalaawe woonelela?

¹⁴ Gogue nohala ukhuluvela “moono weepinaatamu” urinaawe—awula ikaruma cawe cokhotto. (2 Ikor. 32:8) Hiiva ninhala unkhuluvela Yehova, Nlukweehu. Nlattu hiiva wonkhuluvela Nluku, atthu  o ntuninyani anhala unoona ukhala alolo. Kontha isiyani? Kontha anaahala woona wiira iBabilooniya Yuulupale hataa ikhalaka yokuru cinene, anlukwaaya khakhitinri uwoopola atthwaaya ukati waatupheliyaaya ni “nsene” ni ‘niinyaka khuumi’! (Apoka. 17:16) Phimaana, Gogue nhala wuupuwela wiira khunhala unrikela unimalamaliha hiivano. Uyo naahala waatuphela apoovu a Yehova “toko mahutte anripeliha ilapo.” (Ezek. 38:16) Masi woohipica, Gogue naahala woona wiira hovarihiya wantaphani. Toko caakhanlyaawe Farawoo u Mar Vermelho, Gogue naahala woonelela wiira khweeliini nomwaattakanana Yehova.—Nkw. 14:1-4; Ezek. 38:3, 4, 18, 21-23.

15. Isiyani Yesu inhalaawe upanka ukhottoni yo Harmacetom?

¹⁵ Kristu ni anatoropaawe owiirimu anaahala uwaakiha apoovu a Nluku ni anaahala ummalamaliha Gogue ni anatoropaawe. (Apoka. 19:11, 14, 15) Masi isiyani inhala unkhumelela nwanani muulupale a Yehova, Sotwani, ule nohala waatheperya atthu o watuninyani wiira yaatuphele apoovu a Nluku ukhottoni yo Harmacetom? Yesu naahala unttikhela munliwini nuulupale wamoca ni maciinnyaawe, ni ayo anaahala ukhala mommo myaakha 1.000 anatthukiye.—Apoka. 20:1-3.

16. a) Ntthu nothoonyera cani wiira ‘nancuwela Nluku’? b) Isiyani inhala waakhumelela atthu anoncuwela Nluku ukhottoni yo Harmacetom?

¹⁶ Hataa ukhalaka wiira niitthucale ikhweeli khalayi awula phiyaaru, otheene cihu pooti woopwa. Wiira noopoliye, nihaana nithoonyeraka ukhala atthu ‘anoncuwela Nluku’ ni ‘aneewelela ihapari comaana ca Apwiiyeehu Yesu.’ (2 Atesal. 1:7-9) Hiiva ‘ninoncuwela Nluku’ nacuwelaka citthu cinoncivela, citthu cinonrusa ni nacuwelaka ikettelo cawe. Hiiva ciicammo ninthoonyera wiira ninancuwela Nluku nanfentaka ni namwiiwelelaka, ni ciicammo nanswalela uyo paahi. (1 Joau 2:3-5; 5:3) Napanka commo, ninaahala uphwanya iparakha yookhala atthu ‘ancuweliya ni Nluku,’ awula, ninaahala unciveliha! (1 Akor. 8:3) Ni nancivelihaka Nluku, uyo naahala unoopola ukhottoni yo Harmacetom.

17. ‘Wiiwelela ihapari comaana ca Apwiiyeehu Yesu’ maanaaya isiyani?

¹⁷ “Ihapari comaana ca Apwiiyeehu Yesu” cikhanle ikhweeli cotheene ciitthucihalyaawe Yesu ciri nhina Nuulumo na Nluku. Hiiva nineewelela ihapari comaana neettelaka muukumini wihu nnyo ihaparinnyo.  Toko nahooleliheraka Umwene wa Nluku muukumini wihu, nattharaka ikettelo cosariya ca Nluku ni naalalyeeraka akhwiihu Umwene wa Nluku. (Mat. 6:33; 24:14) Ciicammo nineewelela ihapari comaana naakaviheraka asunnawe Kristu oothanliya, anwacera miteko cinci.—Mat. 25:31-40.

18. Makristau oothanliya anhala waatthuvela cani ale akhanle “ikhontwaa cikiina” nlattu wo unamaana woonihenryaaya?

¹⁸ Woohipica, makristau oothanliya ni Nluku anaahala waatthuvela ale akhanle “ikhontwaa cikiina” nlattu wo unamaana uthoonyeriyaaya ni ayo. (Joau 10:16) Anhala waatthuvela manannani? Ihinaaya upacera ikhotto yo Harmacetom, oothanliya 144.000 anhala uhaleela anaarwaa ukusiya wiirimu ni ankookhala minepa ni khanhala uweherera ukhwa. Vano, oothanliya 144.000 otheene anaahala ummalamaliha Gogue ni anaahala ukhikicera “mphwinko muulupale” wo atthu anonswalela Yehova. (Apoka. 2:26, 27; 7:9, 10) Ale akhanle o mphwinko muulupale khweeliini anaahala usukhuru cinene nlattu wookhalana iparakha yo waakavihera makristau oothanliya ukati waaryaaya watuninyani!

19-20. Hataa nikhalaka ni masankiho, isiyani inhala unikavihera uvilela nna va Harmacetom utepalyaawe ukhala wakhiviru?

¹⁹ Ala mahuku ookhiceraala, hiiva otheene cihu anaanikhumelela masankiho. Unookhalaru commo, hiiva pooti ukhitiri uvilela unitteelaka nrima. (Tiya. 1:2-4) Itthu yuulupale inhala unikavihera uvilela ukhanle uhihiya ulompa. (Luka 21:36) Ciicammo, nihaana nisomaka Ibiiblya khula nihuku ni ukumiha ukati wiira nuupuwele insomeehu, woohihiya uttuli inatiri cinhala wiirannya woohipiha. (Isaa. 77:12) Itthu ikhwaawe, ukhanle wiikurumica wuulalyeerani. Nnya citthu nnya cinaahala ulipihaca waamini wihu ni cinaahala unikavihera ukhuluvela cinene inweherereehu uhoolo!

²⁰ Wuupuwele mananna cinhaleehu hiiva ukhala ootteeliya ukati iBabilooniya Yuulupale unhalaaya uhikhala-tho ni ukati unhalaaya umala ikhotto yo Harmacetom! Ni venci-venci, wuupuwele mananna cinhalaaya ureera ukati atthu otheene unhalaaya uhisima ncina na Nluku ni uhisima ukhulupale urinaawe. (Ezek. 38:23) Khweeliini, ikhotto yo Harmacetom ikhanle ihapari yomaana inwehereraaya ale anoncuwela Nluku, ammwiiwelela Mwanawe ni ale anhala uvilela mpaka wuumaleloni!—Mat. 24:13.