Likwene sile Yeova wasya ate ukutekelela insi. Alonona imipepele iya ufi, inko zilazanza antu yakwe Leza, nupya Yeova ali nu konona yakacita ya viipe pa nkondo ya Amagedoni. Aina Klistu yakalondesya ukwizalola kuno ivintu vii ivicindame vikucitika.

Lelo kwene, tutaamanya vyonsi pali vino ucuzi ukalamba ulaya. Wakwe, tutaamanya lino ucuzi ukalamba ulatandika. Tutaamanya imilandu ilalenga ukuti amu uteeko yazanze imipepele ya ufi. Tutaamanya insita ilapitapo ala inko zikuzanza antu yakwe Leza alino na vyuze ivilaacitika. Nupya tutaamanya vino Yeova alaomvya pa konona antu aipe apa Amagedoni.

Nomba, muli Baibo mwaya ivyeo ivikatwazwa ukukwata utailo nu kuya asipe pa vintu vii ivilaacitika uku nkoleelo. Wakwe, twamanya ukuti tuli ukumpela iya “manda akusyalikizya.” (2 Tim. 3:1) Twamanya ukuti manda aakuzanza imipepele “yalacefiwa” pakuti ukupepa ukwa cumi kutakononelwe kumwi. (Mate. 24:22) Twamanya nu ukuti Yeova alapususya antu yakwe. (2 Pet. 2:9) Nupya twamanya ukuti Wino Yeova alaomvya pa konona antu aipe nu kupususya iumba ilikalamba, u mulungami nupya uwa maka.—Kuso. 19:11, 15, 16.

Ivintu ivilacitika uku nkoleelo vilalenga ukuti antu yafwe “icipafi pa mulandu ni ntete.” Lelo ukubelenga nu kwelenganya pali vino Yeova wapuswisye antu uku cisila na vino watusokolwela ivili nu kucitika uku nkoleelo, vingatwazwa ukuti ‘tukimilile nu kwinula imitwe’ itu pano tulataila ukuti ukupusuka kwitu iikupalama.—Luka 21:26, 28.