Yobo 3:1-26
3 Lyene Yobo watandike ukulanda nu kutiipa uwanda uno wavyalilwepo.
2 Walanzile ati:
3 “Si ulowe uwanda uno navyalilwepo,Nu usiku uno umuntu umwi walanzile ati: ‘Umwana umonsi watavyalwa!’
4 Uwanda uuwo uye imfinzi.
Leza wa mwi yulu atasakamala pa wanda uuwo;Nu luswepo lutaloleka pa wanda uuwo.
5 Si mfinzi ikalamba iye pa wanda uuwo.
Na makumbi ya mvula yavimbilikizye uwanda uuwo.
Nupya imfinzi ya kutiinya ipoke uluswepo lwa wanda uuwo.
6 Usiku uuwo uye imfinzi ikalamba;Utasansamukila pamwi na manda yauze amu mwaka;Nupya utapendelwa pamwi na manda yauze aa myezi.
7 Lekini usiku uuwo uye ing’umba;Mutaca muvwike uwa kusansamuka mu usiku uuwo.
8 Lekini aakatiipa uwanda atiipe uwanda uuwo,Kuli kuti yaayo aangazyula ingwena.*
9 Si ntanda zya katondo ka wanda uuwo zite ukuloleka;Usiku ulolele umusanya lelo ukwaula ukuti musanya uloleke,Nupya usiku utalola uluswepo lwa ku macaca.
10 Pano uwanda uuwo utalenzile ukuti ntavyalwa;Nupya utaafisile intazi pakuti ntazilola.
11 U mulandu ci uno ntafwilile pa kuvyalwa?
U mulandu ci uno ntafwile lino nafumile sile umunda yakwe mayo?
12 U mulandu ci uno mayo wampokelile pa makokola yakweNu kungonsya?
13 Pano ndi cakuti nafwile pa nsita iiya nga nalaala ukwaula ukupumvyanyiziwa;Nga nakasula nupya nga nkupuuza
14 Pamwi na ene ya mu nsi na ya mpandamano yao,Aaikuulile umu ncende zino ndakai zyononeka,*
15 Nanti pamwi na ya cilolo aakweti goldi,Yano yazuzizye siuva umu mang’anda yao.
16 Nanti u mulandu ci uno ntafwilile lino ncili umunda yakwe mayo,Wa yana aatalolapo uluswepo?
17 Pano umu malindi nanti sile aipe yakata ukucula;Nupya amuno atonte yakapuuzila.
18 Amuno aafungwa yakaikala pamwi umu mutende;Nupya yasiuvwa izwi lyakwe wino akuyapatikizya ukuomba.
19 Nupya umu malindi, aasulwe na aacindame yakaya icili cimwi,Nu muzya aakaya umuntungwa uku musambazi wakwe.
20 U mulandu ci uno Leza akapeelela uluswepo kuli wino akuculaNu umi kuli wino ali sana nu ulanda?
21 U mulandu ci uno yakalondela imfwa, lelo isiiza?
Yakailondesya ukucila na vino yangalonda ivyuma ivyafiswa,
22 Antu yayo yakasansamuka sana,Nupya yakaya ni nsansa nga yazana ilindi.
23 U mulandu ci uno Leza akapeelela uluswepo uku muntu uwataponga,Wino wayalila?
24 Ukwisya umwenzo kwaya kwati ali cakulya cane,Nupya ukuteta kukauvwika kwati u kupongoloka kwa manzi.
25 Cintu icikanguvwisya intete i caticiza pali nene,Nupya cino nkatiina i caticimponela.
26 Ntakwata umutende, nsiikala uku matwi cele, nupya nsipuuza,Lelo intazi zikatwalilila ukwiza pali nene.”
Mafutunoti
^ Mu Ciebele: “Leviatani,” cinyama icikalamba ica mu manzi icakwatisya maka.
^ Nanti limwi, “aakuuzile umu ncende izyasyala matongwa.”
