Yelemiya 26:1-24
26 Ku kutandika kwa kuteeka kwakwe Yeoyakimu mwana Yosiya umwene wa ku Yuda napokelile mazwi ukufuma kuli Yeova.
2 “Yeova wanenyile ati, ‘Imilila umu musolo wa pa ng’anda yakwe Yeova nu kulanda uku yantu yonsi amu misumba ya mu Yuda aakaiza umu kupepela* pa ng’anda yakwe Yeova. Uyanene vyonsi vino namakunena; utasya vili vyonsi.
3 Limwi yaluvwa nu kuta ukucita viipe vino yakacita, nupya ntalaleta ukali uno nkulonda ukuleta pali aliyo pa mulandu ni viipe vyao.
4 Uyanene uti: “Yeova walanda wati, ‘Ndi cakuti mutuvwile kuli nene ukupitila umu kulondela masunde yano namupeela,
5 nu kuvwa uku mazwi ya yaomvi yane ya kasesema, yano nkatuma kuli mwemwe cila nsita, lelo musiuvwila,
6 ndalenga ing’anda yii ukuya wakwe Syilo, nupya antu yonsi amu nsi yalaalanda pa musumba uu lino yakulanda pa vitiipu.’”’”
7 Ya simapepo, ya kasesema na antu yonsi yuvwanga lino Yelemiya walandanga mazwi yaa umu ng’anda yakwe Yeova.
8 Lyene lino Yelemiya wamazile ukulanda mazwi yonsi yano Yeova wamunenyile ukunena antu yonsi, ya simapepo, ya kasesema na antu yonsi yamulemile nu kumunena iyati: “Ukufwa.
9 U mulandu ci uno watusesemela umwi zina lyakwe Yeova uti, ‘Ing’anda yii ilaya wakwe Syilo, nu musumba uu ulononwa nu kusyala umwaula antu’”? Nupya antu yonsi yakolongine nu kuzinguluka Yelemiya umu ng’anda yakwe Yeova.
10 Lino ya cilolo ya mu Yuda yuvwile mazwi yaa, yafumile ukwi sano lya mwene nu kuya uku ng’anda yakwe Yeova nupya ikazile pa mpongolo ipya iya pa ng’anda yakwe Yeova.
11 Ya simapepo na ya kasesema yanenyile ya cilolo na antu yonsi iyati: “Umuntu wii alinzile ukufwa, pano watasesema uku musumba uu ivintu vino imuyuvwila mweineco.”
12 Lyene Yelemiya wanenyile ya cilolo yonsi na antu yonsi ati: “Yeova uwantuma ukusesema pa ng’anda yii na pa musumba uu vyonsi vino imuvwa nalanda.
13 Fwandi senukini nu kuta ukucita vino mukacita nupya mwauvwila mazwi yakwe Yeova Leza winu, nupya Yeova atalaleta ukali uno watalanda ukuti akulonda ukuleta pali mwemwe.
14 Lelo nemo indi umu makasa inu, muncite consi cino mukulola ukuti cili ningo nupya ali cisuma.
15 Lelo mumanye ukuti nga mwankoma, uwazi uwa kaele umaya pali mwemwe na pa musumba uu alino na pa yantu aakaikalamo, pano umu cumi Yeova uwantumile ukuti nize ndande mazwi yaa yonsi kuli mwemwe.”
16 Lyene ya cilolo na antu yonsi yanenyile ya simapepo na ya kasesema iyati: “Umuntu wii atalinzile ukukomwa, pano watalanda kuli sweswe umwi zina lyakwe Yeova Leza witu.”
17 Nupya akalamba yamwi amu mpanga yakatwike nu kulanda uku yantu yonsi iyati:
18 “Mu manda ya Mwene Hezekiya umwene uwa mu Yuda, Mika uwa ku Molesyeti wasesemanga, nupya wanenyile antu yonsi amu Yuda ati, ‘Yeova wa maumba walanda wati:
“Zioni alalimwa wa calo,Na Yelusalemu alononwa,Nupya umwamba apaya itempele ulaya wa ncende zya kupepelapo izya mu mpanga.
19 “Uzye Umwene Hezekiya na antu yonsi amu Yuda yamukomile? Uzye umwene ataatiinyile Yeova nu kupaapata ukuti Yeova amuvwile uluse icakuti na Yeova ataalesile ukali uno walanzile ukuti alaleta pali aliyo? Fwandi tumailetelela.
20 “Nupya kwali umonsi na muze uwasesemelanga umwi zina lyakwe Yeova, kuli kuti Uliya mwana Syemaya uwa ku Kilyati-yelimu, wasesime pa musumba uu na pa mpanga yii ala akulanda wakwe vino Yelemiya watalanda.
21 Umwene Yeoyakimu na aonsi yakwe yonsi aamaka na ya cilolo yonsi yuvwile vino walanzile, nupya umwene walondanga ukumukoma. Lino Uliya uvwile vivyo, lilyo kwene sile uvwile intete nu kuutukila uku Ijipti.
22 Lyene Umwene Yeoyakimu watumile Elinatani mwana Akiboli na aonsi yauze uku Ijipti.
23 Yaile iyasenda Uliya ukufuma uku Ijipti iyamutwala uku Mwene Yeoyakimu, nawe wamukomile nu lupanga nu kusumbila icitumbi cakwe uku malindi kuno yaziikanga antu yonsi.”
24 Lelo Ahikamu mwana Syafani watungilile Yelemiya icakuti atapeezilwe uku yantu kuti yamukome.
Mafutunoti
^ Nanti “umu kufukama.”
