1 Samweli 8:1-22
8 Lino Samweli wakuzile, wasonsile anakwe ukuya ya kapingula umu Izlaeli.
2 Umwanakwe iyeli wali a Yoweli na wakwe ciili wali a Abiya; yali aakapingula umu Belisyeba.
3 Lelo anakwe yatacitanga wakwe vino wene wacitanga, yapokanga impiya mu ucenjezi, yapokanga mafisakanwa, nupya yatapingulanga nu mulinganya.
4 Mukuya kwa nsita akalamba yonsi mu Izlaeli yakolongine nu kuya uku Lama kuli Samweli.
5 Yamunenyile iyati: “Watukota! Lelo anako yasicita wakwe vino ukacita. Fwandi tusontele umwene wakuti atupingula wakwe vino caya uku nko zyonsi izyasyala.”
6 Nomba Samweli atatemilwe lino yalanzile ukuti: “Tusontele umwene uwakuti atupingula.” Lyene Samweli wapefile kuli Yeova,
7 nupya Yeova wanenyile Samweli ati: “Uvwa kuli vyonsi vino antu yakukunena; pano asi wewe iyakana, lelo nene iyakana ukuti inje umwene wao.
8 Yakucita wakwe viivi kwene vino yacitanga ukufuma pa wanda uno nayafumizye umu Ijipti kufika na ndakai; yakampondokela nu kuombela ya leza yauze, vikwene avino yakucita na kuli wewe.
9 Lelo uuvwe kuli aliyo. Nomba uyacelule pali vino vilayacitikila; uyanene vino umwene aalayateeka alalonda kuli aliyo.”
10 Samweli wanenyile antu alenganga ukuti ayasontele umwene mazwi yonsi yano Yeova walanzile.
11 Walanzile ati: “Vino umwene aalamuteeka alacita kuli mwemwe aevi: Alatola ana inu aonsi nu kuika umu maceleta yakwe nu kuleka ukuti yaye asilika akupitila pa mfwalasi zyakwe nupya yamwi yalasimula ulwa pansi ukukoleelela maceleta yakwe.
12 Nupya alaisontela akwangalila maumba umuli antu masauzandi na akwangalila maumba umuli antu 50, yamwi yalaamulimila, kumuzombwela ivyakulya, nu kumupangila ivyanzo vya nkondo ni vya kuomvya uku maceleta yakwe.
13 Alasenda ana inu akazyana pakuti yapanga mafuta anunkile, ukweleka, nu kupanga imikate.
14 Alatola ivyalo vinu visuma, vyalo vya myangazi, vyalo vya miolivi, nu kuvipeela uku yaomvi yakwe.
15 Alatola icikumi kufuma pa vyalo vinu vya ngano, ni vyalo vinu vya myangazi nupya alapeela ya cilolo yakwe akwi sano na aomvi yakwe.
16 Nupya alatola aomvi inu alumendo na akazyana, ing’ombe zinu izisuma na ya punda inu nu kuviomvya uku milimo yakwe.
17 Alatola ni cikumi kufuma pa mfwele zinu ni mbuzi nupya mulaya aomvi yakwe.
18 Uwanda ulafika lino mulalila pa mulandu nu mwene wino mwaisoolwela, lelo Yeova atalamwasuka.”
19 Lelo antu yakanyile ukuvwa kuli vino Samweli walanzile, yatiile: “Awe, tukulonda umwene uwakuti atuteeka.
20 Lyene tulaya wa nko zyonsi izyasyala, umwene witu alaatupingula, ukututungulula, alino nu kutulwilako ulwi.”
21 Lino Samweli uvwile mazwi yonsi yano antu yalanzile, wanenyile Yeova mazwi yayo.
22 Yeova wanenyile Samweli ati: “Uvwa kuli vino ya kulanda, nupya yasontele umwene uwakuti ayateeka.” Lyene Samweli wanenyile Aina Izlaeli ati: “Cila muntu aswilile uku musumba wa kumwao.”
