Yeosafati umwene uwa Yayuda, ononyile maulambo yakwe Baali ni vilubi umu mpanga yonsi. Walondanga ukuti antu yamanye masunde yakwe Yeova. Fwandi watumile inkombe na Ina Levi umu Yuda monsi ukuti yakasambilizye antu masunde yakwe Yeova.

Inko izyayazingulwike zyatiinanga ukuzanza Ayuda pano zyamanyile ukuti Yeova wali nayo. Antu aa mu nko zii yaletanga na mawila uku Mwene Yeosafati. Lelo Aina Moabu, Aina Amoni, na ali mu citungu ica Seili, yene yaile umu kulwisya Ayuda. Yeosafati wamanyile ukuti walondekwanga ukwazwiwa na Yeova. Wakolonganike aonsi yonsi, anaci, na ana umu Yelusalemu. Wapefile ala yonsi yakuvwako, ati: ‘Yeova, ukwaula wewe tutanga tucimvye. Twapaapata tuneene ivyakucita.’

Yeova waswike ipepo lino watiile: ‘Mutuvwa intete, ndamwazwa. Mwemo mukimilile sile, nu kulola vino ndamupususya.’ Uzye Yeova wayapuswisye uli?

Uwanda uwalondelilepo katondo, Yeosafati wasoolwile ya kiimba nupya wayaneenyile ukuti yaye pa nkoleelo iya asilika. Yaapisile ukufuma uku Yelusalemu ukuyafika uku ncende ya kulwilapo iyayelile uku ncende ino yamanga ukuti Tekoa.

Lino ya kiimba yalumbanyanga Yeova ni nsansa umwi zwi ilyuvwike, ali lino Yeova walwilileko antu yakwe. Wavulunginye Aina Amoni na Ina Moabu icakuti yatandike ukukomana nupya pataali nanti aumwi uwapuswike. Lelo Yeova wacingilile antu aa mu Yuda, asilika, na ya simapepo. Antu yonsi ali umu mpanga izyali umupiipi yuvwile vino Yeova wacisile, nupya yamanyile ukuti Yeova acili akacingilila antu yakwe. Uzye Yeova akacingilila uli antu yakwe? Akacita vivyo umu nzila izingi. Nupya asilondekwa uwazwilizyo ukufuma uku yantu pakuti acite vivyo.