1, 2. U mulandu ci uno tungalandila ukuti ipepo u wila uiyeele sana, napya u mulandu ci uno tulinzile ukumanyila vino Baibo ikasambilizya api pepo?

INSI yacepa sana ngu kuilinganya ku uumbo onsi. Ndi Yeova walolekesya pano nsi, akaalola imitundu ya antu wa kalitoni ka manzi akali apa milomo ya nsembo. (Masamu 115:15; Ezaya 40:15) Nanti cakuti swe yantu twacepesya vii ngu kutulinganya ku uumbo, pa Masamu 145:18, 19 pene pakati, Yeova “wene waya umupipi na yonsi akakuuta kunoli, yonsi akakuuta kunoli umusi mwisyente. Wene akapeela ivikalonda akamoopa, akauvwa ukukuuta kwao nu kuyatuula.” Ala twakwata isyuko lisuma cuze! Yeova, Kaumba wa maka yonsi, akalondesya kuti tuye ya cuza yakwe nupya akalondesya kuti twapepa kuli aliwe. Ukupepa kuli Yeova i syuko sana napya u wila uiyeele uno Yeova watupeela swensi.

² Nomba, Yeova akauvwa mapepo itu ndi cakuti tukupepa kulingana na vino wazumilizya. Uzye vwilini tungacita uli pakuti Yeova auvwa mapepo itu? Lekini tusambilile vino Baibo ikalanda pi pepo.

3. U mulandu ci uno mufwile ukupepela kuli Yeova?

³ Yeova akalonda ukuti mwapepa, nanti kulanda kuli aliwe. Twasininkizya uli? Welengini amazwi aya pali Filipi 4:6, 7. Lyene mwelenganye vino amazwi yaa yakutukomelezya. Kateeka wa uumbo onsi wamutemwa sana, napya  akalonda kuti mwamunena vyonsi ivili ku mwenzo kumwi sile ni ntazi zino mwakwata.

4. Uzye ucuza winu na Yeova ungaya uli ndi mukupepa lyonsi kuli aliwe?

⁴ Ipepo likatulenga ukuya na ucuza ukome na Yeova. Ndi cakuti yacuza yakulanzyanya insita izingi ivili uku mwenzo, ivikuyacuzya, na vino yakuyuvwa, ucuza wao ukaya ukome sana. Vikwene avino caya na lino mukupepa kuli Yeova. Wene akaomvya Baibo pa kumunena vino akaelenganya na pali vino akayuvwa, napya akamunena vino alacita uku nkoleelo. Ndi mukupepa lyonsi, mukakwata isyuko lya kunena Yeova vino mukwelenganya ni vili mu mwenzo. Lino mukucita vivyo, ucuza winu na Yeova ulaakomelako.—Yakobo 4:8.

5. Uzye i cani icalenga tusininkizye ukuti Yeova asiuvwa mapepo yonsi?

⁵ Uzye Yeova akauvwa amapepo yonsi sile? Awe, asi mapepo yonsi yano akauvwa. Mu manda yakwe kasema  Ezaya, Yeova wanenyile aina Izlaeli ati: “Nanti mupepe uli nemo namapupuzyanga sile, pano iminwe inu ikowele ku uyi.” (Ezaya 1:15) Fwandi nga tutacenjile, tungaacita vimwi ivingatutalusya kuli Yeova, na ci cingalenga kuti atauvwa mapepo itu.

6. U mulandu ci uno utailo wacindamila? Mungacita uli pa kulanga ukuti mwaya nu tailo?

⁶ Ndi cakuti tukulonda kuti Yeova auvwa mapepo itu, tufwile ukuya nu tailo muli aliwe. (Mako 11:24) Mutumwa Paulo walemvile ukuti: “Kusi umwi angazanzya Leza kwaula kukwata utailo. Pano wino wensi akaiza kuli Leza alinzile ataile ukuti Leza akuno waya nupya akalambula yao akamulondalonda.” (Ayebulai 11:6) Nomba tutalinzile ukupelela sile pa kulanda ukuti twaya nu utailo. Tulinzile ukulangizya umu cumi ukuti twaya nu utailo lino tukuvwila Yeova cila-wanda.—Welengini Yakobo 2:26.

7. (a) U mulandu ci uno tufwile ukuicefya nu kuya amucinzi lino tukupepa kuli Yeova? (b) Uzye tungalanga uli ukuti tuli acumi lino tukupepa?

⁷ Tulinzile ukuicefya nu kuya a mucinzi lino tukupepa kuli Yeova. U mulandu ci? Ndi cakuti twakweti isyuko lya kulanda na kateeka nanti umwene, tungaya a mucinzi sana. Yeova a “Leza Wamaka Yonsi, fwandi tufwile ukulanga umucinzi sana nu kuya aicefye lino tukulanda kuli aliwe. (Utandiko 17:1; Masamu 138:6) Nupya tufwile ukuya a cumi nu kupepa kuli Yeova nu mwenzo onsi, tutafwile ukulaswilizya amazwi aliyamwi lyonsi lino tukupepa.—Mateo 6:7, 8.

8. Uzye ndi cakuti twapepela pali cimwi, i vyani na vyuze vino tulinzile ukucita?

⁸ Cakusyalikizya icakuti, lino tukupepa kuti Yeova atwavwe, tulinzile ukuomba ukulingana na vino tukupepelapo. Tuti twapepa kuli Leza ukuti, atupeele vino tukalonda cila wanda, tutafwile ukwikala sile nu kwenekela kuti Yeova amatupeela na lino itukwata maka yakuomba. Tufwile  ukuombesya apangapela maka itu incito ili yonsi yaloleka ino tungaomba. (Mateo 6:11; 2 Tesalonika 3:10) Nanti tuti twapepa kuli Yeova ukuti atwazwe ukucimvya uwezyo umwi, tufwile ukutaluka kuli vyonsi vingalenga tweziwe. (Kolose 3:5) Lekini lyene tulande pa mauzyo yano antu yakauzya sana pi pepo.

9. A kuli weni kuno tulinzile ukupepa? Uzye ilembelo lya pali Yoane 14:6 likatusambilizya cani pi pepo?

⁹ A kuli weni kuno tulinzile ukupepa? Yesu wasambilizye alondezi yakwe ukupepa kuli “Tata witu uwa mwiyulu.” (Mateo 6:9) Napya walanzile ukuti: “Nene ndi nzila ni cumi, nu umi. Pasi umwi angiza kuli Tata suka wizila muli nene.” (Yoane 14:6) Fwandi tulinzile ukupepa sile kuli Yeova ukupitila muli Yesu. Uzye calola mwi ukupepa ukupitila muli Yesu? Pakuti Yeova auvwe mapepo itu, tulinzile ukucindika mulimo uyiyeele uno Yeova wapeezile Yesu. Wakwe vino twasambilile, Yesu wizile pano nsi pakuti atukulule ku maifyo ni mfwa. (Yoane 3:16; Loma 5:12) Nupya Yeova wasonta Yesu kuya ali Simapepo Mukalamba napya Kapingula.—Yoane 5:22; Ayebulai 6:20.

10. Uzye kwaya iviiyeele vino tulinzile ukucita lino tukupepa? Londololini.

¹⁰ Uzye kwaya ivi-iyeele vino tulinzile ukucita lino tukupepa? Awe, Yeova atalanda ukuti lino tukupepa tufwile ukufukama, ukwikala nanti ukwimilila. Baibo ikatusambilizya ukuti tungapepa kuli Yeova paliponsi cikulu sile tuli nu mucinzi. (1 Milandu 17:16; Neemiya 8:6; Danieli 6:10; Mako 11:25) Icacindama kuli Yeova, asi vino itucita lino tukupepa, lelo u kuya nu mwenzo usuma. Tungapepa ale mazwi itu yakuvwika, nanti kupepela mu mwenzo kuli konsi kuno tuli, na pa nsita ili yonsi, umusanya nanti usiku. Ndi cakuti twapepa kuli Yeova, tungataila ukuti  alatuvwa nanti cakuti kusi ali wensi akuvwa vino tukupepa.—Neemiya 2:1-6.

11. Uzye i vyani vimwi vimwi vino tungapepela kuli Yeova?

¹¹ Uzye i vyani vino tungapepelapo? Tungapepela pali consi icikuvwana nu kulonda kwako Yeova. Baibo ikati: “Ndi twamulenga, wene akatuvwa nu kutwasuka pali consi cino twalenga kulingana nu kulonda kwakwe.” (1 Yoane 5:14) Uzye tungapepela ivintu vino tukulonda sweineco? Ee. Ukupepa kuli Yeova kwakolana na vino umwi angavwanga kuli cuza wakwe. Tunganeena Yeova vyonsi vino tukwelenganya kumwi sile ni vili mu mwenzo. (Masamu 62:8) Tungapepa kuli aliwe pakuti atupeele umupasi uwamuzilo uwakutwavwa ukucita ivyaololoke. (Luka 11:13) Nupya tungaleenga nu kuti atupeele mano pakuti tupingule ningo pali vimwi; tungamulenga nu kuti atupeele amaka ya kuzizimizya intazi. (Yakobo 1:5) Tufwile ukulenga kuli Yeova kuti atwelele maifyo itu. (Efeso 1:3, 7) Tufwile nu kupepelako na antu yauze, kumwi sile na yalupwa itu, alino na yankazi na ina amu cilongano.—Milimo 12:5; Kolose 4:12.

12. I vyani vicindame sana vino tufwile ukulanda mu mapepo itu?

¹² I vintu ci vicindame sana vino tulinzile ukulumbula mu mapepo? Tulinzile ukulanda pali Yeova nu kulonda kwakwe. Tufwile kumutaizya nu mwenzo onsi pa vintu vyonsi vino watucitila. (1 Milandu 29:10-13) Twamanya ukuti avino tufwile ukucita pano lino Yesu wali pano nsi, wasambilizye asambi yakwe vya kupepa. (Welengini Mateo 6:9-13.) Wayanenyile ukuti yafwile ukutandikilapo ukupepa ukuti izina lyakwe Leza licindikwe, kuli kuti, liye ilya muzilo. Lyene Yesu walanzile nu kuti tulinzile ukupepela Uwene Wakwe Leza kuti wize nu kuti ukulonda kwakwe Yeova kucitike pano nsi yonsi. Lino Yesu walumbwile ivintu kwene vii ivicindame sana, alino wakonkizyepo ukulumbula vino umuntu angaipepela umwineco. Naswe  ndi tukutandikilako ukupepela izina lyako Yeova alino nu kulonda kwakwe, tukalanga ukuti tutaasumba sile amano kuli vino tukalonda sweineco.

13. Uzye amapepo itu yafwile ukutalimpa uli?

¹³ Uzye amapepo itu yafwile ukutalimpa uli? Kwene Baibo itaalanda. Amapepo itu yangaya aipi nanti atali kulingana na vino ivintu vili. Tungapepa ipepo iliipi lino tutatala twalya icakulya, nanti tungapepa ipepo ilitali  lino tukuneena Yeova ivili mu mwenzo witu nanti lino tukumutaizya pali vimwi. (1 Samueli 1:12, 15) Tutafwile ukupepa mapepo atali pakuti sile tuzanzye antu, wakwe vino antu yamwi yacitanga lino Yesu wali pano nsi. (Luka 20:46, 47) Amapepo ya musango uwo yasizanzya Yeova. Icacindama sana kuli Yeova u kupepa nu mwenzo onsi.

14. Uzye tufwile ukupepa imiku inga, napya cii cikatusambilizya cani pali Yeova?

¹⁴ Uzye tufwile ukupepa imiku inga? Yeova akatuneena ukuti tulinzile ukupepa kuli aliwe lyonsi. Baibo ikalanda ukuti tufwile “ukupepa insita zyonsi.” (Mateo 26:41; Loma 12:12; 1 Tesalonika 5:17) Yeova waipekanya ukuvwa mapepo itu lyonsi lino twapepa. Tungaamutaizya cila wanda pali vino watutemwa na pa visuma vino akatupeela. Nupya tungaamulenga nu kuti aatutungulula, aatukomelezya,  nu kuti aatuteekezya. Ndi cakuti tukataizya api syuko lino twakwata ilya kupepa kuli Yeova, tulaalondesya ukupepa kuli aliwe insita yonsi.

15. U mulandu ci uno tulinzile ukulandila “ameni” apa mpela yi pepo?

¹⁵ U mulandu ci uno tufwile ukulandila ukuti “ameni” pa mpela yi pepo? Izwi lyakuti “ameni” lyalola umu kuti “ciye vivyo kwene.” Ndi twalanda twati “ameni” pa mpela yi pepo, ala tukupiliula kuti vino itulanda vili sile ningo napya i vyacumi. (Masamu 41:13) Baibo ikatusambilizya ukuti caya sile ningo ukulandila “ameni” umu mwenzo nanti na mazwi ayuvwike, lino aakupepa wamala, ukucita vi ale tukulanga ukuti twati-tuzumilizya kuli vino wali wavwanga umwipepo.—1 Milandu 16:36; 1 Kolinto 14:16.

16. Uzye i cumicumi Leza aka-asuka amapepo itu? Londololini.

¹⁶ Uzye i cumicumi Leza aka-asuka amapepo itu? Ee, aka-asuka. Baibo ikalanda ukuti Yeova ‘akauvwa amapepo.’ (Masamu 65:2) Yeova akauvwa nu kwasuka mapepo ya cumicumi yano antu aingi sana yakapepa, napya akacita vivyo mu nzila izipusane-pusane.

17. U mu nzila ci muno Yeova akaomvya angeli na aomvi yakwe aya pano nsi ukwasuka amapepo itu?

¹⁷ Yeova akaomvya angeli yakwe na aomvi yakwe aya pano nsi pa kwasuka mapepo itu. (Ayebulai 1:13, 14) Kwaya antu aingi sana apefile kuli Leza ukuti ayavwe ukuvwikisya ivyaya muli Baibo, nupya pataalengile nu kuleengela ukufuma pano yapepiile, na Nte Wakwe Yeova umwi ayatandalila. Baibo ikalanda ukuti angeli yakaombako umulimo wa kusimikila “landwe lisuma” mu nsi yonsi. (Welengini Umbwilo 14:6.) Napya swe ingi kwali limwi lino twapefile kuli Yeova kuti atwavwe ukucimvya intazi  imwi, lyene kapepa unji wizile atwavwa.—Mapinda 12:25; Yakobo 2:16.

18. Uzye Yeova akaomvya uli umupasi wakwe uwa muzilo na Baibo pa kwasuka amapepo itu?

¹⁸ Yeova akaomvya umupasi wakwe uwamuzilo pa kwasuka mapepo itu. Ndi twapepa kuli Yeova kuti atwavwe ukucimvya uwavya umwi, angaomvya mupasi wakwe wa muzilo ukututungulula nu kutukomelezya. (2 Kolinto 4:7) Napya Yeova akaomvya Baibo pa kwasuka amapepo itu nu kutwavwa ukupingulapo ningo pali vimwi. Ndi twawelenga Baibo tungazana ilembelo ilingatwavwa ukumanya ivyakucita pa wavya umwi. Lino tuli pa kulongana, Yeova angaomvya umwi ukwasuka icasuko icingatwavwa, nanti limwi eluda umwi wino twaya nawe umu cilongano angatulanga cisinka cimwi kufuma muli Baibo.—Galatiya 6:1.

19. U mulandu ci uno insita zimwi cingaloleka ngati Yeova ataswike mapepo itu?

¹⁹ Lelo insita zimwi tungaelenganya tuti, ‘I cani cino Yeova akuleengelela kwasuka mapepo yane?’ Mwaiusya ukuti wene wamanya lino alinzile ukwasuka mapepo itu ni nzila ya kwasukilamo. Yeova wamanya vino tukalonda. Tufwile sile ukutwalilila ukupepa, ndi twacita vivyo ale tukulanga ukuti tukulondesya uwavwilizyo napya ale tukulanga ukuti twaya nu utailo kuli Yeova. (Luka 11:5-10) Insita zimwi, Yeova angaasuka amapepo itu mu nzila ino tutakwenekela nu kuti aino angasukilamo. Limwi tungapepela pa ntazi ino tukweti, lelo Yeova atangasisyepo intazi iyo, angatupeela sile maka akuzizimizya.—Welengini Filipi 4:13.

20. U mulandu ci uno tufwile ukupepela kuli Yeova lyonsi?

²⁰ I syuko ilikulu cuze ukupepa kuli Yeova! Tungataila ukuti aluvwa ndi twapepa. (Masamu 145:18) Napya, ndi tukupepa lyonsi kuli Yeova nu mwenzo onsi, ucuza witu na Yeova ulakomelako.