Pa cisila ica kusoolola atumwa 12, Yesu watentemwike umwamba nu kuya ukwali antu aingi. Antu yaa, yafumile uku Galili, uku Yudeya, uku Tuli, uku Sidoni, uku Silya alino nu kumbalama iya luzi lwa Yodani. Yaalesile antu alwile na yamwi acuziwanga ni viwa. Nupya Yesu wayapozizye yonsi. Lyene wikazile ukumbali ya mwamba nu kutandika ukulanda. Walondolwile vino tungacita pakuti tuye ya cuza yakwe Leza. Tulinzile ukumanya Yeova alino nu kumutemwa. Nomba tutangatutemwe Leza ndi cakuti tutatemwa antu. Fwandi tulinzile ukuya ni cikuuku nu mulinganya uku yantu yonsi, kumwi sile nu ku yalwani itu.

Yesu watiile: ‘Tutalinzile ukutemwa sile ya cuza. Lelo tulinzile nu kutemwa na alwani itu nu kwelela antu ni myenzo itu yonsi. Ndi cakuti mwasosyanya na umwi, mulinzile ukuya kuli aliwe nu kulenga uweleelo. Nupya mwacitila yauze vino mungatemwa ukuti yamucitile.’

 Nupya Yesu waneenyile antu ukupanda mano ukusuma pa vikwatwa. Watiile: ‘Cacindama sana ukukwata ucuza usuma na Yeova ukucila ukukwata ivyuma ivingi. Umupuupu angiya ivyuma vinu, lelo kusi nanti aumwi angiya ucuza uno mwakwata na Yeova. Mutasakamala pali vino mumalya, vino mumamwa nanti vino mumazwala. Lolini ivyunyi. Lyonsi Leza akavipeela ivyakulya. Ukusakamala kutanga kulundeko nanti uwanda onga uku umi winu. Mwaiusya ukuti Yeova wamanya vino mukalonda.’

Antu yatatazile yuvwe umwi akulanda wakwe vino Yesu walanzile. Intunguluzi zyao izya mapepo zitayasambilizyepo ivintu vii. U mulandu ci uno Yesu wayelile kasambilizya mukalamba? Pano vyonsi vino wasambilizyanga vyafumile kuli Yeova.