ISAMBILILO 27

Uzye Imfwa Yakwe Yesu Ingatukulula Uli?

LIZYINI

Tukayembuka, ukucuula nu kufwa pa mulandu wakuti atwalane ya kutandikilapo Adamu na Eva yatuvwilile Leza. a Nomba twakwata upaalilo. Yeova wapekinye inzila ya kutupususizyamo uku luyembu ni mfwa ukuomvya Umwanakwe Yesu Klistu. Baibo ikatusambilizya ukuti Yesu wapeezile ilambo lino wafwile. Ilambo, u mutengo ukalipilwa pa kupususya umwi. Umutengo uno Yesu walipiile, wali umi wakwe umalilike. (Belengini Mateo 20:28.) Lino Yesu waipeelisye ukwizatufwila pano nsi, walenzile tukwate upaalilo wa kwizakwata vyonsi vino Adamu na Eva yaponzizye. Nupya Yesu wasokolwile vino wene na Yeova yatutemwa. Isambililo lii limamwazwa ukulataizya sana pa mfwa yakwe Yesu.

1. Uzye imfwa yakwe Yesu ingatwazwa uli ndakai?

Pa mulandu wakuti sweswe yayembu, tukacita ivintu ivingi ivikasosya Yeova. Nomba ndi cakuti twalapila nu kulenga Yeova ukupitila muli Yesu Klistu ukuti atwelele nupya tukwezya na maka ukukanaswilizyapo vino twacisile, tungaya na ucuza usuma na Leza. (1 Yoani 2:1) Baibo ikalanda ukuti: “Klistu wafwile umuku onga sile pa mulandu wa membu, umulungami wafwilile antu ataali alungami, pakuti amutungulule kuli Leza.”—1 Petulo 3:18.

2. Uzye imfwa yakwe Yesu ilatwazwa uli uku nkoleelo?

Yeova watumile Yesu ukwizapeela umi wakwe umalilike “pakuti wensi uwataila muli [Yesu] atakononwe lelo akaye nu umi wa pe.” (Yoani 3:16) Pa mulandu na vino Yesu wacisile, Yeova wasya afumyepo iviipe vyonsi ivikacitika pa mulandu na vino Adamu wacisile. Cii cikupiliula ukuti nga twataila umwi lambo lyakwe Yesu, tulakwata isyuko lya kuipakizya umi wa manda pe umu Paladaise pano nsi.—Ezaya 65:21-23.

LONDELEZYINI NA VYUZE

Sambililini na vyuze pa mulandu uno Yesu wapeelile umi wakwe na vino mukaipakizya pa mulandu na vino wacisile.

3. Imfwa yakwe Yesu yatukulula uku luyembu ni mfwa

Tambini VIDYO, alino mulanzyanye iuzyo ilyatililondelelapo.

VIDYO: U Mulandu ci Uno Yesu Wafwilile?—Ciputulwa 1 (2:01)

I syuko ci lino Adamu wapanyizye lino wafizilwe ukuvwila Leza?

Belengini Loma 5:12, alino mulanzyanye iuzyo lii:

I vyani vyamicitikila pa mulandu wakuti Adamu wayembwike?

Belengini Yoani 3:16, alino mulanzyanye iuzyo lii:

U mulandu ci uno Yeova watuumile Umwanakwe pano nsi?

Adamu wali u muntu umumalilike aatuvwilile Leza na cii calenga antu yayembuka nu kufwa
Yesu wali u muntu umumalilike uuvwilile Leza na cii calenga ukuti antu yakaye amalilike nu kwikala umi wa manda pe

4. Imfwa yakwe Yesu ingazwa antu yonsi

Tambini VIDYO, alino mulanzyanye iuzyo ilyatililondelelapo.

VIDYO: U Mulandu ci Uno Yesu Wafwilile?—Ciputulwa 2 (2:00)

Uzye imfwa ya muntu wenga ingavwa uli antu yonsi?

Belengini 1 Timoti 2:5, 6, alino mulanzyanye iuzyo lii:

Adamu wali u muntu umumalilike, nomba pa mulandu wakuti wayembwike antu yonsi yakayembuka nu kufwa. Yesu wali u mumalilike wakwe vino Adamu wali. Uzye lyene i vyani vino Yesu wali nu kucita?

5. Ilambo u wila uno Yeova wamipeela

Ya cuza yakwe Yeova yakalola ilambo ukuti u wila uno Yeova wayapeela. Belengini Galatiya 2:20, alino mulanzyanye iuzyo lii:

Uzye umutumwa Paulo walangilile uli ukuti walolanga ilambo ukuti u wila uno Leza wamupeezile?

Lino Adamu wayembwike, wene na ana yano wali nu kukwata yali nu kulafwa. Nomba Yeova watumile Umwanakwe ukwizamufwila pakuti mukikale umi wa manda pe.

Lino mukubelenga ivikomo ivyalondelelapo, mwelenganye vino Yeova afwile wayuvwanga lino Umwanakwe waculanga. Belengini Yoani 19:1-7, 16-18, alino mulanzyanye iuzyo lii: