1 Samweli 3:1-21
-
Samweli wasoololwa ukuya kasesema (1-21)
3 Pa nsita iiya, umwance Samweli waombelanga Yeova ala akwangalilwa na Eli, nomba umu manda yaya citaseesile ukuvwa izwi lyakwe Yeova; ni vilolwa vitavuzile.
2 Wanda umwi Eli waizi umu muputule wakwe, nupya alanga manso yakwe yatandika ukukwata akafinzi; icakuti atalolanga ningo.
3 Walanga lampi wakwe Leza atatala wazima, nupya Samweli waizi umwi tempele* lyakwe Yeova, umwikalanga Imbokosi yakwe Leza.
4 Lyene Yeova wamile Samweli. Nawe waswike ati: “Mukwai.”
5 Lyene wasimwilile kuli Eli nu kumunena ati: “A nene, inuvwa mwangama.” Nawe wamwaswike ati: “Ntakwamile. Kalaale.” Fwandi waswilile nu kuyalaala.
6 Yeova nupya kwene wamile ati: “Samweli!” Samweli nawe wakatwike nu kuya kuli Eli nu kumunena ati: “A nene, inuvwa mwangama.” Nawe wamwaswike ati: “Ntakwamile mwanane. Swilila kalaale.”
7 (Alanga Samweli atatala wamanya Yeova, nupya alanga atatala uvwapo ni izwi lyakwe Yeova.)
8 Nupya kwene Yeova wamile umuku wakwe citatu ati: “Samweli!” Nawe wakatwike nu kuya kuli Eli nu kumunena ati: “A nene, inuvwa mwangama.”
Lyene Eli wilwike ukuti a Yeova u wamanga Samweli.
9 Fwandi Eli wanenyile Samweli ati: “Swilila kalaale, nupya ndi cakuti wakwama, uwasuke uti, ‘Landa we Yeova pano umuomvi wako akuvwa.’” Nupya Samweli waswilile nu kuyalaala.
10 Lyene Yeova wizile nu kwama wakwe vino wamanga pa miku yuze ati: “Samweli, Samweli!” Nawe Samweli waswike ati: “Landa umuomvi wako akuvwa.”
11 Lyene Yeova wanenyile Samweli ati: “Nkucita cintu cimwi umu Izlaeli icilalenga yonsi aluvwa ukupeziwa mano.
12 Pa wanda uuwa ndafikilizya vyonsi vino nalanzile pali Eli na pa ya mu ng’anda yakwe.
13 Ulinzile ukumunena ukuti nkuleta upinguzi wa pe pa ya mu ng’anda yakwe pa mulandu ni viipe vino wamanya ukuti vikucitika, pano ana yakwe yakasaalula Leza lelo asiyakalipila.
14 Ali mulandu uno nalapiile ku ya mu ng’anda yakwe Eli ukuti uluyembu lwa ya mu ng’anda yakwe lutalatala lufuutwe ukuomvya malambo nanti ivya upe.”
15 Samweli waizi ukufika katondo; lyene wayuzile ivisaasa vya ng’anda yakwe Yeova. Samweli watiinanga ukunena Eli pa cilolwa.
16 Lelo Eli wamile Samweli ati: “Samweli mwanane!” Nawe waswike ati: “Mukwai.”
17 Wamuzizye ati: “I vyani vino Leza watakunena? Utamfisa. Si Leza akufulule nu kucizyapo ndi cakuti wamfisa sile nanti izwi lyonga pa mazwi yano watakunena.”
18 Fwandi Samweli wamunenyile vyonsi atamufisile nanti acimwi. Eli watiile: “A Yeova uwatalanda. Kaacite cino akulola ukuti icisuma.”
19 Samweli wakulanga, Yeova wali nawe nupya atalesile amazwi yonsi yano Samweli walandanga yatafikiliziwa.
20 Aina Izlaeli yonsi kutandikila uku Dani kufika uku Belisyeba izile iyamanya ukuti Samweli watasoololwa ukuya kasesema wakwe Yeova.
21 Nupya Yeova watwalilile ukulolekela umu Syilo, pano Yeova waisokolwile kuli Samweli umu Syilo ukupitila umwi zwi lyakwe Yeova.
Mafutunoti
^ Kuli kuti, cikuulwa ca muzilo.
