1 Samweli 7:1-17
7 Aina Kilyati-yealimu izile nu kutwala Imbokosi ya Upangano yakwe Yeova umu ng’anda yakwe Abinadabu pa mwamba, nupya yasangulwile umwanakwe Eleaza kuti aacingilila Imbokosi ya Upangano yakwe Yeova.
2 Papisile insita itali, kuli kuti imyaka 20, kufuma pano Imbokosi ya Upangano iziile uku Kilyati-yealimu nupya amu ng’anda yakwe Izlaeli yonsi yatandike ukulonda Yeova.
3 Lyene Samweli wanenyile amu ng’anda yakwe Izlaeli yonsi ati: “Ndi cakuti mukuwela kuli Yeova ni myenzo inu yonsi, sumbini ya leza amu nko zyuze ni vinkolanya vyakwe Asyitaloti vino mukweti nupya ikini imyenzo inu pali Yeova nu kuombela sile aliwe, nawe alamupususya uku Ina Filisti.”
4 Lino Aina Izlaeli yuvwile vivyo yasumvile ya Baali ni vinkolanya vyakwe Asyitaloti nu kutandika ukuombela sile Yeova.
5 Lyene Samweli walanzile ati: “Kolonganikini Aina Izlaeli yonsi pa Mizipa nupya namamupepelako kuli Yeova.”
6 Fwandi yakolongine pa Mizipa, nupya yatafile manzi nu kuitila pa nkoleelo yakwe Yeova, ikazile ukwaula ukulya pa wanda uuwa. Kuuku kwene akuno yalanzile iyati: “Ituyembukila Yeova.” Nupya Samweli watandike ukuomba umulimo wa ukapingula pa Ina Izlaeli mu Mizipa.
7 Lino Aina Filisti yuvwile ukuti Aina Izlaeli iyakolongana pa Mizipa, aene ya Ina Filisti yaile pakuti yakalwe na Ina Izlaeli. Lino Aina Izlaeli yuvwile vivyo, yatiinyile pa mulandu na Ina Filisti.
8 Fwandi Aina Izlaeli yanenyile Samweli iyati: “Utata ukupepa kuli Yeova Leza witu pakuti atwavwe na pakuti atupususye uku Ina Filisti.”
9 Lyene Samweli watozile akana ka mfwele akacili kakonka nu kukapeela ukuya ilambo lya koca kuli Yeova; nupya Samweli wapepiileko Aina Izlaeli kuli Yeova pakuti ayaazwe, na Yeova wamwaswike.
10 Lino Samweli wapeelanga ilambo lya koca, Aina Filisti yapaliime pakuti yalwisye Aina Izlaeli. Lyene Yeova walenzile ukuti kuye ukupangalakansya ukukalamba pa wanda uuwa uku Ina Filisti nupya wayavulunginye icakuti Aina Izlaeli yacimvizye Aina Filisti.
11 Lyene Aina Izlaeli yafumile uku Mizipa nu kuzinganya Aina Filisti, yatandike ukuyakoma suka ukuyafika nu ku kaeya ka Beti-kali.
12 Lyene Samweli watozile iwe nu kulika pakasi kakwe Mizipa na Yesyana nupya walitemiile ati Ebenezeli,* pano walanzile ati: “Yeova watatwavwa ukufika na ndakai.”
13 Vikwene avino Aina Filisti yacimviwe, yatatazile yawele umu mpanga ya Ina Izlaeli; nupya Yeova atazumilizye Aina Filisti ukuzanza Aina Izlaeli lino Samweli acili nu umi.
14 Nupya Aina Filisti yawezezizye Aina Izlaeli misumba ino yayaposile, kufumilila uku Ekiloni kufika uku Gati, na Ina Izlaeli yaposile impanga yao ukufuma uku Ina Filisti.
Nupya pali mutende pa Ina Izlaeli na Ina Amoli.
15 Samweli watwalilile ukupingula Aina Izlaeli umi wakwe onsi.
16 Cila mwaka wayanga uku Betele, ku Giligali, nu ku Mizipa, nupya wapingulanga Aina Izlaeli umu ncende zii zyonsi.
17 Lelo waswililanga uku Lama pano u kwali ing’anda yakwe, nupya nako kwene wapingulanga Aina Izlaeli. Kuuku kwene akuno wakuulile Yeova ulambo.
Mafutunoti
^ Icikapiliula ukuti “Iwe Lya Wazwilizyo.”
