Milimo ya Atumwa 24:1-27
24 Lino papisile manda 5 simapepo mukalamba Ananiya wizile pamwi ni ntunguluzi zimwi izya Yayuda alino na Tetulo uwamanyile ukulanda ningo uku yantu aingi,* nupya yanenyile kateeka umulandu uno yapeezile Paulo.
2 Nupya lino yamile Tetulo ukuti alandepo, watandike ukupeela Paulo umulandu pa manso yakwe kateeka Felikisi ati:
“Tukutaizya ukuti tukaikala umu mutende nupya pa mulandu na vino ukateeka ningo, ivintu vikuzipilako sile umu mpanga itu
3 insita zyonsi, na swensi umu ncende zyonsi twamanya vii, Musambazi Felikisi, nupya tukutaizya sana.
4 Lelo nsikulonda ukuti nkusumbile insita, nkulenga ukuti uye ni cikuuku nu kuvwa kuli sweswe panono.
5 Pano ituzana ukuti umuntu wii akuleta ivimvulunganya, akutunka Ayuda yonsi umu nsi yonsi ukukatukila uteeko nupya akutungulula iumba lya ina Nazaleti.
6 Nupya wezizye ukukowezya itempele, i calenzile tumuleme.
7 *——
8 Nga wamuzya wemwineco umazana ivisinka pa milandu yonsi yii ino tukumupeela.”
9 Lino Ayuda yuvwile vivyo, nayo kwene yatandike ukumupeela imilandu ala yakuti vyonsi ivyalanzilwe pali aliwe i vya cumi.
10 Lino kateeka wasinizye Paulo ukuti avwange, Paulo walanzile ati:
“Namanya ukuti waomba ukapingula umu mpanga yii pa myaka iingi, nupya ali mulandu uno nkulonda injivwangile pa manso yako.
11 Ndi cakuti walondelezya wemwineco, ungazana ukuti patapisile na manda 12 pano nailile umu Yelusalemu uku kupepa;
12 nupya yatanzanyile nkupaazyanya na ali wensi umwi tempele nanti ukutunka antu ukucita ivimvulunganya umu masunagogi nanti umu musumba.
13 Nupya yatanga yakupeele ivisinka pa milandu yonsi ino yakumpeela paa.
14 Lelo nkuzumila cii pa manso yako, ukuti ukulingana na vino iyalanda ukuti nakwata iumba, ikwene ali nzila ino nkapepelamo Leza wa vikolwe vyane, pano nataila umu vintu vyonsi ivyalembwa umu Masunde nu mu mabuku yakwe ya Kasesema.
15 Nupya nataila Leza, wakwe vino na antu kwene yaa yataila, ukuti kulaya ukutuutuluka kwa yantu alungame na asi alungame.
16 Ukwene uli mulandu uno lyonsi nkaombesya ukuti ntwalilile ukuya na kampingu musanguluke kuli Leza nu ku yantu.
17 Lyene pa cisila ca myaka iingi, natwazile upe uku yantu ya mu luko lwane uku Yelusalemu nu kupeela malambo kuli Leza.
18 Lino naombanga imilimo iiyo, yanzanyile umwi tempele ala nene musanguluke ukulingana nu lutambi, lelo ntali ni umba nupya ntacitanga icimvulunganya. Nomba kwali Ayuda yamwi aaku citungu ca Asia
19 ali yalinzile ukuya pano ndi cakuti kuli umulandu uno yakulonda ukumpeela.
20 Nanti leka antu yaa yailandile aineco umulandu uno yanzanyile nao lino nali umu cilye ca Sanihedilini,
21 kufumyako sile mazwi yano nalanzile aakuti: ‘Umulandu wa kutuutululwa kwa yafwe auno nkupingwilwapo ilelo pa manso inu!’”
22 Lyene vino Felikisi wamanyile ivisinka pa yantu aalondelanga Inzila ya Mwene, wimike umulandu nu kulanda ati: “Lino Lisyasi umukalamba wa yasilika aliza, alino ndapingula umulandu winu.”
23 Nupya wanenyile musika wa yasilika ukuti ayalile Paulo umu cifungo lelo amupeeleko untungwa, nu kuzumilizya ukuti antu yakwe yaiza umu kumulola nu kumusakamala muli vino akulondekwa.
24 Lino papisile manda yamwi, Felikisi wizile na Dulusila mamakwe uwali u Muyuda, lyene wamile Paulo nu kuvwa kuli vino walanzile pali vino cikapiliula ukutaila Klistu Yesu.
25 Lelo lino Paulo walanzile pa ulungami na pa kuikaanya alino na pa upinguzi uwali nu kwiza, Felikisi uvwile intete nu kulanda ati: “Tale pitanga, lelo lino ndakwata insita ndakwama nupya.”
26 Pa nsita ili imwi kwene wenekelanga ukuti Paulo amamupeelako impiya. Ali mulandu uno wamwamilanga liili liili nu kulanda nawe.
27 Lino papisile imyaka iili, Polokiya Fesitasi wapyanyile Felikisi pa wene; nupya vino Felikisi walondesyanga kuti Ayuda yamutemwe, wasiile Paulo umu cifungo.
