LINO Davidi watandike ukuteeka umu Yelusalemu, Yeova wamwazwizye ukucimvya alwani. Pa nsita ii ala Yeova walaya mpiti ukuti alapeela aina Izlaeli impanga ya Kenani. Lyene lino Yeova wayavwizye, yaaposile impanga yonsi kwene ino wayalavile.

Davidi wali umwene umusuma sana. Watemilwe sana Yeova. Acino, lino waposile Yelusalemu, icintu cino watandikiilepo ukucita, u kuleeta imbokosi ya upangano yakwe Yeova. Nupya walondanga ukukuula ing’anda ya kupepelamo pakuti amuno imbokosi iiyo yaikala.

Lino Davidi wakosile, wacisile icintu cimwi iciipe sana. Davidi wamanyile ukuti citaziipa ukutoola icintu ca ineco. Nomba uwanda umwi ala ali apipaala lya ng’anda yakwe, waweni umwanaci umwi umusuma cuze. Iziina lyakwe wali a Betisyeba, na iya wali a Uliya umusilika wakwe Davidi.

Davidi watemilwe sana Betisyeba icakuti watumile yamwi ukuyamusenda nu kumuleeta ukwisano. Pa nsita iiyo ala iya wapita uku nkondo. Davidi walaazile na Betisyeba, lyene Betisyeba wakweti inda. Nomba lino Davidi uvwile vii, wasakamiile sana, acino watumile yamwi kuli Yoabu umukalamba wa yasilika ukuti aike Uliya uku nkoleelo pakuti alwani yamukome. Lino Uliya yaamukomile, Davidi watoozile Betisyeba ukuti aye umuci.

Yeova wasosile sana pali vino Davidi wacisile. Watumile umuomvi wakwe wino yatangi Natani pakuti akakalipile Davidi pali vino waluvyanyizye. Lola Natani akuvwanzya Davidi. Davidi wali sana nu ulanda pali vino wacisile, nawe Yeova ataamumoozile. Nomba Yeova wamuneenyile ati: ‘Lyene vino wacita iviipe vyonsi vii, mu ng’anda yako mumayanga intazi sana.’ Avino Davidi waponiilwe ni intazi zingi cuze!

Icatandikiilepo, umwana monsi wakwe Betisyeba wafwile. Kufuma papo, iyeli lyakwe Davidi, Amunoni, walemile nkazi yakwe nu kumulaala uku maka. Nga alino Abusalomu mwana Davidi wasosile sana icakuti wakomile Amunoni. Nupya wanda uze, Abusalomu walyombeliike antu ukuti yamutemwe pakuti aaliwe aayateeka. Davidi wacimvizye Abusalomu, na Abusalomu yaamumoozile umu nkondo. Icumi kwene, Davidi wali ni intazi izingi.

Lino ivintu vyonsi vii vyacitikanga, Betisyeba waviile umwana monsi wino yaatemiile iziina yati Solomoni. Lino Davidi wakosile nu kulwala, umwanakwe Adoniya wakasi ukuiika apa wene. Lyene Davidi waneenyile simapepo wino yatangi Zadoki ukwitila mafuta pa mutwe wakwe Solomoni ku kulanga ukuti Solomoni aliwe alaya umwene. Pataapisile ni insita, na Davidi aiza afwa ala ali ni myaka ya kuvyalwa 70. Wateesile pa myaka 40, nomba, Solomoni u wamupyanyile nu kuya umwene wa Izlaeli.