1 Samweli 5:1-12
5 Lino Aina Filisti yaposile Imbokosi ya Upangano yakwe Leza wa cumi, yaifumizye uku Ebenezeli nu kuitwala uku Asyidodi.
2 Aina Filisti yasenzile Imbokosi ya Upangano yakwe Leza wa cumi nu kuitwala umu ng’anda* yakwe Dagoni nupya yaisile umupiipi na Dagoni.
3 Lino Aina Asyidodi yazyusile katondo uwanda uwalondelilepo, yazanyile Dagoni watapona pansi ala afupime pa nkoleelo ya Mbokosi ya Upangano yakwe Yeova. Fwandi yatozile Dagoni nu kumuswilizya pano wikalanga.
4 Nupya lino yazyusile katondotondo uwanda uwalondelilepo, yazanyile Dagoni watapona pansi ala afupime pa nkoleelo ya Mbokosi ya Upangano yakwe Yeova. Yazanyile umutwe wakwe Dagoni alino ni vizanza vya makasa yakwe yoili ala iviputulwe nupya vyayelile pa ncende iyayela lwa pa mulyango. Cimwili sile icalolekanga wa luswi i casyazile.
5 Ali mulandu uno ukufika na ndakai, ya simapepo yakwe Dagoni na yonsi aakaingila umu ng’anda yakwe yasilyatila pa ncende iyayela lwa pa mulyango wakwe Dagoni mu Asyidodi.
6 Yeova wafulwile sana Aina Asyidodi nupya wayalwalike ulwale wa kuvimba apakafumila usaali* mu ncende zyao zyonsi.
7 Lino Aina Asyidodi yaweni ivyacitikanga, yalanzile iyati: “Mutaleka Imbokosi ya Upangano yakwe Leza wa Ina Izlaeli itwalilile ukuya kuno, pano watatufulula sana kumwi na leza witu Dagoni.”
8 Lyene yamile nu kukolonganika aene yonsi aa Ina Filisti nu kuyuzya iyati: “I vyani vino tulinzile ukucita uku Mbokosi ya Upangano yakwe Leza wa Ina Izlaeli?” Nayo yatiile: “Lekini tutwale Imbokosi ya Upangano yakwe Leza wa Ina Izlaeli uku Gati.” Fwandi yatwazile Imbokosi ya Upangano yakwe Leza wa Ina Izlaeli uku Gati.
9 Pa cisila ca kuitwala uku Gati, ukali wakwe Yeova pa yantu ya mu musumba, wakuzile sana. Walwalike antu amu mu musumba ulwale wa kuvimba apakafumila usaali, kutandikila uku munono kufika uku mukalamba.
10 Fwandi yatwazile Imbokosi ya Upangano yakwe Leza wa cumi uku Ekiloni, lelo lino Imbokosi ya Upangano yakwe Leza wa cumi yafisile sile uku Ekiloni, Aina Ekiloni yatandike ukupunda iyati: “Iyaleta Imbokosi ya Upangano yakwe Leza wa Ina Izlaeli kuno pakuti yatukome kumwi na antu itu!”
11 Lyene yamile nu kukolonganika aene yonsi aa Ina Filisti nu kuyanena iyati: “Fumyini Imbokosi ya Upangano yakwe Leza wa Ina Izlaeli kuno, lekini iswilile kuno yali pakuti swemo na antu itu tutakomwa.” Pano antu yonsi amu musumba yuvwile intete ukuti yamafwa pa mulandu wakuti Leza wa cumi wayafulwile sana,
12 na antu yano yataafwile, yalwile ulwale wa kuvimba apakafumila usaali. Nupya ukulila kwa yantu ya mu musumba kuvwikike ukwi yulu.
