Ibuku Lyakwe Ciili Lyakwe Samweli 12:1-31
12 Yeova watumile Natani kuli Devedi. Nawe waile kuli aliwe nu kuyamunena ati: “Kwali aonsi yaili umu musumba umwi, wenga wali umukankaala nu muze wali umupiina.
2 Umukankala wakweti imfwele izingi sana ni ng’ombe;
3 Lelo umupiina wakweti sile kafwele ka kaci konga kano wakazile. Wakasakamalanga nupya kakulilanga pamwi na anakwe alumendo. Kalyanga utwakulya twakwe nu kumwela muli kapu yakwe nu kulaala pa cisao cakwe. Kali sile kwati umwanakwe umukazyana.
4 Uwanda umwi umukankaala wapokeliile umwenyi, nomba atatozile imfwele yakwe ili yonsi nanti ing’ombe pakuti apekanyizizye umwenyi. Lelo waile atola imfwele ya mupiina nu kupekanyizizya umwenyi wino wapokeliile.”
5 Lino Devedi uvwile vivyo wasokiile sana umukankaala, nupya wanenyile Natani ati: “Nkulapa pali Yeova Leza wa umi ukuti umuntu uwacisile vivyo alinzile ukufwa!
6 Alinzile ukulipila imiku 4 pa mfwele ino watozile, pa mulandu wakuti wacisile icintu cii nupya ataakweti uluse.”
7 Lyene Natani wanenyile Devedi ati: “Wewe uli muntu wiyo! Yeova Leza wa Ina Izlaeli walanda wati: ‘Nene nakusonsile ukuya umwene wa Ina Izlaeli nupya nakupuswisye kuli Saulo.
8 Nakupeezile ing’anda ya musambazi wako na aci yakwe nupya nakupeezile na Ina Izlaeli na Ayuda. Nupya ndi cakuti vintu vivyo i vicepa nali nu kukupeela na vyuze kwene.
9 U mulandu ci uno wasuulile mazwi yakwe Yeova nu kucita iviipe? Wakomile Uliya Umwina Hiti umu nkondo! Lyene pa cisila cakuti waleka Aina Amoni yamukoma, watozile umuci wakwe pakuti aye a mamako.
10 Lyene ulupanga lutalatala lufume pa ya mu ng’anda yako, pano wansuuzile lino watozile umuci wakwe Uliya Umwina Hiti kuti aye a mamako.’
11 Yeova walanda wati: ‘Nimaleta intazi ukufuma umu ya mu ng’anda yako kwene; nupya ndatola ya mama yako nu kuyapeela uku monsi muze ala ukulola nako, nupya alalaala nayo ale na antu yonsi yakulolako.
12 Nanti cakuti wemo wacisile vivyo umu nkama, nemo ndacita vivyo ale na Ina Izlaeli yonsi yakulolako.’”
13 Lyene Devedi wanenyile Natani ati: “Injembukila Yeova.” Natani waswike Devedi ati: “Yeova wakweleela pa luyembu lwako, usikufwa.
14 Nomba pa mulandu wakuti watusaalula Yeova, umwana wino alavyalwa alafwa.”
15 Lyene Natani waswilile ukwakwe.
Nupya Yeova walwalike umwana wino umuci wakwe Uliya waviile kuli Devedi.
16 Devedi wapaapasile Leza wa cumi pa mulandu wa mwana. Nupya Devedi watiile ukulya, walaalanga sile pansi usiku onsi.
17 Fwandi akalamba ya mu ng’anda yakwe yaile pali aliwe nu kwezya ukumukatusya, lelo wakanyile nupya atalyanga pamwi nayo.
18 Pa wanda uwalenga 7, umwana wafwile, lelo aomvi yakwe Devedi yatiinyile ukumunena ukuti umwana watafwa. Yalanzile iyati: “Lino umwana wali nu umi twalandanga nawe, nomba atuvwanga kuli vino twamunenanga. Nga lyene tungamunena uli ukuti umwana watafwa? Limwi angacita icintu iciipisye.”
19 Lino Devedi waweni ukuti aomvi yakwe yakutotozana, wilwike ukuti umwana watafwa, Devedi uzizye ati: “Uzye umwana watafwa?” Nayo yamwaswike iyati: “Ee watafwa.”
20 Lyene Devedi wakatwike pansi. Waile afulala nu kupakala mafuta, azwala ni vyakuzwala vyuze, nupya waile uku ng’anda yakwe Yeova nu kupepa. Pa cisila waswilile ukwakwe nu kulenga ivyakulya nupya waliile.
21 Aomvi yakwe yamuzizye iyati: “U mulandu ci uno wacitila vii? Lino umwana wali umupuma, watiile ukulya nupya walilanga; nomba lino umwana wafwa sile, wakatuka nu kulya.”
22 Nawe waswike ati: “Lino umwana wali umupuma, natiile ukulya nu kutwalilila ukulila pano nelenganyanga inti, ‘Limwi Yeova anganguvwila uluse nu kuleka ukuti umwana atwalilile ukuya nu umi.’
23 Nomba lyene umwana watafwa, u mulandu ci uno namatwalilila ukwikala ukwaula kulya? Uzye ningamutuutulula? Ndafwa wakwe vino watafwa, lelo atanga atuutuluke pa nsita yii.”
24 Lyene Devedi wateekizye mamakwe Batisyeba. Wapanzile nawe icupo. Nupya umu kuya kwa nsita wizile amuvyalila umwana umonsi nu kumutemela izina ati Solomoni.* Yeova wamutemilwe,
25 nupya watumile kasesema Natani ukuyamutemela izina ati Yedidaya,* pa mulandu wakwe Yeova.
26 Yoabu watwalilile ukulwisya Aina Amoni aikalanga umu Laba, nupya waposile umusumba wa wene.
27 Fwandi Yoabu watumile aakuyanena Devedi ukuti: “Indwisya umusumba uwa Laba nupya impoka umusumba wa manzi.
28 Lyene kolonganika asilika yonsi nu kupanga inkambi nu kulwisya umusumba pakuti uupoke. Nga utacisile vivyo, nene namaupoka nupya umaya uwane.”
29 Fwandi Devedi wakolonganike asilika yonsi nu kuya uku musumba wa Laba nu kuyaulwisya nupya yauposile.
30 Lyene Devedi wazuzile Malikamu leza wa Ina Amoni cisote ca wene. Cisote cico cafinyile italanti* lyonga lyakwe goldi, kumwi na mawe yauze aa mutengo. Nupya yazwisile Devedi cisote cico. Waposile ni vintu vingi kufuma umu musumba.
31 Nupya wasenzile antu aikalangamo nu kuleka ukuti yaomba umulimo wa kuputula mawe, kuomba imilimo ya kuomvya iviombelo vya cela ivikalipe ni mpasa alino nu kutama injelwa. Vivyo kwene avino wacisile nu ku misumba yonsi ya Ina Amoni. Lyene pa cisila Devedi waswilile uku Yelusalemu pamwi na asilika yonsi.
Mafutunoti
^ Ukufuma ukwi izwi lya Ciebele ilikapiliula ukuti “Mutende.”
^ Icikapiliula ukuti “Uwatemwikwa kuli Jah.”
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
