Izwi lya Ciyebulai likaomviwa umu milembele yonsi yoili. Amazwi apya yaisilemo pa mulandu nu ulondolozi uu:

1. Imilembele ya mazwi ikauvwana na mazwi ya mu lulimi luno Baibo yalembilwemo. Ukulemana ukwaya pali Masamu 144:12-15 ni vikomo vyuze ivya kucisila, vikatungililwa nu upiliulo wi zwi lya kutandikilako umu cikomo 12, kuli kuti izwi lya Ciyebulai ilyakuti asher. Izwi lii lingaomviwa umu nzila izipusane pusane. Lingaomviwa wi zwi ilikalondolola vimwi pa muntu wakwe ilyakuti “wino.” Izwi lyakuti “wino” ali upiliulo uwali umu kusenula kwa nkoleelo. Na cii calenzile ukuti ivintu ivisuma ivya lumbulwa pa vikomo 12 kufika uku 14 vyalozya uku yantu aipe alumbwilwe umu vikomo vya ku cisila. Nomba, izwi lyakuti asher lingalozya nu ku vintu ivyafumilemo lino vimwi vyacitiike nupya lingasenulwa nu mu mazwi yakuti “ukuti,” “pakuti,” nanti “lyene.” Izwi lyakuti “lyene” i lyaomviwa muli Baibo mupitulukwemo uwa mu 2013 alino nu mu Mabaibo yauze aasenulwa.

2. Amazwi apitulukwemo yakauvwana sana na mazwi yonsi aya umu masamu. Imiomvezye yi zwi lyakuti “lyene” umu cikomo 12 ikalanga ukuti ukupolelelwa ukwalandwa umu vikomo 12 ukufika uku 14 kukalozya uku yantu aololoke, yaayo aakapepa ukuti ‘yapususiwe nanti ukutuulwa’ uku yantu aipe (icikomo 11). Imisenwile kwene ii ipya yaya nu mu cikomo 15, muno izwi lyakuti “ansansa” lyaomviwa imiku iili umu nzila isuma. Nupya ponsi poili, insansa zizyo zikalozya uku yantu aliyamwi kwene, kuli kuti “yano Leza wao a Yeova!” Nupya mwiusye ukuti amazwi ya Ciyebulai ukwafumile imisenwile ii mutaali utumanyililo twa kuomvya pa kuwelenga wakwe tuutu tuno yakaomvya pa kuyalila mazwi (“ ”). Fwandi ya kasenula yalinzile ukuipingwila aeneco upiliulo wa mpomvu, kulikuti ukwelenganya pa milembele ya mazwi ya Ciyebulai, ukumanya ivikulandwapo, alino nu kulola pa vyeo vyuze ivikolaneko ivyaya muli Baibo.

3. Amazwi apitulukwamo yakauvwana na malyasi yauze amuli Baibo aakalanda pa malayo yano Leza walaya antu yakwe acumi. Pa mulandu wa kuomvya izwi lyuze api zwi lyakuti asher, lyene masamu yano Davidi walemvile yakalanga upaalilo wakuti pacisila cakuti Leza wakulula uluko lwa ina Izlaeli uku yalwani yao, wali nu kuyapaala pakuti yaye sana ni nsansa alino nu kuilyokezya ivintu ivisuma cuze. (Levi 26:9, 10; Malan. 7:13; Masa. 128:1-6) Vikwene avino na mazwi aaya pali Malango 28:4 yakalanda ukuti: ‘Yeova alamupolelela nu kumupeela ana avule, ni vyakulya vivule cuze, nga ni ng’ombe ni mbuzi zivule.’ I cumicumi apa nsita ino Solomoni mwana Davidi watekaanga, uluko lwali pa mutende nu kuipakizya ivintu ivisuma cuze. Nupya, ivyacitikanga umu uteeko wakwe Solomoni vikalozya nu ku miteekele yakwe Mesiya.—1 Yamw. 4:20, 21; Masa. 72:1-20.

Fwandi tungasondwelela ukuti, ukwika mazwi yauze muli Masamu 144 kusisenula ukuti vimwi vyativisenuka pa myuvwile itu iya visambilizyo vya muli Baibo. Lelo, vyonsi ivyaya umu masamu lyene vikauvwika ningo ku yaomvi yakwe Yeova pa mulandu nu upaalilo uno yakwata uwakuti lino aipe yalononwa, aololeke yalaikala umutende amanda pe nu kuipakizya ivintu ivisuma cuze.—Masa. 37:10, 11.