Yelemiya 23:1-40
23 Yeova walanda wati: “Kalanda kuli ya kacema akonona nu kusalanganya imfwele zyane.”
2 Fwandi Yeova Leza wakwe Izlaeli walanda pali ya kacema aakacema imfwele zyakwe wati: “Mukasalanganya imfwele zyane; nupya musizikako mano.”
“Nani ndamufulula pa viipe vino mukacita,” avino Yeova walanda.
3 “Lyene ndakolonganika imfwele zyane izyasyalapo umu mpanga zyonsi zino nazisalanganyizizyamo nu kuziwezya uku mulemvwe, nupya zilasandana nu kuvula.
4 Ndasoolola ya kacema aalazicema ningo. Zitalaauvwa intete nanti ukuzakaza nupya kusi iilaponga,” avino Yeova walanda.
5 Yeova walanda wati: “Manda yakwiza lino ndasoolola umulungami uwa mu lupwa lwakwe Devedi. Alaateeka nupya alaailuka, alaleta umulinganya nu ulungami umu mpanga.
6 Mu manda yakwe, Yuda alapusuka na Izlaeli alikala umutende. Nupya alaamwa izina ilyakuti: Yeova Ali Ulungami Witu.”
7 Yeova walanda wati, “Lelo amanda yakwiza lino yatalaalanda yati, ‘Nkulapa umwi zina lyakwe Yeova Leza wa umi, uwafumizye Aina Izlaeli umu mpanga iya Ijipti!’
8 lelo yalaalanda yakuti, ‘Nkulapa umwi zina lyakwe Yeova Leza wa umi uwafumizye Aina Izlaeli uku mpanga ya ku katutu nu ku mpanga zyonsi zino wayasalanganyizizyeko nu kuyawezya,’ nupya yalikala umu mpanga yao kwene.”
9 Pa mulandu na ya kasesema:
Inuvwa sana uyi.
Mafupa yane yonsi yakuzakaza.
Nupya pa mulandu na YeovaNa mazwi yakwe aamuziloIndi wa muntu uwatakoleka, uwatamwa sana waini.
10 Impanga yatizuulamo acende;Nupya ikuloosya pa mulandu ni citiipuMulemvwe wa mu lwanga iuma.
Yakacita iviipe nupya yasiomvya ningo amaka yao.
11 Yeova walanda wati: “Ya kasesema na ya simapepo yakowela.*
Nanti sile umu ng’anda yane kwene inzanamo iviipe vino yakacita.
12 Yeova walanda wati: “Inzila zyao zilatelepa nupya mulaya imfinzi;Umwi alayasunka nupya yalapona.
Pano ndaleta intazi pali aliyoMu mwaka uno ndaleta upinguzi.”
13 Muli ya kasesema ya mu Samaliya indolamo ica winyi.
Yakasesemela umwi zina lyakwe Baali,Nu kuponzya antu yane Aina Izlaeli.
14 Nupya muli ya kasesema ya mu Yelusalemu indolamo ivintu viipe sana.
Yakacita ucende nu kulanda ivya ufi;Yakakomelezya ya kacita ya viipe,Nupya yonsi kwene yasita ukucita iviipe.
Yaya wakwe Sodoma,Nupya aakaikala umu musumba yaya wakwe Gomola.”
15 Yeova wa maumba walanda pali ya kasesema wati:
“Ndayalenga ukulya iviluleNu kumwa manzi yakwe poizoni.
Pano ya kasesema ya mu Yelusalemu iyalenga usangu ukusalangana umu mpanga yonsi.”
16 Yeova wa maumba walanda ukuti:
“Mutauvwa kuli vino ya kasesema yakusesema kuli mwemwe.
Yakumuponzya.
Ivilolwa vino yakalanda ivya mu myenzo yao sile,Visifuma kuli Yeova.
17 Cila nsita yakanena antu aansuula iyati,‘Yeova walanda wati: “Mulaipakizya umutende.”’
Na antu aakacita sile vino yakulonda aakoma imyenzo, yakayanena iyati,‘Intazi zitalamuponela.’
18 Pano a weni uwaya pamwi na ya cuza yakwe YeovaPakuti alole nu kuvwa mazwi yakwe?
A weni uwisile mano uku mazwi yakwe pakuti ayuvwe?
19 Ukali wakwe Yeova uliza wa cimuza;Uliza wa cimuza iciipisye pali ya kacita ya viipe.
20 Ukali wakwe Yeova utalasila,Kufikila waca wacita vino akulonda.
Muluvwikisya ningo ivintu vii mu manda ya kusyalikizya.
21 Ntayaatumile, lelo yapisile zuwa zuwa.
Ntalaanzile kuli aliyo, lelo yasesime.
22 Lelo ndi cakuti iyaya pamwi na ya cuza yane,Nga yalenzile antu ukuvwa mazwi yaneNupya nga yayavwile ukusenuka nu kuta ukucita iviipe.”
23 Yeova walanda wati: “Uzye nene Leza lino indi sile umupiipi, kutali kwene foo?”
24 Yeova walanda nu kuti: “Uzye kwaya kuno umuntu angafisama kuno ntanga mulole?”
Nupya Yeova walanda wati: “Uzye nsilola ivintu vyonsi ivyaya umwi yulu ni vya mu nsi?
25 “Nuvwa ya kasesema aakasesemela ivya ufi umwi zina lyane ala yakuti, ‘Indota ciloto! Indota ciloto!’
26 Uzye ya kasesema yaa yalatwalilila ukusesema ivya ufi ukufika lilaci? Aa kasesema aakasesema ivya ucenjezi ivyaya umu myenzo yao.
27 Yakalonda ukuti antu yane iilile izina lyane ukupitila umu viloto vino yakasimikila yauze, wakwe vino ivikolwe vyao viliile izina lyane pa mulandu na Baali.
28 Lekini kasesema uwatalota iciloto alande vino watalota, lelo aali na mazwi yane alinzile ukuyalanda umu cumi.
“Uzye isote lyakolana ni ngaano?” avino Yeova walanda.
29 “Uzye amazwi yane yataya wa moto na wa nondo iikavungola iwe?” avino Yeova walanda.
30 Nupya Yeova walanda wati: “Nimalwisya ya kasesema aakanyonganya mazwi yane pakuti yanene antu vino aineco yakulonda.”
31 Yeova walanda wati: “Nimalwisya ya kasesema aakalanda iyati, ‘Leza walanda wati!’”
32 Yeova walanda nu kuti: “Nimalwisya ya kasesema aakalota iviloto vya ufi pakuti yaponzye antu yane pa mulandu nu ufi wao ni cilumba cao.”
“Lelo ntaayatumile nanti ukuyanena ivintu vii. Fwandi yatalaazwa antu nanti apanono,” avino Yeova walanda.
33 “Nupya ndi cakuti antu yaa, kasesema nanti simapepo yakunena yati, ‘Mazwi yaa yali wa cisendo* cakwe Yeova,’ ulinzile ukuyanena uti, ‘“Mwemwe kwene muli cisendo! Nupya ndamukana,” avino Yeova walanda.’
34 Lelo ukulozya kuli kasesema nanti simapepo nanti antu aakalanda iyati, ‘Mazwi yano Yeova akutunena yali wa cisendo!’* ndafulula umuntu wiyo pamwi na amu ng’anda yakwe.
35 Cila muntu muli mwemwe akuzya umuze nu mwinakwe ati, ‘I vyani vino Yeova wataasuka? Nupya i vyani vino Yeova watalanda?’
36 Lelo mutalinzile ukulalanda pa cisendo cakwe Yeova, pano mazwi yano cila muntu akalanda aali cisendo, nupya imusenula mazwi yakwe Leza wa umi, Yeova wa maumba, nupya Leza witu.
37 “Uce uuzye kasesema uti, ‘Uzye Yeova watakwasuka uli? I vyani vino Yeova watalanda?
38 Nupya nga mwatwalilila ukulanda ukuti, “Mazwi yakwe Yeova yali wa cisendo!” Yeova walanda wati: “Pa mulandu wakuti mwatwalilila ukulanda ukuti, ‘Mazwi yakwe Yeova yaya wa cisendo,’ lino namunena ukuti, ‘Mutalanda imuti: “Mazwi yakwe Yeova yaya wa cisendo.”’
39 Ndamunyemula nu kumuvwinta, kuli kuti mwemwe kwene pamwi nu musumba uno namupeela kumwi ni vikolwe vinu.
40 Nupya ndamulenga ukuzewana nu kuya ni nsonyi zya manda pe izitalatala zililike.”’”
Mafutunoti
^ Nanti “aasangu.”
^ Mu Ciebele izwi lii lyakwata maupiliulo yaili, kuli kuti “upinguzi uwa maka wakwe Leza” nanti “cintu cimwi cifine.”
^ Nanti “aatale ukulondela.”
