2 Milandu 23:1-21
23 Mu mwaka uwalenga 7, Yeoyada wasifile nu kupangana upangano ni ntunguluzi zya pa yantu 100, kuli kuti Azaliya mwana Yeloamu, Isumaeli mwana Yeoanani, Azaliya mwana Obedi, Maaseya mwana Adaya, na Elisyafati mwana Zikilai.
2 Lyene yapisile umu mpanga ya Yuda nu kukolonganika Aina Levi umu misumba yonsi na akalamba ya mitundu ya mu Izlaeli. Lino yafisile uku Yelusalemu,
3 antu yonsi yapangine upangano nu mwene umu ng’anda yakwe Leza wa cumi, pa cisila wayanenyile ati:
“Umwana wa mwene aalaya akateeka, wakwe vino Yeova walavile ukuti i vilacitika kuli ya mwana Devedi.
4 Mucite vii: Mwankanye ya simapepo na Ina Levi aakulaomba pa wanda wi Sabata umu maumba yatatu, iumba lyonga lyakulalinda pa mpongolo;
5 iumba lyakwe ciili lilaaombela ukwi sano, iumba lyakwe citatu nalyo lilaaya pa mpongolo yuze, nupya antu yonsi yalaaya umu misolo ya pa ng’anda yakwe Yeova.
6 Mutalinzile ukuleka ali wensi ukwingila umu ng’anda yakwe Yeova suka sile ya simapepo na Ina Levi aakuombelamo. Yene yalaingilamo pano i umba lya muzilo, lelo antu yonsi yalalondela isunde lyakwe Yeova ilya kukanaingila umukasi.
7 Aina Levi yalinzile ukuzinguluka umwene umu mbali zyonsi ala yalemile ivyanzo. Wensi uwezya ukwingila umu ng’anda alinzile ukukomwa. Mwaya nu mwene konsi kuno akuya.”
8 Aina Levi na antu ya mu Yuda yonsi yacisile viivi kwene vino Yeoyada simapepo walanzile. Cila wino wasenzile aonsi aaombanga pa wanda wi Sabata, pamwi na aataombanga pa wanda wi Sabata, pano Yeoyada simapepo atainwisye umu milimo yao.
9 Lyene Yeoyada wapeezile angalilanga alinzi masumo ni visyangu ivinono ni vikalamba ivyali vya Mwene Devedi, ivyali umu ng’anda yakwe Leza wa cumi.
10 Lyene wisile antu yonsi umu vifulo vyao ala iyalema ivyanzo kufuma ukwi lunji lya ng’anda kufika kuli cimani, nu mupiipi nu ulambo alino nu mupiipi ni ng’anda ukuzinguluka umwene.
11 Lyene yafumizye umwana wa mwene nu kumuzwika icisote ca wene, nupya isile ulupapulo lwa masunde yakwe Leza pa mutwe wakwe nu kumwitulwila mafuta pa mutwe. Lyene yalanzile iyati: “Uwikale manda aingi mwene!”
12 Lino Ataliya uvwile icongo ca yantu asimulanga nu kulumbanya umwene, lilyo kwene waile kuli aliyo uku ng’anda yakwe Yeova.
13 Lyene waweni umwene aimi umupiipi nu lucesi lwakwe pa mulyango. Ya cilolo na ya kalizya ya mapenga yaali nu mwene nupya antu yonsi amu mpanga iiya yasansamukanga nu kulizya mapenga, nupya ya kiimba aali ni vya kulizizyako inyimbo aliyo yatungululanga umu kwimba. Lino Ataliya waweni vivyo, walepwile ivyakuzwala vyakwe nu kupunda ati: “Iyampondokela! Iyampondokela!”
14 Lelo Yeoyada simapepo wamile angalilanga alinzi, kuli kuti akalamba ya yasilika nu kuyanena ati: “Mufumyini pano nupya ndi cakuti ali wensi wezya ukumupokolola mumukome nu lupanga.” Pano walanga simapepo watalanda ati: “Mutamukomela umu ng’anda yakwe Yeova.”
15 Lyene yamulemile nupya lino yafisile pano imfwalasi zingililanga umwi sano, lilyo kwene sile yamukomile.
16 Lyene Yeoyada wapangine upangano na antu yonsi nu mwene, uwakuti yalatwalilila ukuombela Yeova.
17 Pa cisila antu yonsi yaile iyawisya ing’anda yakwe Baali, nupya yatamozile maulambo ni vilubi vyakwe, yakomile na Matani simapepo wakwe Baali pa nkoleelo ya maulambo.
18 Lyene Yeoyada simapepo wasonsile ya simapepo na Ina Levi akuti yaangalila pa ng’anda yakwe Yeova, yano Devedi wisile umu maumba kuti yaangalila apa ng’anda yakwe Yeova ala yakupeela malambo ya koca kuli Yeova ukulingana ni vyali umu Masunde Yakwe Mose, nupya ala yakusansamuka nu kwimba inyimbo ukulingana na vino Devedi walanzile.
19 Wisile na alinzi umupiipi ni mpongolo ya ng’anda yakwe Yeova pakuti kutaya ali wensi umukowele uwa kwingilamo.
20 Lyene wasenzile angalilanga maumba umwali antu 100, antu acindikwe, ntunguluzi zya yantu na antu yonsi amu mpanga iiya, nayo yasukilile umwene ukufuma umu ng’anda yakwe Yeova. Lyene yafumiile pa mpongolo ya papela ukwi sano lya mwene, nupya yaile iyateeka umwene pa cilimba ca wene.
21 Fwandi antu yonsi amu mpanga iiya yaali ni nsansa nupya umu musumba mwali umutende, pano walanga iyakoma Ataliya ukuomvya ulupanga.
