1 Samweli 26:1-25
26 Mu kuya kwa nsita aonsi aaku Zifu yaile kuli Saulo ku Gibeya nu kumunena iyati: “Devedi watafisama umu mwamba wa Hakila uwalozyanya na Yesyimoni.”
2 Fwandi Saulo waile umu kulonda Devedi umu lwanga lwa Zifu, wali na onsi 3,000 aasoolwilwe umu Izlaeli.
3 Saulo waile apangila inkambi pa mwamba wa Hakila uwalozyanya na Yesyimoni umumbali ya museo. Devedi wikalanga umu lwanga nupya wamanyile ukuti Saulo watamukonka umu lwanga.
4 Fwandi Devedi watumile aakuyasininkizya ukuti Saulo wataiza.
5 Pa cisila Devedi waile uku ncende ino Saulo wapangiileko inkambi, nupya Devedi waweni pano Saulo na Abineli mwana Neli umukalamba wa yasilika yakwe Saulo yaizi. Saulo waizi pakasi ka nkambi ala asilika yakwe yonsi iyamuzinguluka.
6 Lyene Devedi uzizye Aimeleki Umwina Hiti na Abisyai mwana Zeluya umwina wakwe Yoabu ati: “A weni aamaya nani umu nkambi kuli Saulo?” Abisyai waswike ati : “Namaya naawe.”
7 Fwandi Devedi na Abisyai yaile uku yasilika yakwe Saulo usiku. Yazanyile Saulo watalala pakasi ka nkambi ala ni sumo lyakwe ilisimpwa pansi umupiipi nu mutwe wakwe, Abineli na asilika yaizi ala iyamuzinguluka.
8 Lyene Abisyai wanenyile Devedi ati: “Ilelo Leza watapeela umulwani wako kuli wewe, fwandi leka mutote ni sumo umuku sile onga lipuzinkanye nu mu musili, ntakumutota nu muku wakwe ciili.”
9 Lelo Devedi wanenyile Abisyai ati: “Utamukoma, pano uzye a weni angazanza umusoololwe wakwe Yeova nu kutwalilila ukuya uwa kaele?”
10 Devedi watwalilile ukulanda ukuti: “Nkulapa umwi zina lyakwe Yeova Leza wa umi nkuti, Yeova umwineco alakoma Saulo, nanti uwanda wakwe ulafika lino alafwa, nanti alaya akafwile umu nkondo.
11 Cisi ningo kuli Yeova kuti nzanze umusoololwe wakwe Yeova. Fwandi tola sile isumo ilili umupiipi nu mutwe wakwe na kasembo ka manzi nupya leka twapita.”
12 Lyene Devedi watozile isumo na kasembo ka manzi ivyali umupiipi nu mutwe wakwe Saulo nupya yapisile. Kusi uwayaweni, nanti ukumanya vino yacisile nanti ukuzyuka pano yonsi yakaswile pa mulandu wakuti Yeova u walenzile ukuti yonsi yakasule sana.
13 Lyene Devedi waile uku mbalama yuze nu kuyaimilila papela ya mwamba apataliko na apayelile Saulo na asilika yakwe.
14 Devedi wapundilile uku yasilika na kuli Abineli mwana Neli ati: “Abineli, uzye usikwasuka?” Abineli nawe waswike ati: “Wewe weni wemuno ukupundilila uku mwene?”
15 Devedi wanenyile Abineli ati: “Uzye asi wewe monsi, nupya a weni uwaya wakwe wewe umu Izlaeli? Nomba u mulandu ci uno utaali wacingilila umusambazi wako? Pano umusilika umwi aali wiza kuti akome umusambazi wako.
16 Vino wacita vitaziifile. Nkulapa umwi zina lyakwe Yeova Leza wa umi nkuti, ulinzile ukufwa pano utacingilile umusambazi wako wino Yeova wasoolola. Lyene lolekesya, uzye isumo lya mwene na kasembo ka manzi ivyali vili umupiipi nu mutwe wa mwene wako vili kwi?”
17 Lyene Saulo wamanyile izwi lyakwe Devedi nupya uzizye ati: “Devedi mwanane uzye izwi lii lino nkuvwa i lyako?” Nawe Devedi waswike ati: “Emukwai, iizwi lyane mwene?”
18 Nupya walanzile nu kuti: “U mulandu ci uno umusambazi wane akunzinganyizizya, i vyani vino nacita nupya i cani cino naluvyanya?
19 Musambazi wane si uvwa kuli vino ne muomvi wako nkulanda, ndi cakuti Yeova u watalenga ukuti unkatukile, si apokelele upe wane uwa vyakulya. Lelo ndi cakuti antu aatiyalenga ukuti unkatukile, si yaye aatiipwe kuli Yeova pano ilelo iyanzinga pa yantu* yakwe Yeova iiyati, ‘Yanga ukaaombela ya leza yauze.’
20 Nupya utaleka imfwile uku mpanga ukutali na kuno tukapepela Yeova. We mwene wa Ina Izlaeli ukundonda wa lupantila kwati u muntu aakulunga inkwale umu mwamba.”
21 Nupya Saulo walanzile ati: “Injembuka. Wela mwanane Devedi, pano ntalakucitila iciipe icili consi, watucindika umi wane nu kuulola ukuti u wa mutengo uwanda wilelo. Incita ivya uwelewele nupya induvyanya sana.”
22 Devedi waswike ati: “Isumo lya mwene aeli, tuma umulumendo umwi aize asende.
23 Yeova aalalambula cila muntu pa ulungami wakwe na pali ucisinka wakwe, pano ilelo Yeova ali wakupeela kuli nene, lelo ntali nkulonda ukuzanza umusoololwe wakwe Yeova.
24 Wakwe vino umi wako wali uli u wa mutengo kuli nene ilelo, si umi wane uye uwa mutengo kuli Yeova nupya ampususye uku ntazi zyonsi.”
25 Saulo wanenyile Devedi ati: “Si upaalwe mwanane Devedi, ulacita ivintu ivikalamba nupya ivintu vilakuzipila.” Lyene Devedi wapisile, Saulo nawe waswilile ukwakwe.
Mafutunoti
^ Mu Ciebele: “Caupyanyi” cingalozya kuli vyoili, uku yantu nu ku mpanga ino yapyanyile.
