Uzye mwabelenga ningo ya magazini afumile uno mwaka aa Lupungu Lwa Mulinzi? Lolini vino mungasuka amauzyo aali apisika:

Uzye tulinzile kulalola uli apakwe?

Tukataizya pa utailo wao, lelo tusilonda ukulayacindikisya sana. Tusilonda ukulakumbwa vino yaya. (Yuda 16) Tutalinzile ukulayuzya amauzyo pa upaalilo uno yakwata.—w20.01, ifwa 29.

I vyani vingalenga musininkizye ukuti Yeova akamusakamala?

Baibo ikalangilila ukuti wamuweni na lino mutali muvyalwe. Nupya akauvwa mapepo inu. Wamanya vino mukaelenganya ni vyaya umu myenzo inu, nupya vino mukacita vikamuzanzya nanti ukumusosya. (1 Mila. 28:9; Mapi. 27:11) Wamupalamika kuli aliwe.—w20.02, ifwa 12.

A lilaci lino tulinzile ukuvwanga na lino tutalinzile ukuvwanga?

Tukauvwa ningo nga tukulanda pali Yeova. Tukavwanga ndi cakuti twalola umwi akucita vimwi ivingalenga aluvyanye. Ya eluda yakavwanga lino yakusunda umwi aakulondekwa ukusundwa. Tusivwanga ndi cakuti yamwi ya kulonda ukumanya vino mulimo witu uwa kusimikila ukaombwa umu mpanga muno yainda umulimo witu. Tusisokolola ivintu vya nkama.—w20.03, mafwa 20-21.

Uupusano ci uwaya pali makanta uwalumbulwa pali Yoweli cipande 2 nu waya pali Umbwilo cipande 9?

Pali Yoweli 2:20-29 pakalanda ukuti Leza alafumyapo makanta wensi nupya walaya ukuwezya vyonsi vino makanta onona. Lyene pa cisila, Leza alapongolola umupasi wakwe uwa muzilo. Ivintu vii vyafikiliziwe lino Aina Babiloni yazanzile Aina Izlaeli alino nu ku nkoleelo. Makanta uwaya pali Umbwilo 9:1-11 akaimililako apakwe, aakasimikila ilandwe lya upinguzi umu nsi ii iipe, nupya cico cikalenga yonsi aakatungilila insi ii ukuvwa uyi.—w20.04, mafwa 3-6.

Uzye ndakai umwene wa ku katutu a weni?

Uuteeko wa Russia na akautungilila. Yazanzile antu yakwe Leza lino yalesizye umulimo wa kusimikila nu kulangizya ukuti yapata sana ya Nte. Umwene wa ku katutu watwalilila ukulwisyanya nu mwene wa ku kaeya.—w20.05, ifwa 13.

Uzye imiyele iyaya api lembelo lyakwe Galatiya 5:22, 23 [NWT] ali miyele sile ino umupasi wa muzilo ukatulenga ukukwata?

Awe foo. Umupasi wa muzilo ukatwazwa ukuya ni miyele na yuze isuma wakwe, uwololoke. (Efes. 5:8, 9)—w20.06, ifwa 17.

Uuzanzo ci onga uwaya umukwika ivikope vinu pa intaneti?

Vino mukaika apa intaneti vingalangilila ukuti mukaituumika nanti mutaicefya.—w20.07, mafwa 6-7.

I vyani vino kasimikila Umwina Klistu angasambilila kuli ya kavwuwa ya nswi amanyikisya umulimo?

Yakaomba pa nsita ino yangazana inswi na kuno yangazizana. Yakasambilila ivya kuomvya iviombelo. Yakatwalilila ukuya asipe nanti icakuti ivintu vyasenuka. Vikwene avino tungacita lino tuli umu mulimo wa kusimikila.—w20.09, ifwa 5.

Umu nzila ci muno tungazwila asambi ukulatemelwako Yeova?

Tungayakomelezya ukulabelenga Baibo cila wanda nu kulaelenganya pali vino yakubelenga. Nupya tungayasambilizya ivya kupepa.—w20.11, ifwa 4.

Uzye amazwi yakuti: “Klistu nawe waleta umi kunotuli,” yakalozya na kuli ya weni?—1 Kol. 15:22.

Mutumwa Paulo atalandanga ukuti antu yonsi yalatuutululwa. Walandanga pa Aina Klistu apakwe, yayo aamwa “kuti yaye antu yakwe Leza amuzilo.” (1 Kol. 1:2; 15:18)—w20.12, mafwa 5-6.

I vyani vino apakwe yalacita pa cisila ca kusenulwa “wa kukapaya kwi linso, lino ntandala yakusyalikizya ilalila”?—1 Kol. 15:51-53.

Yalalondela Klistu nu kutungulula inko ni nsonzo ya cela. (Umbw. 2:26, 27)—w20.12, mafwa 12-13.