Ya Dauda aku Sierra Leone yasimike iyati: “Nakuliile umu muzi unono umu citungu icaela ku Kaeya mu mpanga ya Sierra Leone. Uwanda umwi, ala ncili umwance, amu lupwa lumwi yalemaniile nu lupwa lwitu. Indupwa zyonsi zyoili zyalwilanga umusonso. Lyene pa kuputula umulandu, twamile sing’anga. Sing’anga wiyo wapeezile umonsi umwi igalasi, alino amuviimba insalu itiswe. Papisile sile akasita akanoono nu monsi wiyo atandika ukuzakaza nu kukailwa. Lino waweni umwigalasi, wapunzile ati: ‘Nkulola umukombe umwi akwiza! Azwite ivyakuzwala ivitiswe. U mukote nupya u mutali, ni imvwi, na pakupita akukoongoza.’

“Umukote wino walandangapo wali a kuuku! Lyene, umonsi wiyo uvwile intete nu kupunda ati: ‘Ndi musikulonda ukuzumila vino nkulanda, izini muilolele mweineco!’ Nomba, swensi kwene tutaiileko pano tuvwile intete! Sing’anga wamuteekizye lino wamusansile umulembo wa mafwa yano waombekiile umu nkolo.

“Lyene ‘Kuuku’ walanzile ukupitila umu mukote uwali umwigalasi ukuti umusonso uwo wali uwa lupwa lwitu. Wanenyile mama ukuti aalimamo ukwaula intete. Amu lupwa luze yazumile. Nu mulandu a vino wasizile.”

 Ivya musango uu vikacitika sana uku mpanga izyaela uku uondaka wa Africa. Ukuntu kuu wakwe vino caya uku mpanga zyuze, antu avule cuze yazumila ukuti antu ndi yafwa, yakasenuka iyaya imipasi uku ncende yuze, kuno yakalola nu kucitila vimwi antu aya umu nsi. Uzye icizumilo cii i ca cumi? Uzye i cumicumi afwe yaya nu umi? Ngi cakuti asi vino caya, aaweni aakaikolanya ngati imipasi ya yafwe? Icicindama sana ukumanya ivyampomvu apa mauzyo yaa. Umwi angafwilanapo ndi cakuti atamanyile ivya cumi.