Ezaya 22:1-25
22 Yaa ali mazwi aalanzilwe ukulozya uku Mukonko wa Cilolwa:*
U mulandu ci uno antu yako yonsi iyakwelela pa mapaala?
2 Mu musumba wako mulaya sana icimvulunganya,Icongo ni nsansa.
Antu yako aalafwa yatalafwila uku lupanga,Nanti umu nkondo.
3 Antu yako yonsi aakateeka auze mu unkalwe yalutuka.
Yalayatwala uku cifungo ukwaula ukuomvya maulapwa,
Nanti cakuti yalutukila ukutali,Alwani yao yalayalema nu kuyatwala umu cifungo.
4 Ali mulandu uno nkulandila inti: “Tiini ukundolekesya,Lekini ndoosye sana.
Tiini ukunteekezyaPa mulandu nu wononesi uwatiwiza pa mwanaci uwa mu yantu yane.
5 Pano ilelo umu mukonko wa cilolwaMuli cimvulunganya, ukucimviwa nu kusakamikwa,Kufuma uku Mwene wa Papelapela Yeova wa maumba,
Kuli ukoomola ilinga,Kulila kukuvwika kufika nu ku mwamba.
6 Elamu watola icola umuli inceto zyakweNupya wapita na maceleta ya nkondo ni mfwalasi,Kili nawe wapekanya ivisyangu.
7 Mu mikonko yako isumaMulazuula maceleta ya nkondo,Nupya imfwalasi na aonsi aakwezilepo vilimilila pa mpongolo,
8 Nupya icikalenga umusumba wa Yuda ukuya ucingililwe cilafumiziwapo.
Mu wanda uuwa mulataila ivyanzo ivyasungilwa umu Ng’anda ya mu Mutengo,
9 nupya mulalola ivipongo vya kwi linga lya Musumba Wakwe Devedi. Mulatapa manzi mu ca kusungilamo manzi icayela ukwisika.
10 Mulapenda mang’anda ya mu Yelusalemu nupya mulayaongolola pakuti mukomye ilinga.
11 Pakasi ka viumba viili mulapanga ica kusungilamo manzi aali umu ca kusungilamo ica mpiti, lelo mutalataila uwacipanzile, nanti ukwelenganya pali wino walenzile ukuti ciyeko mpiti.
12 Mu wanda uuwa Umwene wa Papelapela Yeova wa maumba,Alalanda ukuti kuye ukuloosya nu kulila,Kupela inyele nu kuzwala ivyakuzwala vya kulangilamo ulanda.
13 Lelo kulaya ukuzevya nu kusansamuka, kukoma ing’ombe ni mfwele,Kulya inyama nu kumwa waini,Mulalanda muti,
‘Lekini tulye nu kumwa pano mutondo tulafwa.’”
14 Yeova wa maumba wali wanena wati: “‘Luyembu luu lutalelelwa kufikila muce mufwe,’ avino Umwene wa Papelapela, Yeova wa maumba walanda.”
15 Umwene Uwa Papelapela, Yeova wa maumba watalanda wati: “Yanga kuli Syebina umuomvi aakaangalila isano ukamunene uti,
16 ‘I vyani vino ukulonda kuno, nupya a weni wino ukulonda kuno pakuti uipangile ilindi kuno?’ Akupangila ilindi pa ncende ya kupepelapo; akuipangila ilindi umu ciliwe.
17 ‘We muntu we! Yeova alakufwanta iciipisye nu kukulema na maka.
18 Alakunyepa nu kukufyenta sana nu kukusumba wakwe bola uku mpanga ya kutali. Nupya maceleta yako aalulumbi yalaya kuuku kwene, yalaya ica muzewanya uku ya mu ng’anda iya musambazi wako.
19 Ndakupoka umulimo nu kukufumya pa cifulo cino wakwata.
20 “‘Mu wanda uuwa ndaama Eliyakimu muomvi wane mwana Hilikiya,
21 nupya ndamuzwika icakuzwala cako nu kumunyepela umusipi wako, ndamupyanika na pa cifulo cako. Alaya wakwe isi uku yantu ya mu Yelusalemu nu ku ya mu ng’anda yakwe Yuda.
22 Nupya ndika maki ya yantu ya mu ng’anda yakwe Devedi pa ciye cakwe. Alayula nupya kusi aalayala; alayala nupya kusi aalayula.
23 Ndamupampamila wa lusunga uku ciumba icikome, nupya alaya wa cilimba ca wene icicindame uku ya mu ng’anda yakwe isi.
24 Nupya yalakoweka ululumbi lonsi ulwa yantu amu ng’anda yakwe isi kuli aliwe, nupya amu lupwa na ana yalataila muli aliwe wa viya vyonsi ivinono, wa viya ivyaya wa mbale izifunkane na wa nsembo zyonsi izikalamba.’”
25 Yeova wa maumba walanda wati: “Mu wanda uuwa, ulusunga ulwapopiilwe umu ciumba icikome lulasomolwa, nupya lulaputulwa nu kupona nupya ivintu vino lwatungililanga vilapona nu kononeka, pano avino Yeova umwineco watalanda.”
Mafutunoti
^ Ufwile ukulozya kuli Yelusalemu.
