Umu musumba uwa Ninive umwikalanga Aina Asilya, mwali sana antu aacitanga iviipe. Yeova waneenyile Yona kasesema wakwe, ukuya uku musumba uwa Ninive uku kucelula antu aakuuku kuti yasenule imiyele yao iipe. Nomba Yona wene utukiile kuze. Wakwezile uwato uwayanga uku Tasyisyi.

Lino uwato wali pali yemba, kwakatwike icimuza icipisye nupya yaakafiya ya wato yuvwile sana intete. Yapefile kuli ya leza yao nu kuzya iyati: ‘U mulandu ci uno ivintu vii vikucitikila?’ Nu mukusyalikizya, Yona wayaneenyile ati: ‘Aneene nati ndenga. Iinkaana ukucita vino Yeova waneenyile. Acino nsumbilini muli yemba nupya icimuza cimaata.’ Ya kafiya ya wato yatalondanga ukusumbila Yona muli yemba, nomba watwalilile ukuyaneena ukuti yamusumbile. Lino yamusuumbile, icimuza casizile.

Yona welenginye ukuti amaafwa. Lino wayanga akutuwila muli yemba, wapefile kuli Yeova. Lyene Yeova watumile iciswi icikulu. Camizile Yona, nomba ataafwile. Lino Yona wali umu ciswi, wapefile ati: ‘Nkulaya ukuti ndaakuvwila lyonsi.’ Yeova wacingilile Yona amanda yonsi yatatu yano wali umu ciswi, nupya walenzile ukuti ciswi cii cimuswile uku mulundu.

Uzye vino Yeova wapuswisye Yona, cikupiliula ukuti ataali nu kuya uku Ninive pa cisila cakwe vii? Awe foo. Nupya kwene Yeova  waneenyile Yona ukuya uku Ninive. Umuku uu wene, Yona ataakanyile. Waile kuuku nupya waneenyile antu yaya aipe ati: ‘Mu manda sile 40, Ninive alononwa.’ Lyene kwacitike cimwi icaula ukwenekela, Aina Ninive yuvwile nu kusenula imiyele yao. Umwene uwa ku Ninive waneenyile antu ati: ‘Pepini kuli Leza nupya mulapile. Limwi amatuvwila uluse.’ Lino Yeova waweni ukuti antu yalapila, atoononyile umusumba uwa Ninive.

Yona wasosile pali vino umusumba utoononyilwe. Tale elenganya: Yeova wateekelile Yona nupya wamuvwiilile uluse, nomba Yona wene aatuvwiliile antu aa mu Ninive uluse. Lelo, waile ukunzi ya musumba aya aikala umucisaao ica cimelwa ala watasoka. Lyene icimelwa cumile, na cii calenzile Yona asoke sana. Yeova waneenyile Yona ati: ‘Wemo wasakamala pa cimelwa cii ukucila ukusakamala pa Ina Ninive. Injuvwila uluse napya iyapusuka.’ I cisinka ci icilipo paa? Antu aa mu Ninive yaali acindame ukucila icimelwa icili consi.