1-2. U mulandu ci uno Aina Klistu yonsi yalinzile ukusambilila pa kutuutulukila ukwi yulu?

ANTU aingi aakaombela Yeova ndakai yakwata upaalilo wa kwizaikala amanda pe pano nsi. Nomba Aina Klistu anono apakwe, yakwata upaalilo wa kutuutulukila ukwi yulu. Apakwe yaa yakalondesya ukumanya vino umi wao ulaya lino yalaya ukwi yulu. Nomba u mulandu ci uno yayo aakwata upaalilo wa kwikala pano nsi nayo yalinzile ukusambilila pali vii? Wakwe vino tumalola, ukutuutulukila ukwi yulu kulaleta amapaalo na kuli yayo aakwata upaalilo wa kwikala amanda pe pano nsi. Fwandi asi mulandu twakwata upaalilo wa kwikala ukwi yulu nanti pano nsi, swensi kwene tulinzile ukusambilila pa kutuutulukila ukwi yulu.

² Leza watungulwile asambi yakwe Yesu yamwi ukulemba pa kutuutulukila ukwi yulu. Mutumwa Yoane walondolwile ukuti: “Ndakai sweswe ana yakwe Leza. Citamanyike vino tulaya. Lelo twamanya ukuti lino Klistu alaloleka, swemo tulakolana nawe.” (1 Yoa. 3:2) Fwandi Aina Klistu apakwe yatamanya vino yalaya nga yatuutulukila ukwi yulu umu miili ya mupasi. Lelo, tungalanda ukuti yalalola Yeova lino yalapokelela icilambu cao. Baibo italanda vyonsi pa kutuutulukila ukwi yulu, lelo umutumwa Paulo walanzileko vimwi. Apakwe yalaya pamwi na Klistu lino alacimvya “mawene yonsi, mauteko yonsi na maka yonsi.” Pa vintu vino alacimvya palaya nu ‘mwanisi uwa kusyalikizya, imfwa.’ Lyene  Yesu pamwi na ya kateeka yauze yalaswilizya uwene kuli kateeka wakwe vyonsi, Yeova. (1 Kol. 15:24-28) Ala insita iyo ilazipa sana! *

3. Wakwe vino ilembelo lyakwe 1 Kolinto 15:30-32 likalangilila, uzye vino Paulo wataile umu kutuutuluka vyamwavwile ukucita cani?

³ Vino Paulo wataile umu kutuutuluka camwavwile ukuzizimizya intazi izingi. (Belengini 1 Kolinto 15:30-32.) Wanenyile Aina Kolinto ukuti: “Cila wanda nemo nkalolenkana ni mfwa.” Paulo walanzile nu kuti: ‘Nkalwisyanya ni vilyanyi muno mu Efeso.’ Afwile walozyanga kuli vino antu yalwanga ni nyama mu cikuulwa ca kutambilamo ivyangalo umu Efeso. (2 Kol. 1:8; 4:10; 11:23) Nanti limwi walandanga pali ya kakanya Ayuda na yauze ali wa “vilyanyi.” (Mili. 19:26-34; 1 Kol. 16:9) Asi mulandu ni ntazi zino Paulo wakwatanga, lelo watwalilile ukutaila ukuti ivintu vilaya ningo uku nkoleelo.—2 Kol. 4:16-18.

4. Uzye upaalilo wa kutuutuluka ukakomya uli Aina Klistu ndakai? (Lolini icikope icili pa nkupo)

⁴ Tukwikala mu manda atale. Aina yamwi yakayacuzya. Yamwi nayo yakaikala ku ncende ukukacitika sana inkondo nupya yasiyuvwa acingililwe. Yauze nayo yakaika umi wao umu uzanzo pakuti sile yaombe umulimo wakwe Yeova mu ncende zino yalesya umulimo wa kusimikila. Nanti ciye vivyo, aina na ya nkazi yaa yakatwalilila ukupepa Yeova, fwandi tungayakolanya. Yasitina, pano yamanya ukuti nanti yafwa, Yeova walaya ukuyapeela ivintu ivisuma uku nkoleelo.

5. I myelenganyizizye ci ingalenga tutandike ukwelenganya ukuti kutalaya ukutuutuluka?

⁵ Paulo wacelwile aina yakwe ukutaluka uku myelenganyizizye ino yamwi yakweti iyakuti: “Ndi afwe yatalatuutuluka, ‘lekini twamwa nu kulya, pano mutondo tulafwa.’” Vii avino antu yamwi yelenganyanga umu manda yaya na lino Paulo ataatala wayako. Afwile waomvizye amazwi aaya pali Ezaya 22:13 aalandanga pa miyele ino Aina Izlaeli yakweti. Cakuti yaika mano kuli ucuza wao na Leza, yene isile amano ku kuipakizya umi. Imiyele ino Aina Izlaeli yakweti yali iyakuti yaipakizye umi uwanda uwo pano uwanda uli onsi yangafwa, yaseeka sana na ndakai kwene. Lelo Baibo ikalanda pa viipe ivyacitikiile Aina Izlaeli pa mulandu na melenganyo ya musango uwo.—2 Mila. 36:15-20.

6. Uzye ukupaalila ukuti kulaya kutuutuluka kungatwazwa uli ukusoolola angaya ya cuza itu?

⁶ Vino twamanya ukuti Yeova alatuutulula afwe, tulinzile ukucenjela lino tukusoolola ivyuza. Aina mu Kolinto yalinzile ukutaluka uku kupanga ivyuza na antu aakananga ukuti kutalaya kutuutuluka. Kuli vino tungasambililaka ndakai: Ndi cakuti tukusumba insita ikulu na ya cuza asiika mano pali vino vilacitika uku nkoleelo nupya yakaika sile mano ku vyakuizanzya, yangalenga tuye ni miyele iipe. Ndi cakuti umwina Klistu akuzanwa na antu ya musango uu angatandika ukuya ni myelenganyizizye iipe. Nupya angatandika ukucita ivintu vino Leza wapata. Acino Paulo waneniile Aina Kolinti ukuti: “Zinzimukini mu mano nupya tini kwifya.”—1 Kol. 15:33, 34.

7. I uzyo ci lino umwi afwile uzizye pa kutuutuluka wakwe vino 1 Kolinto 15:35-38 ikalanda?

⁷ Belengini 1 Kolinto 15:35-38. Umuntu umwi uwalondanga auze yatandike  ukutwisika ukuti kutalaya ukutuutuluka afwile uzizye ati: “Uzye Afwe Yalatuutululwa Uli?” Cingazipa ukwelenganya pali vino Paulo waswike pa mulandu wakuti antu ndakai yakwata vino yazumilamo pali vino cikaya antu nga yafwa. Nomba uzye Baibo yene ikasambilizya uli?

8. I cilangililo ci icingatwazwa ukumanya vino ukutuutulukila ukwi yulu kwaya?

⁸ Lino umuntu wafwa, umwili ukaola. Lelo uwaumvile ivintu vyonsi wakwata amaka ya kutuutulula umuntu nu kumupeela umwili uno akulondekwa. (Utan. 1:1; 2:7) Paulo waomvizye icilangililo uku kulangilila ukuti Leza atalatuutulula umuntu nu mwili uno wali nao. Elenganyini pa “lumbezu.” Nga yalukomela lukatandika ukumela mu musili mpaka ilukula. Cilimwa nga cakula, cikaiza icipusana nu lumbezu luno yakomiile. Paulo waomvizye icilangililo cii uku kulangilila vino Kaumba angalenga umwili wa muntu ukuya vino umwineco akulonda.

9. I vyani vino ilembelo lyakwe 1 Kolinto 15:39-41 likalanda pa kupusana kwa miili?

⁹ Belengini 1 Kolinto 15:39-41. Paulo walanzile ukuti Leza ataaumvile umwili mu nzila ili imwi. Wakwe, umwili wa ng’ombe, ivyunyi ni inswi vyapusana. Walanzile ukuti nga twalolekesya umwi yulu tukalola ukuti ilanzi nu mwezi vyapusana. Nupya walanzile ukuti ulutanda lwapusana “ucindami” nu luze. Tutanga tulole upusano uu na manso itu, Ya Sayansi yalanda ukuti kwaya intanda izikulu, zinono, ziyenzu, zitiswe ni ziswepulukile wa kasanya. Paulo walanzile nu kuti ‘Kwaya viumbwa vya mwiyulu nga ni viumbwa vya pano pansi.’ Uzye walozizye mwi? Pano nsi paya iviumbwa ivyakwata imiili ya munyefu, lelo ukwi yulu kwaya iviumbwa ivyakwata imiili ya mupasi, wakwe vino angeli yaya.

10. U mwili wa musango ci uno aalatuutulwilwa ukwi yulu yalakwata?

¹⁰ Lolini na vyuze vino Paulo walanzile,  Watiile: “Vii, avino cilaya lino afwe yalazyukuka. Mwili ukazikwa mu musili wa lumbezu lwakomelwa, ukaola, lelo ulazyukuka mu cisiola.” Twamanya ukuti umuntu nga wafwa, umwili wakwe ukaola aswilila nu ku lukungu. (Utan. 3:19) Uzye lyene umwili ungatuutululwa mu cintu icisiola? Paulo ataalandanga pa antu aatuutulwilwe pano nsi wakwe yaya yano Eliya, Elisya na Yesu yatuutulwileko. Walandanga pa muntu uwatuutululwa nu mwili wa kwi yulu, kuli kuti umwili wa “u mupasi.”—1 Kol. 15:42-44.

11-12. I vyani ivyasenwike kuli Yesu lino watuutulwilwe, nupya vyakolana uli ni vikacitikila Aina Klistu apakwe?

¹¹ Lino Yesu wali pano nsi, wali nu mwili wa untunze. Lelo lino watuutulwilwe, wizile aya ‘umupasi uno ukapeela umi’ nu kuswilila ukwi yulu. Na Ina Klistu apakwe kwene, yakatuutululwa nu mwili wa kwi yulu. Paulo walondolwile ukuti: “Wakwe vino twakolana na Adamu, wino uwaumvilwe kufuma kwi vu, vivyo kwene tulakolana na Klistu, wino uwafumile kwiyulu.”—1 Kol. 15:45-49.

¹² I cicindama ukwiusya ukuti Yesu ataatuutulwilwe nu mwili wa untunze. Lino Paulo wali umupipi nu kumalila ukulanzyanya kuu, walondolwile umulandu uno walandiile ukuti: “Miili itu iya minyefu nu wazi ilaola yene itangakumako ku Wene wakwe Leza” ukwi yulu. (1 Kol. 15:50) Mutumwa Paulo na apakwe yauze yataali nu kutuutulukila ukwi yulu ni miili ya munyefu nu wazi. A lilaci lino yaali nu kutuutululwa? Paulo walanzile ukuti yali nu kutuutululwa uku nkoleelo asi lilyo kwene lino yafwa. Lino Paulo walembanga ibuku lyakwe 1 Kolinto, ale asambi yamwi ali wa mutumwa Yakobo ala “yafwa.” (Mili. 12:1, 2) Atumwa na apakwe yauze nayo kwene yali nu “kufwa.”—1 Kol. 15:6.

13. I vyani ivilacitika umu nsita ya kuyapo kwakwe Yesu?

¹³ Yesu na Paulo yasoowile pa cintu cimwi  icali nu kucitika uku nkoleelo, kuli kuti ukuyapo kwakwe Klistu. Mu nsita ya kuyapo kwakwe Klistu, kwali nu kuya inkondo, vilundumusi, malwala alino ni vintu ivingi viipe umu nsi. Twalola kuno usesemo uu ukufikiliziwa kufuma umu 1914. Kwali na cuze icicindame icali nu kucitika. Yesu wasoowile ukuti ilandwe lisuma ilya Wene wakwe Leza uwatandika ukuteeka “lilakosolwa mu nsi yonsi kuya umboni ku antu amu nko zyonsi, alino mpelelekezyo iliiza.” (Mate. 24:3, 7-14) Paulo walanzile ukuti mu nsita ya kuyapo kwa Mwene, amuno Aina Klistu apakwe yano yafwa yalatuutululwa.—1 Tesa. 4:14-16; 1 Kol. 15:23.

14. I vyani vikacitikila Aina Klistu apakwe aakafwa umu nsita ya kuyapo kwakwe Klistu?

¹⁴ Aina Klistu apakwe aakafwa ndakai, yakatuutulukila ukwi yulu lilyo kwene sile. Tukasininkizya vii uku mazwi yano Paulo walanzile aaya pali 1 Kolinto 15:51, 52 aakuti: “Asi swensi swe muno tulafwa. Lelo lino ntandala yakusyalikizya ilalila, swemo tulasenulwa. Cii cilacitika zuwazuwa wa kukapaya kwi linso.” Amazwi yaa yano Paulo walanzile yakufikiliziwa ndakai! Lino yalatuutululwa, aina yaa yakwe Klistu yalaya sana nu luzango ukuya “pamwi nu Mwene lyonsi pe.”—1 Tesa. 4:17.

15. U mulimo ci uno yayo aalasenulwa wa “kukapaya kwi linso” yakaenekela ukwizaomba?

¹⁵ Baibo ikatunena umulimo uno yayo aalasenulwa wa “kukapaya kwi linso” yalaomba ukwi yulu. Yesu wayanenyile ukuti: “Yao alacimvya, nu kutwalilila kucita vino nkalonda kufika nu ku mpelelekezyo, ndayapeela utesi pa nko zyonsi uno Tata wampela. Yalateeka inko ni nsonzo ya cela, nu kuzivungola  wa ntendo ku maka ali yonga na yano nemo napokelile kufuma kuli Tata.”(Umbw. 2:26, 27) Yalalondela Yesu nu kutungulula inko ni nsonzo ya cela.—Umbw. 19:11-15.

16. Uzye antu aingi yalacimvya uli imfwa?

¹⁶ Ukwaula nu kutwisika, apakwe yacimvya imfwa. (1 Kol. 15:54-57) Ukutuutululwa kwao kulalenga yaombeko umulimo wa kusisya iviipe vyonsi ivyaya pano nsi lino kulaya inkondo ya Alamagedoni. Aina Klistu aingi aonsi na anaci yalapusuka umu ucuzi ukalamba nu kwingila umu nsi ipya. Yayo aalapusuka pano nsi yalalolako kuno imfwa ilacimviwa lino antu aingi sana aafwile mpiti yalatuutululwa. Elenganyini insansa zino tulakwata lino ivintu vii vilacitika! Nupya yayo yonsi aya ni cisinka kuli Yeova yalacimvya imfwa ino twapyana kuli Adamu. Yalikala amanda pe.

17. I vyani vino ilembelo lyakwe 1 Kolinto 15:58 likatukomelezya ukulacita ndakai?

¹⁷ Umwina Klistu wensi alinzile ukulataizya pa mazwi ya kukomelezya akalanda pa kutuutuluka yano Paulo walembiile Aina Kolinto. Twakwata ivingi ivingalenga ukuti tuvwiile ukupanda mano kwakwe Paulo lino ‘tukutumikila Mwene.’ (Belengini 1 Kolinto 15:58.) Ndi cakuti tukuombesya umu mulimo uu, cingalenga tukaipakizye umi usuma uku nkoleelo. Insita iyo ilazipa sana ukucila ivili vyonsi vino tungelenganya ndakai. Cilalangilila ukuti ukuombesya kwitu mu mulimo wa Mwene kutaali ukwasilesile.