1 Samweli 4:1-22
4 Nupya Samweli watwalilile ukunena Aina Izlaeli yonsi amazwi yakwe Leza.
Lyene Aina Izlaeli yaile umu kulwa na Ina Filisti; yapangiile inkambi mupiipi na Ebenezeli, Aina Filisti nayo yapangiile inkambi pa Afeki.
2 Aina Filisti yatandike ukuya uku Ina Izlaeli pakuti yakalwe, nomba ulwi utapitike ningo nupya Aina Izlaeli yayacimvizye uku Ina Filisti, yakomile aonsi mupiipi na 4,000 pano yalwilanga.
3 Lino antu yawezile umu nkambi, akalamba ya mu Izlaeli yatiile: “U mulandu ci uno Yeova wazumilizizya Aina Filisti ukutucimvya ilelo? Lekini tusende imbokosi ya upangano yakwe Yeova ukufuma umu Syilo, pakuti tuye nayo nu kutupususya uku yalwani itu.”
4 Fwandi antu yatumile aonsi ku Syilo, nupya yaile iyasenda imbokosi ya upangano yakwe Yeova Leza wa maumba, uwikala pa cilimba ca wene papela yakwe ya kelubi. Ana yakwe Eli yaili aonsi, kuli kuti Hofini na Finiasi nayo kwene akuno yaali ukwali imbokosi ya upangano yakwe Leza wa cumi.
5 Lino imbokosi ya upangano yakwe Yeova yafisile umu nkambi, Aina Izlaeli yonsi yatandike ukupunda icakuti nu musili iusunkana.
6 Lino Aina Filisti yuvwile icongo ca kupunda, yatandike ukuuzyanya iyati: “U mulandu ci uno mu nkambi ya Aebele muvwikila icongo?” Lyene izile iyamanya kuti iyaleta Imbokosi yakwe Yeova umu nkambi.
7 Aina Filisti yuvwile intete pano yalandanga ukuti: “Leza wataiza umu nkambi!” Fwandi yatiile: “Catwipila, pano ica musango uu citatala cacitikapo!
8 Caipa sana! A weni amatupususya kuli Leza wii uwa maka? Ali Leza uwakomozile Aina Ijipti ukuomvya ivintu vipusanepusane umu lwanga.
9 Sipini wa yonsi, mwe Ina Filisti, pakuti mutakaombela Aebele wakwe vino yakamuombela. Lwini wa yonsi!”
10 Fwandi Aina Filisti yalwile nu kucimvya Aina Izlaeli, nupya Aina Izlaeli yonsi yutukiile uku matenti yao. Aina Filisti yakomile Aina Izlaeli aingi; asilika aapitanga pansi aakomilwe yali 30,000.
11 Nupya yaposile Imbokosi ya Upangano yakwe Leza, na ana yaili yakwe Eli, kuli kuti Hofini na Finiasi yakomilwe.
12 Umonsi umwina Benjamini utwike ukufuma uku ulwi nupya wafisile uku Syilo pa wanda kwene uuwa ala ivyakuzwala vyakwe ivilepuka nupya ala ali nu lukungu ku mutwe.
13 Lino umonsi wafisile, ala Eli wataikala pa cilimba umu mbali ya museo akuloleela, pano wasakamile sana pa Mbokosi ya Upangano yakwe Leza wa cumi. Umonsi wingiile umu musumba nu kuyanena antu ivyacitike, na antu yonsi mu musumba yatandike ukulila.
14 Lino Eli uvwile icongo ca kulila uzizye ati: “Ngi congo cico cino nkuvwa?” Umonsi wiyo wasimwilile kuli Eli nu kumunena ivyacitike.
15 (Pa nsita iiyo Eli wali ni myaka 98 nupya atalolanga.)
16 Lyene umonsi wanenyile Eli ati: “Anene inutuka ukufuma uku nkondo! Nupya inutuka ilelo kwene.” Lyene Eli wamuzizye ati: “I vyani vyativicitika mwanane?”
17 Umonsi nawe waswike ati: “Aina Izlaeli iyutuka Aina Filisti pano iyayacimvya nupya aingi iyakomwa, nupya ana yako yaili Hofini na Finiasi iyafwa, na Ina Filisti iyasenda Imbokosi ya Upangano yakwe Leza wa cumi.”
18 Lino umonsi walumbwile sile Imbokosi ya Upangano yakwe Leza wa cumi, Eli waponiile ukwi tundu ukufuma pa cilimba cino wikazilepo mupiipi ni mpongolo nupya wavunike insingo nu kufwa pano wali umukote nupya umufine. Wapingwile Aina Izlaeli pa myaka 40.
19 Nyinavyala, kuli kuti muka Finiasi wakweti inda nupya wali apiipi nu kukwata umwana. Lino uvwile ukuti iyapoka Imbokosi ya Upangano yakwe Leza wa cumi nupya isivyala na iya iyafwa, uvwile ukali nu kutandika ukupaapa nupya wakweti umwana.
20 Lino wafwanga, anaci aimilile umupiipi nawe yalanzile iyati: “Utatiina pano wakwata umwana umonsi.” Lelo ataswike nupya atisileko mano.
21 Nomba watemiile umwana izina lyakuti Ikabodi,* watiile: “Lulumbi ilufuma umu Izlaeli nu kuya umu uzya,” walozyanga kuli vino Imbokosi ya Upangano yakwe Leza wa cumi yaposilwe na kuli vino vyacitikile isivyala na iya.
22 Watiile: “Lulumbi ilufuma umu Izlaeli nu kuya umu uzya pa mulandu wakuti Imbokosi ya Upangano yakwe Leza wa cumi yatipokwa.”
Mafutunoti
^ Icikapiliula ukuti “Ululumbi luli kwi?”
