Yakapingula 13:1-25
13 Nupya kwene Aina Izlaeli yasosizye Yeova, fwandi Yeova wayapeezile umu minwe ya Ina Filisti pa myaka 40.
2 Lyene kwali umonsi umwi uwa ku Zola uwa mu lupwa lwa mutundu wakwe Dani, izina lyakwe wali a Manoa. Umuci wakwe atakwatanga ana.
3 Mu kuya kwa nsita malaika wakwe Yeova walolekiile uku muci wakwe nu kumunena ati: “Lola, usikwata ana. Lelo ulakwata inda nupya ulavyala umwana umonsi.
4 Ulinzile ukusininkizya ukuti utakumwa waini nanti icili consi icikakola, nupya utalinzile ukulya icili consi cikowele.
5 Lola! Ulakwata inda nu kuvyala umwana umonsi, nupya atalinzile ukupelwa inyele zyakwe, pano umwana wiyo alaya Umunazili wakwe Leza ukufuma pa kuvyalwa nupya alatandika ukupususya Aina Izlaeli uku Ina Filisti.”
6 Lyene umwanaci waile kuli iya nu kuyamunena ati: “Umuntu wakwe Leza wa cumi ali wiza kuli nene nupya wali akuloleka kwati a malaika wakwe Leza wa cumi, wali akuloleka umucindame. Ntali namuzya kuno ali wafuma, nupya ataali wanena izina lyakwe.
7 Ali wanena wati, ‘Lola! Ulakwata inda nu kuvyala umwana umonsi. Utalinzile ukumwa waini nanti icili consi icikakola, nupya utalinzile ukulya icili consi cikowele, pano umwana alaya Umunazili wakwe Leza kufuma pa kuvyalwa kufika pa wanda uno alafwa.’”
8 Manoa wapaapasile kuli Yeova ati: “Napaapata, we Yeova. Si leka umuntu wakwe Leza wa cumi wino wali watuma awele nupya pakuti aize atunene vino tulinzile ukucita uku mwana wino alavyalwa.”
9 Fwandi Leza wa cumi uvwile kuli Manoa, nupya malaika wakwe Leza wa cumi waile uku muci wakwe Manoa nupya kwene ala atenzi umu mpanga; Manoa ataali nawe.
10 Lyene zuwa zuwa umwanaci wasimwilile kuli iya nu kuyamunena ati: “Lolini! Umuntu uwizile kuli nene mutondo watalolekela kuli nene nupya kwene.”
11 Lyene Manoa wakatwike nu kupita nu muci wakwe. Waile uku monsi nu kuyamuzya ati: “Uzye ale wewe walanzile na mamane?” Nawe watiile: “Ee anene.”
12 Lyene Manoa walanzile ati: “Si vino walanzile vice vicitike! Uzye umi wa mwana ulaya uli, nupya u mulimo ci uno alaomba?”
13 Nupya malaika wakwe Yeova wanenyile Manoa ati: “Umuci wako alinzile ukutaluka kuli vyonsi vino namunenyile.
14 Atalinzile ukulya icili consi icikafuma uku myangazi, atalinzile ukumwa waini nanti icili consi icikakola, nupya atalinzile ukulya icili consi cikowele. Alinzile ukulondela vyonsi vino namunenyile.”
15 Lyene Manoa wanenyile malaika wakwe Yeova ati: “Napaapata ikala, leka tukupekanyizizye kambuzi.”
16 Lelo malaika wakwe Yeova wanenyile Manoa ati: “Ndi cakuti nikala, ntakulya ivyakulya vyako; lelo ndi cakuti ukulonda ukupeela uwila wa koca kuli Yeova, ungapeela.” Manoa ataamanyile ukuti walandanga na malaika wakwe Yeova.
17 Lyene Manoa uzizye malaika wakwe Yeova ati: “Wewe weni izina, pakuti tuce tukucindike lino vino watulanda vilacitika?”
18 Lelo malaika wakwe Yeova wamunenyile ati: “Utanguzya izina, pano ilya kuzungusya.”
19 Lyene Manoa watozile kambuzi nu upe wa vyakulya nu kuvipeela kuli Yeova pa ciliwe. Nupya Leza wacisile icizungusyo ala Manoa nu muci yakulolako.
20 Lino umoto wafumanga pa ulambo nu kuya umupela, malaika wakwe Yeova wapisile umu cimbilimbili ca moto icafumanga pa ulambo ala Manoa nu muci yakulolako. Lyene lilyo kwene sile yafupime pansi.
21 Malaika wakwe Yeova ataalolikepo nupya kuli Manoa nu ku muci wakwe. Lyene Manoa wilwike ukuti wali a malaika wakwe Yeova.
22 Nupya wanenyile umuci wakwe ati: “I cumi tumafwa, pano itulola Leza.”
23 Lelo umuci wakwe wamunenyile ati: “Ndi cakuti Yeova akulonda ukutukoma, nga atapokelile upe wa koca nu upe wa vyakulya vino itumupeela, nga atatulanzile ivintu vii vyonsi nupya nga atatunenyile ivili vyonsi pa vintu vii.”
24 Pa cisila umwanaci wizile avyala umwana umonsi amutemela ni zina ilyakuti Samusoni; nupya lino umwana wakulanga, Yeova watwalilile ukumupaala.
25 Mu kuya kwa nsita umupasi wakwe Yeova watandike ukumutungulula, ku Mahane-dani pakasi ka musumba wa Zola na Esyitaoli.
