1. I mipepele ci imwi-imwi iyaya umu Africa?

ANTU aingi sana umu Africa yazumila ukuti ukupepa Leza kwazipa. Nomba, vino yakamupepa vitaakolana. Yamwi yakamupepela pa vikulwa, yauze nayo yakaya ku malindi. Alino yauze yene yakaya uku macalici. Nomba, tutanga tuti kwaya sile imisango itatu ino yakapepelamo Leza umu Africa. Muli ya Mozilemu mwaya masunde ni vizumilo ivipusane-pusane. Mipepele ya visilano nayo yapusana-pusana ukulingana ni ncende. Mu macalici aakati Aina Klistu namo mutaya ukuombela pamwi. Alino kwaya macalici na yauze aingi sana umu Africa.

2. (a) I vintu ci ivikalenga ukuti umuntu asoolole ukwa kupepa? (b) I vyani ivisisininkizya ukuti imipepele itu ikazanzya Leza?

² I cani icalenga ukuti antu yataapepa ivilivimwi? Antu aingi yakalondela imipepele ino avyazi yao yayamo. Ivintu ivyacitike mpiti navyo vikalenga antu ukusoolola ukwa kupepa. Mwibuku lyakuti The Africans—A Triple Heritage mwaya amazwi yakuti: ‘Ya Mozilemu yasalanganiile ku ncende zyayela uku Kaeya kakwe Africa kupitila umu kucimvya, . . . nayo Aina Klistu yasalanganiile uku mpanga izyaela uku Katutu kakwe Africa, nayo kwene u kupitila umu kucimvya.  Ngi cakuti ya Mozilemu yacimviizye uku lupanga, Aina Klistu yene yaomvizye imfuti.’ Nanti ciye vivyo, fwe ingi twazumila ukuti ukupepa kwitu kukazanzya Leza. Nomba ukupepa kusiya ukwa cumi pa mulandu sile uwa kuti akuno avyazi yakapepa, nanti pa mulandu sile uwakuti antu yauze aliyo yapatikizye ivikolwe vitu.

3-5. I cilangililo ci icingatwazwa ukumanya ukuti isi mipepele yonsi iikasambilizya icumi?

³ Nanti i cakuti imipepele yonsi ikalanda ukuti ikasambilizya ningo antu ivya kuombela Leza, vino yakasambilizya visiya ivilivimwi. Yakasambilizya ivipusane-pusane pali vino Leza waya na vino akalonda twacita. Pakuti muvwikisye vino caya, elenganyini ukuti mwazana incito pa kampani kakalamba. Pa wanda wakutandikilako, mwazana ukuti umukalamba wa ncito asipo. Lyene muzya aomvi yatatu vino mumaomba. Muomvi wa kutampilapo wamuneena wati ya bosi yali-yalanda ukuti mwakulapyela. Muomvi wakwe ciili wati mulinzile ukupenta icikulwa. Wako citatu wamuneena wati mwakulatwala makalata kuno yafwile ukuya.

⁴ Lyene, muuzya aomvi kwene yaa pali vino umukalamba wa ncito waya. Muomvi wakutampilapo wamuneena wati umukalamba wa ncito u mutali, uwa cilumendo, nupya wakalipa. Wako ciili nawe wati u mwipi, uwikolo, nupya u wa cikuuku. Wakwe citatu wamuneena wati umukalamba wa ncito asi monsi foo, wene u mwanaci. Kwaula nu kutwisika, mungelenganya ukuti yonsi kwene yatatu yasikulanda ivisinka. Ndi mukulonda ukutwalilila ukuomba apa kampani kwene kako, kwene mungatemwa ukulondelezya ivisinka pa mukalamba wa ncito pakuti mumumanye ningo, nu kumanya vino akulonda mwaomba.

⁵ A vino ni mipepele yaya. Kwaya ivisambilizyo ivingi pali vino Leza waya na vino akalonda twacita, fwandi, tulinzile ukusininkizya ukuti tukamupepela umu cumi. Nomba tungasambilila tutuuli icumi pali Leza?