CIPANDE 1
“Vino Ukutemwa Leza Kukapiliula”
“Swemo tukalanga kutemwa kuno twatemwa Leza pa kuyela masunde yakwe. Na masunde yakwe angupale.”—1 YOANE 5:3.
1, 2. Uzye i cani icikalenga ukuti mutemwe sana Yeova?
UZYE mwatemwa Leza? Ndi cakuti mwaipeela mpiti kuli Yeova, ukwaula nu kutwisika, mungaasuka ukuti ee namutemwa—nupya ale mwasuka sile ningo! Ukutemwa Yeova kwacindama sana. Swemo tukatemwa Leza pano u watandikilepo ukututemwa. Baibo ikati: “Swemo tukatemwa pano Leza uwatandike ukututemwa.”—1 Yoane 4:19.
2 Yeova u watandikilepo ukulangizya ukuti watutemwa. Watupeela insi yakwikalamo. Akasakamala umi witu nu kutupeela vyonsi vino tukalondekwa. (Mateo 5:43-48) Ni cacindama sana, akatusambilizya ukulonda kwakwe. Watupeela Baibo. Nacuze, akatulaalika ukuti twapepa kuli aliwe pano akauvwa amapepo itu nupya akatupeela umupasi wakwe uwamuzilo ukuti watwazwa. (Masamu 65:2; Luka 11:13) Ni cacindamisya sana, watumile Umwanakwe ukuti atukulule uku maifyo ni mfwa. I cumicumi Yeova watutemwa cuze!—Welengini Yoane 3:16; Loma 5:8.
3. (a) Uzye i cani cino tulinzile ukucita pakuti twikale mu kutemwa kwakwe Leza? (b) I cuzyo ci cino tulinzile ukwelenganyapo sana, nupya aukwi ukukazanwa icasuko?
3 Yeova akaalonda ukuti twaipakizya amanda pe, pano watutemwa. Nomba, pakuti tukaipakizye, tulinzile ukuisoolwela sweineco. Baibo ikatuneena ukuti: “Ikalini mu kutemwa kwakwe Leza . . . alaya na mizu kunomuli nu kumupeela umi wape.” (Yuda 21) Izwi lyakuti “ikalini” likalaanga ukuti pakuti tutwalilile umu kutemwa kwakwe Leza, tulinzile ukucitapo cimwi. Tulinzile ukulanga ukuti twatemwa Leza muli vino tukacita. Lyene fwandi icuzyo cino tufwile ukuyuzya sweineco aeci: ‘Ningalangizya uli ukuti natemwa Leza?’ Icasuko cikazanwa umu mazwi afuma kuli Leza aaya umwibuku lyakwe Yoane aakati: “Swemo tukalanga kutemwa kuno twatemwa Leza pa kuyela masunde yakwe. Na masunde yakwe angupale.” (1 Yoane 5:3) Icicindama sana ukuti tumanye upiliulo wa mazwi kwene yaa, pano tukalonda ukulanga Leza witu ukuti twamutemwa sana.
VINO UKUTEMWA LEZA KUKAPILIULA
4, 5. (a) Uzye amazwi yakuti “kutemwa kuno twatemwa Leza” yaalola mwi? (b) Londololini vino mwatandike ukutemwa Yeova nu mwenzo winu onsi.
4 Uzye umutumwa Yoane walozizye mwi lino walanzile amazwi yakuti “Kutemwa kuno twatemwa Leza?” Walozizye kuli vino cila-muntu watemwa sana Leza nu mwenzo onsi. Uzye mungiusya insita lino mwatandike ukutemwa sana Yeova nu mwenzo winu onsi?
Ukuipeela nu kuwatiziwa i ntandikilo ya kuvwila Yeova nu kumutemwa
5 Tala elenganyini pa nsita ino mwasambiliile icumi pali Leza nu kulonda kwakwe alino nu kutandika ukuya nu utailo sana. Mwizile imumanya ukuti nanti cakuti mwali mwemwe ya kaifya nupya mwaitalwisye kuli Leza, Yeova wamuyuliile inzila ukupitila muli Yesu pakuti mukaye amaliilike nu kwikala amanda pe. (Mateo 20:28; Loma 5:12, 18) Mwatandike ukumanya ningo ukuti vino Yeova wacisile pa kutuma Umwanakwe wino watemwisya ukwiza mufwila, cali i cintu icicindame sana. Camuletiile sana uluzango, nupya mwatandike ukutemwa Leza pa mulandu wakuti walaanga ukuti wamutemwa sana.—Welengini 1 Yoane 4:9, 10.
6. Uzye umuntu akalangizya uli ukutemwa kwa cumi, nupya ukutemwa Leza kwalenzile mucite cani?
6 Lelo, viivi vino mwayuvwile umu mwenzo, yaali i ntandikilo sile iya kutemwa Leza. Kutemwa asi sile vino umuntu akuyuvwa umu mwenzo, nupya asi kulanda sile pa kanwa. Ukutemwa Leza ukwa cumi kwaluta pa kulanda sile ukuti “Natemwa Yeova.” Viivi kwene vino utailo waya, avino ukutemwa kwa cumi kukalolekela muli vino umwi akacita. (Yakobo 2:26) Tukalanga ukutemwa ndi tukucita ivikazanzya wino twatemwa. Fwandi lino mwatandike ukutemwa Yeova nu mwenzo onsi, mwatandike ukulondesya ukucita ivikamuzanzya. Uzye mwemwe Nte yakwe Yeova iyawatiziwa? Ndi avino cili, ale ukutemwa kuno mwatemwa Yeova u kwalenzile ukuti muipeele kuli aliwe. Mwaipeezile kuli Yeova pakuti mwacita ukulonda kwakwe, nupya mwalangizye ukuipeela kwinu lino mwawatiziwe. (Welengini Loma 14:7, 8.) Pa kufikilizya vino mwalavile Yeova, cikalondeka ukucita vino umutumwa Yoane walemvile ivili apisika.
‘TUKAYELA MASUNDE YAKWE’
7. Uzye a masunde ci yamwi-yamwi yano Leza watupeela, nupya calola mwi ukuvwila amasunde yaayo?
7 Yoane walondolwile vino cikapiliula ukutemwa Leza ati: ‘Tukayela masunde yakwe.’ Uzye a masunde ci yano Leza watupeela? Yeova watupeela amasunde aingi aaya muli Baibo. Yamwi pa masunde kwene yaa yakalesya ukucita ivintu vimwi wakwe ukukoleka, ulalelale, kupepa utuluwi, ukwiya, nu kusomba. (1 Kolinto 5:11; 6:18; 10:14; Efeso 4:28; Kolose 3:9) Umu kuyela amasunde yakwe Leza mwaya nu kulondela vino Baibo ikati avino tufwile ukuya.
8, 9. Tungamanya uli vino Yeova watemwa nanti sile lino Baibo itatunena ivya kucita? Landiniko icintu cimwi.
8 Nomba, pakuti twazanzya Yeova, tutalinzile ukupeleela sile pa kulondela amasunde yano watupeela. Yeova ataatupeela amasunde yano tulinzile ukulondela muli vyonsi sile vino tukacita cila-wanda. Fwandi, lino tukucita vimwi umu wikalo witu, tukazana ukuti kwaya ivintu vimwi vino tulinzile ukuipingwila sweineco. Uzye ndi caya vivyo, tungacita uli pakuti twapingula ningo nu kuzanzya Yeova? Muli Baibo mwaya amazwi aakalanga imyelenganyizizye yakwe Leza. Lino tukusambilila Baibo, tukazana amazwi aakalanda pali vino Yeova watemwa na vino wapata. (Welengini Masamu 97:10; Mapinda 6:16-19) Tukamanya amelenganyo ni miyele ino Leza watemwa. Ndi tukusambilila sana pali vino Yeova waya na vino akacita ivintu, tulaaleka imyelenganyizizye yakwe yatungulula vino tukapingulapo ukucita. Fwandi, na lino kwaya vimwi vino tulinzile ukupingulapo vino pataaya isunde lya muli Baibo, ilingi tungamanya ‘vino Umwene akalonda kuti twacita.’—Efeso 5:17.
9 Wakwe vino muli Baibo mutaaya isunde ilikatulesya ukutamba mafilimu nanti vino yakatambiisya pa TV ivyayamo unkalwe nu upulumusi. Nomba, uzye vwilini suka kuye isunde ilyakutunena ivya kucita nga alino tungasenka uku viipe kwene vivyo? Swemo twamanya vino Yeova akalola ivintu vivyo. Izwi lyakwe likatunena ningo sana ukuti: “Wapata uwatemwa ukang’ansi [unkalwe].” (Masamu 11:5) Nupya likati: “Leza alapingula yao akacita uzelele na yao akacita ulenzyo.” (Ayebulai 13:4) Ukwelenganya sana pa malembelo yaayo kungatwazwa ukumanya ningo vino Yeova akaalonda. Fwandi twasoolola ukukanatamba ivintu vino Leza wapata. Twamanya ukuti Yeova akatemwa ndi tukusenka uku vintu viipe vino amu nsi yakaalola ukuti vyaya sile ningo. *
10, 11. U mulandu ci uno tukasoolwela ukuvwila Yeova, nupya i cuvwila ca musango ci cino twaya naco?
10 U mulandu ci ucindamisye uno tukauvwila masunde yakwe Leza? U mulandu ci uno tukalondela ukuti cila-wanda twacita ivintu ukulingana na vino twamanya ukuti avino Leza akaalonda? Asi kuti tukatiina ukuti limwi Leza angatufulula pali vino tukucita, nanti ukutiina sile intazi. (Galatiya 6:7) Lelo fwemo tukamuvwila pano twamanya ukuti ukucita vivyo iinzila ya kulangilamo ukuti twamutemwa. Viivi kwene vino umwana akaalonda ukuti isi amutemwe, avino nafwe kwene tukalonda ukuti Yeova atutemwe. (Masamu 5:12) Wene a Tata witu, nupya twamutemwa. Kutaaya icintu icikatuletela uluzango sana wakwe vino tukazanga ndi twamanya ukuti vino tukucita vikuzanzya Yeova.—Mapinda 12:2.
11 Fwandi swemo asi kuti yakatupatikizya sile ukuvwila Leza, nupya tusimuvwila sile limwi-limwi. * Tusisoolola ukuti tufwile ukumuvwila sile lino ivintu vyatuzipila nanti ndi twalola ukuti citatazile ukucita vivyo. Lelo swemo tukamuvwila ‘ni myenzo itu yonsi.’ (Loma 6:17) Twaya wakwe kalemba wa masamu umwi uwalemvile ati: “Ninzana uluzango umu masunde yako, yano natintemwa wakwe cimwi.” (Masamu 119:47) I cumicumi, twatemwa ukuvwila Yeova. Twamanya ukuti wene akaalonda ukuti twamuvwila nu mwenzo onsi nupya aliwe walinga ukuvwila. (Malango 12:32) Tukalonda ukuti nafwe Yeova akatunene vino wanenyile Nowa. Baibo ikalanda pali vino Nowa wali uwacuvwila kuli Leza ukuti: “Nowa wacisile vyonsi ndi vino Leza wamupezile ilamulo.”—Utandiko 6:22.
12. I cuvwila ca musango ci icikazanzya umwenzo wakwe Yeova?
12 Uzye Yeova akauvwa uli ndi tukuitemelwa ukumuvwila? Izwi lyakwe likati ‘tukamuzanzya umwenzo.’ (Mapinda 27:11) Uzye i cumicumi icuvwila citu cikazanzya umwenzo wakwe Leza wino a Kateeka wa Papela-pela? Ee cikamuzanzya! Pano Yeova watu-umvile na maka ya kuisoolwela ivyakucita. Kulikuti twakwata untungwa wa kuisoolwela vino tukulonda; nga tukulonda tungasoolola ukuvwila Leza, nanti ukukanamuvwila. (Malango 30:15, 16, 19, 20) Ndi twasoolola ukuvwila Yeova pa mulandu nu kutemwa kuno twamutemwa, cikazanzya Tata witu uwa mwiyulu. (Mapinda 11:20) Nakapya, ukucita vivyo i cintu cisuma wakwe cimwi.
‘AMASUNDE YAKWE YANGUPALA’
13, 14. U mulandu ci uno cingalandilwa ukuti ‘masunde yakwe Leza angupale,’ nupya mungalondolola ukuomvya icilangililo ci?
13 Mutumwa Yoane watunena icintu cimwi cisuma sana pa masunde yakwe Yeova ati: “Na masunde yakwe angupale.” Izwi lya ciGliki lino yasenula ukuti “angupale” ilyaya pali 1 Yoane 5:3 likapiliula ukuti asi anyome. * Lyene Baibo yakuti Cimambwe New Testament yasenula ilembelo lii ukuti: “Ivyeo vyakwe vyene vitatutiticizya.” Ivintu vino Yeova akaalonda ukuti twacita, vyangupala visitutitikizya foo. Amasunde yakwe yataakoma icakuti antunze aatamalilika yangafilwa ukulondela.
14 Lekini tulangilile. Elenganyini ukuti cuza winu wamunena ukuti mumwavwe ukusenda iviya lino akukuukila uku ng’anda yuze. Tuti pali iviya ivingi vya kusenda. Pali ivyangupale vino nu muntu wenga sile angasenda sile ningo, lelo vyuze vyene i vifine cuze vikulondekwa sile antu yaili. Lyene cuza winu wasoolola iviya ivyakuti musende. Uzye angamunena ukuti musende iviya vino amanyile ukuti iivinyomesya icakuti mutanga mukwanisye mwenga? Awe, foo. Atanga atemwe ukuti muicise lino mukuvisenda. Vivyo kwene avino na Leza kwene uwatutemwa nupya uwa cikuku waya, asitupeela masunde yano tutanga tukwanisye. (Malango 30:11-14) Atanga aezye ukututwika ivinyomesye. Yeova wamanya apaapela amaka itu, pano “wene wamanya vino watuumba, wamanya nu kuti swemo sweswe lukungu sile.”—Masamu 103:14.
15. U mulandu ci uno tungatailila ukuti masunde yakwe Yeova yayelako uku kutwavwa?
15 I cumicumi masunde yakwe Yeova yataanyoma foo; yaayelako uku kutwavwa. (Welengini Ezaya 48:17.) Fwandi acino Mose waneniile aina Izlaeli ati: “Lyene alino [Yeova] Leza witu watupeezile ilamulo kuti twayela amasunde yaa yonsi nu kumucindika. Ndi twacita vii, ale lyene lyonsi kwene alawaka uluko lwitu nu kulupeela ulongo.” (Malango 6:24) Naswe kwene tukataila ukuti lino Yeova akutupeela masunde yakwe, ala watatusumbako sana mano—kulikuti ala akulonda ukuti twaya ni nsansa lyonsi. Cumi kwene Yeova atanga atunene ukuti tucite ivintu ivingatucisa. Yeova a Leza uwa mano cuze. (Loma 11:33) Fwandi wamanya ningo ivingatuziipila. Nakapya, Yeova aliwe waya nu kutemwa wakwe cimwi. (1 Yoane 4:8) Wene ukutemwa ali vino waya, u kukatungulula vyonsi vino akulanda nu kucita. Masunde yonsi yano akapeela aomvi yakwe yakapangwa pa mulandu nu kutemwa.
16. Nanti cakuti twikala umu nsi umwaya imiyele iipe, alino swe yantu tutaamalilika, u mulandu ci uno tungayela acuvwila?
16 Cintu cii cisikupiliula ukuti ukuvwila Leza kwangupala sana. Twikala umu nsi umwaya imiyele iipe, ino “ili pisika lya utesi wa Mwipe.” (1 Yoane 5:19) Alino nafwe kwene tutaamalilika, na cii cikalenga ukuti ilingi twatama amasunde yakwe Leza. (Loma 7:21-25) Lelo ukutemwa kuno twatemwa Leza, u kukatwazwa ukuti twamuvwila. Yeova akapolelela yonsi aakalonda ukumuvwila pakuti yalangizye vino yamutemwa. Akaapeela umupasi wakwe uwa muzilo “kuli yano akamuyela.” (Milimo 5:32) Umupasi uwo ukalenga antu ukuya ni miyele isuma—kulikuti imiyele iingatwazwa ukuya acuvwila.—Galatiya 5:22, 23.
17, 18. (a) Uzye i vyani vino tuli nu kusambilila umwibuku lii, nupya lino tukusambilila, i vyani vino tulinzile ukwiusya? (b) Uzye i vyani vino tuli nu kusambilila umu cipande cilondeliilepo?
17 Umwibuku lii tumasambilila sana pa masunde yakwe Yeova na vino akalonda ukuti twacita, alino ni vintu ivingi ivikalangilila ukulonda kwakwe. Lino tukucita vivyo, tulinzile ukwiusya ivintu vimwi vicindame sana. Tufwile ukwiusya lyonsi ukuti Yeova asitupatikizya ukuvwila masunde yakwe; akaalonda ukuti twaitemelwa ukumuvwila nu mwenzo onsi. Tutafwile ukwilila ukuti Yeova akatunena ukuti twacita ivintu ivingatuletela insansa ndakai nu kututungulula uku umi wa pe. Nupya twalola icuvwila ukuti iinzila isuma sana ya kulangilamo Yeova vino twamutemwa.
18 Pa kutwavwa ukumanya ivisuma ni viipe, Yeova watu-umba na kampingu. Lelo kwene pakuti kampingu aatutungulula umu nzila yampomvu, afwile ukusambiliziwa ningo, wakwe vino icipande calondelelapo cilalondolola.
^ par. 9 Welengini umu Cipande 6 umwibuku kwene lii pakuti mulole ivingatwavwa ukusoolola ningo ivyakutuzanzya.
^ par. 11 Ni mipasi yankota kwene ikauvwila ndi yapatikiziwa. Lino Yesu wakalipilanga imipasi yankota iyali umu yantu, imipasi iyo yaapatikiziwe ukumanya ukuti Yesu waya na maka, nupya yuvwilile, nanti cakuti itaitemiilwe ukucita vivyo.—Mako 1:27; 5:7-13.
^ par. 13 Pali Mateo 23:4, izwi lilyo lyaomviwa ukulanda pa “visendo vinyomesye,” kulikuti masunde atalisye ni ntambi zya yantu vino ya kalemba na Afaliseo yikanga pa yantu. Izwi ilili lyonga kwene lyasenulwa ukuti ‘lufyengo’ pa Milimo 20:29, 30 nupya likalozya uku yasangu aipisye ‘aalatumpoka’ kuti yaponzye antu yauze.
