LOLA vino insi ikuloleka paa! Vyonsi ivilimo vikuloleka ningo sana! Lola isote ni imiti, maluwa alino ni inyama zyonsi izili mwenemo. Uzye ungasonta apali inzovu na ya cisama?

Nga lyene caali uli pakuti insi iziipe vii? I cisuma, leka tusambilile vino Leza wacisile pa kutupekanyizizya insi.

Nkoleelo, Leza wameziizye umulemvwe pakuti wavimbilikizya umusili. Nakupya, wameziizye utumelwa utupusane-pusane ni vimpuuza alino ni imiti. Ivimelwa kwene vii, i vikalenga ukuti insi yaloleka ningo. Nomba, kwaya umulimo nauze uno vikaomba. Vimwi pali vii, vikatupeela ivyakulya ivisuma sana.

Mukuya kwa nsita, Leza wapanzile inswi ukuti zyaowa umu manzi ni vyunyi ukuti vyapapuka umu lwelele. Wapanzile ya simbwa, ya nyau ni mfalasi; inyama izikulu ni zinoono. Uzye iinyama ci izyaya umupiipi nakuno mwikala? Uzye tutafwile ukutemwa sana pa vintu vyonsi kwene vii vino Leza watupangila?

Lyene ni ca kusyalikizya, Leza wazifizye sana incende imwi inoono umu nsi. Leza watandike ukwama incende kwene ii ukuti i calo ca Edeni. Yaali incende isuma cuze. Vyonsi kwene ivyalimo vyalolekanga ningo sana. Nupya Leza walondanga ukuti insi yonsi ice iziipe wakwe vino wazifiizye icalo kwene cii.

Nomba, lola nupya pa cikope kwene cii. Uzye watuumanya cino Leza waweni ukuti pasi? Leka tulole.